தமிழ்த்தென்றல் திரு.வி.க. எழுதியிருப்பதை எடுத்துக்காட்டி ‘மணவழகர் மன்றம் முத்தமிழ் விழா’வில் தமிழர் தலைவர் கருத்துரை

 

பார்ப்பனரல்லாதார் இயக்கத்துக்குப் போட்டியாக காங்கிரஸ் பார்ப்பனர் ஒருவரால் தொடங்கப்பட்டதுதான் ‘சென்னை மாகாணச் சங்கம்’

சென்னை, ஜூலை,11 மணவழகர் மன்றத்தின் முத்தமிழ் விழாவில், தமிழர் தலைவர் ஆசிரியர் கி.வீரமணி அவர்கள் கலந்துகொண்டு சிறப்புரை ஆற்றினார்.  “பார்ப்பனரல்லாதார் இயக்கத்துக்குப் போட்டியாக, காங்கிரசிலிருக்கும் பார்ப்பனர் ஒருவரால் தொடங்கப்பட்டதுதான், ‘சென்னை மாகாணச் சங்கம்  அதில்  யானும், ஈ.வெ.ரா. வும் துணைத்தலைவர்களாக இருந்தோம்” என்று தமிழ்த்தென்றல் திரு.வி.க. எழுதி யிருப்பதாக தமிழர் தலைவர் சுட்டிக்காட்டிப் பேசினார்.

1957இல் தொடங்கப்பட்ட சென்னை மணவழகர் மன்ற அறக்கட்டளை, அதன் 70 ஆம் ஆண்டு முத்தமிழ் விழா 10.07.2026, வெள்ளிக்கிழமை அன்று மாலை 6 மணிக்கு, தியாகராயர் நகரில் ஜி.என்.செட்டி சாலையில் உள்ள தியாகராயர் கலையரங்கத்தில் நடைபெற்றது.

இந்நிகழ்வில், மணவழகர் மன்றத்தின் செயலாளர் கே.கன்னியப்பன் அனைவரையும் வரவேற்று உரையாற்றினார். அதில் அவர், “தமிழ்த்தென்றல் திரு.வி.க.கூறியது போல், தந்தை பெரியார் திராவிடர் கழகத்தின் தலைவராகவும், தமிழ்த்தென்றல் திரு.வி.க. தாய் என்றும் பேசியிருக்கிறார்கள்” என்று ஒரு முக்கியமான வரலாற்றுக்குறிப்பை நினைவூட்டிப் பேசினார். வரவேற்புரை நிறைவு பெற்றவுடன் சிறப்பு விருந்தினர்களுக்கு நிகழ்ச்சி ஏற்பாட்டாளர்கள் சார்பில் மரியாதை செய்யப்பட்டது.

தொடர்ந்து, இந்தியன் யூனியன் முஸ்லீம் லீக் கட்சியின் மாநில துணைத் தலைவர் செ.முகம்மது அலி, “இன்றைய தமிழர் நிலை” எனும் தலைப்பிலும், மார்க்சிஸ்ட் கம்யூனிஸ்ட் கட்சியின் அரசியல் தலைமைக் குழு உறுப்பினர் தோழர் கே.பாலகிருஷ்ணன், “திரு.வி.க.வும், தொழிலாளர் இயக்கமும்” எனும் தலைப்பிலும் உரையாற்றினர். முன்னதாகவே திராவிடர் கழகத்தின் தலைவர் ஆசிரியர் கி.வீரமணி அவர்கள் சிறப்புரை ஆற்றினார்.

