சேலம் பெரியார் பல்கலைக் கழகம் காவி மயமாகிக் கொண்டிருக்கிறது' செய்தியாளர்களிடையே தமிழர் தலைவர்!

 July 15, 2022 • Viduthalai

கேள்வித் தாளில் எந்த ஜாதி, தாழ்ந்த ஜாதி? என்று கேட்பதா?
இதற்குக் காரணமானவர்கள்மீது கடும் நடவடிக்கையை உயர்கல்வித் துறை அமைச்சர் எடுக்கவேண்டும்!
செய்தியாளர்களிடையே தமிழர் தலைவர்

சென்னை, ஜூலை 15 பெரியார் பல்கலைக் கழகம் காவி மயமாகிக் கொண்டிருக்கிறது; ஜாதி தர்மம் அங்கே படமெடுத்தாடிக் கொண்டிருக்கின்றது. இதற் குக் காரணமானவர்கள்மீது கடும் நடவடிக்கையை உயர் கல்வித் துறை அமைச்சர் எடுக்கவேண்டும்; எடுக்காவிட்டால், திராவிடர் கழகம் கடுமையாகப் போராடும் என்றார் திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள்.

கல்வி வள்ளல் காமராசர் பிறந்த நாளான இன்று (15.7.2022)  சென்னை பெரியார் பாலம் அருகில் (ஜிம்கானா கிளப்) உள்ள அவரது சிலைக்கு - உருவப் படத்திற்கு மலர்தூவி மரியாதை செய்த திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் செய்தியாளர்களுக்குப் பேட்டியளித்தார்.

காமராசருடைய கொள்கைகள் நிலைக்க வேண்டும்; சாதனைகள் தொடரவேண்டும்

கல்வி வள்ளல், பச்சைத் தமிழர் என்று தந்தை பெரியார் அவர்களாலே வர்ணிக்கப்பட்ட தமிழ் நாட்டின் ரட்சகர் காமராசர் அவர்களுடைய பிறந்த நாளான இன்றைக்கு, கட்சி வேறுபாடில்லாமல், அவரைப் பாராட்டக் கூடிய அளவிற்கு, அவருடைய கொள்கைகள் நிலைக்கவேண்டும் - அவர் பாடுபட்டு செய்த சாதனைகளைத் தொடரவேண்டும் என்கிற உணர்வோடு அனைத்துக் கட்சியினரும் இன்றைக்குக் காமராசர் அவர்களுக்கு மரியாதை செலுத்துகிறார்கள்.

காமராசர் அவர்கள் குலக்கல்வியை ஒழித்த காரணத்தினால்தான், இன்றைக்கு நாடெல்லாம் கல்வி நீரோடை பாய்ந்து கொண்டிருக்கிறது.

தகுதி, திறமை என்ற பெயராலே, மாணவர்களை வடிகட்டிக் கொண்டிருக்கிறார்கள்

காமராசர் அவர்களுடைய அரிய முயற்சி, மீண்டும் இன்றைக்குக் குழிதோண்டி புதைக்கப்படுகிறது என்ப தற்கு அடையாளமாக, புதிய கல்விக் கொள்கை என்ற பெயராலே - தகுதி, திறமையை சாடிய காமராசருடைய கொள்கைக்கு விரோதமாக இன்றைக்கு மிகப்பெரிய அளவிற்கு, நீட் தேர்வு, கியூட் தேர்வு என்று தகுதி, திறமை என்ற பெயராலே, மாணவர்களை வடிகட்டிக் கொண்டிருக்கிறார்கள்.

ஒடுக்கப்பட்ட சமுதாயத்தைச் சார்ந்தவர்களுக்கு சமூகநீதி இல்லாமல் ஆக்குகிறார்கள்.

எனவே, காமராசர் அவர்களுடைய பிறந்த நாளை, வெறும் வெளிச்சம்போட்டு, மாலை போடுவது என்ற அளவில் நிறுத்தாமல், எந்தக் கொள்கைக்காக, எந்த சாதனைக்காக காமராசர் அவர்கள் வாழ்ந்தார்களோ, அந்தக் கொள்கை என்றைக்கும் நிலைத்திருக்கக் கூடிய அளவிற்கு, அவர் பாடுபட்டு செய்த சாதனைகள் கல் வித் துறையில் - குலக்கல்வித் திட்டத்தை ஒழித்தார்.

இன்றைக்கு அதே குலக்கல்வி வேறு அவதாரம் எடுத்துக் கொண்டிருக்கிறது. இதையெல்லாம் எடுத்துப் போராடுவதுதான், காமராசருக்கு உண்மையிலேயே நாம் செய்யக்கூடிய மிகப்பெரிய மரியாதையாகும்.

அதைத் தொடர்ந்து திராவிடர் கழகமும், திராவிட இயக்கங்களும், 'திராவிட மாடல்' ஆட்சியும் தொடர்ந்து செய்து கொண்டிருக்கின்றன என்பதை நாடு அறியும்.

காமராசர் புகழ் ஓங்குக!

பல்கலைக் கழக கேள்வித்தாளில்  எந்த ஜாதி, தாழ்ந்த ஜாதி?

செய்தியாளர்: சேலம் பெரியார் பல்கலைக் கழக த்தில் செமஸ்டர் தேர்வு வினாத்தாளில், நான்கு ஜாதிகளைக் குறிப்பிட்டு, இதில் எந்த ஜாதி. தாழ்ந்த ஜாதி என்று கேட்டிருப்பது சர்ச்சையாகி இருக்கிறது; பல்கலைக் கழக கேள்வித் தாளிலேயே இதுபோன்ற கேள்வி வருவதை நீங்கள் எப்படி பார்க்கிறீர்கள்?

