அரசு பேருந்துகளில் 5 வயதிற்குட்பட்ட குழந்தைகளுக்கு இலவச பயணம்: அதிகாரிகளுக்கு உத்தரவு

    May 29, 2022 • Viduthalai

சென்னை, மே 29 அரசு பேருந்துகளில் 5 வயதிற்கு உட்பட்ட குழந்தைகளுக்கு கட்டணமில்லா பயணத்தை செயல்படுத்த அனைத்து மேலாளர்களுக்கும் முதன்மை செயலாளர் உத்தரவிட்டுள்ளார்.

இதுகுறித்து அவர் வெளியிட்ட அறிக்கை:போக்கு வரத்து துறையின் மானியக்கோரிக்கை மீது சட்டமன்ற பேரவையில் கடந்த மே 5ஆம் தேதி நடந்த விவாதத்திற்கு பின் போக்குவரத்து துறை அமைச்சர் கீழ்க்கண்ட அறிவிப் பினை வெளியிட்டார்.

தமிழ்நாடு அரசு போக்குவரத்துக் கழகங்களால் இயக்கப்படும் அனைத்து வகை பேருந்துகளிலும் 5 வயதிற்கு உட்பட்ட குழந்தைகள் இலவசமாக பயணிக்க அனுமதிக்கப்படுவார்கள். (தற்போது 3 முதல் 12 வயது வரையிலான குழந்தைகளுக்கு அரை கட்டணத்தில் பயணச்சீட்டு வழங்கப்படுகிறது) மேற்கண்ட அறிவிப்பினை உடனடியாக நடைமுறைப்படுத்த தேவையான நடவடிக்கைகளையும் மேற்கொள்ள வேண்டும்.

முத்தமிழறிஞர் கலைஞர் அவர்களின் உருவச் சிலையினை நேற்று (28.05.2022) தமிழ்நாடு முதலமைச்சர்மு.க.ஸ்டாலின் அவர்கள் தலைமையில் இந்தியக் குடியரசுத் துணைத் தலைவர் எம். வெங்கையா நாயுடு அவர்கள் திறந்து வைத்தார்.

   May 29, 2022 • Viduthalai

சென்னை ஓமந்தூரார் அரசினர் தோட்டத்தில் அமைக்கப்பட்டுள்ள முத்தமிழறிஞர் கலைஞர் அவர்களின் உருவச் சிலையினை நேற்று (28.05.2022) தமிழ்நாடு முதலமைச்சர்மு.க.ஸ்டாலின் அவர்கள் தலைமையில் இந்தியக் குடியரசுத் துணைத் தலைவர் எம். வெங்கையா நாயுடு அவர்கள் திறந்து வைத்தார். இந்நிகழ்வின் போது, நீர்வளத் துறை அமைச்சர் துரைமுருகன், பொதுப்பணித் துறை அமைச்சர் எ.வ. வேலு, இந்து சமயம் மற்றும் அறநிலையத் துறை அமைச்சர் பி.கே. சேகர்பாபு, நாடாளுமன்ற உறுப்பினர்கள் டி.ஆர்.பாலு, தயாநிதி மாறன், கனிமொழி, சட்டமன்ற உறுப்பினர் உதயநிதி ஸ்டாலின், தலைமைச் செயலாளர் முனைவர் வெ. இறையன்பு, தமிழ் வளர்ச்சி மற்றும் செய்தித் துறை அரசுச் செயலாளர் மகேசன் காசிராஜன், மற்றும் அரசு உயர் அலுவலர்கள் உடனிருந்தனர்.

தருமபுர ஆதீனம் பல்லக்குச் சவாரி பிரச்சினை: மனிதனை மனிதன் சுமக்கும் அநாகரிகத்துக்கு முற்றுப்புள்ளி வைக்கப்படவேண்டும்

  May 10, 2022 • Viduthalai

இதுபோன்ற பிரச்சினைக்குத் தனி ஆணையும் தேவை!

தருமபுர ஆதினத்தின் பண்டார சன்னதி மனிதர்கள் சுமக்கும் பல்லக்கில் பவனி வருவதற்கு அனுமதி அளித்திருப்பது மனித உரிமைக்கும், நாகரிகத்திற்கும் உகந்ததல்ல - இனியாவது குறைந்தபட்சம் இதுபோன்ற மனித உரிமை மீறலை - அநாகரிகச் செயலை தடை செய்ய பொதுவான ஆணை ஒன்றைத் தமிழ்நாடு அரசு பிறப்பிக்க வேண்டும் என்று திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் அறிக்கை விடுத்துள்ளார். 

அவரது அறிக்கை வருமாறு:

தருமபுர பண்டார சன்னதி பல்லக்கில் செல்லுவது குறித்து 8.5.2022 நாளிட்ட 'விடுதலை'யில் ஓர் அறிக் கையைக் கொடுத்துள்ளோம். 

அதில் குறிப்பிட்டிருந்ததாவது:

‘‘மன்னார்குடி ஜீயர் - அமைச்சர்களையும், எம்.எல்.ஏ.,க்களையும் நடமாட விட முடியாது என்று பகிரங்கமாக சவால் விடுகின்றார் என்றால், இது 1971 ஆம் ஆண்டு ஆத்திக - நாத்திகப் பிரச்சாரத்தின் ‘புதிய அவதாரம்'தானே!'

இதன் பின்னணி, பின்பலம் எங்கே, எந்த நோக்கத்துடன் என்பது மிகவும் ஆராயத்தக்கதும், புரிந்துகொள்ளவேண்டியதும் ஆகும்!

இது முழுக்க மனிதநேய பிரச்சினையின் பாற்பட்டதாகும். தி.மு.க. ஆட்சியின் முற்போக்குக் கொள்கைத் திட்டங்களை மிரட்டிப் பணிய வைத்து முடக்கும் ஒரு காவித் திட்டம்.

இதில் ஓட்டை போட்டுவிட்டால் மற்றபடி மற்ற திட்டங்களில் நாம் வெற்றி அடையலாம் என்பதற்கான ஓர் ஒத்திகை என்பதை தமிழ்நாடு அரசுக்கு குறிப்பாக மரியாதைக்குரிய நமது முதலமைச்சர் அவர்களுக்கு நாம் கனிவுடன், உரிமையுடன் கொள்கை உணர்வு காரணமாக சுட்டிக்காட்டுகிறோம்.

தவத்திரு குன்றக்குடி அடிகளார் அவர்கள்  அன்று சுட்டிக்காட்டியதுபோல், பெரும்பான்மை மக்கள் நலனுக்கும் - சமூகநீதிக்கும் எதிரான வர்கள்தான் இந்த ஆன்மிக போர்வை போர்த்திய ‘நரியர்கள்!'

எனவே, இதுபற்றிய அச்சுறுத்தல்கள், அவ தூறு புழுதிகள்கண்டு பின்வாங்கினால், எந்த ஒரு மாற்றமும், புரட்சிகரமான முன்னெடுப்புத் திட்டங்களும் வரும் நான்கு ஆண்டுகளில் தி.மு.க. ஆட்சியும், இன்றைய முதலமைச்சர் அவர்களும் செய்யவே இயலாத அளவுக்கு ஆக்கவே இன எதிரிகள் துணிவார்கள்.

‘‘துணிந்த பின் எண்ணுவது என்பது இழுக்கு'' 

நடைமுறைத் திட்டங்களில் மறுபரிசீலனை - ஆட்சிக்கு இவையெல்லாம் சிக்கலை ஏற் படுத்தும்.''

இவ்வாறு 'விடுதலை'யில் (8.5.2022) குறிப்பிட்டு இருந்தோம். ஆனாலும், நடக்கக் கூடாதது - இப்போது நடந்துவிட்டது.

இதனை எதிர்பார்க்கவில்லை.

ஆன்மிகம் என்பதைவிட இதன் பின்னணியில் பி.ஜே.பி., ஆர்.எஸ்.எஸ். என்ற அரசியல் இருக்கிறது என்பதை மறந்துவிடக் கூடாது.

தங்களுக்கான வெற்றி என்று துள்ளிக் குதிப்பார்கள்; மதவெறி காவி சக்திகளும் மகிழ்வார்கள்.

முற்போக்காளர்களுக்கும், பகுத்தறிவாளர்களுக்கும், மனித உரிமைப் போராளிகளுக்கும் தமிழ்நாடு அரசின் பின்வாங்குதல் - இந்த பல்லக்குப் பிரச்சினையில் ஒரு தோல்வி என்று ஊடகங்கள் சித்தரிக்கக் கூடும். எப் போதுமே சமூகநீதிக்கான, மனித உரிமைப் போராட் டங்கள் உடனடியாக வெற்றியை தந்ததாக வரலாறு இல்லாவிட்டாலும், இறுதியில் சிரிப்பவர்கள் பகுத்தறி வாளர்களாகத்தான் இருப்பார்கள் என்பதற்கு வரலாற்றில் எத்தனையோ நிகழ்வுகள் உண்டு.

அது ஒரு புறமிருக்கட்டும். நமக்குள்ள ஆதங்கம் எல்லாம், தி.மு.க. ஆட்சிக்கு இப்படி ஒரு பின்னடைவை - களங்கத்தை - இந்தத் தடுமாற்ற முடிவு உருவாக்கி விட்டதே என்பதுதான்!