தமிழர் தலைவர் ஆசிரியர் தமது உரையில், “இன்றைய அரசியல் சூழல் மாறியிருக்கிறது. அவர் வருவார், இவர் வருவார் என்று இல்லாமல் எவர் வந்தாலும் வராவிட்டாலும் மணவழகர் மன்றம் நிகழ்ச்சி நடைபெறும்” என்று பலத்த கைதட்டல்களுக்கிடையே தொடங்கினார். தொடர்ந்து, தந்தை பெரியாருக்கும், தமிழ்த்தென்றல் திரு.வி.க. அவர்களுக்கும் கருத்து மோதல்கள் இருந்தாலும் அது கண்ணியமாக இருந்தது என்பதைச் சுட்டிக்காட்டி, “இது என்றைக்கும் பாடமாக இருக்கக்கூடியது” என்றார். மேலும், மணவழகர் மன்ற வரலாற்றில் மேனாள் நீதியரசர் பி.ஆர்.கோகுலகிருஷ்ணன், எ.ஆர்.லட்சுமணன், சுந்தரேசன் ஆகியோரை நினைவு கூறாமல் இருக்க முடியாது” என்றார். மேலும் அவர், வரவேற்புரை வழங்கிய கன்னியப்பன் அவர்களின் பணிகளையும் நினைவு கூர்ந்து பாராட்டினார்.

தொடர்ந்து, தனக்கு வழங்கப்பட்ட ‘தந்தை பெரியாரும் தமிழ்த்தென்றல் திரு.வி.க.வும்” என்ற தலைப்பை சுட்டிக்காட்டி, “Unlike poles attracks each other” என்ற காந்தவியலைச் சுட்டிக்காட்டி இருவரின் கருத்துகளையும், குணங்களையும் பட்டியலிட்டார். “சமூகநீதிக்காகத்தான் தந்தை பெரியார் பொதுவாழ்க்கைக்கு வந்தார்” என்பதை முன்னோட்டமாகக் கூறிவிட்டு, நீதிக்கட்சி இருந்த காலத்தில், அதற்கு போட்டியாகத்தான் காங்கிரசில் இருக்கும் பார்ப்பனர் ஒருவரால் தொடங்கப்பட்டதுதான், சென்னை மாகாண சங்கம். அந்த சென்னை மாகாண சங்கத்தில், தந்தை பெரியாரும், திரு.வி.க.வும் துணைத் தலைவர்களாக இருந்ததை, திரு.வி.க.வே எழுதியிருப்பதை, அவரது எழுத்துகளிலேயே வாசித்துக்காட்டினார். வாசிக்கும் போதே அந்த தமிழின் இனிமையில் மனதைப் பறிகொடுத்து, “கடலூர் மாநாடு, ஈரோடு மாநாடுகளில் திரு.வி.க. பேசியதை கேட்கும் பேறு பெற்றவன் நான். அவரது பேச்சு மட்டுமல்ல, எழுத்தும் நம்மை ஈர்க்கக்கூடியது” என்று பெருமிதத்துடன் கூறினார். அடுத்து திரு.வி.க. சொன்ன இன்னுமொரு முக்கியமான கருத்தான, “தமிழ்நாடு காங்கிரஸ் ஈ.வெ.ரா வின் உழைப்பால் நன்றாக உண்டு கொழுத்தது” என்பதைச் சொன்னவுடன் பார்வையாளர்கள் நன்றாக ரசித்து சிரித்தனர்.

அடுத்து, “ஈ.வெ.ரா.வின் சுயமரியாதை இயக்கம் எனது சன்மார்க்க இயக்கத்திலிருந்து பிறந்தது. 90% ஒற்றுமை! 10% வேற்றுமை! வேற்றுமை எங்களுக்குள் போரை மூட்டியது. ஆனால், வேற்றுமை ஆக்கம் பெறவில்லை” என்று திரு.வி.க. சொன்னதையே எடுத்துரைத்தார். மேலும் அவர், “அந்த வேற்றுமையும் கண்ணியத்துடன் இருந்தது. இது பொதுவாழ்வில் இருப்போருக்கு என்றைக்கும் பாடமாகும்” என்று கூறி, பெரியாரின் தொண்டும், உண்மையும் எப்படிப்பட்டது என்பது உள்ளிட்ட பல்வேறு விசயங்களைப் பட்டியலிட்டு, காஞ்சிபுரம் மாநாட்டில் கருத்து வேற்றுமை காரணமாக பிரிந்தாலும், சந்திக்கும் போது, காழ்ப்புக் காட்டாத நண்பர்களாகவே இருந்ததையும் சுட்டிக்காட்டி தமது உரையை நிறைவு செய்தார்.

