ஒன்றிய அரசின் ஹிந்தித் திணிப்புக்குத் தமிழ்நாடு அரசு ஒப்புதல் அளிக்கிறதா? இருமொழிக் கொள்கையைக் கைவிட்டால் தமிழ்நாடே போராட்டக் களமாக மாறும்!

 

தேசிய நெடுஞ்சாலைகளில் ஹிந்தித் திணிப்பா?

ரயில் நிலையங்களில் ஹிந்திக்கு முதல் இடமா?

தேசிய நெடுஞ்சாலைகளில் ஹிந்தித் திணிப்பா? ரயில் நிலையங்களில் ஹிந்திக்கு முதல் இடமா? ஒன்றிய அரசின் ஹிந்தித் திணிப்புக்குத் தமிழ்நாடு அரசு ஒப்புதல் அளிக்கிறதா? இருமொழிக் கொள்கையைக் கைவிட்டால் தமிழ்நாடே போராட்டக் களமாக மாறும்! என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள எச்சரிக்கை அறிக்கை வருமாறு:

ஒன்றிய பா.ஜ.க அரசு தனது திட்டங்களை ஒவ்வொன்றாகத் தமிழ்நாட்டில் நடைமுறைப்படுத்து வதற்கான மும்முரத்தில் இருக்கிறது. அதற்கு, த.வெ.க. தலைமையிலான கூட்டணி அரசைப் பயன்படுத்திக் கொண்டிருக்கிறது. ‘அதிகாரம் கிடைத்தால் போதும், யார் ஆட்டுவித்தால் என்ன?’ என்ற தொனியில் தான் த.வெ.க. ஆட்சி நடைபெற்றுக் கொண்டிருக்கிறது.

மாநில உரிமைப் பறிப்பு, பண்பாட்டுத் திணிப்பு, நிதி குறைப்பு என்ற எந்தப் பிரச்சினைக்கும் வாயைத் திறக்காமல் அமைதியாக இருக்கிறது த.வெ.க.அரசு. தமிழ்நாட்டைக் கபளீகரம் செய்ய பல்வேறு மறை முகமான வேலைகளில் ஈடுபட்டிருக்கும் அதே நேரம், தமிழ்நாடும், தமிழ்நாடு அரசும் இதை எப்படி எதிர்கொள்கிறார்கள் என்று பார்ப்பதற்கு வெளிப்ப டையாகவும் சில வேலைகளில் ஈடுபடுகிறது.

தமிழ்நாட்டில் மாநில நெடுஞ்சாலைத் துறை வைத்த பெயர்ப்பலகைகளில் ஹிந்தி இருந்தது என்று கண்டனம் எழுந்தபோது, உடனடியாக ஓர் அமைச்சர் அதனை மறுத்து, சில அதிகாரிகளின் தவறு என்று காரணம் சொல்லிவிட்டு, இரு அதிகாரிகளைப் பணியிடை நீக்கம் செய்து ஒரு பரபரப்பைக் காட்டிவிட்டு ஓய்ந்தார்கள். கரூர் அரசு மருத்துவமனையில், மருந்துப் பையில் ஹிந்தி இருந்ததற்கும் ஏதேதோ காரணம் சொன்னார்கள்.

ஹிந்தி ஒட்டகம், தமிழ்நாடு கூடாரத்திற்குள் தலையை நுழைக்கிறது, இதன்மூலம் – எச்சரிக்கை!

தஞ்சை – சேலம்
தேசிய நெடுஞ்சாலையில்…

இப்போது தேசிய நெடுஞ்சாலைகள் அனைத்திலும் மைல்கற்களைப் புதுப்பித்து, அதில் மும்மொழியில் எழுதவிருக்கிறார்கள் என்ற செய்தியும், அதன் தொடக்கமாக தஞ்சை – சேலம் தேசிய நெடுஞ்சாலையில் ஹிந்தியிலும் எழுதப்பட்டு இருக்கிறது என்னும் செய்தியும் வந்திருக்கிறது.

