“பக்தர்கள் பாலாபிஷேகம் செய்வது மூடத்தனமே!” - துக்ளக் ஒப்புதல்

  April 16, 2022 • Viduthalai

கேள்வி: எஸ்றா சற்குணம் அரசியல் பேசினால் மதச்சார்பின்மை. மதுரை ஆதீனம் அரசியல் பேசினால் மதவாதம் என்கிறார்களே, இது என்ன மாதிரியான மனநிலை? 

பதில்: இதுதான் மைனாரிட்டி தாஜா, ஹிந்து துவேஷ செக்யுலர் மனநிலை

- துக்ளக், 20.4.2022

மதுரை ஆதீனம் இன்னொன்றும் சொல்லியுள்ளாரே, ‘நான் சைவன், ஹிந்து அல்ல!’ என்று சொல்லியிருக்கிறாரே - அதைப் பற்றியும் குருமூர்த்தி குடுமி சிலாகிப்பது தானே!

சுப்பிரமணியசாமி காஞ்சி சங்கரமடம் சென்றால் சங்கராச்சாரியாரோடு  சரி சமமாக “ஜாம் ஜாம்“ என்று அமர்ந்திருக்கிறார் - ஒன்றிய இணை அமைச்சர் பொன்.இராதாகிருஷ்ணன் சங்கரமடம் சென்றால் தரையில் உட்கார வேண்டியிருக்கிறதே - அதையும் சிலாகிக்கலாமே!

அவாள் ஆடினால் பரதம் - இவாள் ஆடினால் சதுர் என்கிறாளே, அதையும் சற்றுச் சிலாகிக்கலாமே!

காஞ்சி ஜெயேந்திர சரஸ்வதி திருப்பதி ஏழுமலையான் கோயில் சன்னதியில் அத்துமீறி ஆகமங்களுக்கு விரோதமாக நுழைந்தாரே - இராமேசுவரம் இராமநாதன் கோயிலில் காஞ்சி விஜயேந்திர சரஸ்வதி அத்துமீறி, ஆகமவிதிகளை மீறிக் கர்ப்பக் கிரகத்தில் நுழைந்ததும், இந்தியாவின் குடியரசுத் தலைவர் மாண்பமை. இராமநாத் கோவிந்த், பூரி ஜெகந்நாதன் கோயிலிலும், அஜ்மீர் பிர்மா கோயிலிலும் வழிபடச் சென்ற போது தடுக்கப்பட்டாரே -அதைப் பற்றியும் குடுமிகள் சிலாகிக்கக் கூடாதா?

கேள்வி: பத்திரிகை மோகம், செல்போன் மோகம், டி.வி.மோகம் இவற்றில் எது உயர்வானது?

பதில்: இன்றைய நிலையில், எதுவும் எதையும் விட உயர்வானதல்ல. எது எதை விட மோசம் என்று வேண்டுமானால் கூறலாம்.

துக்ளக் - 20.4.2022

கல்லைக் கடவுள் என்பதை விட மோசடி, சாக்கடையும், கழிவும் கலக்கும் நீரை புனிதம், அதில் குளித்தால் பாவம் போகும் என்பதும் மோசமா - மோசடியா?

கேள்வி: தங்கள் அபிமான நடிகரின் நூறு அடி ‘கட்அவுட்’ மீது, உயிரைப் பணயம் வைத்து ஏறி, பாலாபிஷேகம் செய்து, பணத்தை வீணடிக்கும் ரசிகர்களைப் பற்றி?

பதில்: கோவில்களில் பக்தர்கள் கடவுளுக்குப் பாலாபிஷேகம் செய்வது மூட நம்பிக்கை, முச்சந்தியில் நடிகர்கள், நடிகைகள், அரசியல் தலைவர்களுக்கும், பாலாபிஷேகம் செய்வது முற்போக்கு, இததான் திராவிடச் சித்தாந்தம் தமிழகத்தில் செய்திருக்கும் சமூக நீதிப்புரட்சி.

- துக்ளக், 20.4.2022

கோவில்களில் நடக்கும் பாலாபிஷேக மும், நடிகர் நடிகைகளுக்கு அரசியல் தலைவர்களுக்குச் செய்யும் பாலாபிஷேக மும், மூடநம்பிக்கைதான் என்று ‘துக்ளக்‘ ஒப்புக் கொண்டதற்கு பாராட்டு!

இதில் திராவிடச் சித்தாந்தம் எங்கிருந்து வந்தது? சமூக நீதி எங்கிருந்து வந்தது? மொட்டைத் தலைக்கும் முழங்காலுக்கும் முடிச்சுப் போடும் வேலைதானே இது?

எப்படியோ, கோயிலில் கடவுளுக்குப் பாலாபிஷேகம் செய்வது முட்டாள்தனம் என்று ஒப்புக் கொண்டது வரை சரி!

கேள்வி: வெளிநாடுகளில் தமிழர் பண்பாட்டை விட்டுக் கொடுக்காத தமிழக அரசியல்வாதி யார்? 

பதில்:  ராஜாஜி - காந்தி அமைதி நிறுவனத்தின் தலைவராக இருந்த ராஜாஜியை அமெரிக்கா அழைத்தது. அவர் அங்கு சென்றார். இங்கு எப்படி வேஷ்டி அணிந்து இருந்தாரோ, அங்கும் அப்படியே பயணம் செய்தார். அன்று உலகின் தலைசிறந்த தலைவராகக் கருதப்பட்ட ஜான் எஃப். கென்னடியை அதே உடையில் சந்தித்துப்  பேசினார்  பாரம்பரிய உடையில் இருந்த ராஜாஜியைப் பார்த்த கென்னடி, ‘‘அது போன்று சிந்தனையில் துல்லியமாகவும், மொழியில் அழகாகவும் பேசிய ஒருவரைப் பார்ப்பது அரிது’’ என்று கூறி னார். உடன் இருந்த இந்திய தூதுவர் பி.கே. நேரு, ‘’தனது காரியதரிசிகள், அவருக்காகக் காத்திருந்த மற்றவர்களைப் பற்றிச் சீட்டுக்களை கென்னடியிடம் அடிக்கடி கொடுத்த போது, அவர்களை விரட்டி அடித்த கென்னடி, ராஜாஜியால் ஈர்க்கப்பட்டார்’’ என்று குறிப்பிட்டார். நவீன கோட் போட்டால் தகுதி கூடாது. பாரம்பரிய வேஷ்டி கட்டினால் குறையாது.

- துக்ளக், 20.4.2022

ராஜாஜி வேட்டி கட்டியது சாதாரணமான தல்ல - பஞ்சக்கச்சம் அதை மறைப்பானேன்? ஆட்சிக்கு வந்தால் குலக்கல்வி - இதையும் சேர்த்து பேச வேண்டியதானே!

சரி. ராஜகோபாலாச்சாரியார் அமெரிக்கா வுக்குச் சென்றாலும் பஞ்சக் கச்சத்தோடு சென்றார் - வி.வி.கிரி அய்யரும், ஆர்.வெங்கட் ராமய்யரும் கோட், ஷூட்டுடன் சென்றனரே, அது எப்படியாம்?

அதுவும் சிங்கப்பூர் சென்ற வி.வி.கிரி அய்யர்வாள் தனக்குப் பிராமண சமையல் வாள் தான் வேண்டும் என்று அடம் பிடித்ததையும் கொஞ்சம் சேர்த்துக் கொள்ளலாமே!

 கேள்வி: “காஷ்மீர் ஃபைல்ஸ்” மாதிரி “குஜராத் ஃபைல்ஸ்” எடுக்க வேண்டும், என்று, கண்ணாடிக் கூண்டுக்குள் நின்று கல் எறிகிறதே காங்கிரஸ்? 

பதில்:  கோத்ரா ரயில் நிலையத்தில், இஸ்லாமிய பயங்கர வாதிகள் அயோத்தியிலிருந்து வந்த 59 ராம பக்தர்களை, ரயில்வே பெட்டியில் வைத்துப் பூட்டி, பெட்ரோலை ஊற்றி உயிருடன் கொளுத்திப் படுகொலை செய்தார்கள். அதனால் துவங்கியது குஜராத் கலவரம். கோத்ராவைக் காட்டாமல் குஜராத் ஃபைல்ஸ் துவங்காது. அதைக் காட்டினால், கலவரத்தைத் தூண்டியது இஸ்லாமிய பயங்கரவாதிகள் என்று தெரிந்துவிடும். கலவரத்தை மோடி தூண்டினார் என்று அவதூறு கூறி வரும் காங்கிரஸ் மீது கல்லெறிவார்கள் மக்கள். அப்பாவி பண்டிட்டுகள் படுகொலை செய்யப்பட்டு காஷ்மீரிலிருந்து விரட்டப்பட்டதையும், பயங்கர வாதிகள் தூண்டியதால் நடந்த குஜராத் கலவரத்தையும் ஒன்று என்று ஏடாகூடமாகப் பேசி, தன் தலையில் தானே கொள்ளி வைத்துக் கொள்ள காங்கிரஸால் மட்டுமே முடியும்.

-துக்ளக், 20.4.2022

கோத்ரா ரயிலில் ஏற்பட்ட நிகழ்வுக்கான குற்றவாளிகள் யார் யார்? என்று கண்டுபிடித்துத் தண்டனை கொடுத்தால் சரி.

அவ்வாறு செய்யாமல், சம்பந்தமே இல்லாத அப்பாவி முஸ்லிம்களை படுகொலை செய்ததை நியாயப்படுத்துவது எப்படி? பெஸ்ட் பேக்கரி நெருப்பில் முசுலிம் குடும்பத்தினரை விறகைக் கட்டுவது போல் கட்டி எரித்தது எப்படி? நிறைமாதக் கர்ப்பிணி பெண்ணின் குடலைக் கிழித்து கருவை வெளியில் எடுத்து நெருப்பில் வீசி எறிந்து குதியாட்டம் போட்டது எப்படி?

அட ஈவு இரக்கமற்ற பிண்டங்களே, உங்களை என்ன சொல்லி அழைப்பது? 

உ.பி. முசாபர்பூர் கலவரத்துக்குக் காரணம் யார்? (எண்ணாயிரம் சமணர்களைக் கழுவேற்றிக் கொன்ற கும்பலாயிற்றே!)

கேள்வி: பா.ஜ.க. மதவாதக் கட்சியா?

பதில்: பா.ஜ.க. மதவாதக் கட்சி என்றால், அனைத்துக் கட்சிகளும் மதவாதக் கட்சிகள்தான். எந்த மதவாதத்தை, எப்போது யார் ஆதரிக்கிறார்கள் என்ற ஒன்றுதான் வித்தியாசம்.

- துக்ளக் - 20.4.2022

அதில் பா.ஜ.க. மதவாதக் கட்சி என்பதைத் துக்ளக் இப்பொழுதாவது ஒப்புக் கொண்டதே!