தமிழர் தலைவர்: வன்மையாகக் கண்டிக்கின்றோம். ஏற்கெனவே, சேலம் பெரியார் பல்கலைக் கழகம் காவி மயமாகிக் கொண்டிருக்கிறது; ஜாதி தர்மம் அங்கே படமெடுத்தாடிக் கொண்டிருக்கின்றது. இதற்குக் காரண மானவர்கள்மீது கடும் நடவடிக்கையை உயர்கல்வித் துறை அமைச்சர் எடுக்கவேண்டும்; எடுக்கவிட்டால், திராவிடர் கழகம் கடுமையாகப் போராடும்.

ஆளுநருக்குச் சொந்தமாக எந்த அதிகாரமும் கிடையாது

செய்தியாளர்: மதுரை காமராசர் பல்கலைக் கழகத்தில் நடைபெற்ற பட்டமளிப்பு விழாவிற்கு, உயர் கல்வித் துறை அமைச்சரை அழைக்காமல், தன்னிச் சையாக ஆளுநர் செயல்பட்டிருப்பது குறித்து...?

தமிழர் தலைவர்: ஆளுநர் ஒரு போட்டி அரசாங் கத்தை நடத்தலாம் என்று நினைத்துக் கொண்டிருக் கிறார். ஆளுநருக்குச் சொந்தமாக எந்த அதிகாரமும் கிடையாது.

அவரைப் பொறுத்தவரையில் பல்கலைக் கழகத்தில் அவர் ex-officio Chancellor என்ற அளவிலேதான் - ஆளுநராக இருக்கிற காரணத்தினால், அதுவும் மாநில அரசு பார்த்து கொடுத்தது.

அதே மாநில அரசு, தமிழ்நாடு அரசு இப்பொழுது மீண்டும் மசோதாவை மற்ற மாநிலங்களில் இருப்பது போல, திருத்தி இருக்கிறது.

அதற்கு ஆளுநர் அனுமதி தர மறுக்கிறார், ஒப்புதல் தர மறுக்கிறார் என்ற சூழ்நிலையில், அவர் ஒரு போட்டி அரசாங்கத்தை நடத்துகிறார்.

எனவேதான், இனிமேல் ஆளுநர், தமிழ்நாட்டில் கலந்துகொள்கின்ற நிகழ்ச்சிகளை மக்கள் புறக்கணிக்க வேண்டும் என்பது முதற்கட்டப் போராட்டமாக, அமைதிப் போராட்டமாக இருக்கும்.

- இவ்வாறு திராவிடர் கழகத் தலைவர் தமிழர் தலைவர் ஆசிரியர் கி.வீரமணி செய்தியாளர்களிடம் கூறினார். 

திராவிடர் என்று அடையாளப்படுத்தி பிரித்தது ஆங்கிலேயர்களா? வரலாற்றை மறைத்து பிரச்சினையை திசை திருப்புவதா?

  July 12, 2022 • Viduthalai

தமிழ்நாடு ஆளுநருக்கு தி.மு.க. பொருளாளர் டி.ஆர்.பாலு கண்டனம்

சென்னை, ஜூலை 12- உண்மையான பிரச்சினைகளைத் திசை திருப் பும் செயலில் இறங்க வேண் டாம் என ஆளுநருக்குக் கண் டனம் தெரிவித்து தி.மு.க. பொருளாளர் டி.ஆர்.பாலு அறிக்கை விடுத்துள்ளார்.

அவர் வெளியிட்ட அறிக்கை பின்வருமாறு: தமிழ்நாடு ஆளு நர் ஆர்.என்.ரவி அவர்கள் தினந்தோறும் ஏதாவது ஒரு சர்ச்சைக்குரிய கருத்தைச் சொல்வதை தனது வழக்கமாக வைத்திருக்கிறார். சர்ச்சைக்கு ரிய கருத்தைச் சொல்லி தன்னை நோக்கி அனைவரையும் பார்க்க வைக்கும் நோக்கத்துடன் இப் படி ஆளுநர் நடந்து கொள் கிறாரோ என்ற சந்தேகம் ஏற்படும் வண்ணம் அவரது கருத்துகள் தமிழ்நாட்டின் பொதுவெளியில் அமைந்து வருகின்றன

தமிழ்நாட்டிற்கு இதுவரை வந்து பணியாற்றிய ஆளுநர்கள் யாரும் இதுவரை இதுபோன்ற கருத்துகளைப் பொதுவெளி யில் சொல்லி சர்ச்சைகளில் இறங்கியது இல்லை என்று சொல்லும் வண்ணம், இன் றைய ஆளுநர் அவர்களின் செயல்பாடுகள் அமைந்துள் ளன.

சனாதனம் குறித்து சில வாரங்களுக்கு முன்னால் அவர் சில கருத்துகளைச் சொன்னார். அப்போதே அதற்கு உரிய விளக்கத்தை தி.மு.கழகத்தின் சார்பில் நான் அளித்தேன். இந்த நிலையில், ‘திராவிடர்’ குறித்து ஆளுநர் அவர்கள் அடுத்த விவாதத்தைத் தொடங்கி வைத்திருக்கிறார்.

‘திராவிடர்’ என்று அடை யாளப்படுத்திப் பிரித்ததே ஆங்கிலேயர்கள்தான் என்று ஆளுநர் அவர்கள் சொல்லி இருப்பதற்கு எந்த ஆதாரமும் இல்லை. ஆங்கிலேயர்களது வருகை கி.பி.1600 ஆம் ஆண்டு என வைத்துக் கொண்டால், அதற்கு முன்னதாக ‘திராவிடம்’ என்ற வார்த்தை இந்தியாவில் இல்லையா? இல்லை என்று ஆளுநர் அவர்கள் சொல்கி றாரா? இப்படி நிரூபிப்பதன் மூலமாக அவர் என்ன சொல்ல வருகிறார்?