தமிழ்நாடு அரசின் இருமொழிக் கொள்கை என்னாயிற்று? அறிஞர் அண்ணா காலத்திலிருந்து (1967 முதல்) உறுதியாக இருந்துவரும் ஆட்சிகளைப் போல இதில் இருக்கப் போகிறார்களா? இல்லை, இரு மொழிக் கொள்கையில் இந்த அரசு உறுதியாக இருக்கும் என்பது வெறும் வாய்வார்த்தை தானா? பா.ஜ.க. அரசுக்குப் பயந்து ஹிந்தித் திணிப்பை அனுமதித்தால், தமிழ்நாட்டு மக்களும், இளைஞர்களும் அதைப் பொறுத்துக் கொண்டிருக்க மாட்டார்கள்.

ரயில்வே துறையிலும் ஹிந்திக்கு முதன்மையிடம் தரும் வகையில், எல்லா ரயில் நிலையங்களிலும் பெயர்ப் பலகையைத் திருத்திக் கொண்டிருக்கிறார்கள் என்று அறிகிறோம்.

ஹிந்தித் திணிப்பு எதிர்ப்புப் போராட்டத்தைத் தூண்ட நினைக்கிறதா ஒன்றிய அரசு?

தமிழ்நாட்டில் இன்னொரு ஹிந்தித் திணிப்பு எதிர்ப்புப் போராட்டத்தைத் தூண்ட நினைக்கிறதா ஒன்றிய அரசு? அதற்குத் துணைபோகிறதா தமிழ்நாடு த.வெ.க. அரசு?

ஹிந்தி – சமஸ்கிருத மொழி – பண்பாட்டுத் திணிப்புகளை எதிர்க்கும் நெஞ்சுரம் கொண்டோர் தமிழ் மறவர்கள்! நெருப்புடன் விளையாட நினைக்க வேண்டாம் ஒன்றிய அரசு என்று எச்சரிக்க வேண்டியது நம் கடமை!

திராவிடர் கழகம்
தயங்காது! தயங்காது!!

ரயில் நிலையங்களில் தமிழுக்கு முதன்மை, நெடுஞ்சாலைக் கற்களில் இருமொழி என்ற நிலைமை திரும்பவில்லை என்றால், ஹிந்தி எழுத்துகளை அழிக்கும் போராட்டத்தை அறிவித்துச் செயல்படுத்தத் திராவிடர் கழகம் தயங்காது! தயங்காது!!

எச்சரிக்கை! எச்சரிக்கை!!

கி.வீரமணி
தலைவர்,
திராவிடர் கழகம்

சென்னை    

11.11.2026      

மெய்யா? பொய்யா? (தில்லி போராட்டம் குறித்து அவதூறு)

CJP போராட்டத்தில் Gen Zயினர் கொண்டாட்ட நடனமா?

 

பரவும் செய்தி

டெல்லியில் காக் ரோச் ஜனதா கட்சியினர், மாணவர் அமைப்புகள், சமூக ஆர்வலர்கள் இணைந்து வாக்கு திருட்டிற்கு எதிராக ஜந்தர் மந்தர் மைதானத்தில் கூடி காந்தி ஜெயந்தி நாளான அக்டோபர் 2 முதல் தலைமைத் தேர்தல் ஆணையரை பதவி விலகக் கோரி போராட்டம் நடத்தி வருகின்றனர். அதன் தொடர்ச்சியாக மும்பையில் உள்ள சிவாஜி பூங்காவிலும் அக்டோபர் 3ஆம் தேதி போராட்டம் நடந்தது.

அந்தப் போராட்டத்தில் மாணவர்கள் நடனமாடி கொண்டாடுவதாகவும், போராட்ட நோக்கமின்றி கூடி மகிழ்ந்திருக்கவே போராட்டம் நடத்துவதாக விமர்சனத்தோடு பதிவுகள் பரவி வருகின்றன.