இந்தியா இந்துக்களின் நாடு, ஒரே நாடு, ஒரே மதம் என்று பச்சையாகப் பேசும் ஒரே கட்சி பா.ஜ. தானே! மற்றவர்கள் யாரும் அப்படிக் கூறுவது கிடையாதே!

எந்த மதவாதத்தையும் நாம் ஏற்பதில்லை.

மதம் யானைக்குப் பிடித்தாலும் ஆபத்து

மனிதனுக்குப் பிடித்தாலும் ஆபத்தே!

கடவுள்களின் கையில் கொலைக்கருவிகள்!

April 09, 2022 • Viduthalai

துன்மார்க்க "துக்ளக்கே" பதில் சொல்!
மின்சாரம்

நல்லவேளை, நம் ஆயுதங்களைத் தெய்வங்கள் பிடுங்கிக்கொண்டு விட்டன. 

ஆர்.ஜே.கல்யாணி, திசையன்விளை 

கே: ஹிந்து தெய்வங்களின் கரங்களில் ஆயுதங்கள் இருப்பது அடியார்களைக் காப்பதற்கா, அடியாட்களை அழிப்பதற்கா?

 ப: அமெரிக்காவில் ஹவாய் பல்கலைக் கழகப் பேராசிரியர் ஆர்.ஜே. ரம்மல், உலகில் நடந்த வன்முறை, படுகொலைகளைப் பற்றி 30 ஆண்டுகள் ஆய்வு செய்தார். அந்த ஆய்வின் முடிவு: கடந்த 2,500 ஆண்டு களில் 120 கோடிப் பேர் உலகில் படுகொலை செய்யப்பட்டிருக்கிறார்கள்; அதில் பாரத நாட்டில் 1,300 ஆண்டுகளில் (13-ஆம் நூற்றாண்டு வரை) நடந்த படுகொலைகள் - ஒன்று அசோக மகாராஜாவின் கலிங்க யுத்தம். அதில் லட்சம் பேர் இறந்தனர். தீவட்டிக் கொள்ளை, உடன்கட்டை ஏறுவது இரண்டிலும் சில ஆயிரம் பேர் மட்டுமே மடிந்தனர். 13-ஆம் நூற்றாண்டில் அந்நியர்கள் படையெடுப்புக்குப் பிறகுதான் 85 லட்சம் பேர் படுகொலை செய்யப்பட்டனர் (1). மற்ற நாடு களில் பல கோடிக்கணக்கில் படுகொலைகள் நடக்கும் போது, இங்கு அப்படி நடக்காமல் இருப்பதற்கு என்ன காரணம்? நம் கையில் இருந்த ஆயுதங்களை நமது தெய்வங்கள் பிடுங்கி வைத்துக் கொண்டு, நம்மை அமைதியாக இருக்க விட்டதுதான். மற்ற நாடுகளில் மனிதர்களிடம் இருந்த ஆயுதங்களைத் தெய்வங்கள் பிடுங்கி வைத்துக் கொள்ளாததால், அவர்களுக்குள் கோடிக்கணக்கில் படு கொலைகள் நடந்தன. தெய்வங்கள் ஆயுதங் களைப் பிடுங்கிக் கொண்டதோ அடியார்களான நாம் பிழைத்தோமோ? பதில் சரிதானே?           'துக்ளக்' - 6.4.2022 - பக்கம் -9

'துக்ளக்'கின் இந்தக் கேள்வி - பதில் பகுதியைப் படித்தால், பரம மூடத்தனத்தின் மொத்த உருவம் என்றுதான் எவரும் கருதுவர்.

கடவுள் அன்பே உருவானவன், கருணையானவன், உருவமற்றவன், எங்கும் நிறைந்தவன் என்று இதே கூட்டம், இன்னொரு இடத்தில் உதடுகள் அசைக்கின்றனவா இல்லையா என்பதைக்கூடத் தெரிந்து கொள்ள முடியாத அளவுக்கு - அவ்வளவு மென்மையான குரலில் இதோபதேசம் செய்யும்.

அந்தக் கும்பலைச் சேர்ந்த குருமூர்த்தி சாஸ்திரிகள் தான் கடவுளுக்கு உருவம் கொடுத்து, அவன் கையில் கொலைகாரன், கொள்ளைக்காரன் கைகளில் இருக்க வேண்டிய கொலைக் கருவிகள் கொடுக்கப்பட்டதற்கு வக்காலத்தும் வாங்குவர்.

சரி... அவர் சொல்லும் விவாதத்திற்கே வருவோம். சண்டை போடும் மனிதர்கள் கைகளிலிருந்து ஆயுதங்களைக் கடவுள்கள் பிடுங்கிக் கொண்டு விட்டனர் என்று கதைக்கிறதே  'துக்ளக்'  - இப்பொழுது எல்லாம் சண்டைகள் நடக்கவில்லையா? கொலைகள் நடக்கவில்லையா?

சங்கராச்சாரியார் குடி கொண்டிருக்கும் காஞ்சிபுரம் வரதராஜப் பெருமாள் கோயில் சன்னதியில் பட்டப் பகலிலேயே அக்கோயில் மேலாளர் சங்கரராமன் படுகொலை செய்யப்படவில்லையா?  அந்தக் கொலை வழக்கில் காஞ்சி சங்கராச்சாரியார் ஜெயிலில் தள்ளப்படவில்லையா?

அதுவும் இருக்கட்டும் - மனிதர்களுக்குள் சண்டை இருக்கக் கூடாது - மனிதர்கள் படுகொலை செய்யப்படக் கூடாது என்பதற்காகவே மனிதர்கள் கைகளில் இருந்து ஆயுதங்களைப் பறி முதல் செய்து தன் கையில் அந்த ஆயதங்களைக் கடவுள்கள் வைத்துக் கொண்டன என்று வக்காலத்து வாங்கும் குருமூர்த்திகளே! அந்தக் கடவுள்களே சண்டை போட்டுள்ள னவே - உயிர்களைக் கொன்று தீர்த்துள்ள னவே - இதற்கு என்ன பதில்?

அய்ந்தாவது வேதம் என்று கீதையை தூக்கிப் பிடிக்கும் 'துக்ளக்' வகையறாக்கள் இதற் குப் பதில் கூறட்டும் பார்க்கலாம்!

மகாபாரதத்தில் அர்ஜுனன் போர்க் களத்தில் நின்று,  தேரோட்டியாகிய கிருஷ்ணனைப் பார்த்து, "என் உற்றார் உறவினர்கள் என் எதிரில் நிற்கிறார்கள்; அவர்களைக் கொல்லுவது எப்படி?"  என்று கேட்டபோது "பகவான் கிருஷ்ணன் என்ன சொன்னான்? அர்ஜுனா நீ கொல்லப் போவது எதிரிகளின் உடல் களைத்தான்  - ஆத்மாவையல்ல- ஆத்மா அழிக்கப்பட முடியாதது" என்று சொல்லவில்லையா?

இதனைத் தானே 'கீதாபதேம்' என்று கிசு கிசுக்கிறீர்கள்-காந்தியாரைப் படுகொலை செய்த நாதுராம் கோட்சே என்ற மராட்டிய பார்ப்பான் நீதிமன்றத்தில் என்ன சொன்னான்?

'தர்மத்தைக் காப்பாற்ற அதர்மத்தைச்  செய்யலாம் என்று கீதையிலே பகவான் கிருஷ்ணன் கூறி இருக்கிறான். காந்தியார் கொலை  விடயத்திலும் அதன்படிதான் நடந்து கொண்டேன்!" என்று சொல்லவில்லையா?

உங்கள் மதமும், கடவுளும் ஓர் உத்தமத் தலைவரைப் படுகொலை செய்யும் அளவுக்குத் தூண்டியிருக்கிறதே!

இந்த வெட்கக் கேட்டில் மனிதர்கள் கைகளில் ஆயுதங்கள் இருந்தால்  சண்டைகள், கொலைகள் நடக்கும் என்பதால், கடவுள்கள் அவற்றைப் பிடுங்கித் தம் கையில் வைத்துக் கொண்டு விட்டன என்று சொல்லுவது எத்தகைய மூர்க்கத்தனமான முட்டாள்தனமும் மதவெறி ஆபாசமும் ஆகும்.

ஹிந்து மதக் கடவுளான மகாவிஷ்ணு எடுத்த அவதாரங்களில் எல்லாம் கொலைகளைத் தானே செய்திருப்பதாக உங்கள் புராணங்கள் புட்டுப் புட்டு வைக்கின்றன.

பிர்மாவுக்கு 5 தலைகள் - சிவனுக்கும் அய்ந்து தலைகள்- பிர்மா என்ன செய்தான்? சிவன் போல் தனக்கும் அய்ந்து தலைகள் இருப்பதைப் பயன்படுத்தி சிவனின் பெண்டாட்டி பார்வதியிடம் காம சேட்டை (கடவுளின் யோக்கியதை இதுதான்!) செய்ய, பார்வதி அதனைத் தன் புருஷன் சிவனிடம் சொல்ல, சிவன் என்ன செய்தானாம்? பிர்மாவின் ஒரு தலையைக் கிள்ளி எறிந்து அவனை நான்முகன் ஆக்கினான் என்று சொல்லும் கூட்டமே, பிர்மாவின் ஒரு தலையை வெட்டியது அகிம்சைக்கான அடையாளமா?

காட்டில் தலை கீழாகத் தொங்கித் தவம் செய்து கொண்டிருந்த சம்பூகன் என்பவனை வாளால் வெட்டிக் கொன்றானே ராமன் - மகாவிஷ்ணுவின் அவதாரம் இல்லையா?

மக்களுக்கு நன்மைகளையல்லால் வேறு எதையும் செய்தறியாத மாபலி சக்ரவர்த்தியின் தலையின்மீது கால் வைத்து அழுத்திக் கொன்றானே மகாவிஷ்ணுவின் அவதாரமான வாமனன். பரசுராமன் அவதாரமே (கையில் கோடாரி) சத்திரிய அரசர்களைக் கொன்று குவிக்கத்தானே?

சுப்பிரமணியன் கடவுள் சண்டை போடவில்லையா? அவன் போரில் தோற்கும் சூழலில் அவனின் உடன்பிறப்பான விநாயகன் - எதிரிகள் உற்பத்தியாகும் வல்லபை என்ற பெண்ணின் பிறப்பு உறுப்பில் தும்பிக்கையைத் திணித்து அசுரர்களைக் கொன்றான் என்று சொல்லுவதற்கு வெட்கம் இல்லையா? மத்தூர் கோயிலில் இந்த ஆபாசமான உருவம் கடவுளாகச் செதுக்கி வைக்கப்பட்டுள்ளதே - அதுதானே வல்லபைக் கணபதி.

சிவனடியாராக வேடமிட்டு பக்தனின் பிள்ளையை அரிந்து சமைத்துச் சாப்பிட்டவன் தானே உங்கள் முழு முதற்கடவுள். அதோடு விட்டாரா? சிவனடியாரின் மனைவியையே தானமாகக் கேட்டவன்தானே உங்கள் பித்தாபிறை சூடி?