தி.மு.க. ஆட்சி என்ற ''வாராது வந்த மாமணி''யான ஆட்சியின் சாதனைகளும், புகழும் என்றும் ''ஆயிரங் காலத்துப் பயிராக'' அமைய வேண்டும் என்பதில் நம்மைவிட அதிக அக்கறை உள்ளவர்கள் வேறு எவரும் இருக்க முடியாது.

எனவேதான் கொள்கைச் சறுக்கல்களோ, வழுவல் களோ நடந்துவிடக் கூடாது என்பதில் நமது பார்வையும், கவலையும், பொறுப்பும் அரசியலுக்கு அப்பாற்பட்ட இனமானப் பிரச்சினையாகும்!

மக்களாட்சியில் சில முடிவுகளை ஆட்சியாளர்கள் மறுபரிசீலனை செய்வது தவிர்க்க இயலாததுதான். ஆனால், அப்படிப்பட்ட மறுபரிசீலனைகள் அடிப்படை மனித உரிமைகளையும், சமத்துவ நெறிகளையும் பாதிப்பதாக அமைந்து விடக் கூடாது.

மதுரை ஆதின கர்த்தர் என்னைக் கேலி செய்வதாக நினைத்து, பல்லக்கை மனிதர்கள் சுமப்பது அநாகரிகம்; மனித உரிமை பறிப்புக் கூடாது என்கிற அத்துணை முற்போக்கான தலைவர்களை, சிந்தனையாளர்களை கேலி செய்துள்ளார்.

‘‘உலகம் முழுவதும் இது விளம்பரப்படுத்தப்பட்டதாம்'' என்றும் கூறுகிறார். உலகம் முழுவதும் அந்த அநாகரிக மான, மனிதனை மனிதன் தூக்கி சுமப்பதைக் கண்டு இப்படி இந்த 21 ஆம் நூற்றாண்டிலும் பழைய மனித அநாகரிகங்களா? என்றுதான் முகம் சுளிப்பார்கள் - சிரிப்பார்கள் என்பதை பக்குவமடையாத பண்டார சன்னியாசி  புரிந்துகொள்ள சக்தியற்ற பரிதாபத்திற் குரியவர் ஆவார்!

மனிதர்களை தூக்கிச் சுமப்பதற்கு ஒரு விசித்திரமான புதிய வாதம் - முன் வைக்கப்படுகிறது!

தூக்குபவர்களே விரும்பி வந்துதான் தூக்கிச் சுமக்க முன் வருகிறார்களாம்! - இது அறிவுபூர்வமாகவோ, சட்டபூர்வமாகவோ ஏற்கத்தக்கதா?

கைரிக்ஷாவை இழுத்தவர்கள் அவர்களாகவே விரும்பித்தான் இழுக்கிறோம் என்று கூறி, இன்று இழுத்தால் சட்டம் அனுமதிக்குமா?

கருணைக் கொலை செய்ய, முற்றிய நோயினால் அவதியுறுகிறார்கள் - வலியும், வேதனையும் தாங்க முடியாத நிலை அவர்களுக்கு, ஆகவே, அதைச் செய்கிறோம் என்று எந்த டாக்டராவது சொன்னால் அனுமதிப்பார்களா?

 குறிப்பிட்ட மாதங்களைத் தாண்டிய கருவை அதனைச் சுமப்பவர்கள் விரும்பி, தானே கருவை அழித்துக் கொள்ள விரும்புகிறார்கள் - அனுமதிக் கலாமா?

பெண் குழந்தைகளை கள்ளிப்பால் தந்து குடும் பத்தினர், ஏன் தாயுமே அழிக்க முன் வந்தால், சட்டமும் - அரசும் அனுமதிக்குமா?

மனித உரிமை மலிவான விலைச் சரக்கா?

இந்த அரசு சிலரைத் ‘திருப்தி' செய்வதற்காக  அளவுக்கு அதிகமாக ‘ஆன்மிகம்', 'ஆன்மிகம்' என்று ‘தம்பட்டம்' அடிக்கவேண்டுமா?

தந்தை பெரியார் சொன்ன ஒரு பழமொழிதான் நமக்கு இப்போது நினைவுக்கு வருகிறது.

‘‘மாமிசம் சாப்பிடுகிறவன் என்பதற்காக, நான் எலும்புத் துண்டைக் கழுத்தில் போட்டுக் கொண்டு அலைய வேண்டுமா?'' என்பதுதான் அது.

தருமபுர ஆதினகர்த்தரின் பல்லக்குச் சவாரி அனுமதி இதுவே கடைசியாகவும் இருக்கவேண்டும் - பொதுவான ஆணை பிறப்பிப்பது சரியானதாக இருக்கும்.

எனவே, அடிப்படையில் பெரியார், அண்ணா, கலைஞர் வழியே பாதுகாப்பான நிரந்தர வழி!

எதிர்ப்பை உரமாக்கி எழுவதுதான் வெற்றி உலா வுக்கு நிரந்தர வெளிச்சம் என்பதை, உங்களுக்காக என்றும் ஓர் இராணுவக் கட்டுப்பாடுடன் பாடுபடும், பாதுகாக்கும் ஒரு போராளி என்ற உரிமையுடன் மானமிகு முதலமைச்சருக்கும், மற்ற அமைச்சரவை யினருக்கும் வேதனையுடன் தெரிவித்தும், நாளையும் அதே பாதையில் எங்கள் பணி - எந்த நிலைப்பாட்டிலும் விட்டுக் கொடுக்காமல் தொடரும் என்று பெரியார் வழித் தொண்டன் உறுதி கூறி முடிக்கின்றேன்.

மானம் பாராத எம் பணி என்றும் திசை தடுமாறாமல் தொடரும்! தொடரும்!!

கி.வீரமணி

தலைவர்,

திராவிடர் கழகம்

10.5.2022

உயிர்மை' ஆசிரியர் கவிஞர் மனுஷ்யபுத்திரன் அவர்களுக்குப் புரட்சிக்கவிஞர் பாரதிதாசன் விருது

உயிர்மை' ஆசிரியர் கவிஞர் மனுஷ்யபுத்திரன் அவர்களுக்குப் புரட்சிக்கவிஞர் பாரதிதாசன் விருதினை திராவிடர் கழகத் தலைவர் ஆசிரியர் கி.வீரமணி அவர்கள் வழங்கி பாராட்டுகளைத் தெரிவித்தார்

 April 29, 2022 • Viduthalai

'உயிர்மை' ஆசிரியர் கவிஞர் மனுஷ்யபுத்திரன் அவர்களுக்குப் புரட்சிக்கவிஞர் பாரதிதாசன் விருதினை திராவிடர் கழகத் தலைவர் ஆசிரியர் கி.வீரமணி அவர்கள் வழங்கி பாராட்டுகளைத் தெரிவித்தார். புரட்சிக்கவிஞரின் ''உலகுக்கோர் அய்ந்தொழுக்கம்'' என்ற நூலினை தமிழர் தலைவர் வெளியிட, கவிஞர் மனுஷ்யபுத்திரன் பெற்றுக்கொண்டார்.  பேராசிரியர் ந.இராமநாதன் அவர்கள் தொகுத்த ''பெரியார் பாடங்கள்- 3''  நூலினை பேராசிரியர் சுப.வீரபாண்டியன் அவர்கள் வெளியிட, முனைவர் ஏ.ஆர்.வெங்கடாசலபதி பெற்றுக்கொண்டார் (சென்னை பெரியார் திடல், 29.4.2022).

பெரியார் திடலா? இளைஞர்களின் கருங்கடலா?

  May 04, 2022 • Viduthalai

கரோனா நோய்த்தொற்று காரணமாக இரண்டாண்டுகால நீண்ட இடைவெளிக்கு பிறகு திராவிடர் கழக மாநில இளைஞரணி கலந்துரையாடல் கூட்டம் சென்னை பெரியார் திடலில், இது பெரியார் திடலா? இளைஞர்களின் கருங் கடலா? என்று பார்ப்போர் வியக்கும் வண்ணம் தமிழர் தலைவர் ஆசிரியர் கி.வீரமணி அவர்கள் தலைமையில் மிக எழுச்சியோடு நடைபெற்றது.

இளைஞர்களுக்கான உற்சாக அறிவிப்பு :

9.4.2022 அன்று ‘விடுதலை' நாளிதழில் ஓர் அறிவிப்பு வெளிவந்தது. 30.4.2022 அன்று காலை சென்னை பெரியார் திடலில் திராவிடர் கழக இளைஞரணி மாநில கலந்துரை யாடல் கூட்டம், 90 வயதை தொடவிருக்கும் தலைவர், வெயிலையும், மழையையும் பொருட்படுத்தாமல் மக்கள் நலனுக்காக, மாநில உரிமைக்காக என்னாளும் பிரச்சார பயணம் மேற்கொள்ளும் திராவிடர் கழகத் தலைவர், தமிழர் தலைவர் ஆசிரியர் கி.வீரமணி அவர்கள் தலைமையில் நடைபெறும் என்ற இளைஞர்களுக்கான உற்சாக அறிவிப்புதான் அது. இந்த அறிவிப்பு ‘விடுதலை'யில் வெளிவந்த அன்று மாலையே இளைஞரணி பொறுப்பாளர்கள் தங்கள் பொறுப்பிற்கு உட்பட்ட இளைஞரணி தோழர்களோடு தகவல் பரிமாறிக்கொள்ள தொடங்கினர்.