X தளத்தில் dr_monika_singh என்பவரின் பதிவு ”ஜெனரல்-இசட் தலைமுறையினர் எதிர்ப்பு தெரிவிக்கும் விதம் மிகவும் தனித்துவமானது,

ஞானேஷ் குமாரை பதவி விலகக் கோரி  போராடும் இளைஞர்களின் கொண்டாட்டத்தைப் பாருங்கள்

பாலிவுட் ட்விஸ்ட் இல்லாமல் மும்பையில் எப்படி போராட்டம் நடத்த முடியும்?

மும்பையில் உள்ள சிவாஜி பூங்காவில் இன்று நடந்த சி.ஜே.பி போராட்டத்தில் இளைஞர்கள் சிலர் “கேரக்டர் தீலா ஹை” பாடலுக்கு நடனமாடி திளைத்த இந்த காட்சிப் பதிவு (வீடியோ)” என்ற பின்னொட்டுடன் பதிவிடப்பட்டுள்ளது.

இதே போன்ற கருத்தோடு  பல காணொலிகள் கடந்த ஒரு வாரமாக பரவி வருகின்றன.

ஆய்வு

குறிப்பிட்ட காணொலியை, படங்களை வைத்து தேடும் முறையில்(reverse image search) தேடிய போது இதே போன்ற உள்ளடக்கத்தோடு பல காணொலிகள்  X தளத் திலும், Instagram தளத் திலும் அதிகளவில் அதே போன்ற உள்ளடக்கத்தோடு பதிவிடப்படுவதும், பரப் பப்படுவதும், அவை அதிக பார்வைகளைப் பெறுவதை அறிய முடிகிறது.

மேலும் தேடிய போது  Instagram தளத்தில்  avika_re12 என்ற பயனர் ”Hip Hop Battle part 1 #hiphopculture #hiphop #dancereels# mrbeastchallenge” என்ற பின்னொட்டோடு அக்டோபர் 1ஆம் தேதியன்று முதலில் பதிவிட்டுள்ளார்.

Aa_& iiii_p என்பவர் பதிவு IIT Mumbai என்ற இருப்பிடத் தகவலை இணைந்து 02ஆம் தேதி பதிவிட்டுள்ளார். மேலும், எனவே இது அய்அய்டி மும்பையில் அக்டோபர் முதல் வாரத்தில் நடந்ததாக தெரிகிறது. @dev_perspectives என்னும் IIT மும்பை மாணவரின் யூடியூப் பக்கத்தில் அக்டோபர் 4 அன்று பதிவிடப்பட்ட காணொலியில் red square iit Mumbai என்று பதிவிடப்பட்டுள்ளது. எனவே இந்த நிகழ்வு நடந்த இடம் மும்பை அய்அய்டி என உறுதியாகிறது.

அக்டோபர் 4 தேதிக்கு பிறகே இக்காணொலி அதிகளவில் பரவி வருகிறது. இதன்மூலம் இக்காணொலி இம்மாணவர்களின் பக்கங்களில் இருந்து எடுக்கப்பட்டு பரப்பப்படுகிறது என்பதும் உறுதியாகிறது.

பரவலுக்கான காரணம்

மாணவர்கள் தலைமைத் தேர்தல் ஆணையர் பதவி விலகக் கோரி போராடி வருகின்றனர். இதற்குமுன் கடந்த ஜூலை மாதம் நாடுதழுவிய அளவில் நீட் முறைகேடுகளுக்கு எதிராக நடந்த போராட்டத்தால் அப்போதைய ஒன்றிய கல்வி அமைச்சர் பதவி விலகும்  நிலை உருவானது.

இதுபோன்ற அவதூறுப் பதிவுகளை முக்கியமாக ஒன்றிய அரசின் ஆதரவுப் பதிவர்கள் மூலமே பதிவிடப் படுவதும் பகிரப்படுவதும் அறிய முடிகிறது.

தொடர்ந்து போராட்டம் வலுத்து வரும் நிலையில் போராடுபவர்களுக்கு எதிராக அவதூறான கருத்துகள் மாணவர்களுக்கு எதிரான மனநிலையை உருவாக்கும் நோக்கில் பகிரப்படுவதாக தெரிகிறது.