மூன்று குரவர்களில் ஒருவரான - பார்வதி தேவியாரிடம் ஞானப்பால் உண்டதாகக் கூறப்படும் திருஞான சம்பந்தனின் தூண்டுதலால் மதுரையில் எண்ணாயிரம் சமணர்கள் கழுவேற்றிக் கொல்லப்படவில்லை? (ஈ. எறும்புக்குக்கூட ஹிம்சை செய்யக் கூடாது என்று கருதி வாழ்பவர்கள் சமணர்கள் ஆயிற்றே!)

சொல்லிக் கொண்டே போகலாம். ஆனால் இந்த மக்கு மசாலாக்களால் பதில் சொல்ல முடியுமா? நாம் எழுப்பும் எந்தக் கேள்விக்குத்தான் இதுவரை பதில் சொல்லி இருக்கிறார்கள்?

21 மொழிகளில் பெரியார் சிந்தனைகள்: எது விபரீத சிந்தனை - துக்ளக்கே?

  March 31, 2022 • Viduthalai

மின்சாரம்

 தந்தை பெரியார் சிந்தனைகள், எழுத்துகளை 21 மொழிகளில் கொண்டு வர தமிழ்நாடு அரசின் நிதி நிலை அறிக்கையில் 5 கோடி ரூபாய் ஒதுக்கப்பட்டுள்ளதாம். வாயிலும் வயிற்றிலும் அடித்துக் கொள்கிறது ‘துக்ளக்‘ (6.4.2022, பக்கம் 6 மற்றும் 7).

அதே போல பெரியார் நினைவு சமத்துவ புரங்களைச் சீரமைக்க 190 கோடி ரூபாய் ஒதுக்கப்பட்டதற்கும் ஒப்பாரி வைத்துள்ளது.

சீர்படுத்தவே முடியாத கங்கை என்னும் சாக்கடையைச் சுத்திகரிக்க 20 ஆயிரம் கோடி ரூபாயைக் கொட்டி அழும்  ஒன்றிய பா.ஜ.க. அரசைத் தலையில் தூக்கி ஆடும் இந்தக் கூட்டம் தான் மக்கள் மத்தியில் மண்டிக் கிடக்கும் சகதிகளைச் சுட்டெரித்துப் பகுத்தறிவு சுத்திகரிப்புச் செய்யும் தந்தைபெரியார் சிந்தனைகளை உலகெங்கும் கொண்டு  செல்ல ஓர் அரசு திட்டமிட்டால் கடுகடுக்கிறது திரிநூல் கும்பலுக்கு!

இருக்காதா? பிர்மாவின் நெற்றியில் பிறந்தவர்கள் நாங்கள் என்று மார்தட்டி “கல்வி, உத்தியோகம் எல்லாம் எங்களுக்கு மட்டுமே சொந்தம் - நீங்கள் எல்லோரும் சூத்திரர்கள், நாலாஞ் ஜாதி மக்கள் - உங்களுக்குக் கல்வி கிடையாது. படித்தால் நாக்கை அறுத்திடுவோம் - ஜாக்கிரதை - மற்றவர்கள் படிப்பதைக் கேட்டால் காதுகளில் ஈயத்தைக் காய்ச்சி ஊற்றி விடுவோம் எச்சரிக்கை, படித்து நெஞ்சில் வைத்திருத்திருந்தால், நெஞ்சைப் பிளந்திடுவோம் - சேதி தெரியுமா என்று ஆணவம் பிடித்துத் திரிந்த மதவாதக் கூட்டத்தின் மத்தளத்தைப் பிளந்து அனைவருக்கும் அனைத்தும் என்ற நீரோடையை நாடெங்கும் பரவச் செய்த ஒரு மனிதரின் சிந்தனைகள் உலகெங்கும் பரவுகிறது என்றால் வாந்தியும் - பேதியும் உடைப்பெடுக்காதா?

“தமிழின் சிறப்பை வெளிமாநிலங்களுக்கும், வெளிநாடு களுக்கும் கொண்டு செல்வது வரவேற்கத் தகுந்தது தான். ஆனால் ஈ.வெ.ரா..வின் சிந்தனைகள் அதற்குத் தகுதி உடையவை அல்ல. தமிழில் பெருமைக்குரிய படைப்புகளை உருவாக்கியவர்கள் எண்ணற்றோர் உள்ளனர். வாழ்க்கை நெறியைப் போதித்த வள்ளுவர் போன்றோர் உண்டு.”

அடடே! வள்ளுவர் மீது இந்த அய்யன்மார் கூட்டத்துக்கு எப்படிப்பட்ட அளப்பரிய காதல்!

சங்கராச்சாரியார்கள் உள்ளிட்டு நாகசாமி வரை திருக்குறள் மனுதர்மத்தின் சாரம் என்று வாய்க்கூசாமல் வக்கரித்த கூட்டம், தந்தை பெரியார் மீது குற்றம் சொல்ல வேண்டும் என்றால் வள்ளுவரை இழுத்துக் குளிர் காயும் -  அவர்களுக்கே உரித்தான பிரித்தாளும் சூழ்ச்சியைப் பார்த்தீர்களா?

“பிறப்பொக்கும் எல்லா உயிர்க்கும்“ என்ற திருவள்ளுவர் ஆசானின் குறள் எங்கே? பிறப்பிலேயே உயர்வு தாழ்வு   வருணம் பேசும் மனு தர்மம் என்னும் மானுடவிரோத குப்பை எங்கே?

ஆண்டாளின் திருப்பாவை இரண்டாம் பாடலில் வரும் ‘தீக்குறளைச் சென்று ஓதோம்‘ என்ற வரிக்குத் ‘தீய திருக்குறளை ஓதமாட்டோம்‘ என்று சொன்ன பேர்வழிதானே - இவர்களின் ஜெகத்குரு! குறளை என்றால் குற்றம், குள்ளம், கோட்சொல் என்று பொருள் என்பதைக் கூட அறியாத மரக்கட்டைகள் எல்லாம் - இவர்களுக்கு மகான் - மண்ணாங்கட்டி!

திருக்குறளுக்காக முதல் மாநாடு கூட்டி திருக்குறளை மலிவு விலையில் ஊரெங்கும் கொண்டு சென்றவர் தந்தை பெரியார் என்ற வரலாறு தெரியுமா? - இந்த வடிகட்டிய வருணாசிரம வெறியர்களுக்கு?

வெகு தூரம் போவானேன்? இந்தத் ‘துக்ளக்‘கையே எடுத்துக் கொள்வோம்.

கேள்வி: பெங்களூருவில் திருவள்ளுவர் சிலை திறக்கப்படுவதன் மூலம் கன்னடர் - தமிழர் இடையே நல்லிணக்கம் ஏற்படும் என்று கருநாடக முதல் அமைச்சர் எடியூரப்பா கூறியுள்ளாரே?

பதில்: நல்லுறவா? நல்ல உறவுதான்! யாராவது கன்னட வெறியர்கள் ஒரு சமயம் பார்த்து இந்தச் சிலையை அவமதிக்காமல் இருந்தாலே போதும் என்று எழுதிய துக்ளக் தான் (19.8.2009 பக்கம் 3) கொஞ்சம் கூட வெட்கம் இல்லாமல் திருவள்ளுவருக்குத் தலைப்பாகையைக் கட்டுகிறது.

‘பேசு நா இரண்டுடையாய்ப் போற்றி’  என்று ஆரியத்தை அர்ச்சித்தார் அறிஞர் அண்ணா (நூல்: ஆரிய மாயை)-

பரிதிமாற் கலைஞர், கவிமணி தேசிய விநாயகம் பிள்ளை, உ.வே.சாமிநாத அய்யர், மனோன்மணியம் சுந்தரம்பிள்ளை போன்றவர்களின் சிந்தனைகள் தமிழ்மொழியின் சொத்து என்கிறது துக்ளக்!

‘துக்ளக்‘ சொல்லும் அதே பரிதிமாற் கலைஞர் இந்த ஆரியப் பார்ப்பனர்களைப் பற்றி என்ன கூறுகிறார்?

“வடமொழி தமிழ்நாட்டின் வெகுநாள் காறும் இயங்கியும், அதற்குத் தமிழ் மொழியைத் தம் வழியிலேயே திருப்பிக் கொள்ளுதற்குற்ற ஆற்றலில்லாது போயிற்று. வடமொழியாளர் தமிழர்களது ஒழுக்க வழக்கங்களையுணர்ந்து அவற்றிற்கேற்ப வடமொழியில் நூல்களை வகுப்பான் புகுந்தனர். அவர்களெல்லாம் ஆன்ம நூற்பயிற்சி மிக்குரியறாயும், கலையுணர்ச்சி சான்றவராயிருந்தமை பற்றித் தமிழரது திவ்ய ஸ்தலங்களுக்கும் புராணங்கள் வகுத்தனர். தமிழர்களிடத்தில்லாதிருந்த ‘அந்தணர், அரசர், வணிகர், வேளாளர்’ என்ற நால் வகைச் ஜாதி முறையை மெல்ல மெல்ல நாட்டிவிட்டனர்.

தமிழர்களிடத்திலிருந்த அரிய விஷயங்களையும் மொழி பெயர்த்துத் தமிழர் அறியும் முன்னரே அவற்றை தாமறிந்தன போலவும், வடமொழியினின்றுமே தமிழிற்கு அவை வந்தன போலவும் காட்டினர்” என்று ‘துக்ளக்‘ எடுத்துக் காட்டிய பரிதி மாற் கலைஞரே ‘துக்ளக்‘ கும்பலின் கன்னத்தில் அறைந்தது போலவே எழுதியுள்ளாரே!

(‘தமிழ் மொழியின் வரலாறு’, பக்கம் 26 -28)

உ.வே.சா.வைப் பற்றியும் எழுதுகிறது துக்ளக். “திரு” என்ற அழகிய தமிழ்ச்சொல்லைப் பயன்படுத்துவதற்கு உ.வே.சா.வும், இரா.இராகவய்யங்காரும் எப்படி எல்லாம் முட்டுக்கட்டை போட்டனர் என்பதைப் பேராசிரியர் சாரதா நம்பி ஆரூரான் விளாசியுள்ளாரே! (‘தனித்தமிழ் இயக்கத்தின் தோற்றமும் வளர்ச்சியும்‘)

உ.வே.சாவைத் தூக்கிப் பிடிக்கும் பார்ப்பனர்கள் அவருடைய ஆசிரியரான மகா வித்வான் மீனாட்சி சுந்தரம்பிள்ளையை இருட்டடிப்பதையும் இந்த இடத்தில் சுட்டிக் காட்ட வேண்டும்.

“வள்ளுவர் திருக்குறளை. மறுவற நன்குணர்ந்தோர் உள்ளுவரோ, மனுவாதி ஒரு குலத்துக்கொரு நீதி” மனுவாதிகளின் மரமண்டையில் அடித்த பேராசிரியர் மனோன்மணியம் சுந்தரனாரையும் அழைத்து மொத்தடி பட வேண்டுமா?

