ஹிப்போ கிரேட்டிக் பெயரால் எடுக்கப்படும் உறுதிமொழியை சமஸ்கிருத நூலில் காணப்படும் ‘ஷராக் ஷாபாத்' பெயரில் மாற்றமா?

உலகம் முழுவதும் மருத்துவர்கள் 

   February 14, 2022 • Viduthalai

எல்லாவற்றிலும் பார்ப்பனக் கலாச்சாரப் படையெடுப்பா?

மருத்துவம் படிக்க சமஸ்கிருதம் தேவை என்ற நிலையும் நாளை வருமோ?

உலகம் முழுவதும் மருத்துவர்கள் ஹிப்போ கிரேட்டிக் பெயரால் எடுக்கப்படும் உறுதிமொழியை புராதன சமஸ்கிருதத்தில் காணப்படும் ஒருவரின் பெயரால் எடுக்கப்படவேண்டும் என்று ஒன்றிய அரசு மாற்றுவது பார்ப்பன சமஸ்கிருதக் கலாச்சாரத்தைத் திணிப்பதாகும். மருத்துவம் படிக்க சமஸ்கிருதம் தெரிந்திருக்கவேண்டும் என்ற பழைய நிலையைக் கூடக் கொண்டு வந்தாலும் வருவார்கள் - பார்ப்பனக் கலாச்சாரத் திணிப்பைக் கண்டித்துத் திராவிடர் கழகத் தலைவர் ஆசிரியர் கி.வீரமணி அவர்கள் அறிக்கை விடுத்துள்ளார்.

அறிக்கை வருமாறு:

மருத்துவர்கள், நம் நாட்டில் மருத்துவக் கல்லூரியில் படித்து பட்டம் (எம்.பி.பி.எஸ்.) பெறுகிறபொழுது, வெள்ளைக் கோட்டை அணியும்போது, மருத்துவத்தை ஒரு தொண்டறப் பணியாகச் செய்வதுபற்றிய ஓர் உறுதிமொழியை எடுப்பது பல காலமாக இருந்துவரும் ஒன்று.

ஹிப்போ கிரேட்டிக் பெயரில் மருத்துவர்கள் உலகெங்கும் எடுக்கும் உறுதிமொழி!

கிரேக்கத்தின் பிரபல டாக்டரான ஹிப்போ கிரேட்டிக் (Hippocratic Oath) பெயரிலான உறுதிமொழி என்று அதற்குப் பெயர்.

பிரபல மருத்துவரான ஹிப்போகிரேட்டிக் கிரேக் கத்தில் 460 முதல் 377 (BCE - Before Common Era)  வரை வாழ்ந்தவர். ‘மருத்துவத்தின் தந்தை' (Father of Medicine) என்று அழைக்கப்படுபவர். அவர் பெயரால் மருத்துவப் பட்டதாரிகள் தங்களது மருத்துவப் பணி தொடங்குமுன் எடுக்கும் உறுதிமொழி, அதற்குரிய நெறிமுறைகளைக் கடைப்பிடிக்க வேண்டியதை அவர் களுக்கு அறிவுறுத்தும் ஓர் உறுதிமொழியாகும்.

உலகமெங்கும் இந்த உறுதிமொழி, நாட்டு எல்லை களைத் தாண்டி காலங்காலமாய்க் கடைப்பிடிக்கப்பட்டு வருகிறது.

சமஸ்கிருத பாட நூலிலிருந்து கொண்டுவரப்படும் உறுதிமொழி!