ஆரியர் - திராவிடர் என்ற சொற்கள் எல்லாம் எப்போது உருவானவை என்பது குறித்து மிகப்பெரிய வரலாற்றாசிரியர் கள் பல நூறு புத்தகங்களை எழுதி இருக்கிறார்கள். அது குறித்து ஒன்றிரண்டு புத்தகங் களை மேலோட்டமாக ஆளு நர் அவர்கள் வாசித்தாலே ஆரி யர் - திராவிடர் என்ற உண் மையை எளிதாகப் புரிந்து கொள்ளலாம்.

அசல் மனு தரும சாஸ்தி ரத்தின் பத்தாவது அத்தியாயத் தின் 33ஆவது சூத்திரம் என்ன சொல்கிறது என்றால், ”பவுண்ட்ரகாஷ் சவுட்ர த்ரவிடா காம்போஜாயவநா ஷகா பாரதா பஹ்ளவாஷ் சீநா கிராதா தரதா கஷா” - என்கிறது.  "இத்தேசத்தை ஆட்சி செய்த வர்கள் அனைவரும் சூத்திர னாய் ஆகிவிட்டார்கள்"- என்கி றது மனுசாஸ்திரம்.

மகாபாரதத்தில் ‘திராவி டம்’ வருகிறது. காஞ்சி புராணத் தில் ‘திராவிடம்’ இருக்கிறது. தாயுமானவர் ‘திராவிடம்’ சொல்கிறார். தஸ்யூக்கள், அடிமைகள், திராவிடர்கள் "சூத்திரர்கள்" ஆக்கப்பட்டார் கள் என்கிறார் டாக்டர் அம் பேத்கர் அவர்கள்.

இத்தகைய இந்தியச் சமூக வரலாற்றின் சாதாரணச் செய் திகளைக் கூட அறிந்து கொள் ளாமல் ஆங்கிலேயர்கள் வந்து தான் ‘திராவிடர்கள்’ என்று பிரித்தார்கள் என்று சொல்வது வரலாறு அறியாதவர் கூற்று. அல்லது வரலாற்றை மறைப்ப வர்களின் கூற்று ஆகும்.

‘திராவிடம்’ என்பது இடப் பெயராக, இனப்பெயராக, மொழிப் பெயராக  இருந்தது. வடக்கு - தெற்கு என்ற பாகுபாடு இடப்பாகுபாடாக இருந்தது. ஆரியன் - திராவிடன் என்ற இனப்பாகுபாடாக இருந்தது. தமிழ் - சமஸ்கிருதம் என்ற மொழிப்பாகுபாடாக இருந் தது. இப்படி காலம்காலமாக இருந்த இன - இட - மொழிப் பாகுபாட்டை முன்வைத்து தமிழர் தம் அரசியலை - முன் னேற்றத்தை - எழுச்சியை உரு வாக்க முனைந்ததுதான் திரா விட இயக்கம் ஆகும். கடந்த 100 ஆண்டு கால திராவிட இயக்கத்தின் வரலாறு என்பது இதில் தான் அடங்கி இருக்கி றது.

 ஆயிரமாண்டுப் பள்ளத்தை 100 ஆண்டுகளில் நிரப்பி வரு கிற இயக்கம் தான் திராவிட இயக்கம் ஆகும். இதனைத் தாங்கிக் கொள்ள முடியாத வர்கள் ‘திராவிடம்’ என்ற சொல்லைப் பார்த்தாலே மிரண்டு கொண்டு இருக் கிறார்கள். இத்தகைய பீதிதான் ஆளுநர் அவர்களது பேச்சில் வெளிப்படுகிறது.

மன்னர்கள், குறுநில மன் னர் கள், சமஸ்தானங்கள் - என பிரிந்து கிடந்த நிலப்பரப்பை ஒன்றாக்கி ‘இந்தியா’வாக ஆண்டது பிரிட்டிஷ் அரசு. இங்கிருந்த ஜாதி - மத - இன - மொழி - எல்லை வேற்றுமை களை அவர்கள் பயன்படுத்திக் கொண்டார்கள் என்று வேண் டுமானால் சொல்லலாமே தவிர, இந்த வேற்றுமைகள் அனைத்தும் அவர்களால் உரு வாக்கப்பட்டவை என்று சொல் வது வரலாற்றை மறைப்பது ஆகும். வேத கால வரலாற்று இலக்கியங்களை ஆளுநர் அவர்கள் வாசித்தாலே இத்த கைய வேற்றுமைகளின் பிதா மகர்கள் யார் என்பதை அவர் உணரலாம்.

பிரிட்டிஷ் ஆட்சிக்குக் கீழ் இன்று இந்தியா இல்லை. பா.ஜ.க. ஆட்சியில்தான் இன்று இந்தியா இருக்கிறது. அதே வேற்றுமைகளை நீக்கும் செயல் கள் என்னென்ன என்று பார்த்து அதனை முன்னெடுப்ப தற்கு தன்னால் முடிந்த காரி யங்களை ஆளுநர் அவர்கள் செயல்படுத்தலாம். மற்றபடி கடந்த கால வரலாற்றுக்கு கற் பனை முலாம் பூசி, உண்மை யான பிரச்சினைகளைத் திசை திருப்ப முன்வர வேண்டாம் என்று கேட்டுக் கொள்கிறேன்.