பெரியாரின் நாத்திக சிந்தனைகளைப் பரப்ப மக்கள் பணத்தைப் பயன்படுத்துவது முறையா? என்று கேள்வி வேறு.

நாத்திகம் எங்கள் இந்து மதத்திலும் உண்டு என்று கூறும் இந்தக் கும்பல், பெரியார் நாத்திகம் பேசினால் கசப்பது ஏன்?

இனி வரும் உலகம் பற்றி 1938களிலேயே பேசியவர் பெரியார். சோதனைக்குழாய் குழந்தைப் பற்றி 84 ஆண்டுகளுக்கு முன்பே கணித்த தொலை நோக்காளர் அவர். முகத்துக்கு முகம் பார்த்துப் பேசும் காலம் வரும், கைக்குள் உலகு  அடங்கும் என்ற சமுதாய விஞ்ஞானி பெரியார்.

மொழி விஞ்ஞான வளர்ச்சிக்குப் பயன்பட வேண்டும் என்றவர் அவர்.

பேதமற்ற இடம்தான் மேலான திருப்தியான இடம் (குடி அரசு, 17.11.1944) என்பது பெரியார் கொள்கை.

உள்ளதைப் பங்கிட்டு உண்பது. உழைப்பைப் பங்கிட்டுச் செய்வது என்ற சமதர்ம மானுட உலகத் தத்துவம் தந்தை பெரியாருடையது.

ஆண் என்றால் எஜமானன், பெண் என்றால் அடிமை என்ற நிலை ஒழிக்கப்பட வேண்டும் என்பது அவருடைய உயர் எண்ணம்.

“பெண் அடிமை என்பது மனித சமூக அழிவு என்பதை நாம் நினைக்காததாலேயே, வளர்ச்சி பெற வேண்டிய மனித சமூகம் பகுத்தறிவு இருந்தும் நாள்தோறும் தேய்ந்து கொண்டே வருகிறது”

(குடிஅரசு, 6.6.1935)

பெண்களைப் பற்றி இவ்வளவு உயர்வான எண்ணம் கொண்ட தலைவர் பற்றி மனச்சாட்சியைக் காலடியின் கீழ் புதைத்து விட்டு கற்பு தேவையில்லை என்று சொன்னவர் என்று தன் போக்கில் எழுதுவது பார்ப்பனர்களுக்குக் கைவந்த கலை!

கற்பு என்பது பெண்ணுக்கும் மட்டும்தானா? ஆணுக்குக் கிடையாதா, கூடாதா - என்று கேட்டதில் என்ன குற்றம்?

“கட்டுப்பாட்டிற்காகவும் நிர்ப்பந்தத்திற்காகவும் கற்பு ஒரு காலமும் கூடாது - கூடவே கூடாது. வாழ்க்கை ஒப்பந்தத்திற்காகவும், காதல் அன்பிற்காகவும் இருவகை கற்பு என்னும் சங்கிலி எவ்வளவு வேண்டுமானாலும் இறுக்கிக் கட்டப்படட்டும். அதைப் பற்றி எனக்குக் கவலையில்லை. ஆனால் ஒரு பிரிவுக்கு ஒரு நீதி என்கிற கற்பு மாத்திரம் அடிமைப்படுத்துவதில் - ஆசை, மூர்க்கத்தனமே அல்லாமல் அதில் கடுகளவு யோக்கியமும், நாணயமும், பொறுப்பும் இல்லவே இல்லை” என்கிறார் தந்தை பெரியார்.

(நூல்: ‘வாழ்க்கைத் துணை நலம்‘)

“படுக்கை, ஆசனம், அலகாரம், காமம், கோபம், பொய், துரோகச் சிந்தை இவற்றினை மாதர் பொருட்டே மனுவானவர்” கற்பித்தார் (மனுதர்மம், அத்தியாயம் 9, 

சுலோகம் 17)

“மாதர்கள் பெரும்பாலும் விபசார தோஷமுள்ள வர்களென்று அனேக சுருதிகளிலும், சாஸ்திரங்களிலும் சொல்லப்பட்டிருக்கின்றன.”

(மனு, அத்தியாயம் 9, சுலோகம் 19)

இத்தகைய மனு தர்மத்தோடு கட்டிப்புரண்டு கொஞ்சும் ‘துக்ளக்‘ வகையறாக்கள் கற்பு என்பது பெண்ணுக்கும் ஆணுக்கும் பொது எனும் தந்தை பெரியாரைப் பற்றி கொச்சைப்படுத்திக் கூக்குரல் போடுவது எத்தகைய கழிசடைத் தனம்!

விதவைப் பெண்கள் தரிசு நிலம் என்றும், வேலைக்கும் போகும் பெண்கள் பெரும்பாலும் ஒழுக்கக் குறைவானவர்கள் என்றும் சொல்லும் பேர் வழிகள் எல்லாம் இவாளுக்கு பெரியவாள், மகா பெரியவாள் மகான்..... வெங்காயம்!

இந்தத் ‘துக்ளக்‘கின் யோக்கியதைதான் என்ன?

கேள்வி: பெண்களைப் பற்றி உங்களுக்கு உண்மையான அபிப்பிராயம் தான் என்ன?

பதில்: உயர்ந்தவர்கள் - அப்படி இருக்க விருப்பம் இல்லாதவர்கள் (துக்ளக்கில் சோவின் பதில் 18.3.2009)

இவர்களின் தாயும் மகளும் பெண்தான் என்ற எண்ணம் கூட இந்தக் கூட்டத்துக்கு இல்லாமல் இப்படி இரக்கமற்று எழுதுகிறதே - வெட்கக்கேடு!

பெண்ணுரிமை பற்றிப் பேசும் போது பெரியார் என்ன சொல்லுகிறார்? “பெண்ணுரிமை என்று வரும் போது உங்கள் மனைவியை நினைத்துச் சிந்திக்காதீர்கள். உங்கள் மகளை நினைத்துக் கொள்ளுங்கள்” (நூல்: வாழ்க்கைத் துணை நலம்)

பொதுவாக ஒழுக்கத்தைப் பற்றித்தான் இவர்களின் கருத்தென்ன?

“ஒழுக்கம் பொதுச் சொத்து - பக்தி தனிச் சொத்து என்றவர்  பெரியார் (சென்னைப் பச்சையப்பன் கல்லூரியில் பேராசிரியர்கள் - மாணவர்களிடம் பேச்சு 24.11.1964)

ஆனால் ஒழுக்கம் பற்றி சங்கராச்சாரியார் என்ன கூறுகிறார்?

“நல்ல ஒழுக்கம் இருந்தால் போதுமென்றும், கடவுள் அவசியம் இல்லை என்றும் சிலர் கூறுகின்றனர். இது தவறான கருத்து. கடவுள் அருள் இல்லையானால் ஒரு நபருக்கோ, நாட்டுக்கோ விமோசனம் ஏற்பட முடியாது (‘கல்கி’, 8.4.1958)

யார் ஒழுக்க நெறியாளர்?

“பிராமணர்களுக்கு எதிரான அவரது ஜாதி துவேஷக் கருத்துகளுக்கு அளவே இல்லை” என்கிறது ‘துக்ளக்‘.

முதலில் பிராமணர் என்பதே பிறப்பின் அடிப்படையிலான அகங்காரம் தானே. “நீ பிராமணன் என்றால் நான் யார்? சூத்திரன்தானே! சூத்திரன் என்றால் வேசி மகன்தானே? என்று கேட்பது குற்றமா? மனிதன் என்றால் அவனுக்குச் சுயமரியாதை வேண்டாமா?

“மானமும் அறிவும் மனிதருக்கழகு” என்று குறளை விடக் குறைந்த சொற்களில் கருத்தினைக் கூறிய தலைவர் மீது சேற்றை வாரி இறைக்கலாமா?

‘தென்னாட்டுப் பிராமணர்கள் தாங்களே துவேஷிகளாக இருந்து கொண்டு, மற்றவர்களைப் பார்த்துத் துவேஷிகள் துவேஷிகள் என்பர்’ என்று லாலாலஜபதி சொன்னது தான் நினைவிற்கு வருகிறது.

சங்கரமடத்தில் ஒரு கடை நிலை ஊழியனாக ஒரு பார்ப்பனரல்லாதார் பணியாற்ற முடியுமா?

‘தீண்டாமை ஷேமகரமானது’ என்று கூறும் இழிவானவர்கள் தான்  - இவர்கள் பார்வையில் லோகக் குரு என்றால், அவர்களை எந்த இடத்தில் நிறுத்துவது?

இன்னொரு குற்றச்சாட்டு:-

ஜாதி ஒழிப்பு நோக்கத்தோடு தந்தை பெரியார் பெயரில் உருவாக்கப்பட்ட பெரியார் நினைவு சமத்துவபுரத்திற்காக ரூபாய் ரூ.190 கோடி தேவையா? என்று கேள்வி கேட்கிறது துக்ளக்.

ஜாதி ஒழிப்பு என்றால் நெரி ஏறுமே, வெறி - மண்டையைப் பிளக்குமே!

அக்கிரகாரம் என்றும், சேரி என்றும் பிறப்பின் அடிப்படையில் ஜாதி வாரியாகக் குடியிருப்புகளை உண்டாக்கிய குற்றப் பரம்பரையாயிற்றே! பெரியார் பெயரில் சமத்துவபுரம் என்றால் அக்குளில் தேள் கொட்டியது போல் கடுகடுக்காதா?

தமிழ்நாடு பிராமணர் சங்கம் கூட்டம் போட்டு, பெருகி வரும் கலப்புத் திருமணங்களைத் தடுத்திட ‘பிராமண சத்யம் பிரமாண நாள்’ (16.11.2019) என்று அறிவித்ததே - இது எதைக் காட்டுகிறது?

பெரியார் நினைவு சமத்துவபுரத்தில் பார்ப்பனர்களுக்கும் இடம் உண்டே!

பேதமற்ற ஒப்புரவு உலகைப் படைக்கத் தந்தை பெரியார் கொள்கை உலகெங்கும் தேவையே! அதற்குத்தான் 21 மொழிகளில் தந்தை பெரியாரின் சிந்தனைகள் எழுத்து உலாவரப் போகின்றன.

சட்டமன்றத்தில் 234 உறுப்பினர்கள் இருக்கிறார்களே ஒருவர் கூட எதிர்க்கவில்லையே என்று புலம்புகிறது ‘துக்ளக்‘.

பிஜேபி உறுப்பினர்களும் சேர்ந்துதான் ஆதரவு தெரிவித்துள்ளனர் என்ற ஆற்றாமையின் அலறல் - புலம்பல் புரிகிறது.

