‘தி மாடர்ன் ரேசனலிஸ்ட்’ 50 ஆம் ஆண்டு மற்றும் தமிழர் தலைவர் ஆசிரியரின் 90 ஆம் ஆண்டு பிறந்த நாள் மலர் வெளியீட்டு விழா

  December 31, 2022 • Viduthalai

நேற்று (30.12.2022) சென்னை பெரியார் திடலில் உள்ள நடிகவேள் எம்.ஆர்.இராதா மன்றத்தில் ‘தி மாடர்ன் ரேசனலிஸ்ட்’ 50 ஆம் ஆண்டு மலர், ஆசிரியரின் 90 ஆம் ஆண்டு  பிறந்த நாள் மலரினை சென்னை ரஷ்ய தூதரகத்தின் துணைத் தூதர் செர்ஷி அஸராவ் அவர்கள் வெளியிட, வி.அய்.டி. வேந்தர் முனைவர் ஜி.விசுவநாதன் அவர்கள் பெற்றுக்கொண்டார். (செய்தி 8 ஆம் பக்கம் காண்க).

தந்தை பெரியார் நிறுவிய 'தி மாடர்ன் ரேசனலிஸ்ட்' ஆங்கில மாத இதழின் ஆண்டு மலர் (2022), ஆசிரியர் கி.வீரமணி அவர்களின் 90ஆம் ஆண்டு பிறந்த நாள் சிறப்பு மலராக வெளியிடப்பட்டது

December 31, 2022 • Viduthalai

1971ஆம் ஆண்டு தந்தை பெரியார் தொடங்கிய 'தி மாடர்ன் ரேசனலிஸ்ட்' ஆங்கில மாத இதழின் 2022 ஆண்டுக்கான மலர் வெளியீடு சென்னை - பெரியார் திடலில் நேற்று (30.12.2022) மாலை நடைபெற்றது. வெளியிடப்பட்ட ஆண்டு மலர், தமிழர் தலைவர் ஆசிரியர் கி.வீரமணி அவர்களின் 90ஆம் ஆண்டு சிறப்பு மலராக  வெளி வந்துள்ளது.

நடிகவேள் எம்.ஆர். ராதா மன்றத்தில் நடைபெற்ற நிகழ்ச்சிக்கு திராவிடர் கழகத்தின் துணைத் தலைவரும் 'விடுதலை' ஏட்டின் நிர்வாக ஆசிரியருமான கவிஞர் கலி. பூங்குன்றன் தலைமை வகித்தார். ஆண்டு மலரை சென்னையில் உள்ள ரஷ்ய தூதரகத்தின் துணைத் தூதுவர் மாண்பமை செர்ஷி அஸராவ் வெளியிட முதல் சிறப்பு மலரினை தமிழர் தலைவர் ஆசிரியர் முன்னிலையில் வேலூர் தொழில் நுட்ப (VIT) நிகர்நிலைப் பல்கலைக் கழகத்தின் வேந்தர் முனைவர் கோ.விசுவநாதன் பெற்றுக் கொண்டார்.

மூத்த பத்திரிகையாளரும், 'ப்ரண்ட் லைன்' இதழின் மேனாள் ஆசிரியருமான இரா. விஜயசங்கர், கொடைக்கானலில் அமைந்துள்ள அன்னை தெரசா மகளிர் பல்கலைக் கழகத்தின் மேனாள் துணைவேந்தர் து. ஜானகி ஆகியோர் வாழ்த்திப் பேசினர்.

திருநெல்வேலியில் தொடங்கப்பட்ட மனோன்மணியம் சுந்தரனார் பல்கலைக் கழகத்தின் மேனாள் துணைவேந்தர் பேராசிரியர் முனைவர் வேதகிரி சண்முகசுந்தரம் (வயது 97) அவர்கள் சிறப்புச் செய்யப்பட்டார். பேராசிரியரின் உரைக்குப் பின்னர், ரஷ்ய தூதரக துணை தூதர் செர்ஷி அஸராவ் , வி.அய்.டி. பல்கலை வேந்தர் கோ. விசுவநாதன் வாழ்த்துரை வழங்கிய பின்னர் தமிழர் தலைவர் ஆசிரியர் நிறைவுரையினை வழங்கினார்.

நிகழ்ச்சியின் தொடக்கத்தில் அனைவரையும் வரவேற்று திராவிடர் கழகப் பொருளாளரும், 'தி மாடர்ன் ரேசனலிஸ்ட்' இதழின் இணை ஆசிரியருமான வீ. குமரேசன் உரையாற்றினார்.

நிகழ்ச்சியினை தொகுத்து வழங்கிய திராவிட மாணவர் கழக மாநில செயலாளர் பிரின்சு என்னாரெசு பெரியார் இறுதியில்  நன்றி கூறினார்.

ரஷ்ய தூதரக துணைத் தூதர்

சென்னையில் உள்ள ரஷ்ய தூதரகத்தின் துணைத் தூதர் செர்ஷி அஸராவ் ஆண்டு மலரினை வெளியிட்டுப் பேசியதாவது:

பெரியார் 1930களிலேயே அன்றைய சோவியத் ரஷ்யாவிற்கு பயணம் செய்தார். அய்ரோப்பிய நாட்டுப் பயணத்தில் அதிகமாக 66 நாள்கள் சோவியத் ரஷ்யாவில்தான் தங்கியிருந்தார். அரசு விருந்தினராக மே1இல் மாஸ்கோவில் நடைபெற்ற அணி வகுப்பில் பங்கேற்றார். அதன் தொடர்ச்சியாக பெரியாரால் தொடங்கப்பட்ட திராவிட இயக்கம் பல்வேறு முன்னேற்றங்களை  மக்களுக்கு வழங்கியுள்ளது. இந்தியாவிற்கும் ரஷ்யாவிற்கும் உள்ள தொடர்பு வெறும் அரசு ரீதியான தொடர்பு மட்டுமல்ல; அதற்கும் முன்பே ஏற்பட்ட கொள்கை சார்ந்த, பண்பாடு சார்ந்த, மக்களை உள்ளடக்கிய உறவு சார்ந்தது. ரஷ்ய தூதரகத்தின் சார்பில் ஆசிரியர் கி.வீரமணி அவர்களின் 90ஆம் ஆண்டு பிறந்த நாள் மலர் வெளியீட்டு விழாவில் பங்கேற்றதில் பெரும் மகிழ்ச்சி அடைகிறேன்.

வி.அய்.டி. வேந்தர் கோ. விசுவநாதன்

ஆசிரியரின் 90ஆம் ஆண்டு பிறந்த நாள் மலரினை பெற்றுக் கொண்ட வி.அய்.டி. பல்கலைக் கழக வேந்தர் கோ. விசுவநாதன் தனது வாழ்த்துரையில் குறிப்பிட்டதாவது:

வடமாநிலங்களைவிட தென் மாநிலங்கள் - குறிப்பாக தமிழ்நாடு கல்வியில் - உயர் கல்வியில் பல மடங்கு முன்னேற்றம் பெற்று விளங்குகிறது. தமிழ்நாட்டின் எழுத்தறிவு 1920களில் 7 விழுக்காடாக இருந்த நிலையிலிருந்து 1973இல் 65 விழுக்காடாக உயர்ந்து இப்பொழுது அதைவிட முன்னேற்றம் கண்டுள்ளது. இவை அனைத்துக்கும் அடிப்படைக் காரணம், தளம் அமைத்து சமூகப் பணி ஆற்றியவர் தந்தை பெரியார்தான். இதை வட புலத்தவரே - தங்களுக்கெல்லாம் 'ஒரு பெரியார்' கிடைக்கவில்லையே என ஆதங்கப்படும் நிலை இன்றைக்கும் தொடர்ந்து வருகிறது. பெரியாரைத் தனது கொள்கை ஆசானாகக் கொண்ட அறிஞர் அண்ணா அரசியல் பாதையில் பயணித்து ஆட்சி அதிகாரத்தை மக்களின் ஆதரவோடு பெற்று தனது ஆசானின் கொள்கைகளை படிப்படியாக நடைமுறைக்குக் கொண்டு வந்தார். இன்று இந்தியாவில் - தமிழ்நாடு மட்டும் தனித்தன்மையுடன் 'இரு மொழிக் கொள்கை' என்பதை (தமிழ் - ஆங்கிலம்) அரசு அதிகாரப் பூர்வமாக்கியதற்கு தந்தை பெரியாரின் கொள்கை, அரசுக்கு ஆதரவாக நிலைப்பாடுதான் காரணம். ஆங்கிலம் கற்ற காரணத்தால் இன்று தமிழ்நாட்டு மாணவர்கள் உலகெங்கும் சென்று பலதுறைகளில் பணியாற்றி வருகின்றனர். இத்தகைய நிலைமை மும்மொழிக் கொள்கையினை நடைமுறைப்படுத்தி வரும் மாநிலங்களில் - குறிப்பாக வட மாநிலங்களில் அவ்வளவாகக் காண முடியாது. 

அரசியல் வழியினை தெரிவு செய்து கொண்ட பெரியாரின் சீடர்கள் அறிஞர் அண்ணாவை நினைவு கூர்ந்து - பகுத்தறிவுக் கொள்கையை நினைவு கூர்ந்து பகுத்தறிவுக் கொள்கையில் தங்களின் நிலைப்பாட்டை மாற்றிக் கொள்ளக் கூடாது. பகுத்தறிவு சார்ந்த சிந்தனைகள் பள்ளிப் பாடத்திலிருந்து உயர்கல்வி வரை இடம் பெற வேண்டும். நான் நாடாளுமன்ற உறுப்பினர், தமிழ்நாடு சட்டமன்ற உறுப்பினர், தமிழ்நாடு அமைச்சர் என்ற பல்வேறு பொறுப்பு நிலைகளிலே இருந்து இன்று உயர் கல்வி நிலையத்தை நிறுவி நடத்தி வரும் நிலையில் எப்பொழுதும் பகுத்தறிவாளராகத்தான் இருந்து வருகிறேன்; வாழ்ந்து வருகிறேன்.

தந்தை பெரியாரின் மனிதநேயக் கொள்கை அறிஞர் அண்ணாவின் அரசியல் பாதையில் நன்கு செல்ல வழி நடத்திடும் நிலையில் உள்ளவர் நமது ஆசிரியர் கி.வீரமணி ஆவார். மக்களுக்கு மட்டுமல்ல; அரசியல் கட்சித் தலைமைகளுக்கும் கொள்கைப் பிரச்சாரம் செய்து வழி நடத்திட ஆசிரியரின் சமுதாயப் பணி தொடர்ந்திட வேண்டும் என வாழ்த்துகிறேன்.

இதழாளர் இரா. விஜயசங்கர்

மூத்த பத்திரிகையாளர் இரா. விஜயசங்கர் உரையாற்றுகையில் குறிப்பிட்டதாவது:

50 ஆண்டுகளுக்கு முன்னால் தந்தை பெரியாரால் தொடங்கப்பட்டு தமிழர் தலைவர் கி.வீரமணிஅவர்களைத் தொடக்கம் முதல் ஆசிரியராகக் கொண்டு வெளிவரும் 'தி மாடர்ன் ரேசனலிஸ்ட்' ஆங்கில மாத இதழின் பயணம் மகத்தானது. பெரும் கடினமான பணி. ஆனால் தொடர்ந்து வரும் பணி.

லெனின் கூறுவார், பத்திரிகை என்பது பிரச்சாரத்திற்கு மட்டுமல்ல; மக்களை அமைப்பு ரீதியாக ஒன்று திரட்டப் பயன்படும் கருவி - அத்தகைய கருவியாக பல்லாண்டுகளாக பணி புரியும் 'தி மாடர்ன் ரேசனலிஸ்ட்' மற்றும் அதன் ஆசிரியர் கி.வீரமணி அவர்களுக்கு மனம் சார்ந்த பாராட்டுகள் - பணி தொடர்ந்திட வாழ்த்துகள்.

புரட்சியாளர்களான மாவோ, லெனின் போன்றவர்கள் பணியாற்றாத - அரசியல் துறந்த சமூகப் பணியில் முத்திரை பதித்தவர் ஆசிரியர்.திராவிட இயக்கத்தின் சாதனைப் பயணத்தின் முக்கிய கட்டங்களின் ஓர் அங்கமாகவே வாழ்ந்து வருகிறார் ஆசிரியர் அவர்கள். அவர் பல்லாண்டு வாழ வாழ்த்துகள். திராவிட இயக்கத்தின் நான்குதலைமுறை தலைவர்களுக்கும்  கொள்கைச் சங்கிலியாக ஆசிரியர் வாழ்கிறார்.

பெனிடிக்ட் ஆண்டர்சன் (Benedict Anderson) எனும் மேலை நாட்டு அறிஞர் தனது "கற்பனை சமுதாயம்"  (Imagined Communities) எனும் நூலில் குறிப்பிடுவார்.

ஒரு தலைவர் - சமுதாயத்தை முன்னேற்றும் பணியினை தனதுகடமையாக கொண்டு செயல்படுபவர் - தனது பணி முழுமையடைய அவர் இரு மொழி அறிவார்ந்தவராக (Bilingual Intellectual Person) இருக்க வேண்டும். ஒன்று - தாய்மொழி, மற்றொன்று - உலகை தொடர்பு கொள்ளத் துணை புரியும் மொழி. அப்படிப்பட்ட இரு மொழி அறிவார்ந்தவராக வாழக் கூடிய தலைவர் ஆசிரியர் அவர்கள். அவர் ஆற்றி வரும் பல்வேறு பணிகள் - படைத்து வரும் சாதனைகளுக்கு அவரிடம் உள்ள இந்த இரு மொழி அறிவார்ந்த  நிலை என்பது முக்கிய அடிப்படையாக - அடித்தளமாக அமைந்துள்ளது.

தற்போது நிலவும் சமூகத்தின் முன்னேற்றத்திற்கு அறைகூவல் விடும் - சமூகநீதிக்கு பாதுகாப்பு மொழிக்கான உரிமைகள், மாநில சுயாட்சி, சுயமரியாதை உணர்வு ஊக்கம் சூழலில் தேவைப்படுவது - அரணாக இருப்பது திராவிட இயக்கம்தான். திராவிட இயக்கத்தின் போராட்டம் என்பது  கருத்தியல் போராட்டமும், அரசியல் போராட் டமும் கலந்தது. அத்தகைய கருத்தியல் போராட்டத்தின் தோழ மையாளர் (Friend)  கொள்கையாளர் (Ideologue) வழிகாட்டி (Guide) நமது ஆசிரியர் அவர்கள்தான்.

ஆசிரியர் அவர்களின் பணி நூற்றாண்டையும் தாண்டி சமுதாயத்திற்கு கிடைக்க வேண்டும்; தொடந்திட வேண்டும் என விரும்பி வாழ்த்தி அமர்கிறேன்.

மேனாள் துணைவேந்தர் 

து. ஜானகி

அன்னை தெரசா மகளிர் பல்கலைக் கழகத்தின் மேனாள் துணைவேந்தர் முனைவர் து. ஜானகி தனது வாழ்த்துரையில் குறிப்பிட்டதாவது:

தந்தை பெரியாருக்குப் பின், அன்னை மணியம்மையாருக்கு பின் பல்வேறு அறக்கட்டளை சார்ந்து மக்களுக்கு பயனளிக்கும் வகையில் சமூகப் பணி ஆற்றி வருகிறார் ஆசிரியர்.

1998ஆம் ஆண்டு இயக்க தோழர்கள், நலம் விரும்புவோர் எனபல தரப்பினரும் - ஆசிரியருக்கு எடைக்கு எடையாக நன்கொடையாக அன்புடன்  தங்கம் வழங்கினர். அந்த நன்கொடை முழுவதையும் தனது ஆசான் தந்தைபெரியார் வழிமுறையில்  புதிய அறக்கட்டளையை உருவாக்கி மக்களின் பங்களிப்பு மக்களுக்கே, பரந்து பயன்படும் வகையில் ஏற்படுத்தினார் ஆசிரியர் அவர்கள். இத்தகைய நிலை உலகில் உள்ள எந்த தலைவர் வாழ்விலும் காண முடியாதது. அந்த வகையில் நமது ஆசிரியர் ஒரு தனித்தன்மை வாய்ந்த தலைவர், தன்னிகரற்ற தலைவர் - அவர் பல்லாண்டு வாழ வாழ்த்துகிறேன்.

தமிழர் தலைவர் ஆசிரியர் நிறைவுரையாற்றினர்.

(ஆசிரியர் அவர்களின் முழுப் பேச்சு பிற பக்கங்களில் வெளி வந்துள்ளது)

மூத்த கல்வியாளருக்கு பாராட்டு

திருநெல்வேலி மனோன்மணியம் சுந்தரனார் பல்கலைக் கழகத்தின் முதல் துணைவேந்தர் பேராசிரியர் முனைவர் வேதகிரி சண்முகசுந்தரம் அவர்களுக்கு, அவரைப் பற்றிய சிறு குறிப்புகளுக்குப் பின்னர், சால்வை அணிவித்து தமிழர் தலைவர் சிறப்பு செய்தார். பின்னர் சிறிது நேரம் பேசிய பேராசிரியர் பெரியார், அண்ணா, கலைஞர் வழியில் கொள்கைகள் கொண்டு செல்லப்பட வேண்டும். ஆசிரியர் அவர்கள்தான் அந்த பணியினை தொடர்ந்து செய்து வருகிறார். வாழ்த்துகள் என்று கூறி முடித்தார்.

மலர் வெளியீடு

‘தி மாடர்ன் ரேஷனலிஸ்ட்’ ஆண்டு மலர் ரஷ்ய துணைத்தூதர் வெளியிட  வி.அய்.டி. பல்கலைக்கழக வேந்தர் கோ.விசுவநாதன் பெற்றுக்கொண்டார். 

தமிழர் தலைவரிடமிருந்து மலரைப் பெற்றுக்கொண்டவர்கள் விவரம் வருமாறு: 20 மலர்களை பகுத்தறிவாளர் கழக மாநிலத் தலைவர் இரா.தமிழ்செல்வன் பெற்றுக்கொண்டார். தமிழக மூதறிஞர் குழுத் தலைவர் சு.தேவ தாஸ், பொருளாளர், பொறியாளர் முனைவர் த.கு.திவாகரன், வழக் குரைஞர் சு.குமாரதேவன், பெரியார் நூலக வாசகர் வட்டத் தலைவர் வழக்குரைஞர் ஆ.வீரமர்த்தினி, ஆடிட்டர் இராமச்சந்திரன், பெரியார் பன்னாட்டமைப்பு சிகாகோ அரசர், பொதுச்செயலாளர் ஆ.வெங்கடேசன், துணைத் தலைவர் கரிகாலன், தாம்பரம் மாவட்டத் தலைவர் ப.முத்தையன், செயலாளர் கோ.நாத்திகன், பெரியார் சுயமரியாதை திருமண நிலைய இயக்குநர் பசும்பொன்  விழிகள் வேணுகோபால், ஜனார்த்தனன், வழக்குரைஞர் ந.விவேகானந்தன், மாணவர் கழக செ.பெ.தொண்டறம் உள்பட பலரும் பெற்றுக்கொண்டனர்.

மலர் தொகுக்கும் பணியை மேற்கொண்டு சிறப்பாக செய்து முடித்த வீ. குமரேசனுக்கு தமிழர் தலைவர்  பயனாடை அணிவித்து பாராட்டு தெரிவித்தார்.