கவர்னர், கவர்னர் ஜெனரல் போன்ற பதவிகள் எல்லாம்கூட பிரிட்டிஷாரால் உருவாக்கப் பட்டவை தான் என்பதையும் நினைவூட்டுவதோடு,  தமிழ் நாடு ஆளுநர் தன் பதவியேற் பின்போது,  அரசமைப்புச் சட் டத்தின்மீது எடுத்துக் கொண்ட உறுதிமொழிக்கு எதிராக இத் தகைய கருத்துகளை வெளியிடுவதைத் தவிர்க்க வேண்டும் என்றும் கேட்டுக் கொள்கி றேன், என்று அவர் அறிக்கை யில் குறிப்பிடுள்ளார். 

தி.மு.க. அரசின் ''திராவிட மாடலுக்கு'' எதிராக உள்ளார்ந்த திட்டத்தோடு வீண் வம்பை வளர்ப்பது சரியல்ல!

   July 12, 2022 • Viduthalai

 *     இந்திய அரசமைப்புச் சட்ட 259 ஆம் பிரிவுப்படி

     உறுதிமொழி எடுத்த ஆளுநர் அதற்கு எதிராகப் பேசலாமா?

* ஆரியர் - திராவிடர் பேதத்தை ஏற்படுத்தியது ஆரியனா - வெள்ளையனா?

தி.மு.க. அரசின் ''திராவிட மாடல்'' அரசுக்கு எதிராகவும், உள்ளார்ந்த திட்டத்தோடும் ஆளுநர் ஒருவர் செயல்படுவதும், பேசுவதும்  அரசமைப்புச் சட்டப்படி ஆளுநர் எடுத்துக்கொண்ட உறுதிமொழிக்கு எதிரானது என்று  அறிக்கை விடுத்துள்ளார்  திராவிடர் கழகத் தலைவர் ஆசிரியர் கி.வீரமணி அவர்கள். 

அவரது அறிக்கை வருமாறு:

தமிழ்நாட்டில் உள்ள ஆளுநர் ஆர்.என்.ரவி அவர் கள் தொடர்ந்து, தனது பதவியின் மாண்புக்கும், மரியா தைக்கும் இழுக்குத் தேடிடும் வகையில், பிரச்சினைக் குரியதாகக் கருதப்படும் கொள்கைகளைப்பற்றி விமர் சனம் செய்வது (Controversial Stories) அரசமைப்புச் சட்டப்படி அவர் எடுத்த உறுதிமொழிக்கு எதிரானது; அவரது அதிகார வரம்பின் அத்துகளை மீறிய நடவடிக்கை என்பதால் கண்டனத்திற்குரியதாகும்.

ஆளுநர் ஆர்.என்.ரவியின் 

ஆரியர் - திராவிடர் ஆராய்ச்சி

சில நாள்களுக்குமுன் அவரது ஆரிய- திராவிடர் ஆராய்ச்சியை உதிர்த்துள்ளார்.

அது அபத்தமானதாகவும், கலாச்சார மற்றும் மொழி பண்பாட்டுக்கு நேர் எதிரிடையாகவும் உள்ளது!

தற்போது நமது ஒப்பற்ற முதலமைச்சர் அவர்கள் தலைமையில் உள்ள  ‘திராவிட மாடல்' ஆட்சியின் மாட்சிகளை உலகமும், இந்திய நாட்டின் இதர மாநிலங்களும் மிகவும் பாராட்டி வரவேற்கும் நிலையில், ‘திராவிட' என்ற கருத்தியல் ஆர்.எஸ்.எஸ். - பா.ஜ.க. மற்றும் பார்ப்பன ஏகபோக கல்வி, பதவிச் சுரண்டல் காரர்களுக்குப் பெரும் ‘ஒவ்வாமையை' ஏற்படுத்துகிறது - அது அவர்கள் கொள்கை வயப்பட்டது.

ஆர்.எஸ்.எஸின் தத்துவ கர்த்தா கோல்வால்கரின் கருத்தை ஆளுநர் எதிரொலிப்பதா?

ஆர்.எஸ்.எஸ். அமைப்பின் தத்துவகர்த்தாவான கோல்வால்கர்  எழுதிய நூலில் (Bunch of Thoughts  - தமிழில் ‘ஞானகங்கை') ஆரிய - திராவிடர் கருத்தியல் பற்றி எவ்வகையில் விமர்சிக்கப்பட்டுள்ளதோ, அத னையே பிரதிபலிப்பதாக தமிழ்நாட்டு ஆளுநரின் பேச்சு - திட்டமிட்டே வம்புச் சண்டை இழுப்பதுபோலவே உள்ளது!

‘‘திராவிடம் என்பது இடம் சார்ந்தது மட்டுமே!''

‘‘ஆங்கிலேயர்கள் வருவதற்கு முன்னே நாம் கல்வியில் சிறந்து விளங்கினோம். 

இந்தியாவை பல ராஜாக்கள் ஆண்டபோதும் ஒரே குடும்பமாக இருந்தோம். ஆங்கிலேயர்கள்தான் பிரித் தாளும் சூழ்ச்சியைக் கையாண்டார்கள். விந்திய மலையை அடிப்படையாக வைத்து, வடக்கில் உள்ள வர்களை ஆரியர்கள் என்றும், தெற்கே உள்ளவர்கள் திராவிடர்கள் என்றும் கூறினர்.

ஒருங்கிணைந்த மராட்டியம், ஒடிசா, ஆந்திரா, கருநாடகா போன்ற பகுதிகளும் திராவிடமாக இருந்தன. திராவிடம் என்பது இடம் சார்ந்தது மட்டுமே.''

இந்த உரையின் கருத்துகள் முற்றிலும் உண்மைக்கு மாறானவை.

ஆங்கிலேயர் வருமுன் கல்வியில் சிறந்து விளங்கியோர் யார்?