நினைவிருக்கிறதா? முருகன் தமிழ்நாடு பிஜேபியின் தலைவராக வந்த போது பிஜேபியினர் பெரியாரைப் பற்றிக் குறை கூறிப் பேச வேண்டாம் என்றாரே, அப்பொழுதும் ‘துக்ளக்‘ புலம்பியதுண்டு.

ஏன்? 7.10.2020 ‘துக்ளக்‘கின் முதல் பக்கத்தில் “பா.ஜ.க.வுக்குள்ளும் பெரியார்” என்று தலைப்பிட்டு ஒரு செய்தி வந்ததே!

கேள்வி: திடீரென்று தமிழக பா.ஜ.க. பெரியாரைக் கொண்டாட ஆரம்பித்திருக்கிறதே?  என்பதுதான் அந்தக் கேள்வி.

ஆம். பா.ஜ.க.வுக்குள்ளும் ஆரிய - திராவிடப் போராட்டம் - தந்தை பெரியாரின் கதிர்வீச்சு அங்கும் ஊடுருவ ஆரம்பித்து விட்டதே!

கேள்வி: தமிழக மக்கள் எந்த விஷயத்தில் தனித்துவம்?

பதில்: ஆன்மீகத்தில் மூழ்கிய தமிழ் மக்கள் தொடர்ந்து திராவிடர் கழகங்களுக்கு வாக்களிப்பது அவர்களின் தனித்துவம். (துக்ளக் - 19.2.2020, பக்கம் 29)

புரிகிறதா? இதுதான் தமிழ்நாடு! ஆரியம் அலறினால் அது தமிழர்களுக்கு நலம் என்று பொருள். இந்தப் பிரச்சினையும் இதுதான்.

பெரியார் நினைவு சமத்துவபுரம் தேவையா?
கேள்வி கேட்கும் "துக்ளக்குக்கு அர்ப்பணம்"

பார்ப்பனரின் விளம்பரம்

7.2.1983 நாள் ‘தினமணி' ஏட்டில் வெளிவந்த கீழ் கண்ட விளம்பரம் பார்ப்பனர்கள் யார் அவர்களுடைய இனவெறி எத்தகையது என்பதற்கு அடையாளமாகும்.

இதோ அந்த விளம்பரம்:- கோவையிலுள்ள பிரபல இன்ஜினியரிங் கம்பெனிக்குக் கீழ்க்கண்ட உத்தியோகங்களுக்கு விண்ணப்பங்கள் படித்த பிராமணர்களிடமிருந்து எதிர்பார்க்கிறோம்.

1) ACCOUNTANTS: B.Com.

பட்டதாரிகள் மூன்று வருட அனுபவம் தேவை

2) TYPIST நன்கு படித்தவர்கள் சுயமாக லெட்டர்கள் தயாரித்து அனுப்பும் திறமை உள்ளவர்கள். குறைந்தது மூன்று வருட அனுபவம் தேவை

3) SALES REPRESENTATIVES:  வியாபாரத்தில் திறமையும், அனுபவமும் உள்ள பட்டதாரிகளிடமிருந்து விண்ணப்பங்களை வரவேற்கிறோம்.

மேற்கண்ட வேலைகளுக்கு சமீபத்தில் ஓய்வு பெற்றவர்களும் விண்ணப்பிக்கலாம். திறமைக்கு ஏற்ற ஊதியம் உண்டு,

ஒவ்வொரு வேலைக்கும் தனித்தனியாக விண்ணப்பித்து அனுப்ப வேண்டும்

RAJ & CO. POST BOX NO. 9, COIMBATORE - 641001

இந்த வேலைகளுக்கு பிராமணர்களிடமிருந்து மாத்திரம் விண்ணப்பம் எதிர்பார்க்கிறோம் என்று பார்ப்பனர்கள் பச்சையாக ஏடுகளில் விளம்பரம் செய்கிறார்கள் என்றால் பார்ப்பனர்கள் யார் என்று இன்னமும் தெரிந்து கொள்ளாதிருக்கும் மரக்கட்டைத் தமிழர்கள் தான் சிந்திக்க வேண்டும்.

தகவல்: மூர்த்தி, கோயி

இவர்கள்தான் ஜாதி ஒழிப்பு நோக்கத்தோடு திமுக அரசு உருவாக்கியுள்ள பெரியார் நினைவு சமத்துவபுரங்களைக் குறை கூறுகிறார்கள்.

காஞ்சி காம கோடி பீடத்தில் சேவை செய்ய வாய்ப்பு

ஸ்ரீ காஞ்சி காம கோடி பீடத்திலும் மற்றும் அதைச் சார்ந்த ஊர்களில் உள்ள கிளைகளில் சேவை செய்வதற்கும் 1994க்கு பிறகு ஓய்வு பெற்ற தாசில்தார், , R.D.O பாங்க், தனியார் கம்பெனியில் ஓய்வு பெற்றவர்கள், நிர்வாகத்திறனில் அனுபவம் உள்ளவர்கள், அந்தணர் மட்டும் விண்ணப்பித்தல் வேண்டும். தகுந்த உதவி செய்து தரப்படும்.

தொடர்பு கொள்ள வேண்டிய முகவரி: சுவாமினாதன், காரியதரிசி. பிராமண சமாஜம், கொல்லாசத்திரம், காஞ்சிபுரம்-631502.

முகநூல் பதிவு

பணிநிறைவு பெற்ற பார்ப்பனர்களுக்காக கும்பகோணத்தில் பழைமை மாறாத அக்கிரஹார குடியிருப்புகளாம்!

இணையதளத்தில் விளம்பரம்

“அக்கிரஹாரத்திற்குள் மலம் எடுக்க தாழ்த்தப்பட்டவர்களை அனுமதிக்கக்கூடாது" என்று கும்பகோணம் நகராட்சியில் தீர்மானம் நிறைவேற்றப்பட்ட வரலாறு தெரியுமா தோழர்களே?

'இந்து தமிழ் திசை'க்கு ஒரு மறுப்பு யாருக்குச் சேவகம் செய்ய ஆசை!

  March 22, 2022 • Viduthalai

மின்சாரம்

திராவிட இயக்கங்களைக் குறை சொல்ல, குதர்க்கம் பேச பார்ப்பனரல்லாதாரையே பிடித்து எழுத வைத்து, நம்மோடு மோத வைக்கும் பார்ப்பனியப் போக்கோடு செயல்படும் 'இந்து தமிழ் திசை' இம்முறையும் செல்வ புவியரசன் என்பவரைப் பிடித்து எழுத வைத்திருக்கிறது. அவரும் தமிழ்நாடு அரசின் நிதி நிலை அறிக்கையில் தந்தை பெரியார் நூல்களை உலக - இந்திய மொழிகளில் மொழி பெயர்க் கப்படும் அறிவுடைமையை முன் வைத்து தன் பேனாவை சுழற்றியிருக்கிறார். (22.3.2022 பக்கம் 6)

அரசிடம் நிதிச் சவால்களின் அழுத்தமும் நிறைந்த காலத்தில் சட்டமன்றத்தில் சமர்ப்பிக்கப்பட்டிருக்கும் நிதி நிலை அறிக்கை - இவை அனைத்தையும் தாண்டி பெரியாரை முன்னிட்டுக் கவனம் விலகி விட்டதாம் - எழுதுகிறது இந்து தமிழ் திசை.

ஒரு பார்ப்பன ஏட்டில்  இது போன்றவர்களை வேலைக்கு அமர்த்தி தந்தை பெரியார், அறிஞர் அண்ணா, திராவிட இயக்கத்தின்மீது வேகமாக சேற்றை வாரியிறைக்கும் நபர்களைத் தேடிப் பிடித்து வைத்திருப்பது பார்ப்பனீயம் அல்லாமல் வேறு என்ன?  

எத்தனை ஊடகங்கள் தமிழ்நாடு சட்டப் பேரவையில் தாக்கல் செய்யப்பட்ட நிதி நிலை அறிக்கைகளையும் தாண்டி, பெரியார் நூல்கள் மொழிபெயர்க்கப்படுவது பற்றி கவனம் செலுத்தியிருக்கின்றன? பட்டியலிடத் தயாரா?

பெரியாரை முன்னிறுத்துவதாகவே வாதத்துக்கு  வைத்துக் கொள்வோம் - அதில் என்ன குறை கண்டு மீசை துடிக்க வேண்டும்?

இதில் இடைஇடையே பெரியாரைப் புகழ்வது போல சில சொற்கள் - பார்ப்பனீயம் நம்மினத்தில் எப்படியெல்லாம் நாடகமாடுகிறது இந்த 2022லும்.

பெரியாரின் நூல்கள் நாட்டுடைமையாக்கப்படும் என்று அனைத்துப் பெரியாரியர்களும் கோரிக்கை வைத்துள்ளார்களாம். அதை ஏன் செய்யவில்லை அரசு, ரொம்ப தான் ஆவேசப்படுகிறார்  'இந்து தமிழ் திசை' எழுத்தாளர். 

யார் யார் அந்தப் பெரியாரியர்கள்? அவரின் கற்பனைக்குத்தான் வெளிச்சம்! 

இதில் ஆனைமுத்து அவர்களை கொண்டு வந்து முட்ட விடுவது ஏன்? அவர் அளவுக்கு அதை செய்தார் அவை தேர்ந்தெடுக்கப்பட்ட கட்டுரைகள் மட்டுமே. முழுமையானதல்ல. அதனை எதிர்நிலைக்கு வைப்பது சிண்டு முடியும் வேலைதானே!

பெரியாரின் நூல்கள் முழுமையாக வெளிவர வில்லையாம். இப்படி எழுதுகிறவர்   பெரியார் திடலுக்குள் நுழைந்தவுடன் வரவேற்கும் திராவிடன் புத்தக நிலையத்திற்குள் வலம் வந்து பார்க்கட்டும்.

பெரியாரின் 'குடிஅரசு' தொகுப்புகள் முழுவதும் (1925-1949) 42 களஞ்சியங்களாக வெளிவந்து காழ்ப்பின்றிக் காண்போரின் கண்களை உறுத்தும்.

தலைப்பு வாரியாக பெரியாரின் கருத்துகள் அடங்கிய 38 தொகுப்புகள் - அவர்களின் அறியாமை இருளை விரட்டும்.

பெரியாரின் பொருளியல் தத்துவத்தைத் தலைப்பாகக் கொண்டு டாக்டர் சாந்தி நாகநாதனின் பி.எச்.டி. பட்டம் பற்றி அறியாத பாமரர்களை என்ன சொல்ல!

தந்தை பெரியாரின் படைப்புகள், தந்தை பெரியாரைச் சார்ந்த நூல்களின் வரிசை 767 என்பது இவர்களுக்குத் தெரியுமா?

1962 தொடங்கி 2021 வரை ஒவ்வொரு ஆண்டும் தந்தை பெரியாரின் பிறந்த நாள் மலர்கள் வரலாற்றுக் கருவூலமாக வந்து கொண்டு இருப்பதைக் கண்ணால் கண்ட துண்டா? தந்தை பெரியாரின் ஒலிப் புத்தகங்களைப் பற்றிக் கேள்விப்பட்டதுண்டா? பெரியார்தம் ஒலி நாடாக்களைக் கேட்டதுண்டா?