ஆட்சி தங்கள் கையில் சிக்கிக் கொண்டது என்கிற வாய்ப்பைப் பயன்படுத்தி, ஒற்றைக் கலாச்சாரத்தை - நாட்டின் பன்மொழி, பன்மத, பன்முகப் பண்பாட்டை அழித்து - புகுத்திடும் ஆர்.எஸ்.எஸ். அஜெண்டாவை இதிலும் புகுத்திட, ஒரு முயற்சி உருவாவதுபற்றி நேற்று (13.2.2022) சில நாளேடுகளில் வந்துள்ள தகவல், நாட்டை சமஸ்கிருத மயமாக்குகின்ற வகையில் மற்றொரு திணிப்பைப் புகுத்த நேஷனல் மெடிக்கல் கவுன்சில் (NMC) என்ற ஒன்றிய அரசின் அமைப்பு இதனை மாற்றி - ‘ஹிப்போகிரேட்டிக் ஓத்' என்பதற்குப் பதிலாக,  ‘ஷராக் ஷாபாத்' (Charak Shapath)  என்ற ஓர் உறுதி மொழியை - மாற்றம் செய்யவேண்டும் என்று திட்டமிடுகிறார்கள்.

இந்த உறுதிமொழி ‘ஷராக்கா சமதி' என்ற வட மொழியான சமஸ்கிருத மொழிப் பாட நூலான பழைய கால ஏடாக இருப்பதிலிருந்து எடுக்கப்படுகிறதாம்!

இதையே சட்டமாக்க முடிவு செய்து, 14.2.2022 முதல் செயல்படுத்த  NMC என்ற நேஷனல் மெடிக்கல் கவுன்சில் முடிவு செய்து, அமல்படுத்தப் போகிறதாம்!

‘ஷராக்கா'  (Charaka)  என்பவர் நமது நாட்டு புராதன மருத்துவராம்; இந்த ‘ஷராக் ஷபாத்' நெறிமுறைப்படி, ஒரு பெண்ணை ஒரு மருத்துவர் சிகிச்சை அளிக்க அழைத்தால், அவருடன் ஒரு ஆண் கட்டாயம் இருக்க வேண்டுமாம்! இல்லையென்றால், ஆண் டாக்டர் பெண் நோயாளிக்கு சிகிச்சை அளிக்கக் கூடாதாம்; முடியாதாம்!

ஆனால், ஹிப்போகிரேட்டிக் உறுதிமொழியில் அப்படி ஏதும் இல்லை. (உறுதிமொழியிலேயே ஆண் கடவுளும் - பெண் கடவுளும்கூட இடம்பெற்றிருக் கிறார்கள்; நாத்திகமும் இல்லை அது).

கைப்பேசி என்பது சுதேசியா?

‘ஹிந்துஸ்தான் டைம்ஸ்' நாளேட்டில் இதுபற்றி வந்துள்ள ஒரு செய்தியில், ‘‘நம் தாய் நாட்டைச் சேர்ந் தவர் ‘ஷராக்கா'  (Charaka) விதேசியாக ஹிப்போ கிரேட்டிக் இருக்கிறார். சுதேசியாக  ‘ஷராக்' முனிவர் இருக்கிறார்'' என்கிறது. தற்போது ஆர்.எஸ்.எஸ். என்று பயன்படுத்தும் எழுத்து சுதேசியா? முனிவர்கள் காலத் தில் கைப்பேசியோ (Cell Phone), தொலைக்காட்சியோ (Television) உண்டா?

‘மனதின் குரல்' (மங்கி பாத்)  பேசுகிறாரே நமது பிரதமர், அந்த வானொலியை எந்த ரிஷி கண்டு பிடித்தார்? அந்நியன் - விதேசி என்று ஒதுக்கிவிட முடியுமா? ஸ்டெதஸ்கோப்,B.P. கருவியெல்லாம் முனிபுங்கவர்கள் கண்டுபிடிப்பா?

நம் நாட்டு ராணுவத்திற்குத் தேவையான போர் விமானங்களுக்கு - ரஃபேல் வெளிநாட்டு விமானங்களை அல்லவா விலை கொடுத்து வாங்குகிறோம். வில்லும்- வேலுமா பயன்படுத்த முனைகிறோம்?

நம் நாட்டில் இப்போது பெரிய அளவில் வைக்கப் படும் தலைவர்கள் சிலை - பெருந்தலைவர்களின் சிலைகளேகூட வெளிநாட்டிலிருந்துதானே இறக்குமதி!