ஆய்வு முடிவு

இந்நிகழ்வு அய்அய்டி மும்பை யில் நடந்தது உறுதி யாவதால் பரவும் செய்தி பொய்யே.

 

– ஆய்ந்தறிவோர்

- விடுதலை நாளேடு, 11.10.26

தனுஷ்கோடியில் அரசு சுற்றுலாத் துறையின் சார்பில் ‘ராம யாத்திரை’யா? குழந்தைகளுக்குக் காவி உடையா? தமிழ்நாட்டை மதவெறி மண்ணாக்க அனுமதியோம்!

 

திராவிடர் கழகத் தலைவர் ஆசிரியர் கி.வீரமணி
அறிக்கை

தனுஷ்கோடியில் அரசு சுற்றுலாத் துறையின் சார்பில் ‘ராம யாத்திரை’யா? குழந்தைகளுக்குக் காவி உடையா? தமிழ்நாட்டை மதவெறி மண்ணாக்க அனுமதியோம் என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

இராமநாதபுரம் மாவட்டம், தனுஷ்கோடி அரிச்சல் முனையில் கடந்த 27.09.2026 அன்று சுற்றுலாத்துறை சார்பில் நாட்டியாஞ்சலி நடத்தி, உலக சுற்றுலா நாள் கொண்டாடப்பட்டுள்ளது. அதில், அபிநய நாட்டியாஞ்சலி என்னும் குழு வினருடன் இணைந்து சுற்றுலாத் துறை ஏற்பாடு செய்த நிகழ்ச்சிக்குப் பெயர் ‘ராம் யாத்ரா’வாம்!

ராம் யாத்ரா நடத்த வேண்டிய அவசியம் என்ன?

நூற்றுக்கணக்கான குழந்தைகள், கொளுத்தும் வெய்யிலில் போதுமான  ஏற்பாடுகளின்றி அவதிப்படுத்தப்பட்டுள்ளனர். அனைத்துக் குழந்தைகளுக்கும் காவி உடை அணிவித்து இந்த நிகழ்ச்சி நடைபெற்றுள்ளது. தமிழ்நாடு அரசின் சுற்றுலாத் துறைக்குக் காவி உடை அணிந்து ராம் யாத்ரா நடத்த வேண்டிய அவசியம் என்ன? மதவெறியைத் தூண்டும் ஆர்.எஸ்.எஸ்.சும், இந்து முன்னணி வகையறாக்களும் ராமேஸ்வரத்தைத் தொடர்ந்து மதவெறித் தளமாகப் பயன்படுத்த முயற்சித்து வருகின்றனர். அதற்கு ஒன்றிய பா.ஜ.க. அரசும் வழிவகுக்க முயற்சிக்கிறது. இப்போது அந்தப் பாதையில் த.வெ.க. அரசு செல்கிறதா?

சுமார் 40 ஆண்டுகளுக்கு முன்பே, எம்.ஜி.ஆர். ஆட்சிக்காலத்தில். ராமநாதபுரம் என்பதை ‘ராமன்நாடு’ என்று ஆங்கிலத்தில் எழுத முயன்று, கடும் எதிர்ப்புகளை எழுப்பி, அந்த முயற்சி முறியடிக்கப்பட்டது.

இதே ராமன் கதையைச் சொல்லித் தான், தமிழ்நாட்டின் பொருளாதார நலனுக்குப் பெரிதும் பயன்பட்டிருக்க வேண்டிய சேதுக் கால்வாய்த் திட்டம், பல ஆயிரம் கோடி ரூபாய்கள் செலவழிக்கப்பட்ட பின்னர் நிறுத்தப்பட்டது.

குழந்தைகளைக் காவி உடையுடன் நிறுத்திய அதிகாரிகள் யார்?

பிஞ்சுக் குழந்தைகளைக் காவி உடையுடன் நிறுத்திய அதிகாரிகள் யார்? இதற்கு அனுமதி அளித்த சுற்றுலாத் துறை அதிகாரிகள் யார்? மாவட்ட ஆட்சியர் இதில் மிகுந்த அக்கறை காட்டினார் என்று சொல்லப்படுகிறதே, என்ன பின்னணி?