ஆங்கிலேயர்கள் வருவதற்கு முன்னே கல்வியில் சிறந்து விளங்கியதாகச் சொல்லப்படுவோர் மிகப்பெரும் பான்மையான உழைக்கும் மக்களா? விளக்குவார்களா?

ஜாதி, வர்ணாசிரம முறைப்படி உயர்ஜாதியினரான ‘பிராமணாள் மட்டுமேதானே - பெரும்பான்மையான கீழ்ஜாதியினரான சூத்திர மக்களுக்கு - ‘‘வேதக் கல்வி என்பது மறுக்கப்பட்டது. காதால் கேட்கவும், நாவால் படிக்கவும் கூடக் கூடாது; மீறினால் காதில் ஈயத்தைக் காய்ச்சி ஊற்றவும், படிப்பவர் நாக்கை அறுக்கவும் வேண்டும்' என்ற சாஸ்திரக் கட்டளை - சனாதனத்தின் சந்நிதானக் கட்டளை'' என்பதை ஆளுநர் ரவியோ அல்லது அவருக்கு அந்தப் பேச்சை எழுதிக் கொடுத்த வர்களோ மறுக்க முடியுமா?

அனைவருக்கும் கல்வி ஆங்கிலேயர் வருவதற்கு முன் உண்டா?

ஆங்கிலேயர் வருமுன் 

அனைவருக்கும் கல்வி உண்டா?

அனைவருக்கும் உத்தியோகம் ஆங்கிலேயர் வருவதற்குமுன் உண்டா?

ஒரே ஜாதியிலிருந்து நியமனங்கள் செய்வது நிறுத் தப்பட்டு, பரவலாகப் பல வகுப்பினருக்கும் பகிர்ந்தளிக் கப்படவேண்டும் என்பதற்குக் கால்கோள் விழா இட்டவர்களே ஆங்கிலேயர் என்பதை இவர்களால் மறுக்க முடியுமா?

துரோணாச்சாரி - ஏகலைவன் கதை (கட்டை விரலை வெட்டி  குருதட்சணை கேட்ட கொடுமைக்கதை) பாரதத் தின் பழைய கதை அல்லவா? அதன் தத்துவம் என்ன? பதிலளிப்பாரா இந்த ஆளுநரான அறிஞர்?

திராவிடம் என்பது வெறும் இடமா? 

இந்தியா ஒரே நாடா?

‘திராவிடம்' என்பது வெறும் இடமா?; நிலத்திற்குக்கூட அந்த மொழி, பண்பாட்டு அடிப்படையில்தானே நாடு களுக்குப் பெயர் உண்டாகிறது; இங்கிலாந்து (England)  என்பது இங்கிலீஷ் மொழி பேசுபவர்களால்தானே! ஜெர்மனி - ஜெர்மானிய மொழிக்காரர்கள் - பண்பாட்டா ளர்களால் வந்த பெயர் அல்லவா? பிரெஞ்சு - பிரான்ஸ் என்பதன் அடிப்படை என்ன என்பதை சாதாரண அறிவுள்ளவரும் அறிவரே!

ஆதிசங்கரர், இராமானுஜர், சமஸ்கிருத,பாலி மொழிச் சுவடுகள், சமண, பவுத்த மதங்கள் நிலைத்த காலங் களுக்குப் பின்னும் தாயுமானவர் (18 ஆம் நூற்றாண்டு), கால்டுவெல் (1856), மனோன்மணியம் சுந்தரனார் (1891), இரவீந்திரநாத் தாகூர் (1911), மறைமலை அடிகள் போன் றோர் திராவிடம் என்ற சொல்லைப் பயன்படுத்தினரே! மகாபாரதத்திலும் திராவிட, கேரளா, பிராச்பேடி, பூஷிகா வன வாசின (பீஷ்ம பர்வம், 6:10:57) என்று உள்ளதே, இதற்கு என்ன பதில்?

சிந்து சமவெளி நாகரிகம், திராவிடர் நாகரிகம் என்று ஆய்வாளர்கள் கண்டுபிடித்தனரே, அய்ராவதம் மகாதேவன் போன்றோரும் கூறியதுண்டே!  நாகர்களும், திராவிடர்களே என்று டாக்டர் அம்பேத்கர் எழுதியுள்ளாரே!

என்ன பதில்?

ஆங்கிலேயர்கள் வரும்முன் இந்தியா ஒரே நாடாக இருந்த வரலாறு உண்டா?

புருஷ சுத்தம் - அதாவது வருண தர்மத்தை ஏற்படுத்தியவன் ஆங்கிலேயனா - ஆரியனா?

தெருக்கூத்தில்கூட ‘‘56 தேசத்து ராஜாக்களும்'' என்றுதானே வசனம் பேசுவர் என்பது - அவருக்குத் தெரியாதா?

ஒரே குடும்பமாக இருந்தால் ஏன் இத்தனைக் கடவுள்கள்? இத்தனை மதங்கள்?

ஒரே மதத்திற்கும் ஏன் தனிப்பிரிவு - சண்டைகள். அர்த்தமுள்ள ஹிந்து மதம் என்பதில் ஏன் நாலாயிரம் ஜாதிகள்?

பிரித்தாண்டவன் வெள்ளைக்காரனா? ‘‘புருஷ சுத்தம்'' காட்டிதலையில், தோளில், தொடையில், காலில் பிறந்தவன், அதற்கும் கீழே - அடியில் பஞ்சமர்கள், அனைத்து ஜாதிப் பெண்கள் என்று படிக்கட்டு ஜாதி முறையை (Graded inequality-யுடன் கூடிய முறையை) உண்டாக்கியவன் யார்? வெள்ளையனா?