கலந்துகொண்டோர்

ரஷ்ய துணைத்தூதரக செயலாளர் எர்கேனி சுத்தலாட்சவ், இந்திய - ரஷ்ய வர்த்தக சபை பொதுச்செயலாளர் ப.தங்கப்பன், திராவிடர் வரலாற்று ஆய்வு மய்யத் தலைவர், மேனாள் துணைவேந்தர் பேராசிரியர் பெ.ஜெகதீசன், பேராசிரியர் அரங்கசாமி, புலவர் பா.வீரமணி, கழக துணைப்பொதுச்செயலாளர் பொறியாளர் ச.இன்பக்கனி, சென்னை மண்டல செயலாளர் தே.செ.கோபால், தென்சென்னை மாவட்டத் தலைவர் இரா.வில்வநாதன், செயலாளர் செ.ர.பார்த்தசாரதி, தாம்பரம் சு.மோகன்ராஜ், சா.தாமோதரன், சி. பாஸ்கர், ஊடகவியலாளர் மணிமாறன், பெரியார் நூலகவாசகர் வட்டம், புதுமை இலக்கியத் தென்றல் உள்ளிட்ட பல்வேறு அமைப்புகளைச் சேர்ந்தவர்கள் உள்ளிட்ட பலர் கலந்துகொண்டனர்.

தொகுப்பு: 

வீ. குமரேசன்

மீண்டும் சேது சமுத்திரக் கால்வாய்த் திட்டத்தை அமைக்க திராவிடர் கழகம் வேண்டுகோள்!அதற்காக தோழமைக் கட்சிகள் அனைவரையும் ஒருங்கிணைத்து போராட்டம் நடத்தவும் தயார்!

செய்தியாளர்களிடையே தமிழர் தலைவர் ஆசிரியர்

  December 24, 2022 • Viduthalai

 இராமர் சேது பாலம் இருந்ததற்கான எந்த ஆதாரமும் இல்லை என நாடாளுமன்றத்தில் ஒன்றிய பா.ஜ.க. அமைச்சர் ஒப்புதல்

மீண்டும் சேது சமுத்திரக் கால்வாய்த் திட்டத்தை அமைக்க திராவிடர் கழகம் வேண்டுகோள்!

அதற்காக தோழமைக் கட்சிகள் அனைவரையும் ஒருங்கிணைத்து போராட்டம் நடத்தவும் தயார்!

திருச்சி, டிச.24 ''இராமர் சேது பாலம் இருந்ததற்கு எந்த ஆதாரமும் கிடையாது'' என்று  நாடாளுமன் றத்தில் பா.ஜ.க. ஒன்றிய அமைச்சரே ஒப்புக்கொண்டி ருக்கின்றார். எனவே, மீண்டும் சேது சமுத்திரக் கால்வாய்த் திட்டத்தை அமைத்தே தீரவேண்டும் என்ற கோரிக்கையை  தி.மு.க. உள்பட, அனைத்துத் தோழமைக் கட்சிகளுக்கும் தந்தை பெரியாரின் நினைவு நாளான இந்த நாளில், திராவிடர் கழகம் வேண்டுகோள் விடுக்கிறது. இதற்காகப் போராட வேண்டி வந்தால், எல்லோரையும் ஒருங்கிணைத்துப் போராட்டத்தை நடத்துவோம் என்றார் திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள்

இன்று (24.12.2022) திருச்சிக்குச் சென்ற திராவிடர் கழகத் தலைவர் ஆசிரியர் கி.வீரமணி அவர்கள், பகுத்தறிவுப் பகலவனின் 49 ஆம் ஆண்டு நினைவை யொட்டி திருச்சி மத்திய பேருந்து நிலையத்தில் உள்ள தந்தை பெரியார் சிலைக்கு மாலை அணிவித்து மரி யாதை செய்து, செய்தியாளர்களுக்குப் பேட்டியளித்தார்.

அவரது பேட்டி வருமாறு:

தந்தை பெரியார் எதை விரும்பினார்களோ, அப்படிப்பட்ட இலட்சியங்கள் இன்றைக்கு நிறைவேறிக் கொண்டிருக்கின்றன

பகுத்தறிவுப் பகலவன் தந்தை பெரியாருடைய 49 ஆம் ஆண்டு நினைவு நாள் என்பது ஒரு வர லாற்றுக் குறிப்பு. மற்றபடி தந்தை பெரியாருடைய அருந்தொண்டை, அவர்கள் வாழ்ந்த காலத்தைவிட, இன்று உலகம் முழுவதும் உணர்ந்து வருகின்றது. இன்றைக்குப் பெரியார் உலக மயமாகி இருக்கிறார்; உலகம் பெரியார் மயமாகி இருக்கிறது. தந்தை பெரியாரின் 49 ஆம் ஆண்டு நினைவு நாளில், ''திராவிட மாடல்'' ஆட்சி இந்தியாவிற்கே வழிகாட்டக் கூடிய வகையிலே நடந்துகொண்டுள்ளது, தந்தை பெரியார் எதை விரும்பினார்களோ, அப்படிப்பட்ட இலட்சியங்கள் இன்றைக்கு நிறைவேறிக் கொண்டிருக் கின்றன.

50 ஆண்டுகளுக்கு முன்....

இன்னுங்கேட்டால், அறிஞர் அண்ணா அவர்கள், 50 ஆண்டுகளுக்கு முன் ஆட்சி அமைத்தபொழுது, ''பெரியாருக்கு இந்த ஆட்சி காணிக்கை'' என்று சொன்னார்கள்.

முத்தமிழ் அறிஞர் கலைஞர் அவர்கள், ''அனைத்து ஜாதியினரும் அர்ச்சகர் என்ற பெயராலே, பெரியாரின் நெஞ்சில் தைத்த முள்ளோடு நான் புதைக்கிறேன்'' என்று சொன்னார்.

ஆனால், பெரியாரின் நெஞ்சில் தைத்த முள்ளை, நம்முடைய முதலமைச்சர் சமூகநீதிக்கான சரித்திர நாயகர் மு.க.ஸ்டாலின் அவர்கள் ஆட்சிக்கு  வந்தவுடன், அதையும் அகற்றினார்.

இன்றைக்குத் தந்தை பெரியார் அவர்களுடைய கொள்கை என்பது உலகளாவிய கொள்கையாக இருக் கிறது. பெரியார் அவர்கள் எதை எதையெல்லாம் விரும் பினார்களோ, அவை அத்தனையும் நடைமுறைக்கு வருகிறது.

 சேது சமுத்திரக் கால்வாய்த் திட்டம்

அதுமட்டுமல்லாமல், 'திராவிட மாடல்' ஆட்சி, தொடங்கிய எல்லா திட்டமும், உண்மை அடிப் படையில் நடந்துகொண்டிருக்கின்றது. இதற்கு எடுத்துக்காட்டாக நேற்று (23.12.2022) ஒன்றிய அமைச்சர் நாடாளுமன்றத்தில்,   ''இராமர் பாலம் என்ற ஒன்று இல்லை'' என்று சொல்லியிருக்கிறார். திராவிட முன்னேற்றக் கழகம்தான் முன்னின்று, ''சேது சமுத்திரக் கால்வாய்த் திட்டம் நிறைவேறினால், தென்மாவட்டங்கள் சிறப்படையும்; வேலை வாய்ப்பு கள் வரும்'' என்று சொன்னது.

கலைஞர் அவர்கள் முதலமைச்சராக இருந்த பொழுது, திராவிட முன்னேற்றக் கழகம், யு.பி.ஏ. அரசில் அங்கம் வகித்தது.  சேது சமுத்திரக் கால்வாய்த் திட்டம் முடிவடையக்கூடிய நிலையில் இருந்தது.  டி.ஆர்.பாலு அவர்கள் அந்தத் துறை அமைச்சராக இருந்தார்.  அந்தத் திட்டம் நிறைவேற இன்னும் 12 கிலோ மீட்டர் பணிகள்தான் மீதம்  இருந்தது.

அந்தத் திட்டத்திற்காக 2,000 கோடி ரூபாய்க்குமேல் செலவழிக்கப்பட்டுள்ளது. இலட்சக்கணக்கான பேருக்கு வேலை வாய்ப்புகள் கிடைத்திருக்கும். திருச்சியிலி ருந்து, தென்மாவட்டங்கள் வரை உள்ள மக்களின் வாழ்வாதாரம் பெருகக் கூடிய அளவில் இருந்த திட்டத்தை, வேண்டுமென்றே சுப்பிரமணியசாமி, மேனாள் முதலமைச்சர் ஜெயலலிதா போன்றவர்கள் அந்தத் திட்டத்தை எதிர்த்து வழக்குப் போட்டு, ''இராமர் பாலம்'', ''இராமர் பாலம்'' என்று சொல்லி, அந்தத் திட்டத்தையே கைவிடும்படியாக ஆக்கினார்கள்.

அதை எதிர்த்து திராவிட முன்னேற்றக் கழகமும், திராவிடர் கழகமும், மற்ற அமைப்புகளும் தொடர்ந்து போராடிக் கொண்டிருக்கின்றன.

''இராமர் சேது பாலம் இருந்ததற்கு எந்த ஆதாரமும் கிடையாது'' 

ஒன்றிய அமைச்சரின் ஒப்புதல்!

அதன் பிறகு கலைஞர் சொன்னார், ''வேண்டு மானால், அதை விட்டுவிட்டாவது, அந்தத் திட் டத்தை நிறைவேற்றுங்கள்; அதன்மூலமாக, வேலை வாய்ப்புகளும், பொருளாதார செழிப்பும் ஏற்படும்'' என்றார்.

ஆனால், வேண்டுமென்றே இதுவரை கிடப்பில் போடப்பட்டுள்ளது.

நேற்று நாடாளுமன்றத்தில் பா.ஜ.க. ஒன்றிய அமைச்சரே ஒப்புக்கொண்டிருக்கின்றார், ''இராமர் சேது பாலம் இருந்ததற்கு எந்த ஆதாரமும் கிடையாது'' என்று சொல்லியிருக்கிறார்.

திராவிடர் கழகத்தின் வேண்டுகோள்!

எனவே, தந்தை பெரியாரின் நினைவு நாளான இந்த நாளில், திராவிடர் கழகம் ஒரு வேண்டுகோளை, தி.மு.க. உள்பட, அனைத்துத் தோழமைக் கட்சிகளுக்கும் வைக்கிறது.

அது என்னவென்றால், மீண்டும் சேது சமுத்திரக் கால்வாய்த் திட்டத்தை அமைத்தே தீரவேண்டும் என்ற கோரிக்கைக்கான கிளர்ச்சிகளை செய்வோம்.

ஏனென்றால், இராமர் சேது பாலம் இல்லை என்று நாடாளுமன்றத்தில் ஒன்றிய அமைச்சரே, சொல்லிவிட்ட பிறகு, நிச்சயமாக அந்தத் திட்டத்திற்காகச் செலவழித்த பணம் வீண் அல்ல என்று சொல்லக்கூடிய அளவிற்கு, ஒன்றிய அரசை வலியுறுத்தி அந்தத் திட்டத்தை நிறைவேற்றச் செய்யவேண்டும்.

எல்லோரையும் ஒருங்கிணைத்துப் போராட்டத்தை நடத்துவோம்!

அதன்மூலமாக தென்மாவட்டங்கள் செழிக்க வேண்டும்; நம்முடைய இளைஞர்கள் வேலைவாய்ப்பு களைப் பெறவேண்டும். அப்படி இளைஞர்கள் வேலை வாய்ப்பைப் பெற்றால், யாரும் கஞ்சா, மது போன்ற போதை பழக்கங்களுக்கு ஆளாகமாட்டார்கள்.

எனவே, தந்தை பெரியாருடைய நினைவு நாளில் உறுதியாகக் கூறுகின்றோம். இதற்காகப் போராட வேண்டி வந்தால், எல்லோரையும் ஒருங்கிணைத்துப் போராட்டத்தை நடத்துவோம்.

நம்முடைய மாண்புமிகு முதலமைச்சர் அவர்களும், தி.மு.க.வும், மற்ற தோழமைக் கட்சிகளும் - அன்றைக்கு யார் யார் ஒன்றுபட்டு சேது சமுத்திரத் திட்டத்திற்காகக் குரல் கொடுத்தார்களோ, அவர்கள் அத்துணை பேரும் இன்றைக்கும் குரல் கொடுக்கவேண்டும்.

அதற்கு ஆதாரமாக பா.ஜ.க.வே இருக்கிறது- எனவே, அவர்கள் மறுக்க முடியாது.

நன்றி, வணக்கம்!

 - இவ்வாறு தமிழர் தலைவர் திராவிடர் கழகத் தலைவர் ஆசிரியர் கி.வீரமணி அவர்கள் செய்தி யாளர்களுக்குப் பேட்டியளித்தார்.

ஒப்புதல் வாக்குமூலம் ராமர் சேது பாலம் பற்றிய உறுதியான ஆதாரம் இல்லை!

  December 24, 2022 • Viduthalai

மாநிலங்களவையில் ஒன்றிய அரசு அறிவிப்பு!

புதுடில்லி, டிச. 24- இந்தியா விற்கும் இலங்கைக்கும் இடையே பழங்கால ராமர்சேது பாலம் இருந் ததாகக் கருதப்படும் பிராந்தியத்தின் செயற் கைக்கோள் படங்கள், தீவுகள் மற்றும் சுண் ணாம்புக் கற்களைக் கைப்பற்றியுள்ளன. ஆனால், அவை ஒரு பாலத் தின் எச்சங்கள் என்று "துல்லியமாகச் சொல்ல முடியாது" என்று ஒன்றிய அரசு வியாழக்கிழமை நாடாளுமன்றத்தில் தெரிவித்துள்ளது.

"ஓரளவிற்கு, விண் வெளி தொழில்நுட்பத் தின் மூலம் துண்டுகள் மற்றும் தீவுகள், சில வகையான சுண்ணாம்புக் கற்கள் ஆகியவற்றைக் கண் டறிய முடிந்தது. அவை எச்சங்கள் அல்லது பாலத் தின் பாகங்கள் என்று துல்லியமாகச் சொல்ல முடியாது" என்றுஒன்றிய விண்வெளித் துறை அமைச்சர் ஜிதேந்திர சிங் மாநிலங்களவையில் தெரிவித்துள்ளார்.

பா.ஜ.க. உறுப்பினர் கார்த்திகேய சர்மா "இந்தி யாவின் கடந்த காலத்தை அறிவியல்பூர்வமாக மதிப்பீடு செய்ய அரசாங் கம் ஏதேனும் முயற்சி களை மேற்கொள்கிறதா என்று கேள்வி எழுப்பினார்.

இதற்குப் பதிலளித்து ஒன்றிய அமைச்சர் "விண் வெளித் துறை உண்மை யில் இதில் ஈடுபட்டுள் ளது என்பதை அவருடன் பகிர்ந்து கொள்வதில் மகிழ்ச்சி அடைகிறேன். ராமர் சேது பாலம் தொடர்பாக அவர் இங்கு கேட்ட கேள்வி யைப் பொறுத்தவரை, வரலாறு 18,000 ஆண்டு களுக்கும் மேலானது என் பதாலும், வரலாற்றைப் பார்த்தால், அந்த பாலம் சுமார் 56 கி.மீ. நீளம் கொண் டது என்பதாலும் கண்டு பிடிப்பதில் எங்களுக்கு சில வரம்புகள் உள்ளன.

செயற்கைக்கோள் படங்களின் மூலம் கைப் பற்றபட்ட தீவுகள் "ஒரு குறிப்பிட்ட அளவிலான தொடர்ச்சியைக் காட்டு கின்றன. இதன் மூலம் சில அனுமானங்களை வரைய முடியும்."

எனவே, நான் சுருக்க மாகச் சொல்ல விரும்பு வது என்னவென்றால், உண்மையில் அங்கு இருந்த சரியான கட்ட மைப்பைக் குறிப்பிடுவது கடினம் என்று அமைச்சர் குறிப்பிட்டார்.

அய்க்கிய முற்போக் குக் கூட்டணி அரசாங் கம், தீவுகளின் சங்கிலி வழியாக ஒரு வழித் தடத்தை அனுமதிக்கும் வகையில், 83 கி.மீ. தூரம் தோண்டி, சேது சமுத்தி ரத் திட்டத்திற்கான மாற்று சீரமைப்பை ஆய்வு செய்ய, சுற்றுச்சூ£ல் ஆர்வலர் ஆர்.கே.பச்சவுரியின் கீழ் ஒரு குழுவை அமைத்தது.

சீதையை மீட்பதற்காக இலங்ககைக்கு வருவதற்கு ராமர்  ஒரு பாதையை உருவாக்கினார் என்றும் அது பாதுகாக்கப்பட வேண்டும் என்றும் மக் கள் நம்பிக்கையை கார ணம் காட்டி பா.ஜ.க. இந்த திட்டத்தை எதிர்க்கிறது.

தந்தை பெரியார் 49ஆம் ஆண்டு நினைவு நாள் மரியாதை - (24.12.2022)

  December 24, 2022 • Viduthalai

திருச்சி மத்திய பேருந்து நிலையம் அருகில் உள்ள தந்தை பெரியார் சிலைக்கு திராவிடர் கழகத் தலைவர் ஆசிரியர் கி. வீரமணி, தமிழ்நாடு - நகர்ப்புற வளர்ச்சித் துறை அமைச்சர் கே.என்.நேரு ஆகியோர் முன்னிலையில் திருச்சி மாநகர மேயர் அன்பழகன், திருச்சி மத்திய மாவட்ட தி.மு.க. பொறுப்பாளர் வைரமணி, திருச்சி மாவட்ட கழகத் தலைவர் ஆரோக்கியராஜ் மற்றும் தி.மு.க. உள்ளிட்ட பல்வேறு கட்சியினர் மாலை அணிவித்து மரியாதை செலுத்தினர்.

திண்டுக்கல்லுக்கு வருகை தந்த தமிழர் தலைவருக்கு மாவட்ட தலைவர் வீரபாண்டி மற்றும் தோழர்கள் பயனாடை அணிவித்து  வரவேற்றனர். தந்தை பெரியார் சிலைக்கு தமிழர் தலைவர் ஆசிரியர் கி. வீரமணி மாலை அணிவித்து மரியாதை செலுத்தினார். உடன்: மயிலை நா. கிருஷ்ணன், கழகப் பொதுச் செயலாளர் இரா. ஜெயக்குமார், மாநில அமைப்பாளர் உரத்தநாடு இரா. குணசேகரன், திராவிடர் தொழிலாளர் கழக மாநில செயலாளர் மு. சேகர்,  திண்டுக்கல் வீரபாண்டி, நாராயணன் மற்றும் தோழர்கள்.

தந்தை பெரியார் 49ஆம் ஆண்டு நினைவு நாளையொட்டி (24.12.2022) சென்னை அண்ணாசாலை சிம்சன் அருகில் உள்ள தந்தை பெரியார் சிலையில் இருந்து அமைதிப் பேரணி திராவிடர் கழக துணைத் தலைவர் கவிஞர் கலி. பூங்குன்றன் தலைமையில் தொடங்கி பெரியார் திடல் வந்தடைந்தது.

