எரியும் நினைவுகளைச் சுமக்கும் (யாழ்ப்பாணம்)நூலகம்!-நமது சிறப்புச் செய்தியாளர் -(2)

Published September 3, 2024

எரிக்கப்பட்ட யாழ்ப்பாண நூலகத்தின் பழைய கட்டடமும் – புதுப்பிக்கப்பட்டு தற்போது செயல்பாட்டிலுள்ள யாழ்ப்பாண நூலகமும்

ஒர் இனத்தை அழிக்க, அதன் மொழி யையும், பண்பாட்டையும் அழித்தலும், வரலாற்றை மறக்கடித்தலும் முக்கியமான நடவடிக்கைகள். வரலாறு நெடுக இதுவே நடந்துவந்திருக்கிறது. தப்பாமல் இலங்கையில் நடைபெற்றதும் அதுவே!

யாழ் பொது சன நூலகம் 97,000 புத்தகங்களையும், ஓலைச் சுவடிகளையும், அரிய பல ஆவணங்களையும் கொண்டிருந்த இலங்கையின் மிகப்பெரிய நூலகம். ஆசியாவின் மிகப்பெரிய நூலகங்களில் ஒன்றும் கூட! 1933-ஆம் ஆண்டு இலங்கை நீதித் துறையில் அலுவலராகப் பணியாற்றியவரான க.மு.செல்லப்பா அவர்களின் தனிப்பட்ட சேகரிப்புகள், பொது மக்களின் பங்களிப்புடன் புத்தகங்கள் திரட்டப்பட்டுக் கட்டப்பட்ட ஒன்றாகும்.

யாழ்ப்பாண நூலகம் எரியூட்டப்பட்டு
சிதைக்கப்பட்ட கொடுமை!

1981-ஆம் ஆண்டு மே மாதம் 31-ஆம் நாள் சிங்களக் காவல்துறையினராலும், துணை ராணுவப் படையினராலும் யாழ்ப்பாணத்தில் வன்முறைகள் கட்டவிழ்த்துவிடப்பட்டன. யாழ்ப்பாண நாடாளுமன்ற உறுப்பினரும், தமிழர் அய்க்கிய விடுதலைக் கூட்டணித் தலைவருமான யோகேஸ்வரன் வீடு, தமிழர் விடுதலைக் கூட்டணி அலுவலகம், பல வணிக நிறுவனங்கள், கடைகள், தமிழர் வீடுகள் தீக்கிரையாகின. வீடுகளிலிருந்து நான்கு தமிழர்களைத் தெருவில் இழுத்து வந்து கொன்று போட்டனர். ஜூன் 1-ஆம் தேதி இரவு யாழ்ப்பாண நூலகத்திற்குத் தீ மூட்டினர் சிங்களப் காவல்துறையினரும், துணை ராணுவக் குழுக்களும்! வரலாற்று ஆவணக் காப்பகமாக, பண்பாட்டுப் பெட்டகமாகத் திகழ்ந்த யாழ் பொது சன நூலகம் முற்றிலும் சிதைந்தது. ஓர் அறிவுக் கருவூலம் அழிந்துபட்டது. இலங்கை அரசின் இனவாத நடவடிக்கைகளை உலகிற்கே பட்டாங்கமாய்க் காட்டியது யாழ் நூலகத்தில் எரிந்த தீ!

யாழ்ப்பாண நூலகத்தில் குழந்தைகளிடம் தமிழர் தலைவர் அளவளாவினார்.
‘பெரியார் பிஞ்சு’ இதழைக் கழகப் பொதுச் செயலாளர் வீ. அன்புராஜ் குழந்தைகளிடம் வழங்கினார்.

1983 முதல் பல ஆண்டுகள் முயற்சித்து 2003 வரை பல கட்டங்களாக அந்நூலகத்தில் மீள் கட்டமைப்பு நடவடிக்கைகள் மேற்கொள்ளப்பட்டன.