பெரியார் திடலில் 1974 முதல் இயங்கி வரும் பெரியார் நூலகம் - ஆய்வகத்தினைப் பயன்படுத்தி எத்தனை எத்தனை எம்.பில் பட்டங்கள். முனைவர் பட்டங்கள் மூளையைக் கொஞ்சம் கசக்கி விட்டுப் பார்க்கட்டும்!

ஆய்வாளர்கள் எஸ்.வி. ராஜதுரை, ஆ. இரா. வேங்கடாசலபதிகளைக் கேட்டுத் தெரிந்து கொள்ளட்டும்; அண்மையில் தோழர் திருமா வேலனால் எழுதப்பட்ட "இவர் தமிழர் இல்லை என்றால் எவர் தமிழர்?" (2 தொகுப்பு) என்ற அரிய நூல்களின் தாய் வீடு - பெரியார் திடல் நூலகம், ஆய்வகம் அல்லவா! ஓகோ இது பெரியார் அறக்கட்டளை சார்பில் நடக்கிறதா என்று கேட்காமல் இருந்தால் சரி.

நூற்றுக்கும் மேற்பட்ட ஆங்கில நூல்கள் வெளியிடப்பட்டுள்ள விவரமாவது புரியுமா?

இந்தி, பிரெஞ்சு, கன்னடம், மராத்தி, ஜெர்மன், மொழிகளிலும் வெளி வந்துள்ளது குறித்து செவி வழித் தகவலாவது தெரியுமா?

திராவிடர் கழகம், பெரியார் சுயமரியாதைப் பிரச்சார நிறுவனம் போல் நூல்கள் வெளியிடுவது குறித்து முத்தமிழ் அறிஞர் முதலமைச்சர் கலைஞர் அவர்கள் முகம் அகம் மலர்ந்து, பாராட்டியதுண்டே!

ஒருக்கால் தோழர் புவியரசன் கூறும் பெரியாரியர் களின் பட்டியலில் கலைஞர் அவர்கள் இடம் பெற மாட்டாரோ!

பெரியார் நூல்களை நாட்டுடமை ஆக்க வேண்டுமாம் - அப்படிக் கூறும் இவர் அறிந்த பெரியாரியர்களின் பட்டியலில் இப்பொழுது தோழர் செல்வ புவியரசனும் இடம் பெறுவதில் அவருக்கு மட்டிலா மகிழ்ச்சியோ!

இப்பொழுதுகூட பல பதிப்பகங்களும் தந்தை பெரியார் நூல்கள் வெளியிட்டுக் கொண்டு தானே உள்ளன. அண்மையில் சென்னையில் நடந்த புத்தகச் சந்தையின் 400 கடைகளில் 186 கடைகளில் பெரியார் நூல்கள் அணி வகுத்தனவே! அரசுடைமை ஆக்கப்படாமலேயே பல பதிப்பகங்களாலும் வெளியிடப்பட்டவைதானே இவை.

பெரியார் நூல்கள் நாட்டுடைமை ஆக்கப்பட்டு அதற்கான பெருந் தொகையை திராவிடர் கழகத்திற்கோ பெரியார் அறக்கட்டளைக்கோ தமிழ்நாடு அரசு அளித்திருந்தால் இந்த ஓட்டை வாய்களின் ஒழுகும் பேனாக்கள் எப்படி எப்படி எல்லாம் உளறிக் கொட்டியிருக்கும் - எழுதிக் கொட்டியிருக்கும்!

பெரியார் நூல்களுக்காக பணம் பெறுவதா? என்று நீட்டி முழங்குவார்கள்.

நோக்கம் - தந்தை பெரியாருக்குப் பிறகும் இயக்கம் வலிவுடன், பொலிவுடன் நடக்கிறதே என்ற ஆத்திரத்தில் துடியாய்த் துடிக்கும் பார்ப்பனீயத்திற்குக் கிடைத்த கைத்தடிகளுக்கான சடகோபம் தானோ!

மகாராட்டிர அரசு அண்ணல் அம்பேத்கர் நூல்களை வெளியிட்ட போது அம்மாநில மக்கள் மகிழ்ந்து ஏந்தினார்களே! அந்த பண்பு 'இந்து தமிழ் திசை' ஏடுகளுக்கு இல்லையே! எப்படி இருக்கும் ஆரிய ஏட்டுக்கு?

"இப்போது பட்ஜெட் நேரம், பெரியார் 21 மொழிகளுக்குச் செல்லப் போகிறார் என்பதே பேச்சாக இருக்கிறது. சுமார் 3 லட்சத்து 33 ஆயிரம் கோடியை மொத்தத் திட்டச் செலவாகக் கொண்ட ஒரு நிதி நிலை அறிக்கையின்மீதான விவாதங்களை ரூ.5 கோடிக்கான ஒரு திட்டம் திசை திருப்பிக்கொண்டு விட்டது." 

கோணிப்பைக்குள்ளிருந்த பூனைக் குட்டி வெளியில் வந்து விட்டதே! இதனைத் தானே ஒரு 'சூத்திர' எழுத்தாளரிடமிருந்து பூணூல்கள் எதிர்பார்க்கின்றன.

பெரியார் உயிரோடு இருந்த காலத்தில் இப்படி நடந்திருந்தால் அவரே இதை விரும்பி இருக்க மாட்டார் என்று மங்களம் பாடியிருக்கிறார்.

பெரியாரோடு இருந்து அவரை அப்படியே அறிந்து தெளிந்த அறிஞர் திலகங்கள் இவர்கள் - நம்பித் தொலையுங்கள்.

அறிஞர் அண்ணா அவர்கள் முதலமைச்சராக இருந்தபோது, சட்டமன்ற உறுப்பினர்  திரு. முனுஆதி 'பெரியாருக்கு தியாகி மான்யம் கொடுக்கப்படுமா?' என்று வினா எழுப்பியபோது "இந்த அமைச்சரவையே பெரியாருக்குக் காணிக்கை" என்றாரே! அப்பொழுது சென்னைப் பொது மருத்துவமனையில் இருந்த தந்தை பெரியார், "என் வலி  நீங்கியது" என்று மகிழ்ச்சி அடைந்த வரலாறு எல்லாம் அரைவேக்காடுகளுக்குத் தெரியுமா?

ஒரு பொதுக் கூட்டத்தில் மக்கள் குறைவாக இருந்து இயக்க நூல்கள் அதிகமாக விற்பனை ஆகியிருந்தால்  "இது உபயோகமான கூட்டம்" என்றும், கூட்டம் அதிகம் இருந்து நூல் விற்பனை சரியாக இல்லாவிடின் "உபயோகமற்ற கூட்டம்" என்பது தந்தை பெரியாரின் கணிப்பு!

இதற்குள்ளிருப்பது வியாபாரக் கண்ணோட்ட மல்ல; கருத்துப் பிரச்சாரமே!

"மண்டைச் சுரப்பை உலகு தொழும்" என்று தந்தை பெரியாரைப் பற்றிப் புரட்சிக் கவிஞர் பாடினார். பெரியார் கருத்துக்கள் உலகெங்கும் பரவக் கூடாதா - உங்களுக்கென்ன வலி?

21 மொழிகளில் தந்தை பெரியாரின் மண்டைச் சுரப்பு பரவுகிறது என்கிறபோது, முற்போக்காளர்களும், பகுத்தறிவுச் சிந்தனையாளர்களும் மனித உரிமை யாளர்களும், சமூக நீதியாளர்களும், பாலியல் நீதிக் கொள்கையாளர்களும் சமதர்ம சமத்துவவாதிகளும் மன நிறைவோடு மகிழ்ச்சியின் எல்லையைத் தொடுவார்கள்.

இவற்றிற்கு எதிரானவர்கள் 'இந்து தமிழ் திசை' போலும்! புவியரசர்களும் புலம்புவார்கள்.

- இவர்களிடம் விழிப்பாக இருப்பது நல்லது!

ஆளுநரின் விருந்து - கட்சிகள் புறக்கணிப்பு: திராவிடர் கழகத் தலைவரின் கருத்து

 April 14, 2022 • Viduthalai

208 நாட்களுக்கு முன்பு 'நீட்'டிலிருந்து விலக்குக் கோரும் மசோதாவை இரண்டாவது முறையாக தமிழ்நாடு சட்டப் பேரவையில் நிறைவேற்றி, மீண்டும் ஆளுநருக்கு அனுப்பப் பட்டுள்ளது. தமிழ்நாடு அமைச்சர்கள் இருவர் இன்று (14.4.2022) ஆளுநரைச் சந்தித்து 'நீட்' தொடர்பாக வேண்டுகோள் வைத்தபோது, குடியரசுத் தலைவருக்கு அனுப்பி வைக்க காலவரையறை கூற முடியாது என்று ஆளுநர் கூறியிருப்பது, தமிழ்நாட்டு சட்டமன்ற மாண்பையும், ஜனநாயகக் கோட் பாட்டையும், வாக்களித்து ஆட்சியை அமைத்த தமிழ்நாட்டு மக்களையும் அவமதிக்கும் செயலாகும்.

மக்களால் தேர்ந்தெடுக்கப்பட்ட ஆட்சிக்குப் போட்டி அரசு நடத்திட ஆளுநர் தயாராகிவிட்டார் என்பதையே இது காட்டுகிறது.

இந்த நிலையில், ஆளுநர் விடுத்த விருந்து வேண்டு கோளைத் தமிழ்நாடு அரசு புறக்கணித்தது மிகவும் சரியான முடிவாகும். அரசமைப்புச் சட்டத்தின் ஜனநாயக உரிமையைக் காக்கும் செயலாகவே இதனைக் கருதவேண்டும்.

தமிழ்நாடு அரசின் மதிப்புறு முடிவை வரவேற்கிறோம் - பாராட்டுகிறோம்.

தமிழ்நாடு அரசு மட்டுமல்ல, காங்கிரஸ், இந்திய கம்யூனிஸ்டு கட்சி, இந்திய கம்யூனிஸ்ட் கட்சி (மார்க்சிஸ்ட்), விடுதலைச் சிறுத்தைகள் கட்சி, மனிதநேய மக்கள் கட்சியும் ஆளுநர் விருந்தை ஒட்டுமொத்தமாகப் புறக்கணித்திருப்பது தமிழ்நாட்டு மக்களின் உணர்வைப் பிரதிபலிப்பதாகும். இதில் ஈடுபட்ட அனைத்துக் கட்சிகளையும் பாராட்டுகிறோம்.

கி.வீரமணி

தலைவர்,

திராவிடர் கழகம்

சென்னை       

14.4.2022         

'கியூட்' நுழைவுத் தேர்வு எதிர்ப்பு சட்டமன்றத் தீர்மானம்: கழகத் தலைவர் ஆசிரியர் அறிக்கை!