பெரியார் திடலில் உள்ள தந்தை பெரியார் சிலைக்கு மாலை அணிவிக்கப்பட்டு அவரது நினைவிடத்தில் மலர் வளையம் வைத்து மரியாதை செலுத்தி உறுதிமொழி ஏற்கப்பட்டது

சென்னை அண்ணா சாலை சிம்சன் அருகில் உள்ள தந்தை பெரியார் சிலைக்கு திராவிடர் கழகப் பொருளாளர் 

வீ. குமரேசன் மாலை அணிவித்து, சிலைக்கு கீழே வைக்கப்பட்டிருந்த படத்திற்கு மலர் தூவியும் மரியாதை செலுத்தினார். உடன் கழக நிர்வாகிகள். 

பகுத்தறிவுப் பகலவனின் சிலைக்கு தமிழர் தலைவர் ஆசிரியர், அமைச்சர் கே.என்.நேரு மரியாதை

  December 24, 2022 • Viduthalai

பகுத்தறிவுப் பகலவன் தந்தை பெரியாரின் 49 ஆம் ஆண்டு நினைவு நாளான இன்று (24.12.2022) திருச்சி மத்திய பேருந்து நிலையம் அருகே உள்ள தந்தை பெரியார் சிலைக்கு ஏராளமாகத் திரண்டிருந்த பொதுமக்கள் மத்தியில்,  பலத்த ஒலிமுழக்கங்களுக்கிடையே தமிழர் தலைவர் ஆசிரியர் கி.வீரமணி, தமிழ்நாடு நகர்ப்புற வளர்ச்சித் துறை  அமைச்சர் கே.என்.நேரு ஆகியோர் மாலை அணிவித்து மரியாதை செலுத்தினர்.

எம்.ஆர்.இராதா மன்றத்தில் நடைபெற்ற நீதிக்கட்சியின் பார்ப்பனரல்லாதார் கொள்கை அறிக்கைப் பிரகடன நாள் கருத்தரங்கம்

சென்னை பெரியார் திடலில் உள்ள 

  December 21, 2022 • Viduthalai

திராவிடர் வரலாற்று ஆய்வு மய்யத்தின் சார்பில், நேற்று (21.12.2022) சென்னை பெரியார் திடலில் உள்ள எம்.ஆர்.இராதா மன்றத்தில் நடைபெற்ற நீதிக்கட்சியின் பார்ப்பனரல்லாதார் கொள்கை அறிக்கைப் பிரகடன நாள் கருத்தரங்கத்தில், பங்கேற்ற பேராசிரியர் முனைவர் வேதகிரி சண்முகசுந்தரம் - அவரது வாழ்விணையர்  மேனாள் துணைவேந்தர் யசோதா ஆகியோருக்குத் தமிழர் தலைவர் ஆசிரியர் அவர்கள் பொன்னாடை போர்த்தி, இயக்க நூல்களை நினைவுப் பரிசாக வழங்கினார். உடன் தமிழ்நாடு போக்குவரத்துத் துறை அமைச்சர் சா.சி.சிவசங்கர், திமுக செய்தித் தொடர்பு செயலாளர் டி.கே.எஸ்.இளங்கோவன்,  பேராசிரியர் மு.நாகநாதன், பச்சையப்பன் கல்லூரி பேராசிரியர் ரா.சரவணன், பேராசிரியர் அ.கருணானந்தன், கழகத் துணைத் தலைவர் கவிஞர் கலி.பூங்குன்றன், கழகப் பொருளாளர் வீ.குமரேசன் 

(சென்னை, பெரியார் திடல், 20.12.2022).

தமிழக மூதறிஞர் குழு செயற்குழுக் கூட்டம் : தமிழர் தலைவர் தலைமையில் நடைபெற்றது - புதிய பொறுப்பாளர்கள் அறிவிப்பு

  December 22, 2022 • Viduthalai

தமிழக மூதறிஞர் குழுவின் (The Tamil Nadu Intellectuals' Forum)   செயற்குழுக் கூட்டம் 21.12.2022 அன்று சென்னை பெரியார் திடலில் நண்பகல் 12 மணிக்கு தொடங்கி நடைபெற்றது.

செயற்குழுக் கூட்டத்திற்கு தமிழக மூதறிஞர் குழுவின் புரவலர் தமிழர் தலைவர் ஆசிரியர் கி.வீரமணி தலைமை வகித்தார். கூட்டத்திற்கு திராவிடர் கழகத் துணைத் தலைவர் கவிஞர் கலி. பூங்குன்றன், பொருளாளர் வீ. குமரேசன் ஆகியோர் முன்னிலை வகித்தனர்.

நடைபெற்ற கூட்டத்தில் செயற்குழு உறுப்பினர்கள் அறிவிக்கப்பட்டனர். தலைவர் முனைவர் சு.தேவதாஸ், துணைத் தலைவர்கள்: நீதிபதி இரா. பரஞ்ஜோதி, வேண்மாள் நன்னன், செயலாளர்கள்: மா.செல்வராஜ், ஆ. வெங்கடேசன், துணைச் செயலாளர் பா. பன்னீர்செல்வம், பொருளாளர் முனைவர் த.கு.திவாகரன், செயற்குழு உறுப்பினர்கள்: எஸ். இராமநாதன், ந. ஜெயராஜ், ஆர். மாணிக்கம். செயற்குழு உறுப்பினர்கள் டிசம்பர் மாத இறுதியில் கூடி, தமிழக மூதறிஞர் குழுவின் வருங்காலச் செயல்பாடுகள் பற்றி கலந்துரையாடல் முடிவு செய்யப்பட்டது.

படையெடுப்புகளில் மிக ஆபத்தானது பண்பாட்டுப் படையெடுப்பே! நமது முதலமைச்சர் வழிகாட்டியுள்ளார்-பின்பற்ற என்ன தயக்கம்?

  December 22, 2022 • Viduthalai

 சென்னை ராஜா அண்ணாமலை மன்றத்தில் முதலமைச்சர் ஆற்றிய தமிழுணர்வு உரை

'தமிழில் பாடினால் கேவலம்' என்ற ஒரு காலகட்டம் இருந்தது

தமிழ் நீஷப் பாஷையா? தமிழன் கட்டிய கோவில்களில் தமிழ் உள்ளே இல்லையே, ஏன்?

தமிழ் மேடைகளில் தமிழ்ப் பாட்டுப் பாடுவது கேவலம் என்று நினைத்த ஒரு காலம் இருந்தது என்று நமது முதலமைச்சர் கூறியதை எடுத்துக் காட்டி, படையெடுப்புகளில் பண்பாட்டுப் படையெடுப்பு ஆபத்தானது என்பதை எடுத்துக் கூறி, முதல மைச்சர் வழிகாட்டியுள்ளார்; அவர் உரையில் உள்ள உணர்வைப் புரிந்துகொண்டு செயல்படுவீர் என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத் துள்ள அறிக்கை வருமாறு:

நேற்று (21.12.2022) சென்னை அண்ணாமலை மன்றத் தில், தமிழிசை சங்கத்தின் 80 ஆம் ஆண்டு விழாவில் கலந்துகொண்ட நமது முதலமைச்சர் சமூகநீதிக்கான சரித்திர நாயகர் மு.க.ஸ்டாலின் அவர்கள் ஆற்றிய உரை பண்பாட்டுப் படையெடுப்பிலிருந்து மீட்டுருவாக்கம் செய்யும், மிக அருமையான அரிய ஆய்வுரையாகும்.

மேடைகளில் தமிழில் பாடுவது 

கேவலம் என்ற ஒரு காலம் இருந்தது

எளிய முறையில், எல்லோருக்கும் விளங்கும் வகை யில் பண்பாட்டுப் படையெடுப்பினை, பாதகங்களை நன்கு படம் பிடித்துக் காட்டியதோடு, இசைச் சங்கங்கள் இந்நாட்டில் செம்மொழி தமிழ்மொழியையும், அதனடிப் படையில் எழுந்து, மக்கள் இசையாக மலர்ந்த தமிழிசை யின் தனித்துவம் குறித்தும் உணர்ந்து, அதை அத்தகைய அமைப்புகள் பின்பற்றி இசை நிகழ்ச்சிகள் நடத்திட வேண்டுகோள் விடுத்த முக்கிய உரையாகும்.

மாண்புமிகு தமிழ்நாடு முதலமைச்சர் அவர்கள் தமது உரையில்,

‘‘தமிழ்நாட்டில், தமிழ் மேடைகளில், தமிழ்ப் பாட்டைப் பாடுவது, கேவலம் என்று நினைத்த ஒரு காலம் இருந்தது. தமிழில் பாடினால், ‘‘மேடை தீட்டாகி விடும்'' என்று நினைத்தார்கள். தமிழை ‘‘நீஷபாஷை'' என்று பழித்தார்கள். தமிழ்நாட்டில், தமிழ் மேடைகளில், தமிழில் பாட வேண்டும் என கோரிக்கை வைக்க வேண்டி இருந்தது.

தந்தை பெரியார் கேட்ட கேள்வி

தமிழில் பாடச் சொல்லி, இசை மேடைகளில் திராவிட இயக்கத்தினர் குரல் கொடுக்கத் தொடங்கினார்கள். இதனால் வேறு வழியில்லாமல், ஒரு பாட்டு பாடுவார்கள். அதற்கு ‘துக்கடா' பாட்டு என்று பெயர். தமிழையே ‘துக்கடா' ஆக்கி வைத்திருந்தார்கள்.

‘‘தமிழ் நீஷப்பாஷையாக இருந்தால், தமிழன் கொடுக்கும் காசு ‘நீஷக்காசு' ஆகாதா'' என்று கேட்டார் தந்தை பெரியார் அவர்கள்'' என்று குறிப்பிட்டுள்ளார்.

'குடிஅரசில்' கலைஞர் 'தீட்டாயிடுத்து' என்று எழுதியதன் பின்னணி!

முன்பு திருவையாறு தியாகய்யர் சமாதியில் நடை பெற்ற இசை நிகழ்வு (ஆண்டுதோறும் கருநாடக சங்கீத சபாவில் முன்னிலைப்படுத்தப்பட்ட விழா) - அதில் இசையரசு எம்.எம்.தண்டபாணி தேசிகர் அவர்கள் தமிழில் பாடிவிட்டதால், ‘மேடை தீட்டாயிடுத்து' என்று கூறி, கழுவி சுத்தம் செய்தால் ஒழிய, பாடமாட்டேன் என்று அரியக்குடி இராமானுஜ அய்யங்கார் மறுத்து எதிர்ப்புக் காட்டியதை ‘குடிஅரசு' ஏட்டில் - தந்தை பெரியார் ஆணைப்படி - கலைஞர் அவர்கள் ‘‘தீட்டா யிடுத்து'' என்ற தலைப்பில் எழுதிய அருமையான பதிலடிக் கட்டுரை  பலரது பாராட்டுதலைப் பெற்றதோடு, தந்தை பெரியாரே வெகுவாகப் பாராட்டியது வரலாறாகும்!

படையெடுப்புகளில் 

ஆபத்தானது எது?

படையெடுப்புகளிலேயே இன, மொழி பண்பாட்டுப் படையெடுப்புதான் மிகமிக ஆபத்தானது. மற்ற அரசியல், பொருளாதார படையெடுப்புகள் கால்களில், கைகளில் பூட்டப்பட்ட விலங்குகள் - கண்ணுக்குப் பளிச்சென்று தெரியும், புரியும்!

ஆனால், இந்தப் பண்பாட்டுப் படையெடுப்பு மூளை யில் போடப்பட்ட மிக ஆபத்தான, கண்ணுக்கு எளிதில் தெரியாமல், நம் மக்களை அடிமைகளாக்கும் அபாயம் மிக்க ஒன்று.

தமிழை நீஷப் பாஷை என்று பழித்ததோடு, அதனை இன்றளவும் கோவில்களில் ‘பூசெய்' (இது மருவி, ‘பூஜை'யாக்கப்பட்டது) தமிழ் - அதுவும்  தமிழ்நாட்டில், தமிழர்கள் உழைப்பில், பொருளில் கட்டப்பட்ட கோவில்களில் இல்லை. இரண்டே முக்கால் வீதம் உள்ள ஒரு வெகுச் சிறுபான்மையினர் ஆயிரம் ஆண்டுகளாகக் கும்பிடும் தமிழனின் மூளையை பக்திப் போதையில் அடிமையாக்கி இதை உணராமல் செய்ததின் விளைவு அல்லவா இது!

தமிழன் கட்டிய கோவில்களில் 

தமிழ் உண்டா?

‘‘தமிழ் தெரியாத கடவுள்களுக்குத் தமிழ்நாட்டில் என்ன வேலை?'' என்றும்கூட தந்தை பெரியார் கேட்டார்.

‘தமிழன் காசு மட்டும் நீஷக் காசு ஆகாதா?'' என்றார்!

பார்ப்பனர்களின் இரட்டை வேடம் அங்கே மட்டுமா?

சமைத்த காய்கறிக்கு ‘‘தீட்டு'' உண்டு; பச்சையாகத் தந்தால் ‘‘தீட்டு'' கிடையாது!

தண்ணீருக்குத் ‘‘தீட்டு'' உண்டு; ஆனால், பால், தயிர், மோர், நெய் இவற்றிற்குத் ‘‘தீட்டு'' கிடையாது. அவர்கள் பயன்படுத்துவார்கள். ஏனெனில், அவை விலை அதிக மாகும்; தண்ணீர்போல் தாராளமாகக் கிடைக்காதவை!

கரன்சி நோட்டுக்குத் ‘‘தீட்டு'' இல்லை; இப்படி எது எது ‘‘அவர்களுக்கு'' வசதியோ, தேவையோ, அதற்கெல்லாம் விதிவிலக்கு ‘பொத்தென்று' வந்து குதிக்கும்!

பக்தி போதையால் பாதிக்கப்பட்ட நம் மக்கள் இதை உணர்வதே இல்லை.

படித்த பாமரர்கள் தலையாட்டி பொம்மைகளா?

அதைவிடக் கொடுமை படித்தவர்கள் என்ற முத்திரையுள்ள ‘‘படித்த பாமரர்கள்'' - நம்மவர்களும் இதை உணராமல் தலையாட்டி பொம்மைகளாகவே இருக்கின்றனர்.

இசைப் படையெடுப்பு மூலம் நம்மூளையில் விலங்கு மாட்டுகிறார்கள். இசை மேதைகள் வடமொழி மந்திரங்கள் இணைத்து, (புரிகிறதோ இல்லையோ) பாடி ‘‘சடகோபம்'' பெறுவதே பெருமையாகக் கருதினர்; காலங்காலமாய் அடிமை - மிடிமை ஓங்கி நிற்கும் அவலம் ‘தொடரும்' நிலை!

முதலமைச்சர் வழிகாட்டியுள்ளார்!

மேடைகளில் இப்படி விழிப்புணர்வு உரைகளை நம் பெரும் பொறுப்பில் உள்ளோர், பெரும் புலவர்கள், இலக்கிய வல்லுநர்கள் வற்புறுத்திடத் தயங்கக் கூடாது.

முதலமைச்சர் வழிகாட்டியுள்ளார் - மற்ற அறிவார்ந்த பெருமக்கள் பின்பற்ற இன்னமுமா தயக்கம்?

கி.வீரமணி

தலைவர்,

திராவிடர் கழகம்

சென்னை

22.12.2022

வாழ்க இனமானப் பேராசிரியரின் தொண்டு!

  December 19, 2022 • Viduthalai

 இனமானமும் - சுயமரியாதையும் ஊட்டிய இனமானப் பேராசிரியரின் வாழ்வு நமக்குக் கலங்கரை வெளிச்சமாகும்!

தமிழர் தலைவர் ஆசிரியர் அறிக்கை

இனமானமும் - சுயமரியாதையும் ஊட்டிய இனமானப் பேராசிரியரின் வாழ்வு நமக்குக் கலங்கரை வெளிச்சமாகும் என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

நம் இனமானப் பேராசிரியர் மானமிகு க.அன்பழகன் அவர்களது நூற்றாண்டு நிறைவு நாள் (19.12.2022) இன்று!

டிசம்பர் 19 ஆம் தேதிதான் தந்தை பெரியார் தனது முழக்கத்தை முடித்துக்கொண்டு, நமக்கு வரலாறாகிய நாள்.

அந்த நாள்தான் இனமானப் பேராசிரியர் பிறந்த நாள்!

கொள்கை லட்சியங்கள் - அதனை உருவாக்கி அதற் காகவே வாழ்வை அர்ப்பணித்து உழைக்கும் தலைமை!

அத்தலைவர் தந்த இலட்சியப் பாதை -

அவற்றைக் கட்டுப்பாட்டுடன் காக்கும் கட்டுப்பாடாக செயல்படும் அமைப்பின் இயக்கம்.

இம்மூன்றும்தான் மிக முக்கியம்.

தமிழன் - திராவிடன் என்றால் என்ன?

நமது இனமானப் பேராசிரியர் இம்மூன்றையும் அவர் நேசித்த ‘முத்தமிழாக'வே கருதி செயலுருக் கொடுக்க தனது மாணவப் பருவம் தொடங்கி, முதுமை - முதிர்ச்சி என்னும் முதுமைப் பருவம் வரை கடினமாக உழைத்த பகுத்தறிவுச் செம்மல்; சுயமரியாதைப் பேரொளி.

தமிழரா? திராவிடரா? என்ற விவாதத்திற்கு ஆணியடித்ததுபோல, பதிலுரையை ‘நச்'சென்று தந்து தெளிய வைத்தவர் நம் இனமானப் பேராசிரியர் ஆவார்.

‘‘தமிழன் என்றால் மொழி உணர்வு வரும் என்றும், திராவிடன் என்றால் மானமும், ரோஷமும் கூடுதலாக இருக்கும்'' என்றும் பெரியார் திடல் நிகழ்ச்சியில் வெட்டு ஒன்று - துண்டு இரண்டாக அழுத்தமாகச் சொன்னவர் நமது இனமானப் பேராசிரியர்.

முத்தமிழறிஞர் கலைஞர் வழியில் - 

முதலமைச்சர் மு.க.ஸ்டாலின்

அவரது மணிவிழாவினை 40 ஆண்டுகளுக்குமுன் முத்தமிழறிஞர் கலைஞர் எந்தப் பெரியார் திடலில் நடத்தி மகிழ்ந்தாரோ, அதன் தொடர்ச்சிபோலவே, அவரது மைந்தரும் ஒப்பற்ற ‘திராவிட மாடல்' ஆட்சியின் முதலமைச்சருமான மாண்புமிகு மானமிகு மு.க.ஸ்டாலின் அவர்களும் 99 ஊர்களில் தமிழ் நாடெங் கும் பொதுக் கூட்டங்களை நடத்தி, 100 ஆவது நிறைவு விழா கூட்டத்தை பெரியார் திடலில் கொள்கைப் பிரச் சாரத் திருவிழாவாக நடத்தியது மிகவும் பாராட்டத்தக்கது!

இனமானக் கொள்கை வெள்ளம் நாடெல்லாம் பாய்ந்திடச் செய்தது மிகப் பொருத்தம்!

மதவாத சக்திகளும், ஜனநாயகத்தின் இடத்தில் பாசிசத்தை அரியணை ஏற்றிட முயற்சிக்கும் சனாதனக் கும்பலும் தலை துள்ளி ஆடும் இன்றைய காலகட்டத்தில், இனமானப் பேராசிரியரின் நூற்றாண்டு - அதற்கான சரியான தடுப்பூசி போன்ற கொள்கைவயப்பட்ட அருமையான ஏற்பாடு.