உலகில் எங்கு சென்றாலும்
நூலகங்கள், புத்தகக் கடைகளுக்குச் செல்லுபவர் ஆசிரியர்

எங்கு பயணம் சென்றாலும், அங்குள்ள நூலகங்களையும், புத்தகக் கடைகளையும் ஆர்வத்துடன் சென்று பார்ப்பவர் தமிழர் தலைவர் ஆசிரியர் அவர்கள். யாழ்ப்பாணப் பயணம் உறுதியானது முதலே, யாழ் நூலகத்துக்குச் செல்ல வேண்டும் என்பதில் கவனமாக இருந்து, பயணத் திட்டத்தில் அதனை இணைக்கச் செய்தார். அகத்தில் இருந்த உணர்வுப்பூர்வமான ஆர்வம் அவரது முகத்திலும் தெரிந்ததைக் காண முடிந்தது.

யாழ்ப்பாண பொது நூலகத்திற்குப் பெரியார் சுயமரியாதைப் பிரச்சார நிறுவன, திராவிடர் கழக வெளியீடுகளைத் திராவிடர் கழகத் தலைவர் ஆசிரியர் கி. வீரமணி அவர்கள் வழங்கினார்.

உலக நாடுகளுக்குப் பயணப்படும்போது அங்குள்ள நூலகங்களில் தந்தை பெரியார், திராவிட இயக்க வரலாற்று நூல்கள் இடம்பெற வேண்டும் என்பதில் குறியாக இருப்பார். அப்படித் தான் சீனா, அமெரிக்கா, சிங்கப்பூர், ஜெர்மனி, பிரான்ஸ் உள்ளிட்ட பல்வேறு நாடுகளின் முதன்மையான நூலகங்களில் தந்தை பெரியார் சிந்தனைக் கருத்துகளைப் பன்மொழிப் புத்தகங்களாகக் கொண்டு சென்று வழங்கியுள்ளார்.

யாழ்ப்பாண பொது நூலகப் பொறுப்பாளர்கள் மற்றும் வாசகர்களுடன் தமிழர் தலைவர்

அதேபோல் தமிழ்நாட்டிலிருந்து யாழ்ப்பா ணத்திற்குக் கிளம்பும்போதே, தந்தை பெரியார், அறிஞர் அண்ணா, முத்தமிழறிஞர் கலைஞர், தமிழர் தலைவர் ஆசிரியர் உள்ளிட்டோர் எழுதிய புத்தகங்கள் தேர்ந்தெடுக்கப்பட்டு எடுத்துச் செல்லப்பட்டன.

உலகத் தமிழாராய்ச்சி மாநாட்டு உயிர்க் கொடை உத்தமர்கள் நினைவிடத்திலி ருந்து கிளம்பி, யாழ் பொதுசன நூலகத்திற்குச் சென்று நாம் இறங்கியது – அங்கிருந்த திருவள்ளுவர் சிலை அருகில்! உதவி நூலகர் அனிதா, நூலகர்கள் ஆனந்தராசா, இராணி, நூலக உதவியாளர் கோதை உள்ளிட்டோர் தமிழர் தலைவரை வரவேற்றனர். பொது நூலகத்தின் அனைத்துப் பிரிவுகளையும் ஆர்வத்துடன் சுற்றிக் காட்டினர். முக்கியச் செய்திகளை எடுத்துக் கூறினர்.

யாழ் பொது நூலகத்திற்குப் புத்தகங்கள்
வழங்கினார் தமிழர் தலைவர்

திருக்குறள் தமிழர்களின் மதம் என்று தந்தை பெரியாரால் போற்றப்பட்ட நூலாகும். காணுமிடமெல்லாம் திருவள்ளுவர் தான் யாழ் பொது நூலகத்தில்! நூலகத்தின் உள்புறத்தில் இருந்த திருவள்ளுவர் சிலை அருகிலும், இந்தியாவின் மேனாள் குடியரசுத் தலைவர் ஆ.ப.ஜெ.அப்துல்கலாம் அவர்கள் சிலை அருகிலும் புத்தகங்களை நூலகப் பொறுப்பாளர்களிடம் வழங்கினார் தமிழர் தலைவர்.