தமிழ்நாட்டை மறைமுகமாக ஆட்சி செய்து, மதவெறிக் காடாக்க நினைக்கும் பா.ஜ.க.வுக்கு ஒத்துழைப்போர் யாராயினும், அவர்களைத் தமிழ்நாட்டு மக்களும் ஏற்கமாட்டார்கள் – வரலாறும் மன்னிக்காது.

 கி.வீரமணி

தலைவர்,

திராவிடர் கழகம்

29.9.2026       

ஓவர்சீஸ் வங்கி பிற்படுத்தப்பட்ட ஊழியர் நலச் சங்கத்தின் மாநில மாநாடு சென்னையில் நடந்தது

 

சென்னை, செப்.10 அனைத்திந்திய இந்தியன் ஓவர்சீஸ் வங்கியின் இதர பிற் படுத்தப்பட்ட ஊழியர் நலச் சங்கத்தின் 19ஆம் ஆண்டு விழா 6.9.2026 அன்று சென்னையில் நடைபெற்றது.

விழா தொடக்கத்தில் ஒடுக்கப்பட்ட மக்களின் மேம்பாட்டிற்காக – சமூகநீதி கிடைப்பதற்கு அரசியலமைப்புச் சட்டத்தில் உரிய பிரிவுகளை உருவாக்கிட – மக்கள் திரள் போராட்டத்தின் மூலம் வழிமுறை கண்ட தந்தை பெரியாரின் ஒளிப்படத்தினை திறந்து அனைவரும் மரியாதை செலுத்தினர்.

ஊழியர் நல சங்கத்தின் ஆண்டு விழாவினை யொட்டி பெண்களின் மேம்பாடு மற்றும் சமூகநீதி – இடஒதுக்கீடு குறித்த கருத் தரங்கம் நடைபெற்றது. சங்கத்தின் பொதுச் செயலாளர் ஏ. இராஜசேகர் கருத்தரங்கு நடவடிக்கைகளை ஒருங்கிணைத்து தலைமை வகித்தார். சங்கத்தின் செயல் தலைவர் ரவீனா விஜயகுமார் வருகை தந்தோரை வரவேற்றுப் பேசினார்.

திராவிட இயக்க தமிழர் பேரவையின் பொதுச் செயலாளர் பேராசிரியர் சுப. வீரபாண்டியன், நாடாளுமன்ற மேனாள் உறுப்பினர் டி.கே.எஸ். இளங்கோவன் சிறப்பு விருந்தினர்களாகப் பங்கேற்று சமூகநீதி – இடஒதுக்கீடு நடைமுறைபற்றி சிறப்புரை ஆற்றினர். ஜாதிவாரி மக்கள் தொகை கணக்கெடுப்பின் அவசியத்தையும் கணக்கெடுப்பு நடத்தப்படும் விதம் குறித்தும் விளக்கமாக எடுத்துரைத்தனர். பிற்படுத்தப் பட்டோர் பற்றிய கணக்கெடுப்பு ஜாதி என்ற குறிப்பில் ஏற்கெனவே உள்ள ஒன்றிய, மாநில அரசுப் பட்டியல்களில் உள்ள பெயரிலேயே பதிவிடப்பட்ட வேண்டும் என்பதுடன் சமூக நீதியின் ஆக்கத்திற்கு உதவிடும் வகையில் இருக்கும் என விரிவாகப் பேசினர்.

சமூக செயல்பாட்டாளரும் வழக் குரைஞருமான பவதாரணி, சமூகத்தில் பெண்கள் சந்திக்கும் சவால்கள் குறித்து சிறப்புரையினை வழங்கினார்.