இதனைச் சிறப்புடன் நடத்தி, இனமானக் கொள்கை வெள்ளம் நாடெல்லாம் பாய்ந்திடச் செய்தது மிகப் பொருத்தம்!

முன்பு தேவைப்பட்டதைவிட இப்போதுதான் தத்துவ ரீதியாக இனமானப் பேராசிரியரின் தன்மான முழக்கங்கள் தகத்தகாய ஒளியுடன் பாயவேண்டிய நேரம்!

நமக்குக் கலங்கரை வெளிச்சமாய் வழிகாட்டட்டும்!

பேதமிலா பெருவாழ்வினை பேசு சுயமரியாதைக் கொள்கைமூலம் பரப்ப - இனமானப் பேராசிரியரின் படமும், வாழ்வும் அவர் தந்த கருத்தியல் விளக்கங்களும் நமக்குக் கலங்கரை வெளிச்சமாய் வழிகாட்டட்டும்!

வாழ்க பெரியார்!

வாழ்க இனமானப் பேராசிரியரின் தொண்டு!

கி.வீரமணி

தலைவர்,

திராவிடர் கழகம்

சென்னை

19.12.2022

கல்வி வளாகத்துக்கு அன்பழகனார் பெயர் சூட்டு விழா பேராசிரியர் க. அன்பழகனார் நூற்றாண்டு நினைவு வளைவு தமிழ்நாடு முதலமைச்சர் மு.க. ஸ்டாலின் திறந்து வைத்தார்

  December 19, 2022 • Viduthalai

சென்னை,டிச.19- தமிழ்நாடு முதல மைச்சர் மு.க. ஸ்டாலின் இன்று (19.12.2022) சென்னை, நுங்கம்பாக்கத் திலுள்ள பள்ளிக்கல்வித் துறையின் டி.பி.அய். வளாகத்தில் நடைபெற்ற இனமானப் பேராசிரியர் க.அன்பழ கனார் அவர்களின் நூற்றாண்டு நிறைவு விழாவில், டி.பி.அய். வளாகத் திற்கு “பேராசிரியர் க.அன்பழகன் கல்வி வளாகம்” எனப் பெயர் சூட்டி, பேராசிரியர் க.அன்பழகன் நூற் றாண்டு நினைவு வளைவினைத் திறந்து வைத்தார்.

தமிழ்நாட்டின் கல்வி வளர்ச்சிக் குப் பெரும் பங்காற்றியவரும், தலை சிறந்த கல்வியாளருமான இன மானப் பேராசிரியர் க. அன்பழக னார் அவர்களின்  நூற்றாண்டு நினைவைப் போற்றும் வகையில் தமிழ்நாடு அரசின் பள்ளிக் கல்வித் துறை செயல்படும் டி.பி.அய். வளா கத்தில் பேராசிரியர் அன்பழகன் அவர்களின் உருவச்சிலை நிறுவப் படுவதுடன் அவ்வளாகம் “பேரா சிரியர் அன்ப ழகன் கல்வி வளாகம்’’ என்றும் அழைக்கப்படும் என்று 30.11.2022 அன்று தமிழ்நாடு முதலமைச்சர் அறிவித்தார்.

அதன்படி, பள்ளிக்கல்வித் துறை யின் டி.பி.அய். வளாகத்திற்கு தமிழ் நாடு முதலமைச்சர் 'பேராசிரியர் க.அன்பழகன் கல்வி வளாகம்' என்று பெயர் சூட்டி, அதற்கான பெயர் பலகையினை திறந்து வைத்தார். மேலும், இனமானப் பேராசிரியர் க.அன்பழகனாரின் நூற்றாண்டு விழாவையொட்டி பள்ளிக்கல்வித் துறையின் டி.பி.அய். வளாகத்தின் நுழைவு வாயில் எண் 2இல் கட்டப் பட்டுள்ள பேரா சிரியர் க.அன்பழகன் நூற்றாண்டு நினைவு வளைவினையும் தமிழ்நாடு முதலமைச்சர் திறந்து வைத்தார். 

பேராசிரியர் க.அன்பழகன் நூற்றாண்டு நினைவு வளைவு மற்றும் பெயர் பலகை ஆகியவை 85 இலட்சம் ரூபாய் செலவில் அமைக்கப்பட்டுள் ளது.     இந்த நிகழ்ச்சியில், நீர்வளத் துறை அமைச்சர் துரைமுருகன் உள்ளிட்ட  அமைச்சர்கள், சட்ட மன்ற உறுப்பினர்கள், தலைமைச் செயலாளர் முனைவர் வெ. இறை யன்பு, இனமானப்   பேராசிரியர் அவர்களின் குடும்பத்தினர், உள் ளாட்சி அமைப் புகளின் பிரதிநிதிகள் மற்றும் அரசு உயர் அலு வலர்கள் கலந்து கொண் டனர்.

விழாவில் திராவிடர் கழகத் துணைத் தலைவர் கவிஞர் கலி. பூங்குன்றன் கலந்து கொண்டார்.

இனமானப் பேராசிரியர் க.அன்பழகனாரின் நூற்றாண்டு நிறைவு விழா பொதுக்கூட்டம்

  December 19, 2022 • Viduthalai

முதலமைச்சர் மு.க.ஸ்டாலின், தமிழர் தலைவர் ஆசிரியர் மற்றும் தலைவர்கள் பங்கேற்பு

சென்னை, டிச. 19- மறைந்த மேனாள் தி.மு.க. பொதுச் செயலாளர் நினைவில் வாழும் இனமானப் பேராசிரியர் க.அன்பழகனாரின் நூற்றாண்டு நிறைவு விழா பொதுக் கூட்டம் நேற்று (18.12.2022) மாலை சென்னை வேப்பேரியில் உள்ள பெரியார் திடலில் நடைபெற்றது.

சென்னை கிழக்கு மாவட்ட தி.மு.க. சார்பில் ஏற்பாடு செய்யப்பட்டிருந்த இந்த பொதுக்கூட்டத்துக்கு தி.மு.க. பொதுச்செயலா ளரும், நீர்வளத்துறை அமைச்சருமான துரை முருகன் தலைமை தாங்கினார். 

சென்னை கிழக்கு மாவட்ட செயலாள ரும், இந்து சமய அறநிலையத்துறை அமைச் சருமான பி.கே.சேகர்பாபு அனைவரையும் வரவேற்றார். 

திமுக பொருளாளரும், நாடாளுமன்ற மக்களவை தி.மு.க. குழு தலைவருமான டி.ஆர்.பாலு, முதன்மை செயலாளரும், நகராட்சி நிர்வாகத்துறை அமைச்சருமான கே.என்.நேரு, கட்சியின் துணைப்பொதுச் செயலாளர்கள் இ.பெரியசாமி, க.பொன்முடி, நாடாளுமன்ற உறுபபினர்கள் ஆ.ராசா, அந்தியூர் செல்வராஜ், கனிமொழி ஆகியோர் முன்னிலை வகித்தனர். 

தலைவர்கள் உரை

தி.மு.க. தலைவர் முதலமைச்சர் மு.க.ஸ்டாலின், திராவிடர் கழகத் தலைவர் ஆசிரியர் கி.வீரமணி, தமிழ்நாடு காங்கிரஸ் தலைவர் கே.எஸ்.அழகிரி, ம.தி.மு.க. பொதுச் செயலாளர் வைகோ, மார்க்சிஸ்ட் கம்யூ னிஸ்டு கட்சியின் மாநில செயலாளர் கே.பாலகிருஷ்ணன், இந்திய கம்யூனிஸ்டு கட்சி யின் மாநில செயலாளர் இரா.முத்தரசன், இந்திய யூனியன் முஸ்லிம் லீக் தேசிய தலைவர் கே.எம்.காதர்மொய்தீன், விடுதலை சிறுத்தைகள் கட்சி தலைவர் தொல்.திருமாவ ளவன், மனிதநேய மக்கள் கட்சி தலைவர் எம்.எச்.ஜவாஹி ருல்லா, கொங்குநாடு மக்கள் தேசிய கட்சியின் பொதுச் செயலாளர் ஈ.ஆர்.ஈஸ்வரன், தமிழக வாழ்வுரிமை கட்சி தலைவர் தி.வேல்முருகன் ஆகியோர் பங் கேற்று பேராசிரியர் க.அன்பழகனாரின் தொண் டினை விளக்கி வாழ்த்துரை வழங்கினர். நிறைவாக எழும்பூர் தெற்கு பகுதிச் செயலாளர் வி.சுதாகர் நன்றி கூறினார்.

சிறப்பிதழ் வெளியீடு

இவ்விழாவில் பேராசிரியர் க.அன்பழகன் நூற்றாண்டு நிறைவு விழா முரசொலி சிறப்பிதழை முதல்-அமைச்சர் மு.க.ஸ்டா லின் முன்னிலையில் அமைச்சர் துரைமுரு கன் வெளியிட திராவிடர் கழக தலைவர் ஆசிரியர் கி.வீரமணி பெற்றுக்கொண்டார். 

ஒளிப்பட கண்காட்சி

முன்னதாக நிறைவு விழா பொதுக்கூட் டத்தின் ஒரு பகுதியாக பேராசிரியர் க.அன்பழகனாரின் ஒளிப்பட கண்காட் சியை முதல்-அமைச்சர் மு.க.ஸ்டாலின் முன்னிலை யில் திராவிடர் கழக தலைவர் ஆசிரியர் கி.வீரமணி  அவர்கள் திறந்து வைத்தார். அதைத் தொடர்ந்து கூட்டணி கட்சி தலைவர்களுடன் முதல்-அமைச்சர் மு.க.ஸ்டாலின் அந்த ஒளிப்பட கண்காட் சியை பார்வையிட்டார்.

இவ்விழாவில் திராவிடர் கழக துணைத் தலைவர் கவிஞர் கலி.பூங்குன்றன், பொருளாளர் வீ.குமரேசன், வழக்குரை ஞரணித் தலைவர் த.வீரசேகரன் மற்றும் அமைச்சர் பெருமக்கள் தி.மு.க. நாடாளுமன்ற, சட்ட மன்ற மேனாள், இந்நாள் உறப்பினர்கள், பல்வேறு நிர்வாகிகள், தொண்டர்கள் பெருந்திரளாக பங்கேற்று சிறப்பித்தனர்.

நூற்றாண்டு நிறைவு விழாவில் பேராசிரியரின் படம் திறப்பு!

December 19, 2022 • Viduthalai

இனமானப் பேராசிரியர் அவர்களுடைய நூற்றாண்டு நிறைவு விழாவில் முதலமைச்சர் புகழாரம்!

  December 19, 2022 • Viduthalai

 தமிழன் இருக்கும்வரை, தமிழ்நாடு இருக்கும்வரை, திராவிடம் இருக்கும்வரை, 

திருக்குறள் இருக்கும்வரை இனமானப் பேராசிரியரின் புகழ் இருக்கும் 

கலைஞரும், பேராசிரியரும் காட்டிய வழியிலேயே 'திராவிட மாடல்' ஆட்சியை நடத்திக் கொண்டுள்ளோம்

இனமானப் பேராசிரியர் அவர்களுடைய நூற்றாண்டு 

நிறைவு விழாவில் முதலமைச்சர் புகழாரம்!

சென்னை, டிச.19 தலைவர் கலைஞரும், இனமானப் பேராசிரி யரும் போட்டுத் தந்த 'திராவிட மாடல்' அரசை சிறப்பாக நடத்துவோம் - அவர்கள் வழியில் நம் கொள்கைப் பயணம் தொடரும் என்றார் முதலமைச்சர் மு.க.ஸ்டாலின் அவர்கள்.

நேற்று (18.12.2022)  மாலை சென்னை பெரியார் திடலில் உள்ள நடிகவேள் எம்.ஆர்.இராதா மன்றத்தில் நடைபெற்ற மேனாள் திராவிட முன்னேற்றக் கழகப் பொதுச்செயலாளர் இனமானப் பேராசிரியர் க.அன்பழகன் அவர்களின் நூற்றாண்டு நிறைவு விழாவில் முதலமைச்சர் மு.க.ஸ்டாலின் அவர்கள் உரையாற்றினார்.

அவரது உரை வருமாறு:

மதச் சார்பற்ற முற்போக்குக் கூட்டணிக் கட்சித் தலை வர்கள்  பங்கேற்கக்கூடிய என் பெரியப்பா இனமானப் பேராசிரியர் அவர்களுடைய நூற்றாண்டு நிறைவு விழா பொதுக்கூட்டத்திற்கு தலைமையேற்று உரையாற்றியிருக்கக் கூடிய தி.மு.கழகத்தின் பொதுச்செயலாளரும், நீர்வளத்துறை அமைச்சருமான ஆருயிர் அண்ணன் துரைமுருகன் அவர்களே,திராவிடர் கழகத் தலைவர். தமிழர் தலைவர் மானமிகு அய்யா ஆசிரியர் அவர்களே,

தமிழ்நாடு காங்கிரஸ் கமிட்டியின் தலைவர் மதிப்பிற் குரியகே.எஸ்.அழகிரி  அவர்களே, மறுமலர்ச்சி திராவிட முன் னேற்றக் கழகத்தின் பொதுச் செயலாளரும், மாநிலங்களவை உறுப்பினருமான என்னுடைய ஆருயிர் அண்ணன் வைகோ அவர்களே, மார்க்சிஸ்ட் கம்யூனிஸ்ட் கட்சியின் மாநிலச் செயலாளர் தோழர் கே. பாலகிருஷ்ணன் அவர்களே, இந்திய கம்யூனிஸ்ட் கட்சியின் மாநிலச் செயலாளர் தோழர்  இரா. முத்தரசன் அவர்களே,விடுதலை சிறுத்தைகள் கட்சியின் தலைவரும், எழுச்சித் தமிழரும், நாடாளுமன்ற உறுப்பின ருமான என்னுடைய இனிய சகோதரர் தொல். திருமாவளவன் அவர்களே,

இந்தியன் யூனியன் முஸ்லீம் லீக்கின் தேசியத் தலைவர் பேராசிரியர் கே.எம். காதர்மொய்தீன் அவர்களே,

மனிதநேய மக்கள் கட்சித் தலைவரும், சட்டமன்ற உறுப் பினருமான பேராசிரியர் எம்.எச். ஜவாஹிருல்லா அவர்களே,

கொங்கு நாடு மக்கள் தேசியக் கட்சியின் பொதுச் செயலாளரும், சட்டமன்ற உறுப்பினருமான ஈ. ஆர். ஈஸ்வரன் அவர்களே,

தமிழக வாழ்வுரிமைக் கட்சியின் தலைவரும், சட்டமன்ற உறுப்பினருமான  அருமை சகோதரர் தி.வேல்முருகன் அவர்களே,

இந்த நிகழ்ச்சிக்கு முன்னிலை ஏற்றுள்ள தி.மு.க. துணைப் பொதுச் செயலாளர்  நகராட்சி நிர்வாகத் துறை அமைச்சர் அய். பெரியசாமி அவர்களே,

தி.மு.க. முதன்மைச் செயலாளர் கே.என். நேரு அவர்களே,

உயர்கல்வித் துறை அமைச்சர் முனைவர் க. பொன்முடி அவர்களே,

மாநிலங்களவை உறுப்பினரும் தி.மு.க. துணை பொதுச் செயலாளருமான அந்தியூர் செல்வராஜ் அவர்களே,

தொடக்கத்தில் அனைவரையும் வரவேற்று அமர்ந் திருக்கக்கூடிய தி.மு.க. மாவட்டச் செயலாளர், அமைச்சர், என்னுடைய இனிய சகோதரர் சேகர் பாபு அவர்களே,

மாண்புமிகு அமைச்சர் பெருமக்களே,  சட்டமன்ற, நாடா ளுமன்ற மேனாள், இந்நாள் உறுப்பினர்களே, வணக்கத் திற்குரிய மேயர் ஆர்.பிரியா அவர்களே, 

உள்ளாட்சிப் பிரதிநிதிகளே, தி.மு.க. தலைமைக் கழக நிர்வாகிகளே,  மாவட்ட தி.மு.க. நிர்வாகிகளே,

இந்த நிகழ்ச்சியிலே பங்கேற்று இந்த நிகழ்ச்சிக்கு சிறப்பு சேர்த்துக் கொண்டிருக்கக்கூடிய என்னுடைய இனிய சகோதரர்,  பேராசிரியருடைய அருமை மைந்தன் அன்புச் செல்வன் உள்ளிட்ட அந்தக் குடும்பத்தைச் சார்ந்திருக்கக் கூடிய அருமை சகோதரர்களே, சகோதரிகளே, 

மதச் சார்பற்ற முற்போக்குக் கூட்டணியைச் சார்ந்த தோழர்களே, செயல் வீரர்களே,

பத்திரிகை மற்றும் ஊடகத்துறையைச் சார்ந்திருக்கக்கூடிய தோழர்களே, நண்பர்களே,

என் உயிரோடு கலந்திருக்கக்கூடிய தலைவர் கலைஞர் அவர்களின் உயிரினும் மேலான அன்பு உடன்பிறப்புக்களே,

இனமான பேராசிரியர்பற்றி  கலைஞர் எழுதிய கவிதை

உங்கள் அனைவருக்கும் என்னுடைய அன்பான வணக்கம்.

தலைவர் கலைஞர் அவர்களின் கவிதை வரிகளைச் சொல்லி எனது உரையைத் தொடங்கலாம் என நினைக் கிறேன்...

* காலத்தால் மூத்தமொழி பெற்ற பிள்ளை

* ஞானத்தைத் தொழில் கேட்க வைத்திட்ட

  கோலச்சொல் அறிஞர்க்கு வாய்த்த தம்பி

* ஆலமரக் கழகத்தின் ஆணிவேர்த் தொணடர்க்கும் தோழன்

* ஓலமிகும் எதிர்ப்புதனை ஒடுக்குகின்ற உடன்பிறப்பு

* சீலமிகு பேராசிரியர் அன்பழகர்க்குப் பிறந்தநாள் வாழ்த்து சொல்வோம்!

- என்று எழுதிய கலைஞரின் வரிகளால் இனமானப் பேராசிரியப் பெருந்தகையின் புகழைப் போற்றுவோம் என்று முதலில் நான் தெரிவித்துக் கொள்ள விரும்புகிறேன்.

இங்கே பலர் குறிப்பிட்டுச் சொன்னார்கள். 

முதலில் நான் மனிதன்.

இரண்டாவது நான் அன்பழகன்.

மூன்றாவது நான் சுயமரியாதைக்காரன்.

நான்காவது நான் அண்ணாவின் தம்பி.

அய்ந்தாவது கலைஞரின் தோழன் - என்று சொல்லி இறுதிமூச்சு வரையில் வாழ்ந்தவர் நம்முடைய இனமானப் பேராசிரியர் அவர்கள்.

ஆறாவது, உரிமையோடு நான் கூற விரும்புவது,  அவர் எனது பெரியப்பா.

'எனக்கு இரண்டு அக்காள் உண்டு - ஆனால் அண்ணன் இல்லை. அண்ணனாக நினைப்பது பேராசிரியர் அவர்களைத் தான்" என்று தலைவர் கலைஞர் அவர்கள் சொல்வார்கள். சொன்னது மட்டுமல்ல அப்படியே நினைத்தார். மதித்தார், போற்றினார்.