நமது குடியரசுத் தலைவர், பிரதமர் பயணம் செய்யும் விமானமும், கார்களும் சுதேசிகள்தானா?

அவையெல்லாம் இருக்கும்போது ஹிப்போ கிரேட்டிக் உறுதிமொழி மட்டும் அந்நியமாகத் தெரிகிறது என்பதற்கு மூலகாரணம், அதன்மூலம் ஒரு பண்பாட்டுத் திணிப்பு - Cultural Imposition).

மருத்துவம் படிக்க

மீண்டும் சமஸ்கிருதம் வருமா?

சமஸ்கிருத மயமாக்கிடும் - ஆர்.எஸ்.எஸ். செய்திடும் ஒரே மொழி, ஒரே பண்பாடு சமஸ்கிருத கலாச்சாரத்தின் திணிப்பிற்கான திட்டத்தின் செயலாக்கம்தான் இது!

இது இப்படியே தொடர்ந்தால் எங்கே போவோம்?

நாளை, மருத்துவப் படிப்புக்கு மனு போட சமஸ் கிருதம் படித்த தகுதி மீண்டும் நுழைக்கப்பட்டால், அதிசயமோ, அதிர்ச்சியோ அடையவேண்டாம்! மருத் துவக் கனவாளர்களே, நுகத்தடியை சுமக்க தயாராவீர்!

நாடு எங்கே போகிறது?

கி.வீரமணி 

தலைவர், 

திராவிடர் கழகம்

சென்னை       

14.2.2022            

மருத்துவக் கல்வி: அகில இந்திய ஒதுக்கீட்டில் பிற்படுத்தப்பட்டோருக்கு 27% முதற்கட்ட வெற்றியே!

        July 30, 2021 • Viduthalai

69%  சட்டப்படி - தீர்ப்புப்படி இட ஒதுக்கீடு கிடைப்பதற்குப் போராடுவோம்-ஒன்றிணைந்து செயல்பட்ட முதலமைச்சர் மற்றும் அனைவருக்கும் நன்றி!

முழு வெற்றி கிட்டும்வரை நமது போராட்டம் தொடரும்!

மருத்துவக் கல்வியில் முதுநிலைப் பட்டப் படிப்பில் 27% இட ஒதுக்கீடு அளிக்க ஒன்றிய அரசு முன் வந்துள்ளது முதற்கட்ட வெற்றியே! 69% அடிப்படையில் இட ஒதுக்கீடு கிடைக்கும் வரை நமது போராட்டம் தொடரும்  என்று திராவிடர் கழகத் தலைவர் ஆசிரியர் கி.வீரமணி அவர்கள் அறிக்கை விடுத்துள்ளார். அவரது  அறிக்கை வருமாறு:

இந்திய அரசமைப்புச் சட்டத்தின் 142 ஆவது பிரிவைப் பயன்படுத்தி, மருத்துவக் கல்வி வசதிகள் வளர்ச்சி பெறாத வடகிழக்கு மற்றும் வட மாநிலங்களில் உள்ளவர்கள் மருத்துவர்களாவதற்கு உதவும் வகையில், உச்சநீதிமன்றம், மருத்துவக் கல்வியில் வளர்ச்சி அடைந்த மாநிலங்கள் ‘மத்திய தொகுப்பு' என்ற ஒன்றை உருவாக்கி, தங்களுக்குள்ள மொத்த மருத்துவப் படிப்புக் கான இடங்களில் - எம்.பி.பி.எஸ். போன்ற பட்டப் படிப்பிற்கான 15 சதவிகிதமும், மேல் பட்டப் படிப்பிற்கான (எம்.டி., எம்.எஸ். போன்றவை) 50 சதவிகிதமும் (முதலில் 25 சதவிகிதம், பிறகு 50 சதவிகிதம்) ஆண்டுதோறும் தரவேண்டும் என்ற ஒரு ஆணையைப் பிறப்பித்து, அது அமலில் இருந்து வருகிறது.