மனுதர்மம் என்ன கூறுகிறது?

ஆரிய ரிக் வேதத்தின் புருஷ சுத்தத்தை ஆங்கி லேயனா எழுதினான்?

‘திராவிடம்' என்பது மனுதர்மத்தில் பத்தாவது அத்தியாயத்தில் உள்ளது என்பதை இந்த பிரகஸ்பதியார் ஏனோ தெரிந்துகொள்ள மறுக்கிறார்? அபத்தமாக, அரசமைப்புச் சட்டத்தின் 259 ஆவது கூற்றின் - Article-படி எடுத்த உறுதிமொழியை மீறும் வகையில் மக்களிடையே வேற்றுமையை விதைக்கும் பிரச்சாரம் செய்யலாமா?

தி.மு.க.வின் பொருளாளரும், நாடாளுமன்ற தி.மு.க. வின் தலைவரும், மேனாள் ஒன்றிய அமைச்சருமான தோழர் டி.ஆர்.பாலுவின் அறிக்கை மிகத் தெளிவாக விளக்குகிறது - சரியான பதிலடியாகவும் உள்ளது.

தி.மு.க.வின் 'திராவிட மாடலுக்கு' எதிராக ஆளுநர் கூறி - அமைதியற்ற நிலையை உருவாக்குவதா?

ஒரு ஆளுநரின் வேலை அந்த மாநில அரசு ‘‘திராவிட மாடல் அரசு'' என்று கூறும்போது, அதற்கு நேர் எதிரான கருத்தைக் கூறி, உள்ளே ஓர் அமைதியற்ற விவகாரத்தைக் கிளப்பிவிடுவதாக உள்ளது என்றால், ஏதோ ஒரு உள்ளார்ந்த திட்டத்துடன் இப்படி வலிந்த வம்புகள் தொடங்கப்படுகின்றனவோ என்ற அய்யம் பரவலாக உள்ளது!

அதைத் தவிர்த்து, சுமூக உறவுடன் மாநில வளர்ச்சிக்கு, வேலி துணையாக இருக்கவேண்டுமே தவிர, வேலியே பயிரை மேய்வதாக இருப்பது கூடாது.

இந்திய அரசமைப்புச் சட்ட விதிக்கும், எடுத்த உறுதிமொழிக்கும், அவரது பதவியின் பெருமைக்கும்கூட அது விரோதமானதாகும்.

கி.வீரமணி

தலைவர்,

திராவிடர் கழகம்

சென்னை

12.7.2022

விடுதலை'க்கு 10 ஆண்டு சந்தாக்களை வழங்கினார் முதலமைச்சர்!

  July 11, 2022 • Viduthalai

‘விடுதலை' சந்தா சேர்ப்பு இயக்கத்தில் ‘விடுதலை' ஆசிரியர் கி.வீரமணி அவர்களே அண்ணா அறிவாலயம் சென்று, ‘விடுதலை'க்கு 10 ஆண்டுகள் சந்தாவிற்கான தொகை ரூ.20 ஆயிரத்தை தி.மு.க. தலைவரும் முதலமைச்சருமான மாண்புமிகு மானமிகு முத்துவேல் கருணாநிதி ஸ்டாலின் அவர்களிடம் பெற்றுக்கொண்டார் (11.7.2022).

தி.மு.க. பொதுச்செயலாளரும், நீர்வளத் துறை அமைச்சருமான மாண்புமிகு துரைமுருகன், தி.மு.க.வின் முதன்மைச் செயலாளரும், நகர்ப்புற வளர்ச்சித் துறை அமைச்சருமான கே.என்.நேரு ஆகியோர் தலா 10 ஆண்டு ‘விடுதலை' சந்தாவிற்கான தொகை ரூ.20 ஆயிரம் வீதம் ரூ.40 ஆயிரம் வழங்கினார்கள்.‘விடுதலை' ஆசிரியர் நன்றி!

60 ஆண்டு ‘விடுதலை' ஆசிரியராக இருந்துவரும் எனக்கு மதிப்புறு ‘விடுதலை' சந்தாதாரர் என்ற தன்மையில், முதலமைச்சராகிய தங்களிடம் 10 ஆண்டுக்கான சிறப்புறு ‘விடுதலை' சந்தாதாரருக்குரிய தொகையை பெற்றமையைப் பெருமையாகக் கருதுகிறேன் - நன்றியையும் தெரிவித்துக் கொள்கிறேன்.

- கி.வீரமணி,

ஆசிரியர், விடுதலை

குறிப்பு: இவ்வாறு ‘விடுதலை' ஆசிரியர் கூறினார்; சந்தா வழங்கிய அமைச்சர் பெருமக்களுக்கும் நன்றி தெரிவித்துக் கொண்டார் ‘விடுதலை' ஆசிரியர்.

Engal Periyar | Episode 01 | எங்கள் பெரியார் | குழந்தைகள் தொடர் கதை | KI...

இமாம் பசந்த்'தும் சங்கராச்சாரியாரும்

'இமாம் பசந்த்!'

  July 09, 2022 • Viduthalai

பீகார் மாநிலம் பாட்னாவில் முகம்மது ரிஸ்வான்கான் என்பவர் உள்ளாடைகள் விற்பனை செய்யும் கடையை நடத்தி வந்தார். இவர் கடையில் ராம்தேவ் என்பவர் 25 ஆண்டுகளாகப் பணியாற்றினார்.

ராம்தேவுக்கு உறவினர்கள் யாரும் இல்லாத நிலையில், கடை உரிமையாளர் ரிஸ்வான்கான் குடும்ப உறுப்பினர் போலவே ராம்தேவ் வாழ்ந்து வந்தார். கடையில் கணக்குகளைப் பராமரிக்கும் பணி அவருடையது.