நிறைவாக மணவழகர் மன்றத்தின் துணைச் செயலாளர் சு.கருணாநிதி நன்றி கூறி நிகழ்ச்சியை நிறைவு செய்தார்.

நிகழ்வில்,  கழகத்தின் செயலவைத்தலைவர் வழக்குரைஞர் ஆ.வீரமர்த்தினி,  தென் சென்னை மாவட்டத் தலைவர் இரா.வில்வநாதன், செயலாளர் செ.ர. பார்த்தசாரதி, கோ.வீ.ராகவன், வடசென்னை மாவட்டத் தலைவர் வழக்குரைஞர் தளபதி பாண்டியன், செயலாளர் புரசை சு.அன்புச் செல்வன், தாம்பரம் மாவட்டத் தலைவர், முத்தையன், மோகன்ராஜ், கழகச் சொற்பொழிவாளர்கள் பிராட்லா, தேவநர்மதா, பெரியார் மாணாக்கன், திராவிட மாணவர் கழக மாநில துணைச் செயலாளர் செ.பெ‌.தொண்டறம், சோழிங்கநல்லூர் ஜெயராமன்,  சுரேஷ், பெரியார் பெருந்தொண்டர் த.கு.திவாகரன், அரும்பாக்கம் தாமோதரன், யுகேஷ், தங்கமணி தனலட்சுமி உள்ளிட்டோர் கலந்துகொண்டு நிகழ்ச்சியைக் கண்டு களித்தனர்.

- விடுதலை நாளேடு,11.07.26

நூற்றாண்டு கண்ட தலைவர்களின் அரசியல், நனி நாகரிகம், பண்பாடுகளை இன்றைய தலைமுறையினர் அறிந்து பின்பற்ற வேண்டும் சென்னை மணவழகர் மன்றத்தின் 68ஆவது ஆண்டு முத்தமிழ் விழாவில் தமிழர் தலைவர்

 