அவ்வாறு மத்திய தொகுப்பின்மூலம் பெறப்பட்ட இடங்களை ஒன்றிய அரசு - ஒதுக்கீடு முறையில் மாநிலங்களுக்கு ஒதுக்கீடு செய்யவேண்டும் என்று ஆணையிட்டது உச்சநீதிமன்றம்.

ஒன்றிய அரசின் தவறான முடிவு!

ஒன்றிய அரசு, ஒதுக்கீடு முறையில் மாநிலங்களுக்குப் பகிர்ந்தளிக்கவேண்டும் என்பதை, முழுமையாக செய் யாமல், (2008) முந்தைய, இன்றைய ஒன்றிய அரசுகள் ஆதிதிராவிடர், பழங்குடியினர் (எஸ்.சி., எஸ்.டி.,) என்ற பிரிவுக்கு மட்டும் அமல்படுத்திவிட்டு  (அதையும் முழு மையாகப் பின்பற்றியுள்ளார்களா என்பது மில்லியன் டாலர் கேள்வி) ஓ.பி.சி. என்ற இதர பிற்படுத்தப்பட்ட பிரிவுக்கு அளிக்காமலே, இதை நடைமுறைப்படுத்தி, உயர்ஜாதியினரே எஞ்சிய எல்லா மருத்துவ இடங்களை யும் ஏகபோகமாக அனுபவித்த கொடுமை தொடர்ந்தது!

சலோனா குமாரி என்ற பிற்படுத்தப்பட்ட சமுதாய மருத்துவர் - இதுகுறித்து உச்சநீதிமன்றத்தில் வழக்குப் போட்டு இந்த அநீதிக்குப் பரிகாரம் தேட, அப்பிரச்சினை வெளிச்சத்திற்கு வந்தது! (2015).

இதற்கிடையில் எத்தனையோ சம்பவங்கள் - சட்டப் பிரச்சினைகள் என்றாலும், ‘நீட்' தேர்வு என்று திணிக் கப்பட்டுள்ள இந்த தேர்வு வந்த பிறகு - 2016 இல் இந்திய மருத்துவக் கவுன்சில் சட்டம் திருத்தப்பட்டது. (பிரிவு 10-D கொண்டு வரப்பட்டது.) அதன்கீழ் பிறப்பிக்கப்பட்ட அறிவிக்கை(Notification) 2018 ஆம் ஆண்டு வெளியிடப்பட்டது. ‘தேசிய மருத்துவ ஆணையச் சட்டம்' 2019 ஆம் ஆண்டு நிறைவேற்றப்பட்டு, நடைமுறைப் படுத்தப்பட்டது.

அதன்படி இந்திய மருத்துவக் கவுன்சில் சட்டத் தின்கீழ் தரப்பட்ட அறிவிக்கைகள் தொடரிலும்

(21.12.2010) - அந்த அறிவிக்கையில் இட ஒதுக்கீடு அந்தந்த மாநிலங்களில் உள்ள சட்டங்களின்படியே தொடரும் என்று சொல்லப்பட்டுள்ளது. இவை எல்லாம் எந்த அல்லல்பாட்டுக்கும் இடமில்லாமல், சட்டத்திலும், விதிகளிலும் கண்டுள்ளன!

இதைச் செயல்படுத்தாமல் - பிற்படுத்தப்பட்ட சமூக மருத்துவர்களுக்கு இட ஒதுக்கீடே - மத்திய தொகுப்பில் தராத கொடுமை தொடர்ந்து வந்தது.

இதை திராவிடர் கழகம் (‘விடுதலை'யில்) முதல் முதலில் அறிக்கையாக வெளியிட்டது. இந்த சமூக அநீதியை அம்பலப்படுத்தியது! (8.5.2020, 16.5.2020).

சமூக அநீதிக்கு எதிராக ஒன்றாக திரண்ட தமிழ்நாடு!