மாநில கலந்துரையாடல் கூட்டத்திற்கான அழைப்பிதழ் தயார் செய்யப்பட்டு அஞ்சல், மின்னஞ்சல், வாட்சப் போன்ற அனைத்து வழிகளிலும் மாநில பொறுப்பாளர்கள் முதல் கிளைக் கழக இளைஞரணி தோழர்கள் இல்லத்திற்கே அனுப்பி அழைப்பு விடுக்கப்பட்டது. இன்னும் கூடுதலாக கிட்டத்தட்ட ஒருமாத காலம் பம்பரமாய் சுற்றிச்சுழன்று மாநிலம் முழுவதும் இருக்கும் இளைஞரணி தோழர்களை நேரில் சென்றும், தொலைபேசி மூலம் தொடர்புகொண்டும் மாநில இளைஞரணி கலந்துரையாடல் கூட்டம் குறித்து, அதில் தமிழர் தலைவர் தலைமையேற்று உரையாற்றுகிறார் என்பதை வலியுறுத்தி வந்தனர். இப்படி கூட்டம் தொடர்பான தகவல் பரிமாற்றம் அனைத்து வழிகளையும் பயன்படுத்தி நடத்திய செம்மை இளைஞர்கள் மத்தியில் பேசு பொருளா னது. அதன் விளைவாக குமரி முதல் கும்மிடிப்பூண்டி வரை தமிழ்நாடு, புதுச்சேரி உள்ளிட்ட மாநிலங்களில் இருந்து ஒவ்வொரு மாவட்டம் சார்பில் தொடர்வண்டியில் முன்பதிவு செய்தும், தனி பேருந்து, சிற்றுந்து, மகிழுந்து போன்றவற்றின் மூலம் கலந்துரையாடல் கூட்டத்தில் கலந்துகொள்ள தயார் தயார் என்ற செய்தி ‘விடுதலை' நாளிதழில் தொடர்ந்து வெளிவந்து கொண்டே இருந்தது.

பெரியார் திடலில் சங்கமித்த 

திராவிடர் கழகத்தின் இளைஞர் பட்டாளம்

மாநில கலந்துரையாடல் கூட்டம் நடைபெற்ற 30.04.2022 சனிக்கிழமை காலை 4 மணிக்கெல்லாம் தமிழ்நாட்டின் தலைநகராகிய சென்னையில் அமைந்துள்ள திராவிடர் கழகத்தின் தலைமை நிலையமான பெரியார் திடலில் திராவிடர் கழகத்தின் இரத்த ஓட்டமாகிய இளைஞர் பட்டா ளம்  சங்கமிக்கத் தொடங்கியது. காலை 6,7 மணியளவில் பெரியார் திடலில் விடிந்த இனிய காலைப்பொழுதில்  கருமேகம் சூழ்ந்ததுபோல் திரும்பும் பக்கமெல்லாம் கருஞ்சட்டை வீரர்கள், களப்பணியாளர்கள் காட்சியளித்தனர். இரண்டு ஆண்டுகாலம் கரோனா நோய்த்தொற்று காரண மாக விதிக்கப்பட்டிருந்த ஊரடங்கு கட்டுப்பாடு தளர்த்தப் பட்டதன் விளைவாக ஒருவரை ஒருவர் நேரில் சந்தித்து இல்லத்தின் நலன் முதல் இயக்கத்தின் நலன் வரை விசாரித்து உரையாடி மகிழ்ந்திருந்தனர். இக்காட்சி போர்க்களம் சென்று வெற்றிகண்டு நாடு திரும்பிய வீரர்களை மக்கள் நலம் விசாரிப்பதுபோல் அமைந்திருந்தது. பல்வேறு மாவட் டங்களில் இருந்து வந்திருந்த தோழர்கள் பசியாற தலைமை கழகத்தால் 8 மணியளவில் காலை உணவு தயார் செய்து பரிமாறப்பட்டது. உணவருந்திய இளைஞரணியினர் தமிழர் தலைவரை வரவேற்க தயாரானார்கள்.

இளைஞர்கள் புடைசூழ 

தமிழர் தலைவருக்கு உற்சாக வரவேற்பு:

தமிழர் தலைவர் காலையில் புறப்பட்டு முதல் நிகழ்வாக சென்னை கலைவாணர் அரங்கில் திராவிட முன்னேற்றக் கழகத்தின் ஏற்பாட்டில் நடைபெற்ற கல்வி - சமூகநீதி - கூட்டாட்சித் தத்துவம் குறித்த தேசிய மாநாட்டில் கலந்து கொண்டு, அந்நிகழ்வை தொடங்கிவைத்து உரையாற்றி விட்டு பெரியார் திடல் நோக்கி புறப்பட்டார். பெரியார் திடலின் வாசலில் இருந்து எம்.ஆர்.ராதா மன்றம் வரை இளைஞரணியினர்  இருபுறம் வரிசையாக நின்று ஆசிரி யரை வரவேற்க ஆயத்தமானார்கள். தமிழர் தலைவர் ஆசிரியர் அவர்களின் ஊர்தி பெரியார் திடல் வாசலை வந்தடைந்தவுடன் விண்ணை முட்டும்  இடி முழக்கம்,  தாரை தப்பட்டை வாத்தியங்கள் முழங்க தந்தை பெரியார் வாழ்க, அன்னை மணியம்மையார் வாழ்க, தமிழர் தலைவர் வாழ்க என்று எழுச்சி முழக்கமிட்டு வரவேற்பளித்தனர். தமிழர் தலைவர் ஆசிரியரும் வாகனத்தை விட்டு இறங்கி நடைபயணமாக இருபுறமிருந்த இளைஞர்களுக்கு வணக்கம் செலுத்தி, உற்சாகப்படுத்தி கூட்ட அரங்கை சென்றடைந்தார்.

கூட்டம் சேர்க்கும் தலைவர்களுக்கு இடையே இளைஞர்களின் வாழ்வை செதுக்கும் தலைவர்

ஆசிரியர் மேடையில் அமரும்வரை இளைஞரணியினர் அமரவுமில்லை, முழக்கம் அடங்கவுமில்லை. தமிழர் தலைவர் ஆசிரியரோடு கழக துணைத் தலைவர் கலி.பூங்குன்றன், கழக பொருளாளர் வீ.குமரேசன், கழக பொதுச்செயலாளர்கள் துரை.சந்திரசேகரன், வீ.அன்புராஜ், இரா.ஜெயக்குமார், மாநில அமைப்பாளர் இரா.குணசேகரன், மாநில இளைஞரணிச் செயலாளர் த.சீ. இளந்திரையன் ஆகியோர் மேடையில் அமர்ந்து, இதுவரை நடைபெற்ற இளைஞரணியின் பணிகள் குறித்தும், இனிமேல் நடக்க வேண்டிய இயக்க பணிகள் குறித்தும், இளைஞர்களை ஊக்கப்படுத்தியும், உற்சாகப்படுத்தியும் உரையாற்றினர். இறுதியாக திராவிடர் கழகத் தலைவர் தமிழர் தலைவர் ஆசிரியர் அவர்கள் ஒன்றுகூடியிருந்த இளைஞர்களை பாராட்டி பேசினார், அப்போது போதை பழக்கம் உடைய வர்கள் எத்தனைபேர் இருக்கிறீர்கள் கை உயர்த்துங்கள் என்றார், கூட்டத்தில் கலந்துகொண்டிருந்த 600க்கும் மேற்பட்டோரில் 10 நபர்கள் மட்டும் கை உயர்த்தினர். துணிச்சலாக கை உயர்த்தியதற்காக அவர்களை பாராட்டி விட்டு, பின்பு உங்கள் உடல் நலன் பேணி காக்கப்பட வேண்டும், உடலுக்கு தீங்கு விளைவிக்கும் காரியங்களில் ஈடுபடாதீர்கள். உடனே அவற்றை கைவிடுங்கள் என்று அவர்கள் தனிமனித ஒழுக்கத்துடனும், சுய கட்டுப்பாட்டு டனும் வாழவேண்டும் என்பதை வலியுறுத்தி அக்கறையுடன் கண்டித்தார். 

சமூக அக்கறை இளைஞர்கள் மனதில் எழவேண்டி, திருமணமாகாதோர் எத்தனைபேர் இருக்கிறீர்கள் என்று கேட்டார் 67 பேர் கை உயர்த்தினர். விதவை மறுமணம், ஜாதி மறுப்பு திருமணம் செய்துகொள்ள விருப்பமுள்ளவர்கள் எத்தனைபேர் என்று கேட்க அதே 67 பேர் அதற்கும் கை உயர்த்தினர். அவர்களை பார்த்து, நடைமுறை சிக்கல்களை எடுத்து கூறி, வாய்ப்பு வசதிக்கேற்ப ஜாதி மறுப்பு திரு மணமோ, விதவை மறுமணமோ செய்திட முன்வாருங்கள் என்று சமூக அக்கறையோடு உரையாற்றினார்.  

கூட்டம் சேர்க்கும் தலைவர்களுக்கு இடையே இளை ஞர்களின் வாழ்வை செதுக்கும் தலைவராக, சமூகத்தின் மீதும் அக்கறை கொண்டு இயக்கப்பணி செய்திடவேண்டும் என்பதை வலியுறுத்தி உணர்ச்சிமிகுந்த உரையாற்றினார்.