Published July 21, 2024

சென்னை, ஜூலை 21- சென்னை ராஜா அண்ணாமலை மன்றத்தில் மணவழகர் மன்றத்தின் 68ஆவது ஆண்டு முத்தமிழ் விழா 19.7.2024 அன்று மாலை உயர்நீதிமன்ற மேனாள் நீதிபதி கே.ஞானப்பிரகாசம் தலைமையில் நடைபெற்றது.
தமிழ்த்தாய் வாழ்த்துடன் விழா தொடங்கியது. மூத்த வழக்குரைஞர் ல.சுந்தரேசன் முன்னிலையில் மணவழகர் மன்ற செயலாளர் கே.கன்னியப்பன் அனைவரையும் வரவேற்று உரையாற்றி னார். தமிழர் தலைவர் ஆசிரியர் அவர்களுக்கு மணவழகர் மன்ற செயலாளர் பயனாடை அணிவித்து சிறப்பு செய்தார்.
திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் விழாவில் தொடக்க உரையாற்றினார்.
கடந்த சில நாள்களாக தொடர்ந்து நிகழ்ச்சிகளில் பங்கேற்று வருவதால் தொண்டை வலி, நீண்ட நேரம் அமர்ந்திருக்க முடியாது. தொண்டுக்கு ஓய்வு கூடாது. மருத்துவர்கள் தொண்டைக்கு ஓய்வு கொடுக்குமாறு (voice rest) கூறியுள்ளனர்.
முத்திரை பதிக்கின்ற அமைச்சர் மா.சு. என்கிற மாசிலாத மா.சுப்பிரமணியன் அண்மையில் அமெரிக்காவுக்குச் சென்றார். அங்கே உள்ள தமிழ் அமைப்புகளின் FETNA நிகழ்ச்சிகளில் கலந்துகொண்டார். அமெரிக்காவிலுள்ள பிரபலமான மருத்துவமனைகளில் பேசி யுள்ளார். தமிழ்நாடு மருத்துவத்துறையின் செயல்பாடுகள், நடவடிக்கைகள் குறித்து ஹார்வார்ட் பல்கலைக்கழகத்தில் பேசியுள்ளார்.
ரயில்வேத்துறையில் லாலு பிரசாத் அமைச்சராக இருந்தபோது கட்டண உயர்வே இல்லாமல் சாதனைகளை செய்தார். அவரை அழைத்துப் பாராட் டினார்கள், நம்முடைய அமைச்சர் மா.சு.வை பாராட்டியுள்ளனர். இவர்கள் பிற் படுத்தப்பட்ட வகுப்பிலிருந்து சாதனைகள் செய்தார்கள் என்று பாராட்டியுள்ளனர்.
நம்முடைய அமைச்சர் தகுதி, திறமை என்பது மோசடி என்பதற்கு உதாரணம் ஆவார். இங்கே பேராசிரியர் காதர் மொய்தீன் உள்ளார். மதம் வேறாக இருந்தாலும் மனம் ஒன்றுபட்டு இருப்பதுதான் இந்த இயக்கத்தின் சிறப்பு. யாவரும் கேளிர் என்பதுதான் தத்துவம். திரு.வி.க. அவர்கள் உலகம் ஓர் குலம் என்ற மிகப்பெரிய தத்துவத்தை வாழ்நாள் முழுவதும் கடைப்பிடித்தவர்.
அண்ணாமலைப் பல்கலைக்கழகத்தை உருவாக்கியவர் இராஜா முத்தையா செட்டியார் அவர்கள் – மணவழகர் மன்றத்துக்கு அடித்தளமாக விளங்கியவர். அறக்கட்டளைகள் அறைக் கட்டளைகளாகக் கூட பல இடங்களில் இல்லை.
அண்ணா, கலைஞர் என்று இங்கு பேசாத தலைவர்களே இல்லை.
தந்தைபெரியாரைப்போல், பாதை போட்ட தலைவர் திரு.வி.க. ஆவார்.
மணவழகர் மன்றத்தின் அறக்கட்டளை பொறுப்பேற்று மேனாள் நீதிபதி பு.இரா.கோகுலகிருஷ்ணன் பணியாற்றினார். அரு.இலட்சுமணன் மகன் சுந்தரேசன் என்று உயிரோட்டமுள்ளதாக தொடர்ந்து இயங்கிவருகிறது இந்த அமைப்பு. நூற்றாண்டைக் கடந்த தலைவர் திரு.வி.க. பெயரால் உள்ள அமைப்பு மணவழகர் மன்றம்.
கலைஞர் நூறறாண்டு, சிந்துவெளி நாகரிகம் திராவிட நாகரிகமே என்று சர் ஜான் மார்ஷல்அறிக்கை வெளியிட்டதன் நூற்றாண்டு, தவத்திரு தமிழ்த்திரு குன்றக்குடி அடிகளார் நூற்றாண்டு, தந்தை பெரியாரால் உருவாக்கப்பட்ட சுயமரியாதை இயக்கத்தின் நூற் றாண்டு, குடிஅரசு நூற்றாண்டு என நூற்றாண்டுகளைக் கொண்டாடி வருகிறோம்.