அங்கிருந்த குழந்தைகள் பிரிவுக்குச் சென்ற ஆசிரியர், குழந்தைகளிடம் உரையாடினார். எல்லா குழந்தைகளிடமும் அவர் கேட்கும் கேள்வியான “வருங்காலத்தில் என்ன ஆக வேண்டும் என்று ஆசைப்படுகிறீர்கள்?” என்ற கேள்வியையும் கேட்டார். மூன்றாம் வகுப்புச் சிறுவன் வருண் சொன்னார்: “நான் வெட்னரி டாக்டராகப் போகிறேன்.” சரியாகத் தான் சொல்கிறாரா என்று உறுதிப்படுத்தும் நோக்கில், ‘‘அப்படியென்றால், விலங்குகளுக்கு மருத்துவம் பார்க்கும் மருத்துவரா?’’ என்று கேட்டார் ஆசிரியர். ‘ஆம்’ என்றான் சிறுவன். ‘‘எப்படி அந்தத் துறையைக் குறிப்பாகச் சொல்கிறீர்கள்’’ என்று கேட்டார். “நாம் நமக்குத் தேவையானவற்றைக் கேட்டுச் சரி செய்து கொள்ள முடியும்.

சிதைக்கப்பட்ட யாழ்ப்பாண நூலகக் கட்டட நிழற்படங்களைத் தமிழர் தலைவர் பார்வையிடல்

விலங்குகளெல்லாம் மிகவும் கஷ்டப்படுகின்றன அல்லவா?” என்றார் வருண். அடடா… அவரது உயிர்நேயத்தைக் கண்டு மகிழ்ந்து தட்டிக்கொடுத்தார் ஆசிரியர். குழந்தைகள் பிரிவுக்குப் ‘பெரியார் பிஞ்சு’ இதழை வழங்கி, அவர்களுடன் கலகலப்பாகக் கலந்துரையாடினார் திராவிடர் கழகப் பொதுச் செயலாளர் வீ.அன்புராஜ். குழந்தைகள் பிரிவுப் பொறுப்பாளர் இராணி நன்றி தெரிவித்ததுடன், ‘‘குழந்தைகளுக்கு எமது வெளியீடுகளை அனுப்பி வைக்கிறோம்’’ என்று பொதுச் செயலாளர் உறுதி வழங்கியதற்கு நன்றி தெரிவித்தார். இந்தியாவில் இருந்து வெளிவந்த புத்தகங்களுக்கென தனிப்பிரிவில் ஏராளமான புத்தகங்கள் இடம்பெற்றிருந்தன.

அரிய கருத்துக் கருவூலங்கள்
அழிக்கப்பட்ட சோகம்

அடுத்து, தமிழர் தலைவரை ஆவணக் காப்பகப் பிரிவுக்கு அழைத்துச் சென்றனர் நூலகப் பொறுப்பாளர்கள். அப்பிரிவுக்குப் பொறுப்பாளரான தர்மிளா செந்தூரன் அவர்கள், நூலக உதவியாளர் ஜெஸ்டின் ஆகியோர் கடந்த 20 ஆண்டுப் பத்திரிகைகள் சேகரிக்கப்பட்டிருப்பதையும், ஓலைச் சுவடிகள் சிலவற்றைத் தேடித் திரட்டியிருப்பதையும் எடுத்துக் காட்டினார்கள். நூலகம் குறித்து அங்கும், பொதுப் பிரிவிலும் குறிப்பு எழுதினார் ஆசிரியர் அவர்கள்.

ஈழத் தந்தை செல்வா சென்னை வருகையின்போது எடுக்கப்பட்ட நிழற்படங்களில்
தந்தை பெரியாருடன் இருக்கும் படங்களை ஆவணக் காப்பகப் பொறுப்பாளர்கள் தமிழர் தலைவரிடம் சுட்டிக்காட்டினர்.

நாளிதழ் பிரிவுக்குச் சென்று பார்த்து, அங்கு தமிழ்நாட்டிலிருந்து இதழ்கள் வருவதற்கான வாய்ப்பையும் கேட்டு அறிந்தார். தமிழர் தலைவர் அவர்களின் வருகையைப் பார்த்து வியந்த வாசகர்கள் பலர் வணக்கம் தெரிவித்தும், ஒளிப்படங்கள் எடுத்துக் கொண்டும் தங்கள் மகிழ்ச்சியை வெளிப்படுத்தினர். நூலகத்திற்குத் தந்தை பெரியார் நூல்கள் உள்பட கழக வெளியீடுகளை விரைவில் அனுப்பி வைக்கத் தேவையான ஏற்பாடுகளைச் செய்வதாக உறுதியளித்தார் ஆசிரியர். தமிழ்நாட்டின் மூத்த தலைவர், 62 ஆண்டுகள் ‘விடுதலை’ ஏட்டின் ஆசிரியர், பல நூல்களின் ஆசிரியர் என்ற பெருமைக்குரிய தலைவர் தங்கள் நூலகத்திற்கு வந்ததைப் பெரு மகிழ்வுடன் எதிர்கொண்டனர் நூலகப் பொறுப்பாளர்கள். வெளியேவரும் இடத்தில், முந்தைய நூலகத்தின் ஒளிப்படம் இருந்தது. இத்தனைப் பெரிய நூலகத்தில் அன்றைக்கிருந்த அரிய கருவூலங்கள் அழிந்து பட்ட சோகத்தை மீண்டும் அந்தப் படம் நினைவூட்டியது. அமிர்தலிங்கம் அவர்களின் உதவியாளர் ஆர்.பேரின்பநாயகம் அவர்களும், எழுத்தாளர் தங்க.முகுந்தன் அவர்களும் உடனிருந்தனர்.