புதிய தோழர்கள் பங்கேற்பு:

ஏறத்தாழ 60க்கும் மேற்பட்ட கழக மாவட்டங்களில் இருந்து வருகைபுரிந்திருந்த 450க்கும் மேற்பட்ட இளைஞ ரணி தோழர்கள், மற்றும் அன்று மாலை நடைபெற்ற ஹிந்தி எதிர்ப்பு போராட்டத்தில் பங்கேற்க வந்திருந்த திராவிடர் கழக தோழர்கள் அரங்கம் முழுவதும் நிறைந்திருந்தனர். அதில் திராவிடம் வெல்லும் சிறப்பு கருத்தரங்கம், பெரியா ரியல் பயிற்சி வகுப்பு ஆகியவற்றில் கலந்து கொண்ட இளைஞர்கள் தங்களை திராவிடர் கழகத்தில் இணைத்துக் கொண்டு கழக பணியாற்றி வந்தனர். இவ்வாறு 52 புதிய இளைஞர்கள் கலந்து கொண்டனர். கலந்துரையாடல் கூட் டத்தில் கலந்துகொண்ட இளைஞர்களில் 127 பேர் இப்போது தான் பெரியார் திடலை முதன்முதல் பார்ப்பதாகவும், திடலில் அமைந்திருக்கும் தந்தை பெரியார் சிலை, நினைவிடம், அருங்காட்சியகம், நூலகம், விடுதலை அச்சகம் ஆகிய வற்றை பார்த்தது மகிழ்ச்சியளிப்பதாகவும் கூறினர்.

போற்றுதலுக்குரிய தீர்மானங்கள் நிறைவேற்றம்:

கிராமப்புற மாணவர்களை பாதிக்கும், சமூக நீதிக்கு எதிரான நீட் தேர்வு எதிர்ப்பு, தேசியக் கல்விக் கொள்கை எதிர்ப்பு, மாநில உரிமை மீட்பு ஆகிய முழங்கங்களை முன்னிறுத்தி ஏப்ரல் 3ஆம் தேதி நாகர்கோயில் தொடங்கி ஏப்ரல் 25 சென்னை வரை 38 மாவட்டங்கள், 2 மாநிலங்களில் 40 கூட்டங்களில் பங்கேற்று 89 வயதிலும் தனது உடல் நலம், கோடை வெப்பத்தையும் பொருட்படுத்தாமல் இளைஞர் களின் எதிர்காலத்தை கருத்தில் கொண்டு 21 நாட்கள் பரப்புரை பயணம் மேற்கொண்டு  இளைஞர்கள், மாண வர்கள், பொதுமக்கள் என பல்லாயிரம் மக்களை சந்தித்து எழுச்சியை ஏற்படுத்திய தமிழர் தலைவர் ஆசிரியர் 

கி.வீரமணி அவர்களுக்கு கழக இளைஞரணி சார்பில் வாழ்த் துக்களையும், நன்றியையும் தெரிவித்தும், 

சமூகநீதிக்கு விரோதமான நீட் தேர்விலிருந்து தமிழ் நாட்டு மாணவர்களுக்கு விலக்கு அளிக்க கோரி தமிழ்நாடு சட்டமன்றத்தில் நிறைவேற்றப்பட்ட சட்ட மசோதாவை காலம் தாழ்த்தாமல் குடியரசு தலைவருக்கு அனுப்புமாறு தமிழ்நாடு ஆளுநரை திராவிடர் கழக இளைஞரணி வற்புறுத்தியும், 

தலைமை  எடுக்கும் அனைத்து முடிவுகளுக்கும் கழக இளைஞரணியினர் களத்தில் நின்று போராடி தமிழ்நாடு இளைஞர்களின் எதிர்காலத்தை பாதுகாப்பது என்றும், 

தமிழர் தலைவர் ஆசிரியர் அவர்களின் அயராத பணியை ஊக்கப்படுத்திடவும், இனவுரிமை மீட்புக் களத்தில் போரிடும் வாளாக செயல்படும் “விடுதலைக்கு" 60,000 சந்தா சேர்ப்பு இயக்கத்தில் கழக இளைஞரணியினர்  மாவட்ட கழகப் பொறுப்பாளர்களோடு இணைந்து பணியாற்றி இலக்கை அடைய பாடுபடுவது எனவும், 

பெரியாரியல் பயிற்சிப் பட்டறை, பெரியார் சமூக காப்பு அணி பயிற்சி, இளைஞரணி அமைப்பை பரவலாக்குதல், தெருமுனைக் கூட்டங்கள், கருத்தரங்குகள், நெய்வேலி (என்.எல்.சி.) நிறுவனத்தில் பொறியாளர்கள், நியமனத்தில் தமிழர்களைப் புறக்கணிப்பதை எதிர்த்து  மே 9 அன்று நெய்வேலியில் இளைஞரணியினர் ஆர்ப்பாட்டம், 

ஜூன் 4 அன்று  சென்னையில் ஹிந்தித் திணிப்பு எதிர்ப்பு கருத்தரங்கம் - மாநாடு, 

ஜூலை 16 அன்று  அரியலூரில் திராவிடர் கழக இளை ஞரணி மாநில மாநாடு நடத்துவது உள்ளிட்ட பல்வேறு தீர்மானங்கள் நிறைவேற்றப்பட்டன.  

திராவிடர் கழக இளைஞரணிக்கு புது ரத்தம் பாய்ச்சும் விதமாக 35 வயதுக்குமேல் இளைஞரணியில் சிறப்பாக  பணியாற்றி வந்த தோழர்களுக்கு திராவிடர் கழக பொறுப்பு உயர்வு வழங்கிட அவர்கள் இளைஞரணி பொறுப்புகளில் இருந்து விடுவிக்கப்பட்டு, அந்த பொறுப்புகளுக்கு சிறந்த முறையில் கழகப்பணியாற்றிவரும் புதிய இளைஞர்கள் நியமிக்கப்பட்டனர். கூட்டம் நிறைவுபெற்றவுடன் தலைமை கழகத்தினால் மதிய உணவு வழங்கப்பட்டது.

ஹிந்தி எழுத்து அழிப்புக்கு 

தார்சட்டியுடன்  புறப்படுதல்

சென்னை எழும்பூர் ரயில் நிலையத்தில் ஹிந்தி எதிர்ப்பு (ஹிந்தி அழிப்பு) போராட்டக்களம் காண கருப்பு மெழுகு வர்த்திகள், இளைஞரணியினர்  தயாரானார்கள்.  பிற்பகல் 3.30 மணிக்கு இந்தியக் கம்யூனிஸ்ட்  கட்சியின் மாநில செயலாளர் தோழர் முத்தரசன் அவர்கள் தமிழர் தலை வரிடம் தார்ச்சட்டியையும், பிரசையும் வழங்கி போராட் டத்திற்கான பேரணியை தொடங்கி வைத்தார். பேரணியில் தமிழர் தலைவர் முன்செல்ல அவரை பின்தொடர்ந்து திராவிடர் கழகம், திராவிடர் கழக இளைஞரணி தோழர்கள் 600க்கும் அதிகமானோர்  ஈ.வெ.கி.சம்பத் சாலை, பெரியார் ஈ.வெ.ரா.சாலை, காந்தி இர்வின் சாலை வழியாக எழும்பூர் ரயில் நிலையத்தை நோக்கி ஹிந்தி எதிர்ப்பு முழக்கமிட்டு நடந்து சென்றனர். 

கழக தோழர்களை தாளமுத்து நடராஜன் நினைவு கட்டடம் அருகே காவல்துறையினர் தடுத்து நிறுத்தினர். 

அங்கே வந்திருந்த தமிழ் மற்றும் ஆங்கில மொழி ஊடகங்கள் சார்ந்த செய்தியாளர்கள் கேட்ட கேள்விகளுக்கு எதற்காக இந்த ஹிந்தி எதிர்ப்பு போராட்டம் என்பதை விளக்கி, "ஹிந்தி எழுத்தை அழிப்பதன் மூலம் கலாசார, பண்பாட்டு திணிப்பை நாம் எதிர்க்கிறோம். 

இந்த கலாசார திணிப்புக்கு எதிரான போராட்டம் பெரியார் காலத்தில் தொடங்கி இன்று வரை தேவைப் படுகிறது. இந்த மண் காவி மண் அல்ல. பெரியார் மண். இந்த மண் கலாசார பண்பாட்டு திணிப்பை ஒருபோதும் ஏற்காது என்பதற்கு அடையாளமாக இந்த போராட்டம் நடத்தப்படுகிறது. 

பெரியார் தொடங்கிய போராட்டம் ஒரு போதும் தோற்றது இல்லை. கல்வித்துறை, ஆட்சித்துறையில் ஹிந் தியை திணிக்க மேற்கொள்ளப்படும் முயற்சிக்கு எதிராக இந்த போராட்டம் நடத்தப்படுகிறது. இது ஒரு தொடர் போராட்டம் ஆகும். வெற்றி கிடைக்கும் வரை போராட்டம் தொடரும்" என்று தமிழர் தலைவர் ஆசிரியர் அவர்கள் பதில் கூறினார். 