அனைத்திந்திய பிற்படுத்தப்பட்ட ஊழியர் நல சங்கங்களின் கூட்ட மைப்பின் பொதுச் செயலாளர் கோ. கருணாநிதி பிற்படுத்தப்பட்ட ஊழியர் நலத் திட்டங்கள் குறித்தும், அவைகளை முழுமையாக நடை முறைப்படுத்தி பயன் பெறும் வழிமுறைகள் குறித்தும் விரிவாகப் பேசினர். ஊழியர் நலச் சங்கத்தின் ஆண்டு விழாவிற்கு வாழ்த்து தெரிவித்தும், வருங்காலத்தில் சங்கத்தின் செயல்பாடுகள் பரவலாகத் தெரிகின்ற வகையில் உறுப்பினர் சேர்க்கையில் அக் கறை காட்டி  நடை பெற வேண்டும் எனக் குறிப்பிட்டுப் பேசினார்.

விழாவின் நிறைவாக நலச் சங்கத் தின் பொருளாளர் பி.டி. ஆனந்த் நன்றி கூறினார்.

இந்தியன் ஓவர்சீஸ் வங்கி பிற்படுத் தப்பட்ட ஊழியர் நலச் சங்கத்தின் புதிய தலைவராக சேதுராமன் தேர்ந் தெடுக்கப்பட்டார்.

ஆண்டு விழாவில் பல மாநிலப் பிரதிநிதி உறுப்பினர்கள், பிற நிறுவன பிற்படுத்தப்பட்ட ஊழியர் நலச் சங்கத்தின் பொறுப்பாளர்கள் மற்றும் சமூகநீதியில் நாட்டம் கொண்ட பிரமுகர்கள் பலரும் பங்கேற்றுச் சிறப் பித்தனர்.

-விடுதலை நாளேடு, 10.9.26

--------------------------------------------------------------------------------------------------

தென் சென்னை திராவிடர் கழக ஊடகம்

கலந்துகொண்ட திராவிடர் கழக தோழர்கள்

கொடுங்கையூர் தங்கமணி, த.தனலட்சுமி, தென் சென்னை செயலாளர் செ.ர.பார்த்தசாரதி, அரும்பாக்கம் சா.தாமோதரன், த.ராஜா, பெரியார் மாணாக்கன்,, ஆவடி துணைச்செயலாளர் க.தமிழ்ச்செல்வன், தாம்பரம் சு.மோகன்ராஜ் மற்றும் பலர் கலந்துகொண்டனர்.

பேராசிரியர் டாக்டர் வேதகிரி சண்முகசுந்தரத்தின் 100 ஆவது பிறந்தநாள் (நூற்றாண்டு) விழா – தமிழர் தலைவர் பங்கேற்பு

 

சென்னை அரும்பாக்கத்தில் உள்ள டி.ஜி.வைஷ்ணவ் கல்லூரியில் புகழ்பெற்ற பொருளாதார நிபுணரும், முன்னாள் துணைவேந்தருமான பேராசிரியர் டாக்டர் வேதகிரி சண்முகசுந்தரத்தின் 100 ஆவது பிறந்தநாள் (நூற்றாண்டு) விழா நடைபெற்றது. நூற்றாண்டு மலர் வெளியிடப்பட்டது. இவ்விழாவில் திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் பங்கேற்று வாழ்த்துரை வழங்கினார். விஅய்.டி. வேந்தர் விஸ்வநாதன், வைகோ, ஏ.சி. சண்முகம், தமிழ்ச்சி தங்கபாண்டியன் எம்.பி., அக்ரி கிருஷ்ணமூர்த்தி மற்றும் பல முக்கிய பிரமுகர்கள் இந்த விழாவில் கலந்துகொண்டனர். (சென்னை – 16.9.2026)

-விடுதலை நாளேடு,16.9.2026

தென் சென்னை மாவட்ட திராவிடர் கழக ஊடகம்

திராவிடர் கழக தோழர்கள் வீ.குமரேசன்(கழக மாநில பொருளாளர்), ஒளிவண்ணன்(பகுத்தறிவாளர் கழகம்), தென் சென்னை செ.ர.பார்த்தசாரதி, மேற்கு சென்னை கரு.அண்ணாமலை,சுப்பிரமணி,சா.தாமோதரன், ஆவடி மாவட்டம் க.தமிழ்ச்செல்வன் மற்றும் பலர் கலந்துகொண்டனர்.