  April 11, 2022 • Viduthalai

மக்கள் பாராட்டை நன்றியுடன் பிரதிபலிப்பதாகும்!

கல்லூரிகளில், பல்கலைக் கழகங்களில் பட்டயப் படிப்பு, பட்டப் படிப்பு ஆகியவற்றைப் படிக்கக்கூட, 12 ஆம் வகுப்பு மதிப்பெண்கள் கணக்கில் கொள்ளப்படமாட்டாது; அதற்கென தனியே ஒரு 'நீட்' போன்ற நுழைவுத் தேர்வோ, 'கியூட்' போன்ற தேர்வோ கூடாது; அது நமது பிள்ளைகள் கல்லூரி, பல்கலைக் கழகக் கல்வி பெறுவதற்கு மிகப்பெரும் தடைக்கற்கள்  - கண்ணிவெடிகள் என்பதை நன்கு புரிந்த சமூகநீதிக்கான சரித்திர நாயகரான தமிழ்நாடு முதலமைச்சர் கண்டித்து அறிக்கை விடுத்ததோடு நிற்காது, தமிழ்நாடு சட்டப்பேரவையில் இன்று (11.4.2022) ஒரு தீர்மானத்தையே ஒருமனதாக நிறைவேறும்படிச் செய்து, அனைத்துக் கட்சியின் (அ.தி.மு.க. உள்பட) ஆதரவுடன் நிறைவேற்றியுள்ளது வரவேற்கத்தகுந்ததோடு, பாராட்டப்படவும் வேண்டிய அருஞ்செயலாகும்.

பா.ஜ.க.எதிர்த்துப் பேசி, வாதங்களை முன்வைக்க சரக்கு இல்லாத காரணத்தினால் என்னவோ வெளி நடப்பு என்ற ஆயுதத்தைப் பயன்படுத்தியுள்ளனர்.

நாம் நாடு தழுவிய பிரச்சாரத்தில் ஈடுபட்டுள்ள நிலையில், ஒவ்வொரு நாளும் பல்லாயிரக்கணக்கில் மக்களைச் சந்தித்து விளக்கம் அளிக்கும் நிலைக்கு இந்தத் தீர்மானம் மக்களின் உணர்வைப் பிரதிபலிப்ப தாகும் - அருமையான எடுத்துக்காட்டு. 

இதற்காகவே மத்தியப் பல்கலைக் கழகங்கள் அமைந்திருக்கும் திருவாரூரிலும் (31.3.2022), புதுச்சேரி யிலும் இன்று (11.4.2022)  திராவிட மாணவர் கழகம் ஆர்ப்பாட்டம் நடத்தியதென்பதும் குறிப்பிடத்தக்க தாகும்.

நாளை சென்னையிலும் திராவிட மாணவர் கழகம் ஆர்ப்பாட்டம் ஒன்றை நடத்திட உள்ளது (12.4.2022).

தக்க நேரத்தில் உடனடியாக தீர்மானம் நிறை வேற்றிய தமிழ்நாடு முதலமைச்சருக்கு நன்றி கலந்த பெற்றோர்களின் பாராட்டுகள் கிடைக்கின்றன என்பதும் வெள்ளிடை மலை.

கி.வீரமணி

தலைவர்,

திராவிடர் கழகம்

சென்னை

 11.4.2022

வங்கதேசம் உருவானதற்கு அடிப்படைக் காரணம் மொழிப் பிரச்சினைதான்!

  April 11, 2022 • Viduthalai

சிங்கப்பூரில் ஆட்சி மொழி ஆங்கிலம்; நான்கு மொழிகளுக்கும் உரிய அங்கீகாரம்!

ஒவ்வொரு கட்டத்திலும் ஹிந்தியை விரட்டி அடித்தது தமிழ்நாடு;

வரலாறு தெரியாமல் ஒன்றிய அரசு எரியும் நெருப்பில் விரலை வைக்கவேண்டாம்!

தமிழர் தலைவர் ஆசிரியர் அறிக்கை

மொழிப் பிரச்சினை உணர்வுப்பூர்வமான பிரச் சினை - ஒவ்வொரு கட்டத்திலும் ஹிந்தியைத் திணிக்கும் பொழுதெல்லாம் தமிழ் மண் கிளர்ந் தெழுந்து ஆதிக்க ஹிந்தியை விரட்டி அடித்துள்ளது. வரலாறு தெரியாமல் எரியும் நெருப்பில் விரலை விட வேண்டாம் என்று எச்சரித்து திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் அறிக்கை விடுத்துள்ளார்.

அவரது அறிக்கை வருமாறு.

உள்துறை அமைச்சர் அமித்ஷா அவர்கள், ஆங்கி லத்தை ஆட்சி மொழியிலிருந்து அறவே நீக்கிவிட்டு, அந்த இடத்தில் ஹிந்தி மொழியையே பயன்படுத்த வேண்டும் என்று கூறியுள்ளது, நாட்டில் ஒரு பெரும் புயலையே கிளப்பி வருகிறது.

ஆட்சியாளர்கள் முக்கியமாகத் தெரிந்துகொள்ள வேண்டியவற்றை, கற்காவிட்டாலும்கூட - பாலபாடம் - எந்த நாட்டிலும், மக்களிடையே மிகவும் உணர்ச்சியைக் கிளப்பக்கூடிய பிரச்சினை - மொழிப் பிரச்சினையாகும் என்பதே!  (Most Sensitive Problem).

இதில் கை நுழைப்பது, கொழுந்துவிட்டு எரியும் தீக்குள் விரலை விட்ட விபரீதம் ஆகிவிடும் என்பதை வரலாறு நிரூபித்துள்ளது.

வங்காளதேசம் உருவானது 
எந்த அடிப்படையில்?

இந்தியாவை விட்டு மத, கலாச்சார அடிப்படையில் பிரிந்த அண்டை நாடான பாகிஸ்தானிலிருந்து, வங்காள தேசம் என்ற 'பங்களாதேஷ்' உருவானதற்கு எது அடிப்படை? வங்க மொழியை - அந்நாடு புறக்கணித்துவிட்டு, பெரும்பான்மை என்ற பெயரில் உருது மொழியை கிழக்கு வங்க மாநிலத்திலும் திணித்ததுதானே!

இதை மறந்து ஒரே நாடு, ஒரே மொழி (சமஸ்கிருதம், ஹிந்தி), ஒரே மதம் (பார்ப்பனர்களின் ஹிந்து மதம்), ஒரே கலாச்சாரம் (சமஸ்கிருத, ஆரிய வேத கலாச்சாரம்) என்று நாளொரு மேனியும் பொழுதொரு வண்ணமும் ஹிந்தி - சமஸ்கிருதத் திணிப்பை - நாட்டின்மீது திணிப்பது, நாட்டின் ஒற்றுமை - ஒருமைப்பாட்டுக்கு உலை வைப்பதாகாதா? 'புருட் மெஜாரிட்டி' என்று அதிகப் பெரும்பான்மை என்ற மணல்மேட்டில் கட்டடம் கட்டி மகிழலாமா? உள்துறை அமைச்சர்; ஒன்றிய ஆட்சியை இயக்கும் ஆர்.எஸ்.எஸ். முதலிய பா.ஜ.க. பிரதமர் மோடி தலைமையில் ஜனநாயகம்மூலம் ஆட்சியைப் பிடித்து, அதனை அதிவேகமாக எதேச்சதிகாரமாக ஆக்கி வரு கின்றவர்கள் வரலாற்றின் சில பக்கங்களைப் புரட்டிப் படிக்கவேண்டும்.

ஹிந்தியைத் திணித்த ஆச்சாரியாரே

பிற்காலத்தில் ஹிந்தியை எதிர்த்தாரே!

1938 இல் தமிழ்நாட்டில் சமஸ்கிருதத்தைப் புகுத்து வதற்கு முன்னோட்டமாக ஹிந்தியைப் பள்ளிகளில் கட்டாயமாக்கினாரே, முன்னாள் கவர்னர் ஜெனரலும், சென்னை மாகாணப் பிரதமருமான (Premier)   ஸ்ரீமான் சி.இராஜகோபாலாச்சாரியார். அப்போது பழைய சென்னை மாகாணத்தில் - தமிழ்நாட்டில் மூண்ட எதிர்ப்பு அலை ஓயாமல்தான் உள்ளது என்பதை அறிந்ததோடு, அவரே தலைகீழாக மாற்றத்திற்குள்ளா னாரே!  Hindi Never   ஹிந்தியை ஏற்கமாட்டோம்;  English Ever எப்போதும் ஆங்கிலம்  என்று முழங்கினாரே!

1965-க்குப் பின்னர் - முந்தைய ஆட்சியினரின் ஹிந்தித் திணிப்பினால், தமிழ்நாட்டில் 1938, 1948-இன் தொடர்ச்சியாக 1965 ஆம் ஆண்டு மாணவர்கள் கையில் எடுக்கப்பட்ட ஹிந்தி எதிர்ப்பு - அதற்காகவே ஆட்சியை விரட்டி அடித்து 50 ஆண்டுகளுக்குமேலாகி விட்ட நிலையில்தான், ஆச்சாரியார் மனமாற்றமடைந்து ஹிந்தி எதிர்ப்பு பலத்த குரலைத் தந்தார்!

அவரைவிட இன்றைய ஒன்றிய ஆட்சியினர் ஆளுமையில், அனுபவத்தில் மேம்பட்டவர்களா?

'ஹிந்தியை பெரும்பான்மை மக்கள் பேசுகிறார்கள்' என்ற வாதம் அறிவுப்பூர்வமானதா? பன்மொழிகளும், பல கலாச்சாரங்களும் உள்ள ஒரு கூட்டாட்சியில், 'வேற்றுமையில் ஒற்றுமை'  (Unity in Diversity)  காண இப்படிப்பட்ட மொழித் திணிப்புகள் எப்படிப்பட்ட விளைவுகளை உருவாக்கும் என்பதை ஆட்சி - அதி காரம் படைத்துள்ள மத்தியில் உள்ளவர்கள் உணராமல், கூரைமீது ஏறி கொள்ளிக்கட்டையைச் சுழற்றலாமா?

சிங்கப்பூரைப் பாரீர்!

அண்டையில் உள்ள சிங்கப்பூர் நாட்டை 'நவீன சிங்கப்பூர்' ஆக்கிய அதன் தந்தை ஆளுமையின் அதி உச்சமான லீ குவான் யூ' அவர்கள் 'இருமொழிக் கொள்கை' என்று தனது அனுபவங்களை - ஆட்சி மொழிப் பிரச்சினையை அணுகிய விதம்பற்றி ஓர் அருமையான நூலை எழுதியுள்ளார். அதில் அவர் விளக்கிய கருத்துகளை அமித்ஷாக்கள் படித்து கற்கவேண்டும்.