அந்த வகையில் நானும் பேராசிரியர் அவர்களை பெரியப்பாவாக நினைத்தேன். மதித்தேன், போற்றி வந்தேன், இப்போதும் அப்படித்தான். 

இன்று அவருக்கு நூற்றாண்டு விழாவை எடுத்துக் கொண்டு இருக்கிறோம். இனமானப் பேராசிரியரின் நூற் றாண்டு தொடக்க விழாவினையொட்டி, சென்னை நந் தனத்தில் உள்ள ஒருங்கிணைந்த நிதித்துறை வளாகத்தில் கடந்த 19.12.2021 அன்று அவருடைய மார்பளவு சிலையை திறந்து வைத்தோம். 

இனமானப் பேராசிரியருக்கு செய்த சிறப்புகள்

கருவூல கணக்குத் தொடர்பான அலுவலகங்கள் உள் ளிட்ட 15 அரசு அலுவலகங்கள் இயங்கி வரும் அந்த வளாகத்திற்கு “பேராசிரியர் அன்பழகன் மாளிகை” எனப் பெயர் சூட்டியிருக்கிறோம்.

இனமானப் பேராசிரியர் அவர்கள் படைத்த நூல்களையும் நாட்டுடைமையாக்கி, அந்த நூலுரிமைத் தொகையை முழுமையாக பேராசிரியர் அவர்களின் குடும்பத்தாருக்கு வழங்கியிருக்கிறோம்.

பேராசிரியருக்கு நிரந்தரப் புகழ் சேர்க்கும் வகையில் 7,500 கோடி ரூபாய் மதிப்பில் பேராசிரியர் அன்பழகன் பள்ளி மேம்பாட்டுத் திட்டம் தொடங்கப்பட்டிருக்கிறது இந்த திராவிட மாடல் ஆட்சியில். 

நேற்று முன்தினம் 16 ஆம் தேதி தமிழகம் முழுவதும் பேராசிரியர் நூற்றாண்டு விழாவை திராவிட முன்னேற்றக் கழகத்தின் சார்பில், கழக அமைப்புகளின் சார்பில் இது வரையில் வரலாற்றில் இல்லாத அளவிற்கு 100 பொதுக் கூட்டங்களை நடத்தி முடித்திருக்கிறோம். நேற்று அண்ணா அறிவாலயம் கலைஞர் அரங்கில் நம்முடைய  கவிப்பேரரசு வைரமுத்து அவர்கள் தலைமையில் கவியரங்கம் மிகச் சிறப்பாக நடைபெற்று முடிந்திருக்கிறது.

இன்று நம்முடைய மதச்சார்பற்ற கூட்டணியில் இடம் பெற்றிருக்கக்கூடிய கட்சியின் தலைவர்கள் பங்கேற்கக்கூடிய இந்தக் கூட்டம் நடந்து கொண்டிருக்கிறது. 

நுங்கம்பாக்கம் பள்ளிக்கல்வி இயக்ககத்தில் அவரது உருவச்சிலை இன்னும் இரண்டு அல்லது மூன்று மாதக் காலத்திற்குள்ளாக திறக்கப்படவிருக்கிறது. அதற்கு முன் கூட்டியே நாளையதினம் அந்தக் கட்டடத்திற்கு பேராசிரியர் அன்பழகன் அவர்களுடைய பெயர் சூட்டப்பட்டு இருக்கிறது.  

இப்படி இந்த ஆண்டு முழுவதும் அவருடைய நூற்றாண்டு விழாவை நிறைவு விழாவாக நாம் கொண்டாடிக் கொண்டிருக்கிறோம். இன்று இந்த விழா பெரியார் திடலில் நடப்பது  மிகமிகப் பொருத்தமாக அமைந்திருக்கிறது. 

ஏற்கனவே குறிப்பிட்டுக் காட்டியிருக்கிறார்கள், பேராசிரியருடைய மணிவிழா இதே பெரியார் திடலில் அவர் யாரை தலைவராக ஏற்றுக் கொண்டோரோ அந்தத் தலைவர் கலைஞர் அவர்களே முன்நின்று நடத்திய அந்த மணிவிழா.

கலைஞர் கோப்பெருஞ்சோழன் - பேராசிரியர் பிசிராந்தையார்

அந்த விழாவில் பேராசிரியர் அவர்கள் பேசுகிறபோது குறிப்பிட்டுச் சொன்னார்-

''கலைஞர் கோப்பெருஞ்சோழன் என்றால் 

நான் பிசிராந்தையாராக என்றும் இருப்பேன்" என்று குறிப்பிட்டார்.

சொன்னபடியே இறுதிவரை இணைபிரியாது வாழ்ந்தார்.

இதே பெரியார் திடலில் பேராசிரியர் அவர்களின் வாழ்வும் தொண்டும் நூல் வெளியீட்டு விழா 2015 ஆம் ஆண்டு நடந்தது. அந்த விழாவிற்கு கலைவர் கலைஞர் அவர்கள் வரவேண்டும், சிறிது உடல்நலிவுற்று வீட்டில் இருக்கிறார்.  அவர் பங்கெடுப்பாரா, பங்கெடுக்க மாட்டாரா என்ற ஒரு கேள்விக்குறி. 

பேராசிரியர் இல்லத்தினர் கூட கோபாலபுரம் வந்து தலைவரிடத்தில் கேட்டார்கள். ”நான் நல்லாதான் இருக்கேன்... உடல் நலமில்லாமல் இருந்தாலும் நிச்சயம் வருவேன்” என்று தலைவர் கலைஞர் அவர்கள் அவரிடத்திலே சொன்னார். “நான் வரவில்லை என்பதற்காகப் பேராசிரியர் வருந்துகிறாரோ இல்லையோ- நான் நலமாக இருந்தால் போதும் என்று கருதுகிற உயிர் நண்பர் பேராசிரியர்" என்று உருக்கமாக குறிப்பிட்டுச் சொன்னார்.

என்னைப் பொறுத்தவரையில் அரசியல் வரலாற்றில் இரண்டு பெரும் ஆளுமைகள் இத்தகைய நட்பு - புரிதலோடு இருந்துள்ளார்கள் என்றால் அது கலைஞரும் பேராசிரியரு மாகத்தான் இருக்க முடியும். எதையும் பேராசிரியர் அவர்களிடம் சொல்லிவிட்டுச் செய்ய வேண்டும் என்று நினைப்பார் நம்முடைய தலைவர் கலைஞர் அவர்கள். கலைஞர் செய்தால் சரியாகத்தான் இருக்கும் என்று நினைப் பார் பேராசிரியர். இத்தகைய நண்பர்களை அரசியலில் பார்ப்பது என்பது மிக மிக மிக அரிது.

இந்த இயக்கத்தை தலைவர் கலைஞர் அவர்களுக்குப் பிறகு - தனக்குப் பிறகு வழிநடத்தத் தகுதியானவன் ஸ்டாலின்தான் என்பதை முதலில் சொன்னவர் எனது பெரியப்பா பேராசிரியர் அவர்கள்தான். அதாவது கலை ஞருக்கு முன்னதாகவே சொன்னவரும் என்னுடைய பெரியப்பா நம்முடைய பேராசிரியர் தான். 

என்னுடைய அரசியல் வாழ்க்கை ஆரம்பமே பெரியப்பா இனமானப் பேராசிரியரிடமிருந்துதான்!

என்னுடைய அரசியல் வாழ்க்கையே அவரிடத்தில் தான் ஆரம்பித்தது. பதின்மூன்று வயதில் பள்ளிச் சிறுவனாக, பள்ளி மாணவனாக இருந்தபோது, கோபாலபுரம் பகுதியில் இளைஞர் தி.மு.க. என்ற ஒரு அமைப்பை 20, 25 சிறுவர் களோடு சேர்ந்து நடத்தி, அதற்கென்று ஒரு அலுவலகத்தை உருவாக்க வேண்டும் என்று கோபாலபுரத்தில் தெருவின் மூலைப் பகுதியில், அய்ந்தாறு கடைகள் இருக்கிறது, அதில் ஒரு கடை முடிதிருத்தும் நிலையம். அந்த இடத்தில் தான் என்னுடைய அலுவலகத்தை ஆரம்பித்தேன். அதைத் திறந்து வைக்க வேண்டுமென்று தலைவர் கலைஞரிடத்தில், பேராசிரியரிடத்தில் சொல்லிக் கொண்டிருந்தபோது இரு வரும் கிளம்பினார்கள். நடந்தே வந்தார்கள், கோபாலபுரம் தெருவில் நடந்தே வந்து, அதைத் திறந்துவைக்க கத்திரிக் கோலை எடுத்து தலைவரிடத்தில் கொடுக்கிறேன், தலைவர் உடனே, நான் திறக்க மாட்டேன், அவரிடத்தில் கொடுத்து திறக்கச் சொல்லு என்ற பேராசிரியரிடத்தில் கொடுத்தார். 

ஆக, முதன்முதலில் அந்த அலுவலகத்தை திறந்து வைத்ததே என் பெரியப்பா பேராசிரியர் அவர்கள். அவர் கொடுத்த அந்த உற்சாகத்தின், ஊக்கத்தின் அடிப்படையில் தான் இன்று அண்ணா அறிவாலயத்தையே கட்டிக் காக்கக்கூடிய ஒரு மிகப்பெரிய பொறுப்பை ஏற்கக்கூடிய வாய்ப்பு எனக்கு கிடைத்திருக்கிறது. நான் அதைத்தான் நினைத்து பார்க்கிறேன். ஏன், கோட்டையைக் காக்கக்கூடிய அந்தப் பொறுப்பும் இன்றைக்கு கிடைத்திருக்கிறது என்றால், இந்தத் தமிழகத்தைக் காக்கக்கூடிய அந்தப் பொறுப்பும் எனக்கு கிடைத்திருக்கிறது என்றால், அந்த இளைஞர் அணிக்கு முதன்முதலாக அன்பகம் எங்களுக்கு எப்படி கிடைத்தது? அதற்கும் காரணம் பேராசிரியர் தான். 

இளைஞரணியின் செயலாளராக நான் பொறுப்பேற்று பணியாற்றிக் கொண்டிருந்தபோது, தலைமைக் கழகமாக செயல்பட்டுக் கொண்டிருந்த அன்பகத்திலிருந்து காலி செய்து அறிவாலயத்திற்கு தலைமைக் கழகம் வருகிறது. அப்போது அன்பகத்தை எப்படி பயன்படுத்துவது என்று யோசித்துக் கொண்டிருந்தபோது, தொழிலாளர் அணி கேட்கிறது, மாணவர் அணி கேட்டுக் கொண்டிருக்கிறார்கள், இப்படி பல அணிகள் கேட்டுக் கொண்டிருக்கும்போது, இளைஞர் அணியின் சார்பாக நானும் போய்க் கேட்டேன். கலைஞர் முடியவே முடியாது, பிள்ளைக்கு கொடுத்து விட்டார்கள் என்று கெட்ட பெயர் எனக்கு வந்துவிடும், நான் கொடுக்க முடியாது என்று சொன்னார். 

அப்போது பேராசிரியர் ஒரு யோசனை சொன்னார், யார் இந்தக் கட்சிக்கு பத்து லட்சம் ரூபாய் நிதியை கொண்டுவந்து கொடுக்கிறாரோ அவரிடத்தில் கொடுக்கலாம் என்ற சொன்னார்.  ஆறு மாதம் கெடு கொடுத்தார்கள், அய்ந்தே மாதங்களில் பத்து இலட்சம் அல்ல, 11 லட்சம் ரூபாயை திரட்டிக் கொண்டுபோய் கொடுத்தோம். ஆக, போட்டி வைத்து, அந்தப் போட்டியின் மூலமாக அந்த இளைஞர் அணி அமைப்புக்கு அந்தக் கட்டடத்தைப் பெற்றுத் தந்த வரும் என்னுடைய பெரியப்பா பேராசிரியர் அவர்கள்தான். 

'கலைஞருடைய ஆற்றல் ஸ்டாலினின் செயலில் தெரிகிறது' என்று நாற்பது ஆண்டுகளுக்கு முன்பே என்னைப் பாராட்டியவர் பேராசிரியர் அவர்கள்.

''இன்னும் நூறு ஸ்டாலின்கள் வேண்டும்!''

மு.க.ஸ்டாலின் வளர்வதைப் போல் இன்னும் நூறு ஸ்டாலின்கள் வரவேண்டும் என்று மேடைகளில் என்னைப் பாராட்டியவரும் பேராசிரியர் அவர்கள். வாரிசு, வாரிசு என்று இன்றைக்கு சொல்லிக் கொண்டிருக்கிறார்களே, அந்த வாரிசு என்ற  குற்றச்சாட்டை என் மீது சுமத்தியபோது, கல்வெட்டு போல எனக்கு பாராட்டுப் பத்திரம் கொடுத்தவரும் நம்முடைய பேராசிரியர் அவர்கள்தான்.

அவர் சொன்னார், ''கலைஞருக்கு மட்டுமல்ல எனக்கும் ஸ்டாலின் வாரிசுதான். அடுத்த தலைமுறையைப் பாதுகாக்க வேண்டிய கடமை அவருக்கு உள்ளது” என்று துணிச்சலாகச் சொன்னவர் நம்முடைய பேராசிரியர் அவர்கள்தான். 

இவை அனைத்துக்கும் மேலாக, நம்முடைய பொதுச் செயலாளர் அவர்கள் சொன்னதுபோல, தி.மு.கழகத்தின் செயல் தலைவராக என்னை முன்மொழிந்தவர் நம்முடைய பேராசிரியர் அவர்கள்தான். தலைவர் கலைஞர் அவர் களுடைய மறைவிற்குப் பிறகு, என்னை தலைவராக முன்மொழிந்தவரும் என்னுடைய பெரியப்பா பேராசிரியர் அவர்கள்தான். நான் இன்று இந்தளவுக்குத் தகுதி பெற்றவனாக இருக்கக் காரணம், அனைத்துக்கும் காரணம் நம்முடைய பேராசிரியர் அவர்கள்தான்.

அவர் இன்னும் சில ஆண்டுகாலம் வாழ்வார் என்று நான் ஆசைப்பட்டேன். அவர் உடல் நலிவுற்று இல்லத்தில் ஓய்வெடுத்துக் கொண்டிருந்தபோது, நானும், நம்முடைய பொதுச்செயலாளர் அவர்களும், நம்முடைய தி.மு.கழக முன்னோடிகளும் எல்லாம் அடிக்கடி போய்ப் பார்த்தோம். நாங்கள் சொல்லிவிட்டு வருவோம், இன்னும் இரண்டு வருடங்கள் இருக்கப் போகிறீர்கள், நூற்றாண்டு விழாவை உங்களைவைத்து நாங்கள் கொண்டாடப் போகிறோம் என்று சொல்லிவிட்டு, சொல்லிவிட்டு வருவோம். ஆனால், அந்த வாய்ப்பு கிட்டாமல் போய்விட்டது. அந்த வாய்ப்பு கிட்டாமல் போனாலும், அவர் மறைவிற்குப் பிறகு, இந்த நூற்றாண்டு விழாவை எவ்வளவு சிறப்பாக நடத்த வேண்டுமோ அவ்வளவு சிறப்பாக நடத்த வேண்டும் என்று முடிவு செய்து நடத்திக் கொண்டிருக்கிறோம். கோப்பெருஞ்சோழனைத் தொடர்ந்த பிசிராந்தையாராகப் பேராசிரியர் அவர்கள் நம்மை விட்டுவிட்டுச் சென்று விட்டார்.

பேராசிரியருக்கு இணை பேராசிரியர்தான்!

உடல்நலம் பாதிக்கப்பட்டு இருந்த பேராசிரியரை வாரத் துக்கு இரண்டு மூன்று நாட்கள் நாங்கள் சென்று பார்க்கும் போது எல்லாம் அவர் சொல்வார், “எவ்வளவு பணிகள் இருக்கிறது, நீ ஏன் வருகிறாய், நான் நன்றாகத்தான் இருக் கிறேன்” என்று பலமுறை சொல்லியிருக்கிறார். அந்த புன்சிரிப்பு முகம் இன்னமும் என் நெஞ்சில் நிழலாடிக் கொண்டிருக்கிறது. அவர் எந்தளவுக்கு கோபக்காரரோ - அந்தளவுக்குப் பாசக்காரர் என்பதை மறந்துவிட முடியாது. 

பேராசிரியருக்கு இணை பேராசிரியர்தான். இன்றைக்கு அவர் புகழை நாம் போற்றிக் கொண்டு இருக்கிறோம் என்றால் அவரைப் பெருமைப்படுத்துவதற்காக மட்டுமல்ல, தலைவர் கலைஞரும்; இனமானப் பேராசிரியரும் அவர்கள் வாழ்ந்த காலத்திலேயே அனைத்துப் பெருமைகளையும் பெற்றுவிட்டார்கள். இனிமேல் நாம் பெருமைப்படுத்த வேண்டிய அவசியமே கிடையாது. 

இன்றைக்கு பேராசிரியரை நாம் நினைவுகூருகிறோம் என்றால், அவருடைய வாழ்நாளில் பார்த்தீர்களென்றால், அவர் எழுதிய புத்தகங்களாக இருந்தாலும், அவர் பேசிய பேச்சுக்களாக இருந்தாலும், அவர் எழுதிய கட்டுரைகளாக இருந்தாலும், அவர், தன்மானம், சுயமரியாதை,  இனமானம், இந்த வார்த்தைகள் இல்லாமல் அவர் என்றைக்கும் இருந்ததே கிடையாது.  

வாழ்ந்தால் மக்களுக்காக வாழ்வேன்.

தமிழினத்துக்காக வாழ்வேன்.

தாழ்ந்து போன தமிழினம் தலைநிமிர வாழ்வேன்.

உரிமை இழந்த இனம் உரிமை பெற வாழ்வேன்- என்று உறுதி எடுத்துக் கொண்டு வாழ்ந்தவர் நம்முடைய பேராசிரியர் அவர்கள்.

ஆக, அவருடைய நூற்றாண்டு விழாவை கொண்டாடு கிறபோது,  நாமும் அவர் வழியிலே நடைபோட வேண்டு மென்று நான் இந்த நேரத்தில் கேட்டுக் கொள்கிறேன், உறுதி எடுத்துக் கொள்ள வேண்டும் என்று கேட்டுக் கொள்கிறேன். 

இந்த தன்மானம், இனமானம் இரண்டையும் தமிழ் மக்கள் நெஞ்சினில் விதைத்தது திராவிட இயக்கத்தின் வெற்றி!

நமது 'திராவிட மாடல்' அரசு!

திராவிட இயக்கக் கொள்கையை மையப் பொருளாகக் கொண்டுதான் இன்று திராவிட மாடல் ஆட்சியை நாம் நடத்திக் கொண்டிருக்கிறோம். இந்த திராவிட மாடல் ஆட்சியின் கொள்கை வலிமையை நான் கலைஞரிடம் இருந்தும் பேராசிரியரிடம் இருந்தும்தான் கற்றுக் கொண்டேன். அதே போல் அனைவரும் பெற்றுக் கொள்ள வேண்டும் என்பதற்காகத்தான், நம்முடைய இளைஞர் அணியின் சார்பில், மாணவர் அணியின் சார்பிலே 234 தொகுதிகளில் திராவிட மாடல் பயிற்சி  பாசறைக் கூட்டம் என்ற அந்தக் கூட்டங்களை நாம் நடத்தி முடித்திருக்கிறோம். நடத்தி முடித்திருக்கக்கூடிய இளைஞர் அணிக்கும், மாணவர் அணிக்கும் என்னுடைய வாழ்த்துகளை இந்த நேரத்தில் தெரிவிக்கின்ற அதே நேரத்தில், அது ஒன்றிய அளவிலே, கிராம அளவிலே, பட்டித் தொட்டிகள்தோறும் அந்த பாசறைக்  கூட்டங்கள் தொடர்ந்து நடைபெற வேண்டும். இதுதான் பேராசிரியருக்கு செலுத்த வேண்டிய உண்மையான மரியாதையாக அமைந்திட முடியும், அவருடைய புகழுக்கு பெருமை சேர்த்திட முடியும். 