வயது முதிர்ந்த நிலையில், வேலைகளைப் பார்க்க முடியாத நிலைக்கு ராம்தேவ் ஆளானார். ஆனாலும், கடை உரிமையாளர் பரந்த உள்ளத்தோடும், மனிதநேயத்தோடும் பணிக்கு ஓய்வு கொடுத்தார். ஓய்வு என்று ஆகிவிட்டால் சம்பளம் யார் கொடுப்பார்கள்?

பெருந்தன்மை வாய்ந்த கடை உரிமையாளர் முகமது ரிஸ்வான் வழக்கமான சம்பளத்தையும் கொடுத்து அவரைப் பராமரித்தார்.

இந்நிலையில், ராம்தேவ் மூப்பின் காரணமாக மரணத்தைத் தழுவினார்.

ராம்தேவோ இந்து மதத்தைச் சேர்ந்தவர் - கடை உரிமையாளரோ முஸ்லிம் மதத்தைச் சார்ந்தவர். கடைக்காரரின் பெருந்தன்மையையும் - பண்பு நலனையும் பாருங்கள்.

இறந்தவர் இந்து மதத்தைச் சார்ந்தவர் என்பதால், கடை உரிமையாளர் முகமது ரிஸ்வான் தமது கடையில் கால் நூற்றாண்டுக் காலம் பணியாற்றி இருக்கிறார் என்ற நன்றி உணர்வோடு, இந்து முறைப்படி இறுதிச் சடங்குகளை நடத்தி உள்ளார்.

இறுதி ஊர்வலத்தில் ஏராளமான  முஸ்லிம் தோழர்கள் பங்கு கொண்டனர். இந்த வீடியோ சமூக வலை தளங்களில் வேக வேகமாகப் பரவி வருகிறது.

மதம் மனிதனைப் பிரிக்கலாம்; மனிதநேயம் மதத்தைத் தூரத் தள்ளுகிறது. இதற்கு அடையாளம்தான் பாட்னாவில் நடைபெற்ற இந்த நிகழ்வு.

காவி பக்தர் ஒருவர் காஞ்சி சங்கராச்சாரியாரியாக இருந்த ஜெயேந்திர சரஸ்வதிக்கு மாம்பழம் ஒன்றைக் காணிக்கையாகக் கொடுத்தார். மாம்பழத்தின் பெயர் என்ன என்று கேட்டார் சங்கராச்சாரியார்.

'இமாம் பசந்த்' என்றார் பக்தர்.

மாம்பழத்துக்கு ஒரு முசுலிம் பெயரா? பெயரை ராம்பசந்த் என்று மாற்றுவோம் என்றார்.

இவர்கள்தான் ஜெகத் குருக்கள்! இவர்களை ஜெகத்குரு என்று அழைத்தால் பாட்னா இசுலாமிய தோழன் முகமது ரிஸ்வானை மனிதநேய மகாகுரு என்று அழைக்கலாமே!

- மயிலாடன்

அமெரிக்கத் தமிழ்ச் சங்கப் பேரவை விழாவில் முதலமைச்சர் மு.க.ஸ்டாலின் முழக்கம்

‘தமிழால் இணைவோம்’-வட 

   July 06, 2022 • Viduthalai

சென்னை, ஜூலை 6 தமிழ், தமிழர்கள், தமிழ் இனத்தை மேம்படுத்துவதாக நம் செயல்பாடுகள் இருக்கவேண்டும். நம்மை பிளவுபடுத்தும் எண்ணங்களைப் பின்னுக்குத் தள்ளி, ‘தமிழால் இணைவோம்’ என்ற இயக்கத்தை முன்னெடுப்போம் என்று வட அமெரிக்கத் தமிழ்ச்சங்க பேரவைக் கூட்டத்தில் முதலமைச்சர் ஸ்டாலின் தெரிவித்தார்.

அமெரிக்கா, கனடாவில் உள்ள 70-க்கும் மேற்பட்ட தமிழ்ச் சங்கங்களின் கூட்டமைப்பாக விளங்கும் வட அமெரிக்க தமிழ்ச் சங்கப் பேரவையின் (‘ஃபெட்னா’) 35 ஆவது ஆண்டுவிழா நேற்று முன்தினம் (4.7.2022) நடைபெற்றது. இதில், 2020ஆம் ஆண்டுக்கான உலகத் தமிழ் பீட விருது, இலக்கியச் செம்மல் தமிழ்கோ இளங்குமரனாருக்கும், 2021ஆம் ஆண்டுக்கான விருது, ஈரோடு தமிழன்பனுக்கும் வழங்கப்பட்டது.

இதில் காணொலி வாயிலாக கலந்துகொண்டு, முதலமைச்சர் மு.க.ஸ்டாலின் பேசியதாவது:

உலகம் முழுவதும் பரந்து விரிந்து வாழும் ஓர் இனம் உண்டென்றால் அது நம் தமிழ் இனம்தான். 30-க்கும் மேற்பட்ட நாடுகளில் அதிக எண்ணிக்கையிலும், 60-க்கும் மேற்பட்ட நாடுகளில் குறைந்த எண்ணிக்கையிலும் தமிழர்கள் வாழ்கின்றனர். எங்கு தமிழர்கள் வாழ்ந்தாலும், அவர்களுக்கு தமிழ்நாடுதான் தாய்வீடு.

தமிழ் நிலத்தின் தொன்மை என்பது ஏதோ பழம்பெருமையோ, இலக்கியக் கற்பனையோ மட்டுமல்ல, அது வரலாற்றுப்பூர்வமானது. இத்தகைய வரலாற்றை மீட்டெடுக்கும் காலத்தில் இந்த மாநாடு நடைபெறுவது மிக மிகப் பொருத்தமானது.