''சிங்கப்பூர் நாட்டில் பெரும்பாலும் சுமார் 75 சதவிகித மக்கள் சீனர்கள்தான். எனவே, சிங்கப்பூர் நாட்டின் ஆட்சி மொழியாக சீன மொழியினையே வைக்க எனக்கு ஆலோசகர்கள் அறிவுறுத்தினர். நானும் தொடக்கத்தில் அப்படியே சிந்தித்தேன்.

ஆனால், மொழிப் பிரச்சினை ஒரு உணர்ச்சியைத் தூண்டும் பிரச்சினை - இதில் பெரும்பான்மை, சிறு பான்மை பார்க்காமல், அனைத்து மக்களின் உணர்வு களையும் மதிக்கவேண்டும்.

சிங்கப்பூர் நாட்டில் சீனமொழி, மலாய் மொழி, தமிழ் மொழி, யூரேஷிய மொழி (ஆங்கிலம்) போன்ற பல மொழிகள் உள்ளன. சீனமொழியை ஆட்சி மொழியாக் கினால் ஒரு சாராரின் ஏகபோகம் என்றே கருதப்படும்.

ஆங்கிலத்தை ஆட்சி மொழியாக்கினால் அனைத்து மக்களுக்கும் வசதிக் குறைவு ஏதாவது ஏற்படுமானால், அது அனைவருக்கும் சமமாகப் பகிர்ந்தளிக்கப்படுவ தினால் யாரும் அதிகம் பாதிக்கப்படமாட்டார்கள். அதேநேரத்தில், சீனம், மலாய், ஆங்கிலம், தமிழ் ஆகிய நான்கு மொழிகளையும் அரசு உரிய முறையில் பயன்பாட்டில் வைத்துப் பாதுகாப்பும் கொடுக்க, அந்த மக்களின் கலாச்சாரத்தை மதித்து, குடிமக்களை 'சிங்கப்பூரியர்களாக்குவோம்''' என்று தீர்வு கூறினார்.

இது எவ்வளவு ஆக்கப்பூர்வ அறிவியல் அணுகு முறை!

இந்தியாவில் உள்ள 22 மொழிகளுக்கும்
சமவாய்ப்புத் தேவை!

இந்திய அரசமைப்புச் சட்டத்தில் எட்டாவது அட்டவணையில் 'மொழிகள்' என்ற தலைப்பில் 22 மொழிகள் இணைக்கப்பட்டுள்ள நிலையில், ஒரு மொழிக்கு மட்டும் ஏன் இப்படி சிம்மாசனம்?

புழக்கத்தில் - பேச்சு வழக்கு, எழுத்து, புராதன மொழி - வாழும் மொழி - எம்மொழி செம்மொழி தமிழுக்கு உரிய மரியாதை இவ்வாட்சியில் கிடைக்கிறதா?

எனவே, நாட்டில் வேலை கிட்டாத நிலை, பண வீக்கம் - ஏறும் விலைவாசிகள், பரவிவிட்ட வறுமை, இப்படிப்பட்ட பிரச்சினைகளைப்பற்றி எல்லாம் கவ லைப்படாமல், ஹிந்தித் திணிப்பில் ஈடுபட்டால், அதற்கு ஆட்சியாளர்கள் கடும் விலையைத் தரவேண்டும் என்பதை உணர்ந்து - தமிழ்நாடு மட்டும் ஹிந்தியை எதிர்க்கவில்லை - பல மாநிலங்களிலும் அவர்கள் மொழி உணர்வை உரிமையெனக் கருதிடுகிறார்கள் என்ற உண்மையை ஏனோ உணர மறுக்கிறார்களோ - 'டில்லியில் ஆளும் நவீன ராஜாக்கள்' என்பதே நம் கேள்வி!

எனவே, மக்களின் உணர்ச்சி நெருப்போடு விளையாடவேண்டாம்!

 கி.வீரமணி

தலைவர்,

திராவிடர் கழகம்

11.4.2022

என்.எல்.சி.யின் சதி!

  April 09, 2022 • Viduthalai

 தமிழர் தலைவர் ஆசிரியர் அறிக்கை

என்.எல்.சி. நடத்தும் தேர்வின் முறைகேடுபற்றி திராவிடர் கழகத் தலைவர் ஆசிரியர் கி. வீரமணி அவர்கள் விடுத்துள்ள அறிக்கை வருமாறு:

நெய்வேலி நிலக்கரி நிறுவனத்தின் பணிகளில் தமிழர்களுக்கான வாய்ப்பு மறுக்கப்பட்டு வருவது தொடர்கதையாகி உள்ளது. 

Graduate Engineering Trainee (GET) என்ற பணிக்கு 300 பணியிடங்களுக்கான அறிவிக்கை கடந்த 26-ஆம் தேதி வெளியிடப்பட்டுள்ளது. பொறியியல் பட்டதாரிகளுக்கான இப் பணிக்கு விண்ணப்பிக்க Gate 2022 தேர்வில் தேர்ச்சி பெற்றிருக்க வேண்டும் என்று அதில் அறிவிக்கப்பட்டுள்ளது. 

வழக்கமாக Gate  தேர்வுகள் M.tech  போன்ற மேற்படிப்புகளுக்காக எழுதப்படுபவை. மேற்படிப்பு எண்ணம் இல்லாதவர்கள் 'கேட்' தேர்வுகள் எழுதுவதில்லை. ஆனால், இப்பணிக்கான அடிப்படைத் தகுதியாக வைக்கப்படுமேயானால், முன்கூட்டியே அதற்கான அறிவிப்புகள் வெளியிடப்படும். கடந்த ஆண்டுகளில் (2014-2018) அவ்வாறே விளம்பரங்கள் முன்கூட்டியே வெளியிடப்பட்டுள்ளன. அதற்கேற்ப விண்ணப்பிக்க விரும்புவோர் 'கேட்' எழுதி, தயாராக இருப்பார்கள். தற்போதும் அத்தகைய விளம்பரங்களை முன்கூட்டியே வெளியிட்டுத் தான் கோல் இந்தியா, இந்தியன் ஆயில் போன்ற நிறுவனங்கள், தங்களுக்கு விண்ணப்பிக்க விரும்புவோரை 'கேட்' தேர்வுக்குத் தயார்படுத்தச் செய்கின்றன.

இந்நிலையில் 2020-ஆம் ஆண்டு ‘கேட்’ தேர்வு இல்லாமல், என்.எல்.சி. நிர்வாகம் நடத்திய தேர்வு மூலமே பொறியாளர்கள் தேர்வு செய்யப்பட்டுள்ளனர். 2022-ஆம் ஆண்டுக்கு 'கேட்' தேர்வின் அடிப்படையிலேயே பணியாளர்கள் எடுக்கப்படுவார்கள் என்று முடிவு செய்யப்பட்டிருந்தால், என்.எல்.சி. சார்பில் முன்கூட்டியே ‘கேட்’டுக்குத் தயார்படுத்தக் கோரும் விளம்பரம்  வெளியிடப்பட்டிருக்க வேண்டும். வெளியாகவில்லை. 

கடந்த ‘கேட்’ தேர்வு 2021-இல் முடிந்து அதன் தேர்வு முடிவுகள் டிசம்பர் இறுதியில் வெளியாகிவிட்டன. ஆனால், “கேட் தேர்வு அடிப்படையிலேயே பணியிடம் நிரப்பப்படும்; ஏப்ரல் 11-ஆம் தேதியே விண்ணப்பிக்க இறுதிநாள்” என்று இப்போதைக்கு ‘கேட்’ தேர்வு எழுத முடியாத சூழலில் அறிவித்திருப்பது, வாய்ப்பை மறுக்கும் அடாத செயலாகும். 

ஒன்று முந்தைய முறையைப் பின்பற்றி ‘கேட்’ தேர்வு இல்லாமல், நெய்வேலி நிலக்கரி நிறுவனமே தனித் தேர்வு நடத்தி பணியாளர்களைத் தேர்வு செய்ய வேண்டும். அல்லது 'கேட்' தேர்வு கட்டாயம் என்பதை அறிவித்துவிட்டு, எழுதுவதற்கான வாய்ப்பு அமைந்தபின், அதன் அடிப்படையில் பணி நியமனத்திற்கான நேர்காணலை நடத்த வேண்டும். 

வடவர்களுக்கு மட்டும் பயன்படும் வாய்ப்பாக இப்படி திடீரென ஒரு ’கேட்’டைப் போடுவது கண்டனத்திற்குரியது. என்.எல்.சி நிர்வாகம் உடனடியாக இந்த விளம்பரத்தைத் திரும்பப் பெற்று, நியாயமாக அனைவரும் விண்ணப்பிக்க வாய்ப்பு ஏற்படுத்த வேண்டும்.

கி. வீரமணி

தலைவர், 

திராவிடர் கழகம்

9-4-2022

அட, அரை குறையே! (துக்ளக்)

  April 05, 2022 • Viduthalai

கேள்வி: திராவிடர் கழகத் தலைவர் வீரமணி தன்னைத் 'தமிழர் தலைவர்' என்று அழைத்துக் கொள்கிறாரே?

பதில்: கருணாநிதி தன் வாழ்நாள் முழுதும் அமர்ந்திருந்த தமிழர் தலைவர், சமூகநீதிக் காவலர் - ஆகிய இரண்டு நாற்காலிகளும் அவருக்குப் பிறகு 5  ஆண்டுகள் காலியாக இருந்தன. அதில் தமிழர் தலைவர் நாற்காலியைக் குறி வைத்துக் கொண்டிருந்தார் கி. வீரமணி. சமயம் பார்த்து, சமூகநீதி சரித்திர நாயகர் என்று புகழ்ந்து ஸ்டாலினை சமூகநீதி காவலர் நாற்காலியில் அமர்த்தி விட்டு, காலியாக இருந்த தமிழர் தலைவர் நாற்காலியில் ஓசைப்படாமல் அமர்ந்து விட்டார் வீரமணி. ஸ்டாலின் புகழ் பாடியபடி இருந்த தி.மு.க.வினர் அதைக் கவனிக்கவில்லை. இனி அந்த நாற்காலியை வீரமணி விடவே மாட்டார். பாவம், ஸ்டாலின். கருணாநிதிக்குப் பிறகு தமிழர் தலைவர் வீரமணி தான். ஸ்டாலின் அல்ல.

'துக்ளக்' 13.4.2022

சிந்தனை: தமிழ்நாட்டுச் சரித்திரத்தின் 'அரிச் சுவடியே'  தெரியாத ஓர் ஆள் 'துக்ளக்'கை அபகரித்துக் கொண்டு உளறிக் கொட்டிக் கொண்டு இருக்கிறார். கலைஞர் அவர்களே திராவிடர் கழகத் தலைவர் கி.வீரமணி அவர்களைத் "தமிழர் தலைவர்" என்றுதான் அழைத்தார் என்பது தெரியுமா? 'தத்துப் பித்து' என்று உளறுவது 'துக்ளக்'கின் வாடிக்கைப் புத்தி!