தமிழன் இருக்கும் வரை,

தமிழ்நாடு இருக்கும் வரை,

திராவிடம் இருக்கும் வரை,

திருக்குறள் இருக்கும் வரை,

பேராசிரியரின் புகழும் இருக்கும். 

நன்றி, வணக்கம்.

- இவ்வாறு திராவிட முன்னேற்றக் கழகத் தலைவரும், தமிழ்நாடு முதலமைச்சருமான மு.க.ஸ்டாலின் அவர்கள் உரையாற்றினார்.

நூற்றாண்டு நிறைவு விழாவில் பேராசிரியரின் படம் திறப்பு!

  December 19, 2022 • Viduthalai

அமைச்சராகப் பொறுப்பேற்ற மாண்புமிகு உதயநிதி ஸ்டாலின் அவர்களுக்கு தாய்க்கழகத்தின் பாராட்டும் - வாழ்த்தும்!

  December 14, 2022 • Viduthalai

துடிப்பும், செயல்திறனும் மிக்க தி.மு.க.வின் இளைஞரணி செயலாளர் மானமிகு உதயநிதி ஸ்டாலின் எம்.எல்.ஏ., அவர்கள் இன்று (14.12.2022) 'திராவிட மாடல்' அமைச்சரவையில் ஓர் அங்கமாக ஆகி, அமைச்சர் பொறுப்பை ஏற்க மானமிகு, மாண்புமிகு முதலமைச்சர் மு.க.ஸ்டாலின் அவர்கள் பரிந்துரைத்து, அப்பொறுப்பை ஏற்கிறார்!

தாய்க்கழகத்தின் மனம் நிறைந்த வாழ்த்துகள்!

இவர் சேப்பாக்கம்-திருவல்லிக்கேணி தொகுதி சட்டப்பேரவை உறுப்பினராக பெருவாரியான வாக்குகளால் தேர்ந்தெடுக்கப்பட்டு, தொகுதி மக்களின் பேரன்பினை தமது கடமையாற்றும் தொண்டுமூலம் அவர்தம் உள்ளம் கவர்ந்துள்ளார்!

இளைஞர்களுக்குக் கொள்கையைச் சொல்லி, ''திராவிட இயக்க நாற்றுகளான'' அவர்களை வளர்க்க, தக்கவர்களைக் கொண்டு கொள்கைப் பாசறைக் கூட்டங்கள்மூலம் திராவிட இயக்கத் தத்துவ வகுப்புகளை நடத்தி, விரும்பத்தக்க அரிய சாதனை செய்து வருவது பாராட்டுக்குரியது.

எல்லாவற்றிற்கும் மேலாக சீரிய பகுத்தறிவுக் கொள்கையாளர்.

அடக்கமாகப் பழகும் பண்பு அவரது உடைமை களில் ஒன்று என்பது அனைவரும் அறிந்ததே!

43 ஆவது வயதில் தனது தாத்தா 'முத்தமிழ் அறிஞர்' கலைஞர் அவர்கள் அமைச்சர் பொறுப்பு ஏற்றதுபோல, தனது 45 வயதில் அரசியல் பயிற்சிக் களத்தில் புதிய முக்கியப் பொறுப்பை ஏற்கிறார்!

இத்தலைமுறை இளைஞர்களுக்குள்ள ஆற்றல் தங்களது வாய்ப்பு வெளிச்சத்தின் (Exposure) மூலம் வெளிப்படல் மிக அதிகம்.

அவ்வகையில், அவர் பக்குவப்பட்டே இந்தப் பொறுப்பை ஏற்கிறார்!

ஏற்கெனவே தேர்தல் பிரச்சாரக் களத்தில் வென்று காட்டியதோடு, மக்களுக்குப் பதியும் வண்ணம் கருத்துகளைக் கூறி வாக்காளர்களை ஏற்க வைத்த திறமையாளர்!

இவரை 'வாரிசு அரசியல்' என்ற முத்திரையினால் ஒதுக்கிடுவது, விமர்சிப்பது - ஒன்று அறியாமை; இன்றேல் ஆணவப் பொறாமை! அலட்சியப் படுத்தப்பட வேண்டிய ஒன்று!

எதைப்பற்றியும் பகுத்தறிவு மனப்பான்மை யோடு பார்த்து, கவலைப்படாமல், தடைக்கற்களைத் தாண்டும் நெஞ்சுரத்தோடு அவர்தம் அரசியல் பயணம் அடுத்த மைல்கல்லாகத் தொடரட்டும்!

தகுதியானவரை அடையாளம் கண்டு பொறுப் பில் அமர்த்தும் 'சமூகநீதிக்கான சரித்திர நாயகர்' நம் முதலமைச்சருக்கு நமது பாராட்டுகள்!

புதிய பொறுப்பேற்று தனித்த முத்திரை பதித்து வரலாறு படைக்கட்டும்! இளைஞர் சமுதாயத்தின் எழுச்சி வீரரான - '5ஜி' (அய்ந்தாம் தலைமுறை) என்று நம்மால் முன்பே அழைக்கப்பட்ட மாண்பு மிகு அமைச்சர் உதயநிதி ஸ்டாலின் அவர்களுக்கு தாய்க் கழகத்தின் இனிய வாழ்த்துகள்!

கி.வீரமணி

தலைவர்,

திராவிடர் கழகம்

சென்னை

14.12.2022

தமிழ்நாடு அமைச்சராகப் பொறுப்பேற்ற உதயநிதி ஸ்டாலின் தந்தை பெரியார் - அன்னை மணியம்மையார் நினைவிடத்தில் மரியாதை

  December 14, 2022 • Viduthalai

தமிழர் தலைவரை சந்தித்து வாழ்த்துப் பெற்றார்

சென்னை - டிச. 14- இளைஞர் நலன் மற்றும் விளையாட்டுத் துறை அமைச்சராகப் பொறுப்பேற்ற மாண்புமிகு உதயநிதி ஸ்டாலின் அவர்கள் தந்தை பெரியார் - அன்னை மணியம்மையார் நினைவிடத்தில் மலர் தூவி மரியாதை செலுத்தினார். முன்ன தாக தமிழர் தலைவர் ஆசிரியர் அவர் களைச் சந்தித்து வாழ்த்து பெற்றார்.

தி.மு.க. இளைஞரணி செயலாளரும்,  சேப்பாக்கம்-திருவல்லிக்கேணி தொகுதி சட்ட மன்ற உறுப்பினருமான உதயநிதி ஸ்டாலின் அவர்கள் இன்று (14.12.2022) இளைஞர் நலன் மற்றும் விளையாட்டு மேம்பாட்டுத் துறை சிறப்புத் திட்டச் செயலாக்கத்துறை, வறுமை ஒழிப்புத் திட்டங்கள் மற்றும் ஊரகக் கடன்கள் துறை அமைச்சராகப் பொறுப்பேற்ற வுடன் தந்தை பெரியார் நினைவிடத் திற்கு வந்தவுடன் திராவிடர் கழகத் தலைவர் ஆசிரியர் கி.வீரமணி அவர் களை சந்தித்து பயனாடை அணிவித்து வாழ்த்துப் பெற்றார்.  

பின்னர், அவருக்கு ஆசிரியர் 

கி.வீரமணி அவர்கள் பொன்னாடை அணிவித்து வாழ்த்து தெரிவித்தார். திராவிடர் கழகத் துணைத் தலைவர் கவிஞர் கலி.பூங்குன்றன் திராவிட இயக்க நூல்களை வழங்கிப் பாராட்டினார்.

இதையடுத்து அமைச்சர் உதயநிதி ஸ்டாலின் அவர்கள் தந்தை பெரியார் நினைவிடத்திலும், அன்னை மணியம் மையார் நினைவிடத்திலும், சுயமரியா தைச் சுடரொளிகள் நினைவிடத்தில் மலர் வளையம் வைத்தும், மலர் தூவி யும் மரியாதை செலுத்தினார்.

இந்நிகழ்வில் திராவிடர் கழகப் பொதுச் செயலாளர் வீ.அன்புராஜ், பொருளாளர் வீ.குமரேசன், திராவிட மாணவர் கழக மாநில செயலாளர் 

ச.பிரின்சு என்னாரெசு பெரியார் உள் ளிட்ட கழகத் தோழர்கள் உடனிருந்தனர்.

இந்நிகழ்வில் இந்து சமயம் மற்றும் அறநிலையங்கள் மற்றும் சென்னை பெருநகர வளர்ச்சிக் குழுமத் துறை அமைச்சர் பி.கே.சேகர்பாபு, போக்குவ ரத்துத் துறை அமைச்சர் எஸ்.எஸ்.சிவசங்கர், தொழிலாளர் நலன் - திறன் மேம்பாட்டுத் துறை அமைச்சர் சி.வி.கணேசன், மின்சாரம், மதுவிலக்கு மற்றும் ஆயத்தீர்வைத் துறை அமைச்சர் வி.செந்தில் பாலாஜி, பள்ளிக்கல்வித் துறை அமைச்சர் அன்பில் மகேஸ் பொய்யாமொழி, வணிகவரி மற்றும் பதிவுத் துறை அமைச்சர் பி.மூர்த்தி, மத்திய சென்னை நாடாளுமன்ற உறுப்பினர் தயாநிதிமாறன், சென்னை மாநகர மேயர் ஆர்.பிரியா, சட்டமன்ற உறுப்பினர்கள் தாயகம் கவி, சி.வி.எம்.அ. எழிலரசன், மேனாள் சட்டமன்ற உறுப் பினர் ரவிச்சந்திரன், தி.மு.க. பகுதி நிருவாகி கோ.ஏகப்பன் மற்றும் தி.மு.க. நிருவாகிகள் பெருந்திரளாக இந்நிகழ் வில் பங்கேற்று வாழ்த்து தெரிவித்தனர்.

அட, அண்டப் புளுகு - அவுட்டுத் திரி ‘தினமலரே!'

 December 08, 2022 • Viduthalai

நேற்றைய (7.12.2022) ‘தினமலர்' 8 ஆம் பக்கத்தில் ‘இது உங்கள் இடம்' பகுதியில் ‘‘வீரமணிக்காக பேசிய ஸ்டாலின்'' என்ற தலைப்பில், யாரோ ஒரு ‘அனாமதேயம்' எழுதியுள்ளது. (‘தினமலரே'கூட எழுதி ஒருவர் பெயரில் வெளியிட்டிருக்கலாம்).

திராவிடர் கழகத் தலைவர் ஆசிரியர் மானமிகு கி.வீரமணி அவர்களின் பிறந்த நாள் விழாவில் (2.12.2022, சென்னை கலை வாணர் அரங்கம்) மு.க.ஸ்டாலின்- ‘மிசா' கைதியாக சென்னை மத்திய சிறையில் தன்மீது விழுந்த அடியை சிட்டிபாபுதான் தாங்கிக் கொண்டார் என்று இதுவரை சொல்லி வந்த மு.க.ஸ்டாலின், இந்த விழா வில் வீரமணிதான் தாங்கிக் கொண்டார் என்று சொன்னதாகக் கரடி விட்டுள்ளது.

முதலமைச்சர் பேச்சு ‘விடு தலை'யிலும் (3.12.2022) வெளி வந்துள்ளது - முரசொலியிலும் வெளிவந்துள்ளது.

‘‘நெருக்கடி நிலை அமல்படுத்தப்பட்ட நேரத் தில், நான் கைது செய்யப் பட்டு சிறைக்குச் செல் கிறேன். அதுதான் என் னுடைய முதல் சிறை அனுபவம், அப்போது எனக்கு 23 வயது. எனக்கு முன்னால், ஆசிரியர் அவர் களும் மற்ற தோழர்களும் கைது செய்யப்பட்டு சிறை யில் இருக்கிறார்கள், கொட் டடியுள் அடைக்கப்பட்டிருக் கிறார்கள். நான் உள்ளே அழைத்துச் செல்லப்பட்ட  அன்று, அங்கிருக்கக்கூடிய காவலர்களால் குண்டாந்தடியால் பலமாகத் தாக்கப் படுகிறேன். அப்போது என்மீது விழுந்த பெரும்பாலான அடிகளை, தன் உடம்பிலே தாங்கியவர் மறைந்த அண்ணன் சிட்டிபாபு அவர்கள். சிட்டிபாபு அவர்கள் மட்டுமல்ல, அண்ணன் ஆசிரியர் அவர்களும்தான், இந்த நேரத்தில் நான் நினைத்துப் பார்க்கிறேன். இன்று இருப்பதைவிட மிக மெலிந்த உருவாக இருந்தவன் நான்- அடி தாங்க உடம்பு மட்டுமல்ல, அடி என்றால் எப்படி இருக்கும் என் பதை அறியாத நிலையில் இருந்தவன் நான். 

அப்போது என் மீது விழுந்த அடியை தாங்கி, அதன் பிறகு மன தைரியத்தை கொடுத்தவர்தான் நம்முடைய மதிப்பிற்குரிய ஆசிரியர் அவர்கள். தன்னுயிரையும் காத்து என்னுயிரையும் காத்த கருப்புச் சட் டைக்காரர்தான் நம்முடைய ஆசிரியர் அவர்கள்.''

இதுதான் முதலமைச்சர் பேசியது.

உண்மை இவ்வாறு இருக்க, திரு.சிட்டி பாபுவை மறைத்து ஆசிரியரை மட்டும் முதன்மைப் படுத்திச் சொன் னதாகவும் ‘அவுட் டுத்திரி' ‘தினமலர்' அண்டப் புளுகாக அவிழ்த்துக் கொட்டுவானேன்?

ஏதோ இப்பொழுதுதான் மு.க.ஸ்டாலின் அவர்கள் இப்படிப் பேசியதாகச் சொல்லுகிறது. ஆசிரியர் வீரமணி அவர்களின் 75 ஆம் ஆண்டு பவள விழா நிகழ்ச்சியிலும் (2.12.2007) இந்தத் தகவலைச் சொன் னதுண்டே!

ஸ்டாலின் கூறியதை வீரமணி வழிமொழிந்து சொல்லவில்லையாம்.

ஆசிரியர் என்ன பேசவேண்டும், மு.க.ஸ்டாலின் என்ன பேசவேண்டும், எப்படியெல்லாம் வழிமொழிய வேண்டும் என்பதைத் ‘திரிநூலான தினமலரைக்' கேட்டுதான் நடந்து கொள்ளவேண்டுமோ?

மு.க.ஸ்டாலின் ‘மிசா'வில் சிறைக்கே போகவில்லை என்று சொல்லும் அண்ணாமலைகளைத் தூக்கித் தலையில் வைத்துக்கொண்டு ‘அரோகரா' போடும் கூட்டமாச்சே! எதைத்தான் எழுதாது!

‘தினமலரில்' வெளிவரும் கடிதத்தைப் பெயர் மாற்றி ‘காலைக்கதிரில்' அட்சரம் பிறழாமல் எழுதும் தகிடுதத்த ‘தினமலர்' களுக்கு மானமாவது, மண்ணாங்கட்டி யாவது!

தமிழர் தலைவர் ஆசிரியருக்கு முதலமைச்சர் மு.க.ஸ்டாலின் பொன்னாடை போர்த்தி பிறந்த நாள் வாழ்த்து!

 December 02, 2022 • Viduthalai

தமிழ்நாடு முதலமைச்சர் மு.க. ஸ்டாலின் அவர்கள் இன்று (2.12.2022) தமிழர் தலைவர் ஆசிரியர் கி. வீரமணி அவர்களின் 90 ஆவது பிறந்தநாளையொட்டி, அவரது இல்லத்திற்கு நேரில் சென்று அவருக்குப் பொன்னாடை அணிவித்து வாழ்த்து தெரிவித்து, அவருடைய வாழ்விணையர் மோகனா அம்மையாருக்கும் பொன்னாடை அணிவித்தார். நீர்வளத் துறை அமைச்சர் துரைமுருகன், உயர்கல்வித் துறை அமைச்சர் முனைவர் க. பொன்முடி, பொதுப்பணித் துறை அமைச்சர் எ.வ வேலு, நாடாளுமன்ற உறுப்பினர் எஸ். ஜெகத்ரட்சகன், முரசொலி செல்வம் ஆகியோர் தமிழர் தலைவர் ஆசிரியருக்குப் பொன்னாடை போர்த்தி பிறந்த நாள் வாழ்த்துகளைத் தெரிவித்துக் கொண்டனர். உடன்  திராவிடர் கழக பொதுச் செயலாளர் வீ.அன்புராஜ் (சென்னை, 2.12.2022).

-------++++---++-+---++ 

தாய்க் கழகத் தலைவர் ஆசிரியர் அய்யா நீடு வாழ்க!

December 02, 2022 • Viduthalai

தி.மு.க. தலைவர் முதலமைச்சர் மு.க.ஸ்டாலின் வாழ்த்துச் செய்தி!

நேரில் பிறந்த நாள் வாழ்த்துத் தெரிவித்த முதலமைச்சர் மு.க.ஸ்டாலின் அவர்களுக்குத் தமிழர் தலைவர் ஆசிரியர் அவர்கள் பொன்னாடை அணிவித்து நன்றி தெரிவித்தார் (சென்னை, 2.12.2022)

சென்னை, டிச.2- திராவிடர் கழகத் தலைவர் ஆசிரியர் கி.வீரமணி அவர்களின் 90ஆவது பிறந்த நாளை முன்னிட்டு தி.மு.க.தலைவர் முதலமைச்சர் மாண்புமிகு மானமிகு மு.க. ஸ்டாலின் அவர்கள் வாழ்த்துச் செய்தி வெளியிட்டுள்ளார். முதலமைச்சர் அவர்கள் வெளியிட்டுள்ள வாழ்த்துச் செய்தியில் "தாய்க் கழகத் தலைவர் ஆசிரியர் அய்யா நீடு வாழ்க!" என்று குறிப்பிட்டுள்ளார்.

முதலமைச்சர் மு.க. ஸ்டாலின் வெளியிட்டுள்ள வாழ்த்துச் செய்தி வருமாறு:-

'திராவிட இயக்கத்தின் திருஞான சம்பந்தர் என்ற பேரறிஞர் அண்ணாவின் புகழுரைக்கேற்ப, 10 வயது முதல் தந்தை பெரியாரின் இலட்சியத்தை முழங்கத் தொடங்கி, தொண்டறத்தைத் தொடர்ந்து மேற்கொண்டு, இளை யோருக்கு நிகராக சமூகநீதிப் போர்க்களத்தில் சளைக்காமல் போராடி, பகுத்தறிவு இனமான உணர்வினை ஊட்டி வரும் தாய்க் கழகமாம் திராவிடர் கழகத்தின் தலைவர் மானமிகு ஆசிரியர் அய்யா அவர்களுக்கு அகவை 90 என்பதில் அகம் மிக மகிழ்கிறேன். ‘திராவிட மாடல்' அரசின் சமூகநீதிக் கொள்கை சார்ந்த அனைத்துத் திட்டங்களுக்கும், சட்டப் போராட்டங்களுக்கும் உறுதுணையாய் வழிகாட்டியாய்த் திகழும் ஆசிரியர் அய்யா அவர்கள் நூறாண்டு கடந்தும் நலமோடு வாழ்ந்திட நெஞ்சார வாழ்த்துகிறேன்.