நூலகத்தின் முக்கிய விருந்தினர் குறிப்பேடுகளில் தமிழர் தலைவர் எழுதிய குறிப்பு

அடுத்தடுத்த இடங்களுக்குச் செல்ல வேண்டியிருந்ததால், அனைவரிடமும் விடைபெற்றுக் கொண்டு, அமிர்தலிங்கம் அவர்களின் சொந்த ஊரான பண்ணாகம் பகுதியில் உள்ள அவரது சிலைக்கு மாலை அணிவிக்கப் பயணப்பட்டோம். வழி நெடுக ஈழப் போரின் வடுக்களை நினைவுகளில் சுமந்த கிராமங்கள். அந்தப் பெயர்களை எல்லாம் அடிக்கடி செய்திகளில் நாம் பதிவு செய்து கலங்கியிருக்கிறோம்.

ஆவணக் காப்பகக் குறிப்பேட்டில்
தமிழர் தலைவர் எழுதிய குறிப்பு

(நாளை தொடரும்)

யாழ்ப்ப(ா)யணம் – 45 ஆண்டுகளுக்குப் பின்னர் மீண்டும் இலங்கையில் தமிழர் தலைவர்!

Published September 2, 2024, விடுதலை நாளேடு

நமது சிறப்புச் செய்தியாளர்

தமிழர்தம் வரலாற்றுத் தாயகங்கள் தமிழ்நாடும் ஈழமும்! இன்று இந்தியா என்றும், இலங்கை என்றும் அழைக்கப்படும் நிலப்பரப்புகள் பல மில்லியன் ஆண்டுகளாக நிலத்தால் இணைந்தும், நீரால் அவ்வப்போது பிரிந்தும் இருப்பவை. கடந்த 5000 முதல் 8000 ஆண்டுகளுக்குள்ளான கால கட்டத்தில் தான் (கி.மு.6000-க்கும் கி.மு.3000க்கும் இடைப்பட்ட காலம்) கடற்கோளால் கடைசியாகப் பிரிக்கப்பட்டன. பாக் நீரிணைப்பில் இருக்கும் உயரம் குறைந்த மணல் திட்டுகள் இந்நிலப்பரப்புகளுக்கிடையே இருந்த தொடர்பின் மிச்சங்களே!