இந்திய ஒன்றியத்தில் உள்ள மற்ற மாநிலங்களும், வேற்று மொழி மக்களும் புரிந்துகொள்ளும் அளவிற்கு ழிஞிஜிக்ஷி போன்ற ஆங்கில ஊடகங்களும் இந்த செய்தியை வெளியிட்டுள்ளன. 

தமிழர் தலைவர் ஆசிரியர் அவர்களையும், போராட் டத்தில் ஈடுபட்ட தோழர்களையும் கைது செய்து எழும்பூர் தமிழ்ச் சாலையில் அமைந்துள்ள தனியார் திருமண மண் டபத்தில் தங்கவைக்கப்பட்டனர். அங்கேயும் மேடையில் கழக தலைவர் தமிழர் தலைவர், கழக துணைத் தலைவர், கழக பொருளாளர் அமர்ந்திட, கழக தோழர்களை உற்சாகப்படுத்த பொதுச்செயலாளர் ஜெயக்குமார் உள்ளிட்ட தோழர்கள் கழகப் பாடல்களை பாடினர்.

பின்னர் 6 மணியளவில் கைது செய்யப்பட்ட தோழர்கள் விடுதலை செய்யப்பட்டனர். வரலாற்று சிறப்பாக கைது செய்த காவல் துறையினரே வாகன வசதி ஏற்பாடு செய்து கழக தோழர்களை பெரியார் திடலில் கொண்டுவந்து இறக்கிவிட்டனர்.

அதன் பிறகு வெளியூரில் இருந்து சென்னை வந்திருந்த இளைஞரணி தோழர்கள் தலைமைக் கழகம் வந்தோம், தலைவரை கண்டோம், அவரது தலைமை உரையை கேட்டோம் என்ற மகிழ்ச்சியோடும், தங்களது ஊரில் சென்று அடுத்த கட்ட பணியாக மாநில, மண்டல, மாவட்ட, ஒன்றிய வரியாக கலந்துரையாடல் கூட்டங்களை நடத்தி நெய்வேலி ஆர்ப்பாட்டம், அரியலூர் மாநாடு போன்றவற்றிக்கு இளைஞர்களை ஒன்றுதிரட்டும் பணியை மேற்கொள்கிறோம் என்ற உணர்ச்சியோடும் ஊக்கத்தோடும் இரவு பயணம் மேற்கொண்டு இல்லம் திரும்பினர். 

அன்று முழுவதும்  இளைஞரணி தோழர்களுடனேயே இயக்க தலைவர் பயணித்தார் என்பது இளைஞரணிக்கான இன்னும் கூடுதல் சிறப்பு.

(தொகுப்பு: நெல்லுப்பட்டு 

முனைவர் வே.இராஜவேல், தஞ்சை மண்டல இளைஞரணி செயலாளர் ,திராவிடர் கழகம்)

குமரி முதல் சென்னை வரை ஒலித்திட்ட வீரமணியோசை

  May 05, 2022 • Viduthalai

தமிழர் தலைவரின் பெரும் பரப்புரைப் பயணம்

முனைவர்
பேராசிரியர் ந.க.மங்களமுருகேசன்

தமிழக வரலாற்றிலும் சரி, இந்திய வரலாற்றிலும் சரி, இப்படி ஒரு பரப்புரைப் பயணம், புரட்சிப்பயணம், போர் அறிவிப்புப் பயணம் எந்தத் தலைவர் பெருமக்களும் நடத்தியதில்லை.

தந்தை பெரியார், தமிழர் தலைவர் ஆதித்தனார் தொடர் வண்டியில் பயணித்துப் பரப்புரைப் பயணம் மேற்கொண்ட அறுபதுகளில் நிகழ்ந்ததுண்டு.

முத்தமிழ் அறிஞர் கலைஞர் நீதி கேட்டு நெடிய பயணம் கால்நடையாகக் - கால்கள் கன்றிப் போய் கொப்பளிக்க நடந்த வரலாறும் அறிவோம். ஆனால்... ஆனால்.... என்ன?

தந்தை பெரியாரையும் தமிழினத் தலைவர் கலைஞரையும் விஞ்சி விட்டார் தனயன், உடன்பிறப்பு தமிழர் தலைவர் பகுத்தறிவுப் போராளி.

படிக்கக் கேட்கப் படங்களைப் பார்க்க வியப்பாக இருக்கிறது ஒருபக்கம் என்றாலும் உண்மையாகச் சொல்லப் போனால் வேதனையாக இருக்கிறது - அவர் மேற்கொண்ட வேதனைப் பயணத்தை அறிகையில்,

அதே வேளையில் இங்கே ஆளவந்த மேனாள் காவல்துறை அலுவல் கரார் மற்றும் ஒன்றிய அரசு ஆளும் காவி அரசு ஆகியோர் மீது சினம் பூக்கிறது, சிந்தையில் இப்படி மானிட நேயமற்ற மானிடரும் ஆளவந்தனரே என எண்ணக்குவியல் நிறைகிறது.

இந்தப் பயணம் - இந்த 89 வயது மனிதரின் போர்ப்பரணி கூட்டி வரும் பயணம் - கின்னஸ் சாதனைப் புத்தகத்தில் இடம் பெறவோ, புதிய எழுத்தைச் சாதனை மகுடத்தில் பதிக்கவோ இல்லை. நிச்சயமாக இல்லை.

தந்தை பெரியார் தாம் வாழ்ந்த காலத்தில் சமூகநீதி இயக்கத்தைச் தோள்மீது சுமந்த போது, மூத்திரச் சட்டி சுமந்த போது, அவ்வப்போது உடல் உபாதைகள் உறுத்திய போது உம்.... உம்.... என்று, அம்மா.. அம்மா என்று வலி பொறுக்காமல் முனங்கிய வாறே, வேறு யாரும் முன் வராததாலே நான் சுமக்கிறேன் என்றுணர்ந்ததை நினைவுறுத்துகிறது இந்த உற்றார் தொடர் பயணம்.

21 நாள்கள் நாகர்கோயில் முதல் நம் தலைநகர் சென்னை வரை தொடர் பெரும் பரப்புரை பயணம் மேற்கொண்ட தமிழர் தலைவர் 21 வயதாகிய இளைஞரா, கட்டுமஸ்தான உடல் கொண்ட கட்டிளம் காளையரா. இவ்வாறு பயணம் மேற்கொண்டால் இந்தியாவின் தலைமை அமைச்சர், குடியரசுத் தலைவர் பதவி ஏதேனும் கிட்டப் போகிறதா இல்லையே.

அகவை 89, ஆசிரியர் அவர் உடலில் மருத்துவரின் கத்தி படாத இடமே இல்லை. இந்திய வரலாற்றில் ராணா பிரதாப் சிங் என்ற ரஜபுத்திர மாவீரரைப் பற்றி எழுதுகையில் கர்னல் டாப், Fragement of a Soldier  என்று குறிப்பிடுவார்.

அது போல் கண், காது, கை, கால், இதயம், வயிறு என்று உடலின் உறுப்புகள் பலவற்றிற்கும் சிகிச்சை எடுத்துக் கொண்டவர். ஒரு முறை அல்ல, நான்குமுறை திறந்தநிலை இதயச் சிகிச்சை எடுத்துக் கொண்டவர். 

ஒரு முறை அல்ல இரண்டு முறை கரோனா தாக்குதலுக்கு ஆட்பட்டவர். எனவே, வியப்பின் மறுபெயர் வீரமணி என்று விதந்து போர்த்தப்பட்டவர். வேறு எவராயினும் இப்படித் தொல்லை சுமந்து செல்ல விழையார்.

அவரின் துணிச்சலான இந்த முயற்சிகளுக்கு உண்மையிலேயே படபடப்போடு கவலையோடு அப்பாடா பயணம் முடித்து வெற்றிமணி ஒலித்துத் திரும்பினாரே என நிம்மதிப் பெருமூச்சு விடுபவர். - அவர் உடல் நிலையை நன்கு அறிந்தவர்களில் ஒருவரான வீரப் பெண்மணி மோகனா அம்மையார். என்கிற அவர்தம் வாழ்விணையர் ஒருவர் மட்டுமே எனலாம்.

உண்மையில் அவருடைய இப்பயணம்  - சமூக நீதிகாக்க மேற்கொண்ட பயணம். தந்தை பெரியார், அறிஞர் அண்ணா, தலைவர் கலைஞர், பெருந்தலைவர் காமராசர் காலமெல்லாம் கல்விப் பயிரைத் தமிழகத்தில் செழிக்க வைத்த மண்ணில் பிற்படுத்தப்பட்ட, ஒடுக்கப்பட்ட மக்களின் கல்வி வாயில் மண்ணைத் திணிக்கும் மய்ய ஒன்றிய அரசின் முரட்டுப்பிடிவாதக் காளைக்கு மூக்கணாங் கயிறு போட மேற்கொண்ட விழிப்புணர்வு வித்தை ஆழமாக விதைத்திட மேற்கொண்ட பயணம்.

மூன்று முதன்மைச் சிக்கல்கள் தமிழ் மண்ணை மட்டுமல்ல - இந்திய மண்ணையே பாதித்திடும் சிக்கல்கள் குறித்த விழிப்புணர்வுப் பயணம் தமிழகம் போல - இந்தியாவின் மாநிலங்கள் அனைத்தையுமே விழிபிதுங்க வைத்திடும், எதிர்கால இந்திய நாட்டைப் பாதிக்கும்.