சுயமரியாதை இயக்கத்துடன் தொடர்புடையவர் திரு.வி.க.
தந்தைபெரியார் காங்கிரசிலிருந்து வெளியேறி சுயமரியாதை இயக்கத்தைத் தொடங்கினார் என்று சொன்னாலும், அதற்கு முன்னதாகவே நாயுடு, நாயக்கர், முதலியார் என்று ஜாதி பட்டத்தை துறந்தவர்கள் நம் தலைவர்கள். வரதராஜூலு, பெரியார் ஈ.வெ.ராமசாமி, திரு.வி.க. என தலைவர்கள் தொண்டாற்றினார்கள்.
காஞ்சிபுரத்தில் காங்கிரசு மாநாட்டிலிருந்து தந்தைபெரியார் வெளியேறினார். இருவேறு கருத்துகள், கொள்கைகள் கொண்டிருந்தாலும் பண்பாடு காத்தனர். திரு.வி.க. ஆழ்ந்த சைவப்பற்றாளர்.
சுயமரியாதை இயக்கம் 1925 இல் தொடங்கப்பட்டது. 36.11.1933இல் ஈரோட்டில் நடைபெற்ற சுயமரியாதை மாநாட்டில் கலந்துகொண்டு திரு.வி.க. பேசினார். “சுயமரியாதை இயக்கத்துக்கு பெரியார் தந்தை. நான் தாய். அந்த குழந்தை தாயுடன் வளராது, தந்தையுடன் வளர்கிறது” என்று திரு.வி.க. பேசினார். இனமானப்பேராசிரியர் தவறாமல் இதனைக் குறிப்பிட்டுப் பேசுவார்.
மனிதன் சுயமரியாதையோடு வாழ வேண்டும்.
பிறவி பேதம் அழித்தல், ஒழித்தல், ஆண், பெண் பேதமும் பிறவி பேதம்தான். பெண்ணின் பெருமை பற்றி சொன்னவர் திரு.வி.க.
சுயமரியாதை இயக்கத்தில் திரு.வி.க., தந்தைபெரியார் உழைத்த உழைப்பு-எல்லோருக்கும் கல்வி, சொத்துரிமைக்காக பாடுபட்ட இயக்கம் இந்த இயக்கம்.
அரசியல் பயில வேண்டுமென்றால், இன்றைய தலைமுறையினர் திரு.வி.க. எழுதிய திரு.வி.க. வாழ்க்கைக் குறிப்புகள் நூலைப்படிக்க வேண்டும். அதிலே அத்துணைத் தலைவர்கள் பற்றியும் அவருடைய நடையில் அழகான தமிழில் எழுதியுள்ளார்.
இரண்டு தத்துவங்கள், மாறுபட்ட கொள்கைகள் உடையவர்களாக இருந்தாலும், பண்பாடு, அரசியல் நனி நாகரிகம் காத்தவர்கள்.
– இவ்வாறு தமிழர் தலைவர் ஆசிரியர் தனது உரையில் குறிப்பிட்டார்.
விழாவில் தமிழ்நாடு மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன், மாநில சிறுபான்மை ஆணைய தலைவர் பீட்டர் அல்போன்ஸ், மார்க்சிஸ்ட் கம்யூனிஸ்டு கட்சி மாநில செயலாளர் கே.பாலகிருஷ்ணன், இந்திய முஸ்லிம் லீக் தலைவர் கே.எம்.காதர் மொய்தீன் ஆகியோர் கலந்துகொண்டு உரையாற்றினார்கள்.
விழா நிறைவாக மணவழகர் மன்ற துணைச் செயலாளர் சு.கருணாநிதி நன்றியுரையாற்றினார்.
திராவிடர் கழக செயலவைத் தலைவர் வழக்குரைஞர் ஆ.வீரமர்த்தினி, வழக்குரைஞர் சு.குமாரதேவன், தென்சென்னை மாவட்டத் தலைவர் இரா.வில்வநாதன், செயலாளர் செ.ர.பார்த்தசாரதி, தமிழ்நாடு மூதறிஞர் குழு பொருளாளர் த.கு.திவாகரன், உடுமலை வடிவேல், இளைஞரணி மாநில துணைச் செயலாளர் சோ.சுரேஷ், கொடுங்கையூர் கோ.தங்கமணி, தங்க.தனலட்சுமி, க.கலைமணி, சிவக்குமார், பெரியார் நூலக வாசகர் வட்ட பொறுப்பாளர்கள், மணவழகர் மன்ற பொறுப்பாளர்கள் உள்பட பலர் விழாவில் பங்கேற்றனர்.