அப்போது எதிர்க்கட்சித் தலைவராக இருந்த நிலை யில்,  தி.மு.க., அதன் தலைவர் தளபதி தி.மு.க. ஸ்டாலின் அவர்களும் அறிக்கை வெளியிட்டு, அனைத்து ஒத்தக் கருத்துள்ள அரசியல் கட்சிகளும் (பா.ஜ.க. தவிர), சமூக அமைப்புகளும் ஓரணியில் திரண்டன.

சென்னை உயர்நீதிமன்றத்தில் இந்த சமூக அநீதிக்குப் பரிகாரம் தேட வழக்குத் தொடர்ந்தோம்!

இந்த வழக்கு அந்நாளைய தலைமை நீதிபதி சாஹி, நீதிபதி இராமமூர்த்தி ஆகியோர் அமர்வுமுன் விசார ணைக்கு வந்தது!

தி.மு.க.வின் சார்பில் மூத்த வழக்குரைஞர் வில்சன் அவர்களும், தி.க.வின் சார்பில் மூத்த வழக்குரைஞர் தியாகராஜன் அவர்களும், அதுபோல பல அரசியல் கட்சியினரும் தனித்தனியே வழக்குகளைத் தொடுத் தனர்.

ஆளுங்கட்சியாக அப்போது அ.தி.மு.க.வும், தமிழ்நாடு அரசும்கூட இறுதியில் இணைந்தது.

தமிழ் மண் - சமூகநீதி மண் - பெரியார் மண் என்பது உலகுக்கே பளிச்சிட்ட நிலையில், விவரமாக கேட்டு தீர்ப்பளித்த தலைமை நீதிபதி (பிறகு அவர் ஓய்வு பெற்றார்) அமர்வு தெளிவான தீர்ப்பளித்தது.

69 விழுக்காடு இட ஒதுக்கீடு என்பதே சரியானது - சட்டப்படியானது!

1. மத்திய தொகுப்பில் இட ஒதுக்கீடு முழுமையாகப் பின்பற்றப்பட வேண்டும்.

2. சென்னை உயர்நீதிமன்றம் -அவர்களே ஒப்புக் கொண்டபடி ஒன்றிய அரசின் மக்கள் நல்வாழ்வுத் துறை - தமிழ்நாட்டில் 1993 ஆண்டு 9 ஆம் அட்டவணைப் பாதுகாப்பில்  சட்டமாகி, அமலில் உள்ளபடி 69 சத விகிதப்படி இடங்களை பிற்படுத்தப்பட்டவர்களுக்கும் அளிக்கவேண்டும் என்று கூறியது. ஒரு கமிட்டி அமைத்து மூன்று மாதங்களில் தர ஏற்பாடுகள் செய்யவேண்டும் என்றும் உத்தரவிட்டது. அவ்வாண்டு ஓடிய நிலையில், வரும் 2021 ஆம் ஆண்டிலிருந்து செயல்படுத்தவேண்டும் என்று தெளிவுபடுத்தியது.

அதற்குப் பிறகு ஒன்றிய அரசின் மருத்துவ சுகாதாரத் துறை ஏதேதோ சாக்குப் போக்குகளைக் கூறி, பிற்படுத் தப்பட்டவர்களின் உரிமையை ஏற்க மறுத்தே வந்தது.

ஒரு கட்டத்தில், எஸ்.சி., எஸ்.டி.,யினருக்கு மட்டும் தான் இட ஒதுக்கீடு என்றும்கூட கூறத் தயங்கவில்லை!

அதன் பிறகு தி.மு.க., நீதிமன்ற அவமதிப்பு என்ற வழக்கைத் தொடுத்ததில், சென்னை உயர்நீதிமன்ற தலைமை நீதிபதி அமர்வு ஒரு மாதத்திற்குள் ஒன்றிய அரசின் சுகாதாரத் துறை பதில் அளிக்கவேண்டும் என்று கண்டிப்பான ஆணை வெளியிட்டது. அதன் பின்னும் அசையவில்லை. மறுமுறை மேலும் அவகாசம் கேட்ட போது, மீண்டும் ஒரு மாதம் அவகாசம் தந்து, அதற்குள் முடிவு தெரிவிக்க கண்டிப்பான உத்தரவு போட்டது.