உண்மையாகச் சொன்னால் ஒவ்வொரு மாநிலமும் ஒன்றிய அரசுக்கு எதிராகப் புரட்சிக் கொடி தீப்பந்தம் ஏந்த வேண்டிய சிக்கல்கள். சுருக்கமாக ஒரே வரியில் சொல்வதெனில் மூன்று சிக்கல்களுமே மாநிலங்களின் உரிமையைப் பாதிக்கும் மூட மனிதர்களின் சிக்கல்கள்.

ஆனால் பாவம் இந்த மாநிலங்கள் எதை எதை எண்ணி கவலைப்படுவார்கள். பெட்ரோல், டீசல், சமையல் எரிவாயு விலையேற்றம் குறித்து கவலைப்படுவார்களா? மாநிலங்களுக்கு வரவேண்டிய ஜி.எஸ்.டி. வரவில்லை எனக் கவலைப்படுவார்களா? அந்தக் கவலை, இந்தக் கவலைகளைச் சிந்திக்க விடாமல் இந்த அடிப்படையில் பிரச்சினைகளை அமுக்கி விடுகிறதேன்?

எல்லையிலே அயலவரால் ஏற்படுவது மட்டுமல்ல இந்நாட்டிற்கு ஆபத்து, இந்திய ஒன்றிய அரசின் கரம் அரசின் இந்துத்துவாக் கொள்கையால், இவையும் நீட் தேர்வு, புதிய தேசியக் கல்விக் கொள்கையும் மாநில உரிமைப் பறிப்பு என்றும், ஒன்றிய அரசின் கொள்கை ஆகியனவும் தான் என்ற தொலைநோக்குப் பார்வை இந்த மாமனிதர் நம் தமிழர் தலைவருக்கு இருந்ததாலே தன் உடல் நலனையும் பொருட்படுத்தாது பயணம் புறப்பட்டு விட்டார். பதவி சுகம் எதவுமே இல்லாத இயக்கத் தலைவர். 

இதில் ஓர் ஆறுதல் ஒரு மகிழ்ச்சி, ஒரு நிறைவு. ஆசிரியரின் கொள்கைப் பயணத்திற்குத் தமிழ்நாட்டில் தி.மு.க., அதன் தோழமைக் கட்சிகள் ஒதுங்கி விடாமல் துணை நிற்பதே.

வழக்கம் போல் அடிமைகளான அ.தி.மு.க.வினர் கண்டு கொள்ளாமல் அடிமைப் பல்லக்குத் தூக்கிகளாக இருக்கின்றனர்.

இந்தப் பயணத்தில் 21 நாட்களில் 40 நகர்களில் வீரமணி ஓசை ஒலித்தது.

3.4.2022 அன்றும் 25.4.2022 அன்றும் இரண்டு நாட்கள் மட்டுமே ஒரே ஒரு ஊரில் பரப்புரை. மற்ற நாட்களில் எல்லா நாள்களும் இரண்டு ஊர்களில் பரப்புரை. மாலை 6 மணிக்கு ஒரு நகரம் என்றால் அதே இரவில் 7 மணிக்கு மற்றொரு ஊரில். எப்படித்தான் திட்டமிட்டாரோ, எவ்வாறு சிந்தனையைச் செலுத்தி திட்டமிட்டாரோ என்று வியக்க வைக்கிறது.

இந்த பயணத்துக்கு இடையே 14.4.2022 அன்று சென்னையில் அம்பேத்கர் சிலைக்கு மாலையிட்டுச் சிறப்பிக்க வருகை புரிந்ததையும் குறிப்பிட வேண்டும்.

பரப்புரைப் பயண வெற்றிக்கு வெற்றிமணி ஒலிக்கச் செய்வதற்குப் பொதுச் செயலாளர்கள் வீ.அன்புராஜ் அவர்களும், இரா.ஜெயக்குமார் அவர்களும் மற்றும் பெ.சுப்பிரமணியன், பெரியார் வீர விளையாட்டுக் கழக மாநிலத்தலைவர் ப.சுப்பிரமணியன் அவர்களும் ஆற்றிய அரும்பணி  அளவிட இயலாத அற்புதப் பணி என்பதையும், பதிவு செய்தாக வேண்டும். ஒவ்வொரு ஊரிலுள்ள இயக்கத் தோழர்களும், தி.மு.க. அதன் கூட்டணிக்கட்சியினரும் ஆற்றிய அரிய பெரிய பணியும் சொல்லாமல் விளங்கும். 

கூட்டம் நடைபெறுவது ஏதோ ஒரு நகரில் ஆனால் உலகம் முழுவதும் வாழும் மனிதர்கள் உடனுக்குடன் கேட்டு மகிழ வகை செய்த சிறப்பும் குறிப்பிடத்தக்கது. அதிலும் ஒரு சிறப்பைச் சொல்லாமல் இருக்க இயலவில்லை. 40 ஊர்களிலும் தமிழர் தலைவரின் உரை வீச்சு தனித்தனிக் கோணத்தில் அமைந்திருந்தது ஒரு வியப்பு. பெரு வியப்பு.

ஏப்ரல் திங்கள் இரண்டாம் நாள் வெளிவந்த துணைத் தலைவர் கவிஞர் கலி.பூங்குன்றன் அவர்கள் வெளியிட்ட தலைப்புச் செய்தியும், அறிவிப்புமே ஆற்றுப் பெருக்கை மட்டுமல்லாமல் சுண்டி இழுக்க மட்டுமல்லாமல் ஆர்வ ஊற்றை உருவாக்கியது.

புறப்படுகிறது பிரச்சாரப்படை பூமாலை வேண்டாம்! |
கூடுங்கள்! கூடுங்கள்!! பெருந்திரளாய்!!!

குஜராத் முதலமைச்சராக இருந்த போது நீட்டையும், ஜிஎஸ்டி, ஆதார் அட்டையையும் எதிர்த்து நெடுமுழக்கமிட்ட அதே நரேந்திர மோடி  பிரதமரான பிறகு "ஒப்புத்தாளம்" வாசிக்கிறார்.

 திராவிட இயக்கம் எடுத்த முடிவுகள் எல்லாம் வெற்றி பெற்றதற்குக்குக் காரணம் அது.  மக்களிடம் செல்வது தான் - பிரச்சாரத்தின் வாயிலாகத்தான் என்ற திராவிடர் கழகப் போர்களின் வெற்றி இரகசியத்தைச் சொல்லி இப்பொழுதும் அதே அணுகுமுறையைக் கையில் எடுத்துக் கொண்டுதான் தமிழர் தலைவர் பகுத்தறிவுப் போராளி மானமிகு. கி.வீரமணி புறப்பட்டுள்ளார்.

நீட் தேர்வு எதிர்ப்பு, கல்விக் கொள்கை எதிர்ப்பு மாநில உரிமை மீட்புப் பரப்புரைப் பெரும் பயணக்கூட்டத்தொடக்க விழா 3.4.2022 அன்று நாகர்கோவிலில் தொடங்கிய தொடக்கமே களை கட்டியதால் இனிவரும் பரப்புரையும் வெற்றிக்கொடி பறக்கச் செய்யும் என்பதாய் அமைந்தது.

தமிழர் தலைவர் தம் உரையின் தொடக்கத்தில் நாகர்கோவில் காவிக்குரியது என்று சிலர் பேசிக் ªகி£ண்டிருக்கிறார்கள். அது வெறும் கானல் நீர் தான். பொய் மான் தான் எனக் காட்டியிருப்பதைக் எடுத்துக் காட்டினார்.

நாகர்கோயில் தான் திராவிட இயக்கத்தின் நாகரீக தொட்டில்.  முதன் முதலில் இங்குதான் வாசிப்பு சாலை தொடங்கப்பட்டது. அதற்குப் பெயர் சுயமரியாதை வாசிப்புச் சாலை என்று புதிய செய்திப் பூங்கொத்தை அறிய தந்தார். நாகர்கோயிலில் அனைத்துக் கட்சியினரும் பொதுமக்களும் தமிழர் தலைவர் ஆசிரியர் அவர்களின் உரை கேட்கத் திரண்டிருந்தனர். பயண வழி நெடுகிலும் தமிழர் தலைவர் ஆசிரியர் அவர்களை உற்சாகத்துடன் வரவேற்றனர்.

ஒவவொரு இடத்திலும் முதன்மை நிகழ்வை மட்டும் குறிப்பிட்டுக் கூறவேண்டியதை எடுத்து வைப்போம். நாகர்கோயிலை அடுத்து தென்காசி, நெல்லையில் 4.4.2022 அன்று பரப்புரை பயணம் நடைபெற்றது.

தென்காசியில் அவருக்குமுன் உரை நிகழ்த்திய அனைவருமே தம் வயதைக் குறிப்பிட்டுப் பேசியதைச் சுட்டிக்காட்டி "தந்தை பெரியாரைப் போல முடியும் வரை பிரச்சாரம் செய்வேன்" என்று பேசி உரையை நிறைவு செய்தவர், அடுத்து நெல்லையில் சுயமரியாதை இயக்க முதல் கூட்டம் நடைபெற்றது. நெல்லையில் தம் உரையில் அனிதாவை நினைவூட்டினார். நெல்லையில் சிற்பூந்தூர சந்திப்பில் நடைபெற்றது.