தொடரும் தொப்புள் கொடி உறவு

வரலாற்றுக் காலத்திற்கு முன்பிருந்தே இந்நிலப்பரப்புகளில் வாழ்ந்துவந்த மக்கள் ஓரினத்தவரே! அதனால் தான் மொழியும், பண்பாடும் ஒன்றாகச் செழித்து வளர்ந்தன. அரசியல் ரீதியிலும் இருநாடுகளுக்கும் இருந்துவரும் தொடர்புகளுக்கு இலக்கியமும், கல்வெட்டுகளும் சான்று பகர்கின்றன. இவ்விரு நிலப்பகுதிகளும் கடந்த நூற்றாண்டின் முதல் பாதி வரைக்கும் ஒரே அரசின் கீழ் (இங்கிலாந்து) ஆளப்பட்டவை. நூற்றுக்கும் மேற்பட்ட சமஸ்தானங்களும், அரசுகளுமிருந்த நிலப்பகுதி இந்தியா என்றும், பாகிஸ்தான் என்றும் இரண்டே நாடுகளாக உருவாக்கப்பட்டதைப் போலவே, யாழ்ப்பாணம், கண்டி, கோட்டை என்று மூன்று அரசுகளாக 16-ஆம் நூற்றாண்டு வரை இருந்த ஈழ நிலப்பரப்பு, போர்த்துகீசியர்களின் ஆளுகைக்குப் பிறகு ஆங்கிலேயர்களின் ஆளுகைக்கும் வந்து பிறகு 1948-ஆம் ஆண்டு விடுவிக்கப்பட்டபிறகு சிலோன் (இலங்கை) என்ற ஒரே நாடானது. பின்னர் இலங்கை ஜனநாயக சோசலிசக் குடியரசாக 1972-இல் தன்னை அறிவித்துக் கொண்டது. தமிழர்களும், சிங்களர்களும், மூர்கள் உள்ளிட்ட இனத்தவரும் நிறைந்த இம் மண்ணில் 1956 முதல் எழுந்த இன – மொழிச் சிக்கல்களும், அதனைத் தொடர்ந்து நிகழ்ந்த அரசியல் – இராணுவப் போராட்டங்களும், அதில் தார்மீக அடிப்படையிலும், தொப்புள் கொடி உறவுகளான ஈழத் தமிழர் தம் உரிமைக்குரலுக்கு ஆதரவாகவும் தமிழ்நாடு வகித்த பங்கும் பெரும் நூல் தொகுதிகள் எழுதும் அளவுக்குச் செய்திகள் கொண்டவை. அவ் வரலாற்றை எழுதுவது இக்கட்டுரையின் நோக்கமன்று.

உலகத் தமிழர்களின் கவலை

நவீன காலத்தில், குறிப்பாகக் கடந்த நூற்றாண்டில் தொடங்கிய இலங்கையின் இன-மொழிச் சிக்கல் களும், அரசியல் ரீதியான அடக்குமுறைகளும், கட்டவிழ்த்து விடப்பட்ட வன்முறையும், அரங்கேறிய இனப் படு கொலையும் அதற்கெதிரான போராட்டங்களும்
2009-ஆம் ஆண்டு நடந்த இறுதிப் போருக்குப் பிறகு அமைதி நிலைக்குக் கொண்டுவரப்பட்டன. ஆனால், அது மயான

அமைதி!

அமைதி என்று பொதுவாகத் தமிழில் சொல்லப்படும் சொல்லுக்கு ஆங்கிலத்தில் பல சொற்கள் உண்டு. ஒவ்வொன்றுக்கும் விரிந்த பொருளுண்டு. Peace என்பது பிரச்சினைகளற்ற, சமாதானமான சூழலைக் குறிக்கும். Silence யாரும் எதுவும் பேசாத, ஒலி எழுப்பாத, சத்தமில்லாத அமைதியைக் குறிக்கும். இலங்கையில் அனைவரும் வேண்டுவது சமாதனத்தைக் குறிக்கும் அமைதியை; சத்தமில்லாத அமைதியை அல்ல! அதற்கான சூழல் அமைய வேண்டும் என்பது தான் உலகத் தமிழர்களின் கவலை.

2009-இல் ஆயுதங்கள் மவுனிக்கப்பட்ட தற்குப் பிறகு, இழந்த உரிமைகளை மீட்க, ஜனநாயக ரீதியில் போராடும் முயற்சிகள் நடைபெற்று வருகின்றன. உலகின் கவனத்தை ஈர்த்து, மறு கட்டமைப்பு மட்டுமல்லாது, உண்மையான உரிமைகளைப் பெறுவதற்காக அரசியல் – ஜனநாயக வழிகளில் தமிழர்கள் போராடி வருகின்றனர். இந்தச் சூழலில் தான் இத்தகைய உரிமைப் போராட்டங்களுக்கு முன்னோடியாகத் திகழ்ந்தவரும், ஈழத் தந்தை செல்வாவின் வழியில் அரசியல் களத்தில் செயலாற்றி, தமிழர் விடுதலைக் கூட்டணியின் தலைவராகவும், இலங்கை நாடாளுமன்றத்தின் எதிர்க்கட்சித் தலைவரான முதல் தமிழர் என்னும் பெருமைக்குரியவராகவும் திகழ்ந்த பெருமகனார் அப்பாப்பிள்ளை அமிர்தலிங்கம் அவர்களின் 97ஆம் ஆண்டு பிறந்தநாள் விழாவை அமிர்தலிங்கம் நினைவு அறக்கட்டளையினர் ஏற்பாடு செய்து, அந்நிகழ்வில் பங்கேற்க திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்களை அழைத்திருந்தனர்.