இதற்கிடையில் தமிழ்நாடு முதலமைச்சரான மு.க.ஸ்டாலின் அவர்கள், டில்லியில் பிரதமர் மோடி அவர்களைச் சந்தித்துப் பேசி,  வற்புறுத்திய கோரிக் கைகளில் இதுவும் முக்கிய இடம்பெற்றது.

இதனை நாடாளுமன்றத் தி.மு.க. உறுப்பினர்களும், அதன் தலைவர் டி.ஆர்.பாலுவும், மாநிலங்களவையில் அதன் தலைவர் திருச்சி சிவா, மூத்த வழக்குரைஞர் வில்சன் போன்றவர்களும் வலியுறுத்தினர்.

பிறகுதான் பிரதமர் தனது கோப்பில் இப்பிரச்சினைக்கு முக்கிய முன்னுரிமை தரக் கூறினார். அதன்படி, 27 சதவிகித இட ஒதுக்கீடு பிற்படுத்தப்பட்டவர்களுக்கு மத்திய தொகுப்பில் மருத்துவப் படிப்பில் தரப்படும் என்பதைக் கூறி, வசதி குறைந்த ஏழைகளுக்கு, முன் னேறிய ஜாதியினருக்கு பத்து விழுக்காடு ஒதுக்கீட்டையும் இணைத்தே அறிவித்தார்.

(உ.பி. போன்ற சில மாநிலங்களில் அடுத்த ஆண்டு நடைபெறவிருக்கும் சட்டமன்றத் தேர்தலில் உயர்ஜாதி, பிற்படுத்தப்பட்ட ஆகிய இரு சாரர்களின் வாக்கு வங்கி களைக் குறி  வைத்தது என்பது வெள்ளிடை மலை).

இது முழு வெற்றியல்ல!

தமிழ்நாட்டிற்கும், சமூகநீதிக்கும் கிடைத்த வெற்றி இது என்றாலும், முழு வெற்றி அல்ல. இது மறைக்கப்படக் கூடாத உண்மையாகும்!

69 சதவிகித இட ஒதுக்கீட்டின்படி, தமிழ்நாட்டிற்கு பிற்படுத்தப்பட்டவர்களுக்கு 50 விழுக்காடு தருவதற்குப் பதில், 50 சதவிகிதப்படியே - 27 விழுக்காடுதான் தர ஒப்புக் கொண்டுள்ளார்கள்!

இது சென்னை உயர்நீதிமன்றத்தின் ஆணையை முழுமையாக செயல்படுத்தியதாகாது என்றாலும்கூட, மூடப்பட்ட சமூகநீதிக் கதவு பிற்படுத்தப்பட்டோருக்கு கொஞ்சம் திறக்கப்பட்டிருக்கிறது - முழுமையாக அல்ல என்றாலும், இது முதற்கட்ட வெற்றி. இதன் பலன் இந்தியாவிலுள்ள அனைத்துப் பிற்படுத்தப்பட்ட சமூ கங்களும் அனுபவிக்கக் கூடிய திராவிட இயக்க அருங் கொடையாகக் (தந்தை பெரியாரால் முதல் அரசமைப்புச் சட்டத் திருத்த கொடைபோல) கொள்ளலாம்! ஒன்றிய அரசுக்கும் நன்றி!

முதலமைச்சர் உள்பட அனைவருக்கும் நன்றி!

மூடப்பட்ட கதவு திறக்கப்பட்டுள்ளது, தொடங்கப் படாத புதுக் கணக்கு பிற்படுத்தப்பட்டவர்களுக்குத் தொடங்கப்பட்டுள்ளது!

சமூகநீதியின் ஒரு களத்தில் ஒரு பகுதி வெற்றி!

சமூகநீதிப் போராட்டக் களத்தில்  தொடர்ந்து நின்று போராட வேண்டியவர்களே நாம்!