கீழடி சான்றுகள்

கீழடியில் கிடைத்த சான்றுகள்தான், இந்தவரலாற்று வழித்தடத்தை மீண்டும் புதுப்பித்துள்ளன. அதேபோல, சிவகளை முதுமக்கள்தாழியில் கண்டெடுக்கப்பட்ட உமி நீங்கிய நெல்மணிகளின் காலம் கி.மு. 1150 என்று கண்டறியப்பட்டுள்ளது. ‘தண் பொருநை’ என்று அழைக்கப்பட்ட தாமிரபரணி ஆற்றங்கரை நாகரிகம் 3,200 ஆண்டுகளுக்கு முற்பட்டது என்பது உறுதி செய்யப்பட்டுள்ளது. இந்த ஆய்வுகளை மேலும் விரிவுபடுத்த உத்தரவிட்டுள்ளேன்.

சங்ககால துறைமுகங்களான பூம்புகார், கொற்கை, அழகன்குளம், வசவ சமுத்திரத்தையும் ஆய்வு செய்ய உத்தரவிடப்பட்டுள்ளது. ‘கீழடி உள்ளிட்ட ஆய்வுகள் மூலம் நமது வரலாற்றை மீட்பது, எங்கும் தமிழ், எதிலும் தமிழ் என்பதை நடைமுறைப்படுத்துவது, உலகளாவிய தமிழ் இனத்தை ஒருங்கிணைப்பது, தமிழன் எங்கு பாதிக்கப்பட்டாலும் அவன் கண்ணீரை துடைப்பது, தமிழகத்தை அனைத்து மேன்மைகளும் அடைந்த நாடாக வளர்த்தெடுப்பது’ ஆகிய 5 குறிக்கோள்கள் கொண்ட அரசாக தமிழ்நாடு அரசு செயல்பட்டு வருகிறது. கூட்டாட்சி தத்துவம், மாநில சுயாட்சி தத்துவங்களைக் கொண்ட ‘திராவிட மாடல்' அரசாக இந்த அரசு செயல்பட்டுக் கொண்டிருக்கிறது.

‘எல்லார்க்கும் எல்லாம்’ 

கோட்பாடு

திராவிடம் என்ற சொல் ஒரு காலத்தில் இனப் பெயராக, இடப் பெயராக, மொழிப் பெயராக இருந்தது. இது ஓர் இயக்கத்தின் பெயராக கடந்த 100 ஆண்டு காலமாக இருக்கிறது. இன்று ஓர் அரசியல் தத்துவத்தின் பெயராக, கோட்பாட்டின் பெயராக இருக்கிறது.

‘எல்லார்க்கும் எல்லாம்’ என்ற கோட்பாட்டின் அரசியல் வடிவமாக அது சொல்லப்படுகிறது. இந்த தத்துவத்துக்கு எதிரானவர்கள், எல்லார்க்கும் எல்லாம் கிடைக்க கூடாது என்று நினைப்பவர்கள்தான் திராவிட இயக்கத்தையும், இந்த ஆட்சியையும் எதிர்க்கின்றனர். இவர்களை மீறித்தான் தமிழ் இனம் வளர்ந்துள்ளது.

ஒருதாய் மக்களாக 

வாழுங்கள்!

நம் அனைவரது செயல்பாடுகளும் தமிழை, தமிழ் இனத்தை, தமிழர்களை மேம்படுத்துவதாக அமைய வேண்டும். நம்மை பிளவுபடுத்தும் எண்ணங்களை பின்னுக்குத் தள்ளி, நம்மை இணைக்கும் எண்ணங்களுக்கு முக்கியத்துவம் கொடுப்பவையாக நம் செயல்கள் அமைய வேண்டும். தமிழ்நாட்டில் இருக்கும் பிளவுகளுக்கு வெளிநாடுகள் சென்ற பிறகும் முக்கியத்துவம் தராதீர்கள். ஒருதாய் மக்களாக வாழுங்கள். தமிழை, தமிழகத்தை விட்டுவிடாதீர்கள். ‘தமிழால் இணைவோம்’ என்பதுதான் இன்று நாம் முன்னெடுக்க வேண்டிய இயக்கமாகும். தமிழுக்குத்தான் அந்த வலிமை இருக்கிறது.

ஜாதி சழக்குகளை வீழ்த்தும் வல்லமை மொழிக்குத்தான்

மத மாய்மாலங்களையும் ஜாதிச் சழக்குகளையும் வீழ்த்தும் வல்லமை மொழிக்குத்தான் உள்ளது. யாருடைய இறை நம்பிக்கையிலும் ஒருநாளும் தலையிட மாட்டோம். அதேநேரம், தமிழர்களைப் பிளவுபடுத்தும் கருவியாக, மதத்தை பயன்படுத்துவதைத்தான் எதிர்க்கிறோம்.

தமிழ் இனத்தை பிளவுபடுத்தும் முதல் சக்தியாக இருக்கிறது ஜாதி. அதனால்தான் ‘தமிழால் இணைவோம்’ என்பதை நமது முழக்கமாகக் கொண்டிருக்கிறோம். நம்மை நாடுகள் பிரித்தாலும், நிலங்கள் பிரித்தாலும், மொழி இணைக்கிறது. அந்த வல்லமை தமிழ் மொழிக்கு உண்டு. அத்தகைய தமிழ் மொழியை வளர்ப்போம். தமிழ் இனத்தைக் காப்போம். 

இவ்வாறு முதலமைச்சர் மு.க.ஸ்டாலின் கூறினார்.