பேரறிஞர் அண்ணாவின் 118 ஆம் ஆண்டு பிறந்த நாள் வாழ்த்துச் செய்தி! அண்ணா வெறும் படம் அல்ல; என்றும் நமக்குப் பாடம்!

 

தமிழர் தலைவர் ஆசிரியர் அறிக்கை

பேரறிஞர் அண்ணாவின் 118 ஆம் ஆண்டு பிறந்த நாளான இன்று (15.9.2026) ‘‘அண்ணா வெறும் படம் அல்ல; என்றும், நமக்குப் பாடம்’’ என்றும் திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் அறிக்கை விடுத்துள்ளார்.

அவரது அறிக்கை வருமாறு:

இன்று (15.9.2026) பகுத்தறிவுப் பகலவன் திராவிடர்தம் பேராசான் தந்தை பெரியார் அவர்களின் தலைமாணாக்கரான பேரறிஞர் அண்ணா அவர்களது 118 ஆவது பிறந்த நாள் பெருவிழா!

தமிழ் மான, தன்மானப் பெருவிழா!

தனது கல்விப் பருவத்தை சென்னையில் முடித்தவு டன், தந்தை பெரியார் என்ற சுயமரியாதை ஈர்ப்பு மய்யத்தால் ஈர்க்கப்பட்ட அண்ணா, தந்தை பெரியார் அவர்களின் தன்மான இயக்கத்தின் தனிப்பெரும் தளபதியாக, தந்தை பெரியாரால் பெருமைப்படுத்தப்பட்டார்!

திராவிடத்தின் மீட்சிக் காலமாக்கி
வரலாறு படைத்த ‘அரசியல் அதிசயம்!’

அண்ணா ஒரு பல்கலைக் கொள்கலன்! எழுத்து, பேச்சு, சிந்தனை, செம்மையான ஆளுமை, நாடாளு மன்றவாதி, ஓராண்டு முதலமைச்சர் பதவிக் காலம் என்ற குறுகிய தனது ஆட்சிக்காலத்தை, திராவிடத்தின் மீட்சிக் காலமாக்கி வரலாறு படைத்த ‘அரசியல் அதிசயம்’ ஆவார்!

பொதுவாழ்வில் அவர் தனது அறிவு ஆசானிடமிருந்து – ஈரோட்டில் ‘விடுதலை’ ஆசிரியராகி கற்றுக்கொண்ட பல பண்புகள் அவரை நாளும் உயர்த்தி, வரலாற்றில் எவரும் பெற முடியாத தனித்த ஓர் இடத்தில் அமர்த்தி யுள்ளது!

‘என்றும் எனது தலைவர் இடம் காலியே; அதை மீண்டும் அவரை அழைத்து வந்தே நிரப்புவேன்!’

எதிர்நீச்சல், துணிவு, எதிரிகளிடத்தில்கூட கனிவு, ஆட்சி கிடைத்தபோது பணிவு, ஆளுமையில் அவர் எந்த ஏற்றம் பெற்றாலும், அந்த ஆட்சியை தனது ஆசானுக்குக் காணிக்கை ஆக்கிய பண்பின் உச்சம். ‘என்றும் எனது தலைவர் இடம் காலியே; அதை மீண்டும் அவரை அழைத்து வந்தே நிரப்புவேன்’ என்ற வீர சபதத்தினை அரசியலில் நிறைவேற்றிக் காட்டிய விந்தை மனிதர் பேரறிஞர் அண்ணா என்ற பெரும் ஆளுமை!

‘நான் கண்டதும், கொண்டதும் ஒரே தலைவர் தந்தை பெரியாரே!’ என்று கூறியது மட்டுமல்ல, அதைச் சொல்லாலும், செயலாலும் அரசு மூலம் நிரூபித்துக் காட்டிய மாவீரர் நம் அண்ணா அவர்கள்.