இதற்குக் காரணமான அத்துணைக் கட்சிகளுக்கும், அமைப்புகளுக்கும் குறிப்பாக தி.மு.க., தமிழ்நாடு முதலமைச்சர் மு.க.ஸ்டாலின், அரசியல் கட்சிகள் எல்லோருக்கும் நன்றி!

கிடைத்த இடங்களைவிட பறிபோன இடங்களை எண்ணினால் நெஞ்சம் பதறுகிறது. அதுகுறித்து தனியே பிறகு எழுதுவோம்!

 கி.வீரமணி

தலைவர்,

திராவிடர் கழகம்

சென்னை      

30.7.2021            

மருத்துவத் துறையில் அறுவை சிகிச்சை செய்ய ஆயுர்வேதத்திற்கு இடம்கொடுப்பது வருணாசிரமப் பார்வையே!

அலோபதி அறுவை சிகிச்சை முறையில் ஏராளமான புதிய தொழில்நுட்பங்கள் வளர்ந்துள்ள நிலையில் பின்னோக்கிப் பயணிப்பதை கைவிடவேண்டும்!

டாக்டர்கள் எதிர்ப்புப் போராட்டம் நியாயமானதே!

----------------------------------------------------------

மத்திய அரசின் நல்வாழ்வுத் துறை, ‘நீட்’ தேர்வைப் பிடிவாதமாகத் திணிப்பதற்குச் சொல்லப்படும் ஒரு காரணம் தரமான மருத்துவர்களை உருவாக்கவேண்டும்; நோயாளிகளின் உயிரோடு விளையாடக் கூடாது என்பது மிகமிக முக்கியம் என்று ஒருபுறம் கூறிக் கொண்டே, மறுபுறத்தில்...!

கண்டனத்துக்குரிய கேலிக் கூத்து!

ஆயுர்வேத மருத்துவர்களுக்கு அறுவை சிகிச்சைக்கான தகுதியுண்டு என்று ஒரு மருத்துவ விதிகளை மாற்றி, மிக்சியோபதி (Mixopathy) என்று பெயர் கொடுத்திருப்பதைவிட கண்டனத்திற்குரிய கேலிக்கூத்து வேறு இல்லை!

ஆயுர்வேதத்தின்மீது - மற்ற பிரிவுகளை (சித்த வைத்தியம், யுனானி போன்றவற்றின்மீது காட்டாத தீவிர ஆர்வம்)விட அதிகமான அதீத அக்கறை காட்டுவதற்கு மூலகாரணம், அது சமஸ்கிருத கலாச்சாரத்திலிருந்து உருவான ஒன்று என்ற ஆர்.எஸ்.எஸ். கொள்கை அஜெண்டாதான் என்பது உலகறிந்த ரகசியம்!

மத்திய அரசு சித்த வைத்தியத்திற்கு ஒதுக்கிடும் தொகைக்கும், ஆயுர்வேதத்திற்கு ஒதுக்கும் நிதியும் மலைக்கும் மடுவுக்கும் உள்ள வேறுபாடு. அதற்குக் காரணம், இது தமிழ்ப் பண்பாடு - கலாச்சாரம் அடிப்படையைக் கொண்டது என்பதுதான்!

மருத்துவத்திலும் வருணாசிரமப் பார்வையா?

மருத்துவத்தில்கூட இப்படி ஒரு வர்ணாசிரம சிந்தனை ஓட்டம் வேடிக்கையானது.

அலோபதி என்ற ஆங்கில முறை வைத்தியத்தில்கூட, Physician என்ற மருந்துமூலம் குணப்படுத்தும் முறை மருத்துவப் படிப்பினைப் படித்தவர்களுக்கு அறுவை சிகிச்சை நடைமுறை கிடையாதே! அதனால்தானே, Physician’s Cure, Surgeon’s Cure - மருந்துமூலம் குணப்படுத்தும் மருத்துவம், அறுவை சிகிச்சைமூலம் நோயைக் குணப்படுத்தும் சிகிச்சை என்று இரண்டு முறைகள் காலங்காலமாக செயற்பாட்டில் உள்ளது!