மூன்றாம் நாள் பரப்புரை 5.4.2022 அன்று தூத்துக்குடி - சிவகாசியில் நடைபெற்றது. தூத்துக்குடியில் முதல் கூட்டத்தில் மோடி அரசின் புதிய தேசிய கல்விக் கொள்கையில் சமூக நீதி என்னும், உயரிய சமத்துவக் கோட்பாட்டுச் சொல்லே இல்லை, எனத் தமிழர் தலைவர் ஒன்றிய அரசின் முகமூடியைக் கிழித்தார்.

அடுத்து தூத்துக்குடியில் இருந்து இரண்டு மணி நேரம் பயணம், ..... சிவகாசியில் பரப்புரை சிறப்புரை முடிந்ததும் மதுரை நோக்கி பயணித்தார் தமிழர் தலைவர், நாகர்கோயிலைப் போல் சிவகாசியில் நகர மேயர் வரவேற்றார்.

6.4.2022 அன்று தேனியில் பரப்புரை நிகழ்த்தியவர், நீட் தேர்வின் அவஸ்தையை விளக்கியவர் "சரி அவர்கள் சொன்னபடியே நீட் தேர்வின் நோக்கமாகச் சொல்வது நிறைவேறி இருக்கிறதா எனக் கேள்வி கேட்டு வரிசையாக ஒவ்வொன்றுக்கும் பதிலளித்து நோக்கம் நிறைவேறவில்லை என்பதைக் கடந்து ஊழலும் நிர்வாகச் சீர்கேடும் மலிந்து விட்டதைக் கவலையோடும் கவனத்தோடும் உதாரணங்களுடன் மெய்ப்பித்தார்.

தேனியில் கூட்டம் முடித்து இரண்டு மணி நேரம் பயணித்து மதுரை வந்து அடைந்தார். மதுரை சித்திரைத் திருவிழாக் கோலம் பூண்டிருந்ததோடு, தமிழர் தலைவர் வருகைக்கும் விழாக் கண்டது. இங்கே தமிழ்நாடு காங்கிரசுக் குழுத் தலைவர் கே.எஸ்.அழகிரியும் பங்கேற்றார்.

இராமநாதபுரத்தில் 7.4.2022 அன்று இராமநாதபுரம் அரண்மனை முன் நடைபெற்றது. விழாவில் மானாமதுரையில் வரவேற்பு நடைபெற்றது. கூட்டத்தை முடித்துக் கொண்டு மேடையிலேயே செய்தியாளர்களைச் சந்தித்து விட்டுக் காரைக்குடியில் பரப்புரைப் பெரும்பயணப் பொதுக்கூட்டத்தில் "எத்தனையோ பிரச்சினைகள் இருக்கும் போது ஏன் இந்த மூன்று பிரச்சினைகளை மட்டும் மய்யப்படுத்தித் தீவிரப் பரப்புரை செய்வது ஏன்?" என்ற கேள்வியை மக்கள் சார்பாக அவரே கேட்டு இந்த விடையையும் இவ்வாறு உரியப் பிரச்சினையின் தீவிரத்தைப் பளிச்செனப் புரிய வைத்தார். தெள்ளென தெளிய வைத்தார்.

"ஒரு விபத்து ஏற்பட்டால் காயம் ஏற்படுவது எல்லார்க்கும் தெரியும். அதற்குப் பரிகாரம் செய்யப் பலரும் வருவார்கள். ஆனால் புற்றுநோய் வந்தால் அது முற்றிய பிறகுதான் தெரியும். நீட்டும், புதிய தேசியக் கல்விக் கொள்கையும் புற்றுநோயை விட ஆபத்தானவை. அதனாலேதான் இந்த மூன்றையும் நாங்கள் கையில் எடுத்திருக்கிறோம்" என்ற பதில்தான் ஆசிரியர் அளித்தது.

தொடர்ந்தவர் "கல்வி தான் நமது பிள்ளைகளின் வளர்ச்சிக்கு காரணம். அந்தக் கல்விக் கண்ணைக் குத்துவார்கள். அதற்குத் தான் உங்களை நேரில் சந்தித்துப் பேசி சிந்திக்க வைக்க வந்திருக்கிறோம்" எனவும் விளக்கினார்.

காரைக்குடியில் கூட்டம் முடிந்து இரவிலேயே திருச்சியில் தங்கிடப் பயணமானார். திருச்சியில் தங்கிய பின் 8.4.2022 வெள்ளியன்று புதுக்கோட்டை, தஞ்சாவூரை முடித்துக் கொண்டு சிறப்பான வரவேற்றைப் பெற்ற பின் அரியதோர் உரை நிகழ்த்தியவரின் அடுத்த பயணம் திருவாரூர், நாகையாகும்.

திராவிட இயக்க வரலாற்றில் குறிப்பாக திராவிடர் கழக வரலாற்றில் தஞ்சைக்கு மட்டும் தனி இடம் - தமிழர் தலைவர் எத்தனை முறை சென்றாலும் அத்தனை முறையும் தனிச்சிறப்பு வரவேற்புதான். எடைக்கு எடை கொடுத்துத் திராவிடர் கழகத் தலைவர்களை எடை போட்ட மண்.

21 நாள் பயணத்தில் ஒவ்வொரு நகரமும், நாகர்கோயிலில் இருந்து தஞ்சை வரை ஒவ்வொன்றிலும் ஒரு வகைச் சிறப்பு இருந்து. விழிப்புணர்வு பயணம் வெற்றிப் பயணம் தான். ஆனால் தஞ்சையில் ஒரு மாநாடு நடக்கப் போவது போன்ற தோற்றம்.

8.4.2022 அன்று மாலை 6 மணியளவில் ஆபிரகாம் பண்டிதர் சாலையில் நடைபெற்றது. தஞ்சை மாநகர் முழுவதும் திரும்பும் திசையெல்லாம் இப்பிரச்சாரப் பெரும் பயணத்தை விளக்கி 15 நாளுக்கு முன்பாகவே சுவரெழுத்துப் பிரச்சாரம் செய்து இருந்தனர்.

திராவிடர் கழகத் தோழர்கள், பொறுப்பாளர்கள், தஞ்சைக் கிராமம் பகுதி மக்கள், நகரத்தவர் என ஆபிரகாம் சாலை முழுவதும்  மக்கள் வெள்ளம், காணும் இடம் எங்கும் கருஞ்சட்டை வீரர்கள். புதுக்கோட்டையில் இருந்து தஞ்சை நகருக்குள் நுழையும் புறவழிச் சாலையிலிருந்து பரப்புரைக் கூட்டம் நடைபெறும் ஆபிரகாம் பண்டிதர் சாலை வரை நூற்றுக்கணக்கில் கழகக் கொடிகள் கழக மாநாடோ என்று கட்டியம் கூறின.

AT HOME   என்பார்களே அது போன்ற உணர்வு தஞ்சைத் தரணியிலே ஆசிரியரிடத்துக் காணப்பெற்றது எனலாம். இங்கே "நான் முதல் பட்டதாரி. இங்கே மேடையில் இருக்கின்றவர்கள் முதல் தலைமுறைப் பட்டதாரிகள். ஏன்? எதைக் கொடுத்தாலும் சூத்திரனுக்குக் கல்வியைக் கொடுக்காதே என்ற மனுதர்மம் ஆண்ட நாடு இது. எப்படிப் படிச்சிருக்க முடியும் என்று கேட்டவர், இதை மாற்றிக் காட்டியது திராவிட இயக்கம்தான்.

முதுபெரும் பெரியார் பெருந்தொண்டர் மேனாள் மாவட்டத் தலைவர் தோழர் இர.புட்பநாதன் வயதின் காரணத்தால் மேடைக்கு ஏறி வர இயலாது என்பதால் மேடையில் இருந்த ஆசிரியர் நாமே கீழே சென்று வாழ்த்த வேண்டும். ஏன்னா நான் இன்னும் இளைஞன் தான் எனக் கூறி 89 வயது இந்த இளைஞர் மேடையை விட்டிறங்கி இர.புட்பநாதனுக்குப் பயனாடை அணிவித்துச் சிறப்பு செய்து மகிழ்ந்தார். இது நடந்தது தஞ்சைக் கூட்டம் முடித்து புதுக்கோட்டைக்குப் பயணித்து அங்கே சின்னப்பா பூங்கா அருகில் நடைபெற்றப் பெரும் பயணக் கூட்டத்தில். இங்குத் திருக்கோகர்ணம் சந்திப்பில் முன்னர் தலைவரைச் சிறப்பாக வரவேற்றனர்.

9.4.2022 அன்று மாலை நாகப்பட்டினத்தில் உரையாற்று கையில், புதிய கல்விக்கொள்கை என்பது புதிய குலக்கல்விக் கொள்கை என்பதை எவ்வளவு அற்புதமாக எடுத்துரைத்து, நாகையில் கூடியிருந்த மக்களை வியக்கச் செய்த அவருடைய நினைவாற்றல் பொருத்தமான உரைப்பகுதி சுட்டிக்காட்டத் தக்கது.