-இவ்வாறு திமுக தலைவர் முதலமைச்சர் மு.க.ஸ்டாலின் அவர்கள் வாழ்த்துச் செய்தியில் குறிப்பிட்டுள்ளார்.

தமிழர் தலைவர் ஆசிரியர் கி.வீரமணி 90ஆம் ஆண்டு பிறந்த நாள் தலைவர்கள் வாழ்த்து (சென்னை கலைவாணர் அரங்கம் - 2.12.2022)

  December 03, 2022 • Viduthalai

தமிழர் தலைவர் ஆசிரியர் கி.வீரமணி 90ஆம் ஆண்டு பிறந்த நாளன்று கலைவாணர் அரங்கத்தில் நடைபெற்ற விழாவில் 'திராவிட இயக்கப் போர்வாள்' மறுமலர்ச்சி திராவிட முன்னேற்றக் கழக பொதுச் செயலாளர் வைகோ எம்.பி., விடுதலைச் சிறுத்தைகள் கட்சியின் தலைவர் 'எழுச்சித் தமிழர்' தொல். திருமாவளவன் எம்.பி., இந்திய யூனியன் முஸ்லிம் லீக் தேசியத் தலைவர் பேராசிரியர் கே.எம். காதர்மொகிதீன்,  இந்திய கம்யூனிஸ்ட் கட்சி மாநிலச் செயலாளர் இரா. முத்தரசன்,  தமிழ்நாடு காங்கிரஸ் கமிட்டியின் ஊடகத் தொடர்பு செயலாளர் கோபண்ணா, இந்திய கம்யூனிஸ்ட்   (மார்க்சிஸ்ட்) கட்சி மாநிலச் செயலாளர் 

கே. பாலகிருஷ்ணன், பெருநகர சென்னை மாநகராட்சி மேயர்  ஆர். பிரியா, ஆகியோர் திராவிடர் கழகத்  தலைவர் ஆசிரியர் கி. வீரமணி  அவர்களுக்கு பொன்னாடை  அணிவித்தும் புத்தகங்கள் வழங்கியும்  வாழ்த்துகளை  தெரிவித்தனர்.

தமிழ்நாட்டின் மூத்த தலைவர் ஆசிரியர் அய்யா வீரமணி மேலும் நீண்ட காலம் வாழ்ந்து எங்களுக்கும், நாட்டுக்கும் வழிகாட்ட வேண்டும். பல்வேறு கட்சித் தலைவர்களின் வாழ்த்தும் பாராட்டும்!

தமிழ்நாட்டின் மூத்த தலைவர் ஆசிரியர் அய்யா வீரமணி மேலும் நீண்ட காலம் வாழ்ந்து

  December 03, 2022 • Viduthalai

எங்களுக்கும், நாட்டுக்கும் வழிகாட்ட வேண்டும்

பல்வேறு கட்சித் தலைவர்களின் வாழ்த்தும் பாராட்டும்!

சென்னை, டிச. 3- 90 வயதில் 80 ஆண்டு பொதுவாழ்வு என்று புதிய வரலாறு படைக்கும் தமிழர் தலைவர் ஆசிரியர் அவர்களின் 90ஆம் ஆண்டு பிறந்தநாள் நிகழ்வு 02.12.2022 அன்று மாலை கலைவாணர் அரங்கத்தில் அனைவராலும் மிகுந்த மகிழ்வுடனும், கருஞ்சட்டை தோழர்களின் உணர்ச்சிப் பெருக்குடனும் நடைபெற்றது.

ஆசிரியருக்கு நிகர் ஆசிரியரே

வரலாற்றுப் பெருமைமிகு நிகழ்வில், திராவிடர் கழகப் பொருளாளர் குமரேசன் அவர்கள்,   10 ஆவது அகவை தொடங்கி 90 ஆவது அகவையிலும்  தந்தை பெரியார், அன்னை மணியம்மையார் ஆகியோருக்கு பிறகு திராவிடர் கழகம் என்ற சுயமரியாதை, பகுத்தறிவு, பெண்ணுரிமை ஆகியவற்றை அடிப்படையாகக் கொண்டு இயக்கத்தை வழிநடத்தினார் என்றும், அவரது மற்ற கல்வி நிறுவனப் பணிகள், விடுதலையின் 60 ஆண்டு ஆசிரியர், இதழியல் பணிகள் ஆகியவற்றையெல்லாம் பட்டியலிட்டு, "ஆசிரிய ருக்கு நிகர் ஆசிரியரே" என்பதை உறுதியாகக் கூறி, அவர் வாழும் வரலாறு அவர் வாழும் காலத்தில் நாமும் வாழ்கிறோம் என்பதே பெருமை என்பதை பதிவு செய்து, நிகழ்வுக்கு வந்திருந்த அனைவரையும் வரவேற்றார்.

ஆசிரியரின் ஆயுள் நீள்வது மூலமாக, 

தமிழரின் நலமும் நீளும்

ஆசிரியருடன் 57 ஆண்டுகாலம் உடனிருந்து, பொதுத் தொண்டாற்றிய, ஆசிரியரின் நிழலாய் அமைந்த, கழகத் துணைத் தலைவர் கவிஞர் கலி.பூங்குன்றன் தலைமை உரை ஆற்றினார். அவரது தலைமை உரையில்:  திராவிட இனத்தின் மூத்த தலைவரின் பிறந்தநாள் நிகழ்வில் எப்படி மகிழ்ச்சியின் உச்சத்தில் அனைவரும் இருக்கிறோம், இது மகிழ்ச்சித் திருநாள் என்று தொடங்கி, 90 ஆண்டில் 80 ஆண்டு விகிதாச்சாரம் என்பது பொதுவாழ்வில் இவருக்கு மட்டுமே அமைந்திருக்கிறது என்றும், 88 ஆண்டுகளில் விடுதலையின் 60 ஆண்டு கால ஆசிரியர் என்ற விகிதாச்சாரத்தை பெற்றவரும் உலகில் இவர் ஒருவரே என்றும், ஆசிரியர் என்றால் பள்ளிக்கூட ஆசிரியர் அல்ல; ‘விடுதலை' ஆசிரியர் என்று தான் அனைவரும் அறிவர் என்றார்.

தொடர்ந்து, தந்தை பெரியார் அவர்கள் ஆசிரியரைப் பற்றி சொன்னவற்றையெல்லாம் அப்படியே இன்றைய தலைமுறையின் கண் முன் நிறுத்துவது போல்,  "இவரைப் போல்  முன் ஒருவர் வந்தார், வருகிறார் வரக்கூடும் என்று உவமை சொல்ல முடியாதவாறு வீரமணி நமக்கு கிடைத்திருக் கிறார்" என்றதையும், விடுதலை அலுவலக நாற்காலியில் ஆசிரியரின் தோளினைப் பற்றி அய்யா அவர்கள் அமர வைத்த நிகழ்வினை எல்லாம் கூறி, முதல் அரசியல் சட்டத் திருத்தம் என்றால் அய்யா நினைவுக்கு வருவார்; 76ஆவது சட்டத் திருத்தம் என்றால் ஆசிரியர் நினைவுக்கு வருவார் என்றார். ஆசிரியரின் சமூக நீதிப் பணிகளில்,  9000 ரூபாய் வருமான உச்ச வரம்பாணையை எதிர்த்தது, 69% இடஒதுக்கீடு, மண்டல் குழு பரிந்துரையை சட்டமாக்க அவரது உழைப்பு, அதற்காக இந்த இயக்கத்தின் பணி என்பதை எல்லாம் விவரித்து, சென்னை பெரியார் திடலில் பி.பி.மண்டல் அவர்கள் "இந்த பரிந்துரையை நாங்கள் சமர்ப்பித்து விட்டோம். இது செயல்படுத்தப்படுமா என்பது கேள்விக்குறி. இதை செயல்படுத்த வைக்கும் ஆற்றல் பெரியார் இயக்கத்திற்கும், தலைவர் வீரமணிக்கும்தான் உண்டு என்ற நம்பிக்கை எனக்கு இருக்கிறது" என்று சொன் னதை நினைவுப்படுத்தி, இன்று திராவிட மாடல் ஆட்சியால் நாளும் மகிழ்ச்சி அடைகிறார், தினமும் இளமையாய் உணர்கிறார் என்பதை விளக்கி, அதிலும் குறிப்பாக தந்தை பெரியாரின் நெஞ்சில் தைத்த முள்ளை, இந்த திராவிட மாடல் ஆட்சி அகற்றியது; தந்தை பெரியார் பிறந்த நாளை ‘சமூகநீதி நாள்' ஆகவும் அம்பேத்கர் பிறந்த நாளை ‘சமத்துவ நாளாகவும்' அறிவித்தது போன்றவை ஆசிரியருக்கு மகிழ்ச் சியை தருகிறது. இதனால் அவரின் ஆயுள் நீளும்; ஆசிரிய ரின் ஆயுள் நீள்வது மூலமாக தமிழர் நலமும் நீளும் என்றார். அவரின் தலைமையுரை, அனைத்துத் தோழர்களுக்கும் பெரும் கொள்கை உணர்ச்சியை தரும் வகையில் அமைந்தது.

பெரியார் எனும் பல்கலைக்கழகத்தில் நேரடியாக பயின்றவர் ஆசிரியர்

 சென்னை மாநகராட்சியின் மேயர் ஆர். பிரியா அவர்கள் தனது பாராட்டு உரையினை நிகழ்த்தினார். பெரியார் எனும் பல்கலைக்கழகத்தில் நேரடி யாக பயின்றவர் ஆசிரியர் என்றும், 1944ஆம் ஆண்டு  பகுத்தறிவு, ஜாதி ஒழிப்பு, பெண்ணுரிமை ஆகிய கொள் கைகள் அடிப்படையில் ‘திரா விடர் கழகம்' என்று பெயர் சூட்டப்பட்ட திராவிடர் கழகத் தின் தேரை வைர விழா தாண்டி, நூற்றாண்டு காண ஆசிரியர் வழிநடத்தும் விதத்தையும், ஆசிரியர் அவர்களின் பொதுச் செயலாளர், தலைவர் ஆகிய பொறுப்புகளை எல்லாம் விளக்கி, பெரியார் கொள்கைகளை உலகம் முழுவதும் பரப்பிக் கொண்டிருக்கும் ஆசிரியருக்கு பிறந்தநாள் வாழ்த்து களை தெரிவித்து நிறைவு செய்தார்.

காங்கிரசுக்கு தெரியாத சாதனைகள், 

ஆசிரியருக்கு தெரிந்தது

அகில இந்திய காங்கிரஸ் கமிட்டியின் தமிழ்நாடு செய்தி தொடர்பு செயலாளர் கோபண்ணா அவர்கள் தனது வாழ்த்துரையில் : தமிழ்நாடு காங்கிரஸ் கமிட்டியின் தலைவர் உயர்திரு கே. எஸ். அழகிரி அவர்களுக்கும் ஆசிரியர் அவர்களின் குடும் பத்திற்கும், திராவிடர் இயக்கத்திற்கும் இருக்கும் உறவினை எடுத்துரைத்து, அவரால் இந்நிகழ்விற்கு வர முடியாததற்கான காரணங்களை கூறி, தனக்கும் திராவிடர் இயக்கத்திற்கும் ஏற்பட்ட புரிதல் பற்றி பல்வேறு நிகழ்வுகளின் ஊடாக விளக்கி, அன்றைக்கு இருந்த காங்கிரசின் நோக்கம் இந்தியா வின் விடுதலையாக இருந்தது; இட ஒதுக்கீடாக அல்ல. ஆனால், தந்தை பெரியார் நடத்திய வகுப்புரிமைப் போராட் டம் பற்றி காமராஜர் அவர்கள் அன்றைய பிரதமர் நேருவிடம் வலியுறுத்தியதையும், அதற்குப் பிறகு ஏற்பட்ட முதல் சட்டத் திருத்தத்தை பற்றியும் கூறினார். தொடர்ந்து, 1952 இல் எந்த காங்கிரசை ஆழக் குழி தோண்டி புதைப்பேன் என்று பெரியார் சொன்னாரோ, அதே காங்கிரசில் இருந்த காம ராஜரை 1954 தமிழர் நலனுக்காக ஆதரித்ததையும், எடுத்துக் கூறி, "காமராஜரின் சாதனைகள்" என்ற நூல் காங்கிரசால் வெளிவராதபோது ஆசிரியர்  தான் வெளிக் கொண்டு வந்தார் என்றும், காங்கிரசுகாரர்களுக்கு கூட தெரியாத பல தகவல்களை அது உள்ளடக்கியிருந்தது என்றார்.  69% இட ஒதுக் கீட்டின் முழுப் பொறுப்பெ டுத்து, அந்த சாதனையை நிகழ்த்தியவர் ஆசிரியர் என்றும், சமூக நீதிக்காகவும் தமிழ் சமூகத்திற்காகவும் தொடர்ந்து ஆசிரியர் பாடுபட வேண்டும் என்ற தனது வாழ்த் தினை பதிவு செய்து அமர்ந்தார்.

ஆண்டவனுக்கே சவால் விடும் ஆசிரியர்

இந்திய கம்யூனிஸ்ட் (மார்க்சிஸ்ட்) கட்சியின் மாநில செயலாளர் தோழர் கே.பால கிருஷ்ணன் அவர்கள் தனது வாழ்த்துரையில்:  நம்புவதற்கு சந்தேகமான விஷயங்களில் ஒன்று, ஆசிரியருக்கு 90 வயது என்பதும். 90 வயதுக்கு இவர் சவால் விடுகிறார். ஆண்டவன் அருளால் தான் ஆயுள் நீளு கிறது என்பார்கள்; அந்த ஆண் டவனுக்கே சவால் விட்டு சுறு சுறுப்பாக 90 வயதில் ஆசிரியர் வாழ்கிறார் என்றும், ஆண்ட வனை நம்புகிற தத்துவத்திற்கும் அது சவாலாக அமைந் திருக்கிறது என்றார். ஆசிரியர் எப்போது அமர்கிறார், உணவு உண்கிறார் என்பது தெரியவில்லை. இன்றும் 16 வயது இளைஞனைப் போல் செயல்படுகிறார் என்றார். வாழ்நாள் முழுவதும் சனாதனத்தை எதிர்ப்பது என்ற நோக்கத்தோடு இன்னும் பல பத்து ஆண்டுகள் வாழ வேண்டும் என்று தான் வாழ்த்திய போதும், அப்படி வேலையை கொடுத்துக் கொண்டிருக்கிறார்கள் என்று ஆசிரியர் சிரித்த விதத்தை எடுத்துரைத்து, 80 ஆண்டுகளுக்கு முன் எந்த நம்பிக்கையில் அவரது ஆசிரியர் திராவிட மணி அவருக்கு பெயர் சூட்டினாரோ, அதேபோல் வீரராக வாழ்ந்து கொண்டிருக் கிறார் என்றார். பொதுக்கூட்டத்தில் கூட நடமாடும் நூலகம் போல், நீதிமன்றத்தில் விவாதிக்கும் சட்ட நுணுக்கங்களை சாமானிய மக்களும் புரியும் வண்ணம் எடுத்துரைக்கும் சட்ட நிபுணராக ஆசிரியர் இருக்கிறார் என்பதை எடுத்துரைத்து, இன்று பெரியார் அவர்கள் இருந்தாலும் பிரமித்திருப்பார், நம்மால் உருவாக்கப்பட்ட வீரமணி இந்த உலகம் முழுவதும் பெரியாரியத்தை கொண்டு செல்கிறார் என்றும், தொடர்ந்து திராவிடர் கழகம் பொதுவுடைமை இயக்கத்திற்கு பெரியார் - ஜீவானந்தம் - சிங்காரவேலர் ஆகியோருக்கு இருந்த நட்பினை விவரித்து, 69% இட ஒதுக்கீடு அடிப்படாமல் அந்த சாதனையை நிலை நிறுத்திய பெருமை ஆசிரியரையே சாரும் என்றார். பெரியாரின் எல்லாக் கொள்கைகளையும் முன்னெடுக்கிற வீரர் ஆசிரியர் என்ற பெருமை அவருக்கு இருக்கிறது என்றும், இன்றைக்கு ஆளும் ஒன்றிய பாஜகவின் சனாதன ஆட்சியால் சட்ட விழுமியகளுக்கு ஏற்பட்டு இருக்கும் ஆபத்தையும், மனு ஆட்சி நிறுவ துடிப்பதையும் எடுத்துரைத்து அதனை அழித்தொழிக்கும் போராட்டம் 2024 தேர்தலில் தான் அடங்கி இருக்கிறது என்றும், இந்தியாவை காப்பாற்ற அனைவரும் ஒரு அணியாய் திரள வேண்டும்; அதனை சனாதன ஆட்சியை வீழ்த்த, மற்றவர்களை இணைத்து கடமையாற்ற ஆசிரியர் அவர்கள்தான் வழி நடத்த வேண்டும் என்றும், இந்த மகத்தான பணிக்கும் தமிழ்நாட்டில் என்றென்றைக்கும் தலைவராக ஆசிரியர் தான் பணிபுரிவார் என்றுரைத்து, ஆசிரியரின் துணைவியார் அம்மா மோகனா மற்றும் குடும்ப உறுப்பினர்கள்  அனை வருக்கும் நன்றி சொல்லி அமர்ந்தார்.

அப்பா போருக்கு செல்கிறார், 

மகன் தொடங்கி வைக்க வேண்டும் என்கிறார்

இந்திய கம்யூனிஸ்ட் கட்சியின் மாநில செயலாளர் தோழர் இரா. முத்தரசன் அவர் கள் வாழ்த்துரை வழங்கினார். அவரது உரையில் :  ஆசிரிய ரின் வயது 90 என்று மேடை யில் பேசும் நாங்களும், எதிரில் அமர்ந்திருப்பவர்களும் குறிப்பிடு கிறோம். ஆனால், அவர் அதனை ஏற்றுக் கொள்ளவில்லை; பத்து வயது பாலகனாகவே திகழ்கிறார் என்றார். 89ஆம் ஆண்டு பிறந்தநாள் நிகழ்வில், இந்த வயதில் அலைய வேண்டாம் என்று சொல்லி மாட்டிக் கொண்டேன். எப்படி அலையாமல் இருக்க முடியும் என்று ஆசிரியர் கேட்டதையும், இன்றும் பேரணி நடந்தால் எல்லாரையும்விட முன்னாடியே நடந்து செல்வார். அவரது வேகம், சுறுசுறுப்பு தொடர்ந்து கொண்டே இருக்கிறது, இனியும் தொடரும் என்றார். அய்யாவின் கரம் பிடித்த ஆசிரியர், அவரின் கருத்தை கைவிடவில்லை. அய்யா எப்படி தேவைப்படுகிறாரோ, அதேபோல் அய்யாவின் கரம் பற்றிய ஆசிரியரும் தேவைப்படுகிறார் என்றார். அன்றைக்கு அய்க்க்கிய முன்னணியின் வெற்றிக்கு 1952இல் பெரியார் எப்படி பெரும்பாடு பட்டார் என்பதையும், பொதுவுடைமை சமுதாயம் அமைய பெரியார் நினைத்த அவரின் கொள்கை வழியில் ஆசிரியர் அவர்களும் அதே வழியில் முன் மாதிரியாக இருக்கிறார் என்றார். சமூக நீதிக்கு ஆபத்து வரும் அனைத்து நேரத்திலும் முதல் குரல் பெரியார் திடலில் தான் தொடங்கும். அக்குரலில் மேடையில் இருக்கும் நாங்களும் இணைந்து அதனைத் தடுக்க முயற்சி மேற்கொண்டு வருகிறோம் என்றார். 