அப்படி அதிலேயே இருக்கிறபொழுது, மருத்துவப் பட்டப் படிப்பும், அதற்கேற்ப M.D., - M.S., என்று பிரித்து சொல்லிக் கொடுக்கப்படுகிற நிலை உள்ளது!

அறுவை சிகிச்சை செய்வதில் முக்கிய பங்கு  - மயக்க மருந்து (Anaesthesia) கொடுப்பதாகும். அதன் அளவு, நோயாளியின் தன்மைக்கேற்ப அளவீடு பார்த்து கவனமாகக் கொடுத்து, வலி உபாதையிலிருந்து நோயாளிக்கு இதமான முறையில் அறுவை சிகிச்சைமூலம் குணப்படுத்த அதற்கென்றே தனிப்படிப்பு படித்து தகுதி பெறுகிறார்கள் ஆங்கில மருத்துவ முறையில் மருத்துவர்கள்.

நாட்டில் ஜனத்தொகையைக் குறைக்க ஏற்பாடா?

ஆயுர்வேத டாக்டர்கள் இதனை எப்படிக் கையாளுவார்கள் என்பது மிகப்பெரிய கேள்வி. மேலும் பல சிக்கலான உடற்கூறு நுணுக்கங்களை அறிந்து அறுவை சிகிச்சை மேற்கொள்ளப்பட வேண்டிய நிலையில், இப்போது ஆயுர்வேத மருத்துவர்களும் அறுவை சிகிச்சை செய்தால், மிகப்பெரிய உயிர்க்கொல்லி ஆகி, நாட்டில் ஜனத்தொகையைக் குறைக்கத்தான் உதவுமே தவிர, மற்றபடி பயன்படாது! விபரீதமான மத்திய அரசின் இந்தத் திட்டத்தை எதிர்த்து டாக்டர்கள் எதிர்ப்பு காட்டுவது, மக்கள் நலன் கருதியே தவிர, அவர்களுக்காக அல்ல!

மத்திய அரசு இந்த விபரீத யோசனை - திட்டத்தைக் கைவிடவேண்டும்!

மருத்துவத்தில் - மருந்து கொடுத்து குணப்படுத்தும் ஆயுர்வேதத்தைப் பயன்படுத்தட்டும்; அதுபோல, மற்ற முறைகளிடத்தும் பாரபட்சம் காட்டாமல் - மாற்றாந்தாய் மனப்பான்மையோடு சித்த வைத்தியம், யுனானி போன்றவற்றில் நியாயமாக நடந்துகொள்ள வேண்டியது மிகமுக்கியம்!

முன்னோக்கிச் செல்லவேண்டும் - பின்னோக்கி அல்ல!

21 ஆம் நூற்றாண்டில் அறிவியல் மருத்துவவியலின் வளர்ச்சி, முன்னோக்கி செல்லவேண்டுமே தவிர,  பின்னோக்கி, ஆதிகாலத்தின் அறுவை சிகிச்சைக் காலத்தை நோக்கிப் போவது வளர்ச்சி அல்ல; விபரீத விளையாட்டு - அதுவும் மக்களின் - நோயாளிகளின் உயிருடன் என்பது விரும்பத்தகாத விபரீத நிலை!

டாக்டர்களின் எதிர்ப்பு நியாயமானதே!

எனவே, மத்திய அரசு இந்தத் திட்டத்தை கைவிடுவதே சாலச் சிறந்தது - மற்ற வழிகளில் ஆயுர்வேதத்தை ஊக்கப்படுத்தட்டும்; இப்படி ஒரு அபாயகரமான முயற்சியில் ஈடுபடக் கூடாது. மறுபரிசீலனை செய்வது அவசியம், அவசரம்!

டாக்டர்களின் எதிர்ப்பு நியாயமானது - தேவையானதும்கூட!

கி.வீரமணி,

தலைவர், 

திராவிடர் கழகம்.

9.12.2020 

சென்னை.