முதலமைச்சர் பதவி, அவரது வாழ்வின் வசந்தமல்ல; தந்தை பெரியாருடன் இருந்து பரப்புரை செய்ததே ’தம் வாழ்வின் வசந்தம்’ என்று மனந்திறந்த மாமனிதர் அவர்.

தன்மான ஆடை வழங்கிய
தகைசால் வள்ளல் அண்ணா!

தந்தை பெரியார் ஏற்படுத்திய சுயமரியாதைத் திரு மணத்தை சட்டப்படி செல்லுபடியாக்கியதன்மூலம், அத்திருமணம் மூலம் பிறந்த தலைமுறைகளுக்குச் சட்டப்படி தன்மான ஆடை வழங்கிய தகைசால் வள்ளல் அண்ணா!

அண்ணா வெறும் படம் அல்ல; என்றும்
நமக்குப் பாடம்!

அறிஞர் அண்ணாவின் திராவிடர் ஆட்சிதான் மக்களின் சுயமரியாதை தொடங்கி, மாநிலங்களின் சுயமரியாதை வரை விளக்கி, அதற்காகப் போராட, அரசியல் களம் அமைத்தவர் நம் அண்ணா!

அண்ணா ஆட்சிதான், கலைஞர் மற்றும் மு.க.ஸ்டாலின் ஆட்சியாக அவ்வப்போது வளர்ந்து – வழிகாட்டியது!

காலத்தை வென்றிட்ட காவியத் தலைவர்!

எனவே, அண்ணா ஒரு காலத்தை வென்றிட்ட காவியத் தலைவர்.

என்றும் மக்கள் நெஞ்சில் இருக்கும் செந்தமிழ்ப் பெட்டகம்; அறிவுச் செம்மல்!

வாழ்க! வாழ்கவே!!

 

கி.வீரமணி

தலைவர்,

திராவிடர் கழகம்

சென்னை        

15.9.2026        

தேசியநூல் பகவத்கீதையா? திருக்குறளா?' நூலினை தமிழர் தலைவர் ஆசிரியர் வெளியிட நீதியரசர் சு.இராசேசுவரன் (ஓய்வு) பெற்றுக் கொண்டார்

தேவநேயப்பாவாணர் மாவட்ட மய்ய நூலகப் பேரரங்கத்தில் கவிச்சிங்கம் கண்மதியனின் மூன்று நூல்கள் வெளியீட்டு விழா நடைபெற்றது. ‘தேசியநூல் பகவத்கீதையா? திருக்குறளா?’ என்ற நூலினை தமிழர் தலைவர் ஆசிரியர் கி.வீரமணி அவர்கள் வெளியிட, நீதியரசர் சு.இராசேசுவரன் (நீதிபதி, சென்னை உயர்நீதிமன்றம் (ஓய்வு) பெற்றுக் கொண்டார். மேலும் ‘உலகப் பொதுநூல் திருக்குறள் (இயல்புரை) ஒருவரி உரை ஓவியம்’ நூலினை முனைவர் சுவாமிநாதன் தேவதாஸும், ‘உலகப் பொதுநூல் திருக்குறள் (இயல்புரை) புதுக்கவிதை ஓவியம்’ நூலினை செவாலியே டாக்டர் வி.ஜி.சந்தோசமும் (தலைவர், விஜிபி குழுமம்) வெளியிட்டனர். உடன்: கவிச்சிங்கம் கண்மதியன், வா.மு.சே.திருவள்ளுவர், முனைவர் த.கு.திவாகரன், முனைவர் இளவரச அமிழ்தன், இசைக் கலைஞர் டி.கே.எஸ். கலைவாணன். (சென்னை, 14.9.2026)

-விடுதலை நாளேடு, 15.09.2026

----------------------------------------------------------------------------------------------------------------------------

தென் சென்னை திராவிடர் கழக ஊடகம்

தேவநேயப்பாவாணர் மாவட்ட மய்ய நூலகப் பேரரங்கத்தில் கவிச்சிங்கம் கண்மதியனின் மூன்று நூல்கள் வெளியீட்டு விழா!

14.09.2026 மாலை 6.00மணி

-