மேலும், அவரின் இளமையின் ரகசியம் அவர் மேற்கொண்டுள்ள, ஏற்றுக்கொண்டுள்ள தத்துவமே ஆகும். அவர் ஏற்றுக்கொண்ட தத்துவம் விஞ்ஞானம்; விஞ்ஞானம் வளர்ந்து கொண்டே இருக்கும். விஞ்ஞானம் வெற்றி பெற வேண்டும் என்றும், அஞ்ஞானம் வெற்றி பெற அதன் வழியில் ஆட்சி செய்யும் பிஜேபி எப்படி செயல்பட்டு வருகிறது என்றும், பிஜேபியின் தமிழ், தமிழர் விரோதப் போக்கை பட்டியலுடன் விவரித்து, கல்லோடு பேசப்படும் சமஸ்கிருத மொழிக்கு அதிக நிதி, மக்கள் பேசும் தமிழ்மொழிக்கு மிகக் குறைவான நிதி என்பதையெல்லாம் புள்ளி விவரங்களுடன் விவரித்து, இதனை, இந்த பிஜேபி நாடகத்தை தோலுரித்துக் காட்ட தலைவர் தேவை என்றும், அதற்கு ஆசிரியர் தேவை என்றார். காத்திருக்கும் கொக்கு போல் ஆசிரியர் பிஜேபியின் அனைத்து நடவடிக்கைகளுக் கும் உடனடியாக அறிக்கை, போராட்டம் என்று வெளியிடும் விதத்தை பாராட்டி, ஹிந்தி மொழியினைத் திணித்தால், தார் சட்டியை அவர் தூக்கிக்கொண்டு செல்கிறார். பொதுவாக மகன் போருக்கு செல்வார், அப்பா வழியனுப்பி வைப்பார். ஆனால்,இங்கு போருக்கு அப்பா சொல்கிறார்; மகன் தொடங்கி வைக்க வர வேண்டும் என்கிறார். இப்படி எல்லாரையும் இணைப்பதற்கு ஆசிரியர் தேவை என்றார். மேலும், ஆளுநரின் சனாதனப் போக்கை கடுமையாக சாடி விவசாயிகளின் மீது நடத்தப்படும் கொடுமை, ஆன்லைன் ரம்மி தடை சட்ட மசோதாவுக்கு ஒப்புதல் அளிக்காதது போன்றவற்றையெல்லாம் விளக்கி வரும் டிசம்பர் 29 ஆளுநர் மாளிகை முற்றுகைப் போராட்டத்தை இந்திய கம்யூனிஸ்ட் கட்சி நடத்துவதை அனைவருக்கும் கூறி, இதனை ஆசிரியர் தீவிரப்படுத்த வேண்டும்,  நாங்களும் அதற்கு துணையாக இருக்கிறோம், உங்களை விட மாட்டோம், கரம் கோர்த்து வருவோம் என்று வாழ்த்துரை வழங்கி அமர்ந்தார்.

மிகப்பெரிய சாதனையாளர், 

சமூகநீதிக் காவலர்

இந்திய யூனியன் முஸ்லிம் லீக் தேசிய தலைவர் பேராசிரி யர் கே. எம். காதர் மொய்தீன் அவர்கள் தனது வாழ்த்துரை யில்:  நாள் இருக்கும் நாளெல் லாம் அவர் நலமாக வாழ வேண்டும் என்ற தனது விருப் பத்தினை தெரிவித்து, பெரியார் விட்டு சென்ற பணியை, அவர் போட்டுத் தந்த பாதையில், எந்தவித சபலங்களுக்கும் ஆளாகாமல், செய்து முடிப்ப தாக உறுதிமொழி ஏற்று, அந்த உறுதிமொழியினை நாளும் பிசகாமல், இவ்வளவு வருடமாக ஆசிரியர் தொடர்ந்து செயல்பட்டு வருகிறார் என்றும், பெரியார், அண்ணா கலைஞர், தளபதி ஆகியோரின் பணிகளையும்,  தமிழ் மக்களின் பெருமை, தமிழின் பெருமை, திராவிடப் பெருமை, வரலாறு அனைத்தையும் நாளும் எழுதி, பேசி, பரப்புரை செய்து மாற்றம் ஏற்படச் செய்யும் பெருமை ஆசிரியரே சாரும் என்றார். ஆசிரியர் மிகப்பெரிய சாதனையாளர்; சமூக நீதிக் காவலர் என்று அவரை பாராட்டுவது சரியானதாக இருக்கும் என்றார். இந்தியாவின் மிகப்பெரிய பிரச்சினை இட ஒதுக்கீடு. அதற்கு, அரசியல் கட்சியில் இருந்து மாற்றம், திருத்தம், தீர்வை நாம் எதிர்பார்க்க முடியாது. திராவிடர் கழகத் தலைவர் மூலமாகதான் அதற்கான தீர்வை பெற முடியும் என்பது தான் வரலாறு. அன்றைய வரலாறும் அது தான்; இன்றைய வரலாறும் அதுதான் என்றார். தொடர்ந்து, சமூக மாற்றம், இட ஒதுக்கீடு பிரச்சினை முன்பு இருந்ததைவிட இன்று அதிகம் இருப்பதை விவரித்து, அதனை எதிர்த்து முன்பும், இன்றும், இனியும் ஆசிரியர் வைத்துதான், அவரின் வழிகாட்டுதல்தான் தடுக்க முடியும் என்றார். சமூகநீதிக்கு பிரச்சினை என்றபோது, அனைத்து அரசியல் தலைவர்களை யும் ஓரணியில் திரட்டி அற்புதங்களை ஆசிரியர் செய்திருக் கிறார். இன்று இன்னும் வேகமாக தமிழ்நாட்டில் மட்டுமன்றி, இந்தியா முழுவதும் அவர் செல்ல வேண்டும்.உலகம் முழுவதும் பெரியாரை பரப்பிக் கொண்டிருக்கக்கூடிய அவர் பணி, அதற்கு நாம் ஆதரவாக நிற்க வேண்டும் என்றும், பெரியாரின் பாரம்பரியத்தை அவர் தொடர வேண்டும்; நாம் அனைவரும் அதற்கு உதவ வேண்டும் என்றும் வாழ்த்தி அமர்ந்தார்.

தளபதிக்கு தமிழர் தலைவர் 

கிடைத்திருப்பது பெரும் வாய்ப்பு

விடுதலை சிறுத்தைகள் கட்சியின் தலைவர் நாடாளு மன்ற உறுப்பினர் எழுச்சித் தமிழர் தொல்.திருமாவளவன் அவரது பாராட்டு உரையில்:  35 ஆண்டுகளாக தமிழர் தலைவரை அறிவேன் என்று தொடங்கி, கல்லூரி காலத்தில் அவரைப் பார்ப்பது , அவரின் உரையைக் கேட்பது, வாய்ப்பு கிடைக்கும் போது அவரோடு அமர்ந்து பேசுவது என்று இருந்த நாட்களை நினைவுபடுத்தி, அன்று ஆசிரியருக்கு 55 வயது. அன்று இருந்த அதே வேகம், சுறுசுறுப்பு இன்றும் எள்ளளவும் அவரிடம் குறையவில்லை என்றார். தமிழர் தலைவரின் உழைப்பு நமக்கே மலைப்பைத் தருகிறது என்றார். இந்த சுறுசுறுப்பும், இளமையும் அவருக்கு எங்கிருந்து வந்தது என்பதை அவரது பிறந்தநாள் அறிக்கையில் குறிப்பிட்டிருக்கிறார் என்று கூறி, தமிழர் தலைவரின் அறிக்கையில் பல்வேறு பகுதிகளை எடுத்து அதனை விளக்கினார். குறிப்பாக, எப்படி இளமை வந்தது என்று ஆசிரியரின் அறிக்கையில் பெரியாரின் பிரச்சார அணுகுமுறையை அவர் விவரித்த விதத்தையும், அருகில் இருந்து  அதனை ஆசிரியர் பார்த்ததையும், "ஓயாமல் உழைப்பதே மாறாத இளமைக்கு காரணம்" என்ற ஆசிரியரின் வார்த்தையை விளக்கி, கொள்கையைப் பரப்புதல் இருக்கும் இனிமையே இளமைக்குக் காரணம் என்பதையும், உடன் இருப்பவர்களின் எதையும் எதிர்பார்க்காத உழைப்பைப் பற்றிய ஆசிரியரின் குறிப்பையும், திராவிடர் கழகத் தோழர்களோடு ஒப்பிட்டு களத்தில் இருக்கும் கருஞ்சட்டை தோழர்கள் உழைப்பைப் பாராட்டி பேசினார். "ஓய்வு என்பது ஒருவகை நோய்" என்ற ஆசிரியரின் வரிகளை கூறி, வாழ்வில் அரசு வேலையில் ஓய்வு பெற்றாலோ, பேரப் பிள்ளைகள் தாத்தா என்று அழைத்தாலோ எப்படி உளவியல் ரீதியாக சலிப்பு வரும் என்பதையும், 95 வயது வரை சோம்பலின்றி உழைத்த பெரியாரை வழிகாட்டியாக எடுத்துக் கொண்ட ஆசிரியருக்கு என்றும் சோம்பல் எட்டிப் பார்க்காது என்றார். அடுத்தடுத்த தலைமுறை சனாதன சக்திகளை எதிர்த்துப் போராட பெரியார் என்ற ஆயுதத்தை அவர்கள் ஏந்தி நிற்பதை ஆசிரியர் விவரித்த விதத்தை விளக்கிப்  பாராட்டி, இந்த மண்ணை, சமூக நீதியை காக்க ஆசிரியர் சொன்ன செய்தி (னீமீssணீரீமீ) மிகவும் முக்கியம் என்றார். திராவிடர் கழகம் தேர்தலில் பங்கேற்காத இயக்கம். ஆனால், தேர்தலில் இருக்கும் கட்சி பார்த்துக் கொள்ளட்டும் என்று ஆசிரியர் நினைக்கவில்லை. மாறாக, இது பரம்பரை யுத்தம். இந்த யுத்தமானதை சமூகப் போரின் புதிய பரிணாமமாக நாம் பார்க்க வேண்டும் என்றும், 2024 பொதுத் தேர்தல்  அரசியல் தேர்தல் அல்ல என்ற ஆசிரியரின் எச்சரிக்கை மணியை விவரித்தார். தொடர்ந்து, 10% உயர் ஜாதி ஏழை களுக்கான இட ஒதுக்கீடு எப்படி இதர பிற்படுத்தப்பட்ட மக்களின் இட ஒதுக்கீடைப் பாதிக்கும் என்பதை பல்வேறு தகவல்களுடன் எடுத்துரைத்து, ஆசிரியரின் பார்வை என்பது பெரியாரின் பார்வை; அம்பேத்கரின் பார்வை என்றார். நமக்கு நல்வாய்ப்பாக திராவிட மாடல் ஆட்சி அமைந் திருப்பதை விளக்கி, மிகப் பெரிய பேரிடர், பேராபத்து, சூது தமிழ்நாட்டை சூழ்ந்து வரும் சூழலில், நமது முதலமைச்சர் ‘திராவிட மாடலை' இந்தியாவுக்கு அறிமுகப்படுத்தி இருக் கிறார் என்றார். 

தொடர்ந்து, இந்திய அரசியலை மண்டல் கமிஷன் முன் - பின் என்று எப்படி பிரித்துப் பார்க்க வேண்டும் என்பதை வரலாற்று குறிப்புகளோடு விளக்கி, ஜனநாயக சக்திகளை ஒன்றுப்படுத்தி, சனாதன சக்திகளை தனிமைப்படுத்தும் செயலை நாம் செய்ய வேண்டும் .என்றும் அதற்கு பலமாக இன்னும் பல பத்து ஆண்டுகள் ஆசிரியர் சுறுசுறுப்பாக இருப்பார் என்பதை அவரின் பணிகள் நமக்கு உணர்த்துகிறது என்றும், தளபதிக்கு தமிழர் தலைவர் கிடைத்திருப்பது ஒரு பெரும் வாய்ப்பு. கலைஞர் இல்லாத நேரத்தில், பெரியார் இல்லாத, நேரத்தில் இந்த ஆட்சிக்கு மட்டுமல்ல, அவருக்கு மட்டுமல்ல, விடுதலை சிறுத்தைகள் கட்சிக்கும், இடதுசாரிகளுக்கும், இதர ஜனநாயக சக்திகளுக்கும் தமிழர் தலைவர் ஓர் அரண். தமிழர்களுக்கும் அது பெரும் வாய்ப்பு என்று வாழ்த்தி அமர்ந்தார்.

10 வயதில் மேடை ஏறி 90 வயதிலும் மேடையில் பேசும் தலைவர் உலகில் இவர் மட்டுமே!

மறுமலர்ச்சி திராவிட முன் னேற்ற கழகத்தின் பொதுச் செயலாளர் நாடாளுமன்ற உறுப்பினர் திராவிட இயக்கப் போர்வாள் வைகோ அவர்கள் பாராட்டுரை வழங்கினார். 

அவரது உரையில்: நீதிக் கட்சி நடேசனார் தொடங்கி கலைஞர் வரை உள்ள திரா விட இயக்கத் தலைவர்களைப் பட்டியலிட்டு, அந்த வரிசையில் பொன்னெழுத்துகளால் பொறிக்கப்பட இருக்கும் தமிழர் தலைவரின் பெயர் என்று உரையை தொடங்கினார். 

தொடர்ந்து, தமிழர் தலைவர் ஆசிரியர் அவர்களின் வாழ்க்கைக் குறிப்பினை வயது வாரியாக கூறி, அவரது ஆற்றலை எடுத்துரைத்தார். ஆசிரியரின் முதல் மேடைப் பேச்சைப் பற்றி விவரித்து, பத்தாவது வயதில் மேடையில் ஏறிய இவர் 60 ஆண்டுகள் ஓர் இதழுக்கு ஆசிரியர். பத்தாவது வயதில் மேடை ஏறி, 90 வயதிலும் மேடையில் பேசும் தலைவர் உலகிலேயே ஆசிரியர் ஒருவர் தான் என்றார். பெரியாருடனான ஆசிரியரின் முதல் சந்திப்பையும், 16 வயதில் ஆசிரியர் எடுத்த முடிவையும், பெரியார் ஆசிரி யருக்குக் கல்விக்கு செய்த உதவியையும், ஆசிரியர் பெற்ற தங்கப்பதக்கத்தையும், ஆசிரியரின் திருமணத்திலும் அவ ருக்குச் சரியான இணையராக அம்மா மோகனா அவர்களை அய்யா அடையாளப்படுத்தியதையும், திருமண மேடையில் தனது நன்றி உரையில், 'எங்களுக்கு சிறைக்குச் செல்வதும் மாமியார் வீட்டுக்கு செல்வது போன்று தான்' என்ற ஆசிரிய ரின் கொள்கை உறுதிப்பாட்டினை எல்லாம் விளக்கினார். ஆசிரியரின் திருமணத்தில் புரட்சிக்கவிஞர் வரிகளை எடுத்து இயம்பி, இன்றும் அதற்கு பாத்திரமாக ஆசிரியர் விளங்கு வதை விளக்கினார். 

தொடர்ந்து, டில்லியில் பெரியார் மய்யம் இடிக்கப்பட்ட போது ஆசிரியருக்கும், அவருக்கும் இருந்த உணர்வுகளை உணர்வுப்பூர்வமாக எடுத்துக் கூறி , அதன் பின் நடந்த நிகழ்வுகளையும், பெரியார் மய்யம் வேறு இடத்தில் எழுப்பப் பட்டது மட்டுமல்லாமல், இடிக்கப்பட்ட இடமும் ஆசிரியரால் பெறப்பட்டதை விவரித்தார். தனது வாழ்வில் தான் செய்த மிக  மகிழ்ச்சியான காரியங்களில்  இதுவும் ஒன்றாக இருக்கும் என்றார். சனாதன சக்திகளை வீழ்த்த தமிழர் தலைவரின் வழிகாட்டுதலில், தளபதி ஆட்சி நடைபெற வேண்டும் என்றும், காசி ஆனந்தன் அவர்களின் கவிதையை உணர்வுப் பெருக்குடன் கூறி, இன்னும் நூறாண்டு அல்ல. 120 ஆண்டுகள் கடந்து ஆசிரியர் வாழ்ந்து சரித்திரம் படைப்பார் என்றார். அவருடைய பயணத்தை குறைத்துக் கொண்டு வாழ வேண்டும் என்றும், நீங்கள் நலமாக, வலுவாக இருந்தால்தான் எங்கள் தளபதிக்கு அது நலமாக, வலுவாக இருக்கும் என்று வாழ்த்தி நிறைவு செய்தார்.

சமூகநீதிக்கான கி.வீரமணி விருது!

வரலாற்றுச் சிறப்புமிகு நிகழ்வின் ஒரு பகுதியாக, வரலாற்று சிறப்புக்குரிய பெரியார் பன்னாட்டு அமைப்பின் சார்பில் 21 வருடமாக வழங்கப்பட்டு வரும் "கி.வீரமணி சமூகநீதிக்கான விருதினை", தமிழ்நாட்டின் முதலமைச்சர், சமூகநீதிக்கான சரித்திர நாயகர், திராவிடம் மாடல் ஆட்சியை நாள்தோறும் வழங்கிக் கொண்டிருக்கும் திராவிட முன்னேற்றக் கழகத்தின் தலைவர், தளபதி முத்துவேல் கருணாநிதி ஸ்டாலின் அவர்களுக்கு பெரியார் பன்னாட்டு அமைப்பின் சார்பில் பேராசிரியர் இலக்குவன் தமிழ், மருத்துவர் சோம இளங்கோவன், மருத்துவர் சரோஜா இளங்கோவன், அரசு செல்லையா ஆகியோர் தமிழர் தலைவர் முன்னிலையில் வழங்கி மகிழ்ந்தனர். 

பெரியார் உலகுக்கு ரூ.25 லட்சம் நன்கொடை

தொடர்ந்து, பெரியார் உலக மயம்; உலகம் பெரியார் மயம் என்ற தமிழர் தலைவரின் லட்சிய நோக்கில்  திருச்சி சிறுகனூரில் உருவாக இருக்கும் பெரியார் உலகத்திற்கு பெரியார் பன்னாட்டு அமைப்பின் சார்பில் ரூபாய் 25 லட்சம் வழங்கப்பட்டது.

குறிப்பு: முதல் அமைச்சரின் உரையும், கழகத் தலைவர் உரையும் தனியே காண்க!

(தொகுப்பு: சே.மெ.மதிவதனி)