"உச்சந்தலை முதல் உள்ளங்கால் வரை மூளை என்று சொல்லப்பட்ட வெள்ளைக்காரன் போன பிறகு முதல் கவர்னர் ஜெனரலாக இருந்தவர் 'ஹிந்தி ஒழிக! தமிழ் வாழ்க! என்று சொன்னவர்களைச் சிறையிலடைக்கணும் என்றவர் - தந்தைப் பெரியாரைச் சிறையிலடைத்தவர் ராஜகோபாலாச்சாரி என்று சொல்லப் படக்கூடிய ராஜாஜி கொண்டு வந்த இதே குலக்கல்வியைக் சட்டப் போராட்டம் நடத்திச் சர்வ சக்தி வாய்ந்த இராஜ கோபாலாச்சாரியைத் தந்தை பெரியார் கடுமையாக எதிர்த்துச் சென்னை வரை நடைப் பயணம் செய்த வரலாறு இந்த நாகப்பட்டினத்திற்கு உண்டு. அப்படிப்பட்ட ராஜாஜியை விட இவர்கள் மதியூகிகளா? என்று கேள்வி எழுப்பி அப்படி இல்லை என்பவரைச் சிங்கப்பூர் பிரதமர் லீ குவான் யூ அறிவுப்பூர்வமான வரலாற்றைக் கூறி இந்தியாவில் மோடி அரசு ஏற்படுத்த முயலுவதும் ஹிந்தி திணிப்பு  என்று புரிய வைத்தார்.

மேலும் அவர் பரப்புரைப் பயணத்துக்கு அடிப்படையான மூன்று பிரச்சினைகளும் அரசமைப்புச் சட்டப்படியே என்பதையும் விளக்கினார்.

தஞ்சையைப் போலவே திருவாரூர்  நாகைக் கூட்டங்களிலும் சாலை வளைவுகள் சாலையின் இருபுறமும் கழகக் கொடிகள் ஏராளமாக தமிழர் தலைவரை வரவேற்றன.

திருவாரூரில் எடுத்த எடுப்பிலேயே "தளபதி தமிழக முதல்வர் ஆட்சி பத்து மாதத்தில் - பத்து ஆண்டுகளில் செய்ய வேண்டிய சாதனைகளைச் செய்துள்ள நல்ல ஆட்சி. அதைத் தடுத்திடும் வகையில் டில்லியிலிருந்து அனுப்பப்பட்டவர்கள் சட்ட விரோதமாகச் செயல்பட்டுக் கொண்டிருக்கிறார்கள்" என்றார்.

ஆசிரியரின் பெரும் பயணப் பொதுக்கூட்டம் 10.4.2022 அன்று சீர்காழி, அதனைத் தொடர்ந்து கடலூரில் நடைபெற்ற போது "உள்துறை அமைச்சர் அமித்ஷாவுக்கு தமிழ்நாட்டு வரலாறு தெரியாது. தந்தை பெரியாரோ திராவிடர் கழகமோ தோற்றதாக வரலாறு கிடையாது என ஆசிரியர் பாடம் நடத்தினார். ஆசிரியரின் சொல் மழையிடையே இயற்கை மழையும் தலை காட்டி கொண்டிருந்தது.

அண்ணாமலைப் பல்கலைக் கழகத்தில் பயிலும் மாணவராக இருந்த போது சீர்காழியில் மாதத்திற்கு இருமுறையாவது கிராமப் பிரச்சாரத்திற்கு வந்துள்ளதாக நினைவு கூர்ந்தவர். அதே சமயம் இப்போது அப்படி வரஇயலாத சூழல் நிலவுவதையும் சுட்டிக் காட்டினார். மழையையும் வெள்ளத்தையும் பொருட்படுத்தாமல் மக்கள் அமர்ந்து உரை கேட்டதைக் குறித்துக் 

"குடி செய்வார்க்கில்லை பருவம் 

மடிசெய்து மானம் கருதிக் கெடும்"

எனும் குறளை நினைவுபடுத்தினார்.

கடலூர் தமிழர் தலைவர் பிறந்தமண் அல்லவா? அங்கே அவருக்கு அளித்த வரவேற்பும் வித்தியாசமாகத் தானிருந்தது எப்படி? தமிழர் தலைவர் ஆசிரியர் அவர்களுக்கு அங்கே தீப்பந்த வரவேற்பு ஏற்பாடு செய்யப்பட்டு இருந்தது. துரை.சந்திரசேகரன் செய்திருந்த இந்த ஏற்பாடு மக்களிடையே பெரும் எழுச்சியை உருவாக்கியது. கடலூரில் செருப்பொன்று போட்டால் சிலையொன்று முளைக்கும் எனும் எதிர்நீச்சல் வரலாற்றை மிகுந்த மலர்ச்சியுடன் மீட்டிக்காட்டினார். ஆசிரியர் மண்ணின் மைந்தர், நீண்ட காலம் வாழ வேண்டும் என்று வாழ்த்தினார் அமைச்சர் எம்.ஆர்.கே.பன்னீர்செல்வம்.

புதுச்சேரி அண்டை மாநிலம் என்று பெயர் தானே தவிர முழுக்க முழுக்க தமிழ் மண்தான். இன்னும் சொல்வதானால் முறையற்ற வழியில் சங்கிகள், காவித்திருக்கூட்டம் ஆட்சியை கைப்பற்றி ஆளும் மாநிலம். அங்கேயும் தமிழக மாவட்டங்களுக்கு இணையான மிகுந்த உற்சாக வரவேற்பு. கலை நிகழ்ச்சியும் கூட நடைபெற்றது. புதுச்சேரியில் நடப்பது பொம்மலாட்ட அரசு என்று கூறிடவும் தயங்கிடவில்லை. "நாங்க போன முறையே சரியாகச் சொன்னோம். ஆனால் நீங்க பொய்யான வாக்குறுதிகளைக் கேட்டு ஏமாந்திட்டீங்க. இந்த முறை சரியாக இருக்கனும் என வழிகாட்டவும் செய்தார். தீயணைப்பு வீரர்கள் போல் ஒன்றுபட்டு பாசிச ஆட்சியை வீழ்த்தவும் வேண்டும் என்றார் பொருத்தமாக.

அடுத்துப் பயணித்துச் சேர்ந்த தமிழ் மண் திண்டிவனத்தில் கடலூரைப் போலவே தோழர்கள் வழியில் இரண்டு பக்கமும் தீப்பந்தம் ஏந்தி பேண்டு இசை முழங்கச் சென்னைக்குக் கூட கேட்கும் உரத்த குரலில் "தமிழர் தலைவர் வாழ்க! தந்தை பெரியார் புகழ் ஓங்குக! " என்று முழக்கமிட்ட மக்கள் வெள்ளத்தில் நீந்தி காந்தியார் திடல் அருகே  இருந்த மேடைக்குச் சென்றார். இங்கே அமைச்சர் செஞ்சி மஸ்தானும், எழுச்சித் தமிழர் தொல்.திருமாவளவனும் உரையாற்றிய பின் நிறைவாகவே உரை ஆற்றினார் தமிழர் தலைவர்.

தமதுஉரையில், புதுவைக்கு அருகில் புரட்சிக் கவிஞர் பாவேந்தர்  வாழ்ந்த ஊர் அருகிலிருக்கும் ஊர் திண்டிவனம் என்பதை நினைவூட்டும் வகையில் பொதுக்கூட்டம் மாநாடு போல ஏற்பாடு செய்யப்பட்டு இருந்ததை "எங்கள் பகைவர் எங்கோ மறைந்தார் இங்குள்ள தமிழர் ஒன்றாதல் கண்டே" எனப்பலத்த கையொலி இடையே தொடங்கினார்.

திண்டிவனத்தில் தமிழ்நாடு வரலாற்றில் நிகழ்ந்த முதன்மை நிகழ்ச்சியைத் தொட்டுக் காட்டினார். நெருக்கடி நெருப்பாற்றில் தமிழகம் நீந்திய  நிகழ்வு அது.

திண்டிவனத்தில் பொதுக்கூட்டத்தில் தான் பேசிக் கொண்டிருந்த போதுதான் தலைவர் கலைஞரின் கழக அரசு கலைக்கப் பெற்றதையும் அன்னை மணியம்மையார் பொறுப் புடன் நடந்து கொண்டதையும் தாங்கள் பெரியார் திடலுக்குத் திரும்பிச் சென்ற போதுதான் கைது செய்யப்பட்டதையும் அதையொட்டி நிகழ்ந்தவற்றையும் நினைவு கூர்ந்தார். திராவிட இயக்கத்தை எளிதாக வீழ்த்திடலாம் என எவரும் எண்ணிக் கனவு காண வேண்டாம் என எச்சரிக்கவும் செய்தார். திண்டிவம் பெரும்பயணக் கூட்டத்தைச் சிறப்பாக அனைவரும் இணைத்து அமைத்துக் கொடுத்ததைப் பாராட்டும் வகையில் அமைச்சர் செஞ்சி மஸ்தான், திருமாவளவன், ரவிக்குமார், பெண் நகர மன்ற உறுப்பினர்கள் ஆகியோருக்குப் பயனாடை அணிவித்துச் சிறப்பித்தார். நிகழ்ச்சியை முடித்துச் சென்னை புறப்பட்டார். சென்னை சேர்ந்தாரே பயணம் நிறைவுற்றதா? தொடர்கிறது. இரண்டு நாட்களுக்குப் பின் திருவண்ணாமலை, கள்ளக்குறிச்சியில் தொடர்ந்து சந்திப்போம்.