யாழ் பயணம்

அழைப்பை ஏற்று தமிழர் தலைவர் அவர்கள் சென்னையிலிருந்து விமானம் மூலம் 2024 ஆகஸ்ட் 23 அன்று முற்பகல் 11:45-க்குக் கிளம்பி, யாழ்ப்பாணம் பலாலி விமான நிலையத்தை பிற்பகல் 1.20 மணியளவில் சென்றடைந்தார். உடன் திராவிடர் கழகப் பொதுச் செயலாளர் வீ.அன்புராஜ், துணைப் பொதுச் செயலாளர் ச.பிரின்சு என்னாரெசு பெரியார் ஆகியோர் சென்றிருந்தனர்.

யாழ்ப்பாணம் விமான நிலையத்தில் தமிழர் தலைவரை வரவேற்க இலங்கை தமிழரசுக் கட்சியின் தலைவரும், மேனாள் நாடாளுமன்ற உறுப்பினருமான மாவை சோ.சேனாதிராஜா அவர்கள் வருகை தந்திருந்தார். அவருடன் அமிர்தலிங்கம் நினைவு அறக்கட்டளை அறங்காவலர்கள் க.கவுரிகாந்தன், எழுத்தாளர் தங்க.முகுந்தன், அமிர்தலிங்கம் அவர்களிடம் செயலாளராகப் பணியாற்றிய ஆர்.பேரின்பநாயகம், காங்கேசன் துறை தொகுதி இ.த.க. இளைஞரணித் தலைவரும், சேனாதிராஜா அவர்களின் மைந்தருமான கலை அமுதன் ஆகியோர் வந்திருந்து வரவேற்றனர். பாராட்டத்தக்க வகையில் மிகுந்த மரியாதையுடன் விமான நிலைய அதிகாரிகள் தமிழர் தலைவரிடம் நடந்து கொண்டனர்.

நீங்காத நினைவுகள்

பலாலியிலிருந்து யாழ்ப்பாணம் நோக்கி செல்லும் வழியில், உடன் வந்திருந்தவர்களிடம் 45 ஆண்டுகளுக்கு முன்பு தந்தை பெரியார் நூற்றாண்டு விழாவுக்காக இலங்கை வந்திருந்த நிகழ்வு குறித்தும், கொழும்பு உள்ளிட்ட பகுதிகளில் இருந்த இலங்கை திராவிடர் கழகத் தோழர்கள், திராவிட இயக்கப் பற்றாளர்கள், அமிர்தலிங்கம் அவர்களுடனான நினைவுகளையும் பகிர்ந்து கொண்டும், விசாரித்துக் கொண்டும் வந்தார் ஆசிரியர்.

மாலை 4.45 மணிக்கு டேன் தொலைக் காட்சியின் ஸ்பாட் லைட் நிகழ்ச்சிக்கான ஒளிப்பதிவு மேற்கொள்ளப்பட்டது. படப் பிடிப்புத் தளத்திற்கு வந்த தமிழர் தலைவரை டேன் டிவி நிர்வாகிகள் வரவேற்றனர். டேன் டிவி நிகழ்ச்சித் தொகுப்பாளர் சுலக்சன், ஈழநாடு ஆசிரியர் தேவராஜ் ஆகியோர் திராவிடர் கழகம், ஈழ மக்களின் நிலை, தமிழ்நாடு மீனவர்கள் இலங்கை கடற்படையால் சிறைப்பிடிக்கப்படுதல், எதிர்காலப் பணிகள் உள்ளிட்ட பல கோணங்களில் கேள்விகளை முன்வைத்து, சிறப்பான நேர்காணலைச் செய்து முடித்தனர். (முழுப் பேட்டி எழுத்துவடிவில் தனியே வெளிவரும்) அயல்நாட்டுப் பயணங்களின் போது இந்திய அரசியல், அந்நாட்டு அரசியல் குறித்துப் பேசுவதில்லை என்பதையும் தமிழர் தலைவர் தெளிவுபடுத்தினார்.

நேர்காணல் 25-ஆம் தேதியன்று உலகெங்கும் ஒளிபரப்பானாலும், அதன் சாரமான செய்தியை ஈழநாடு ஏடு ஆகஸ்ட் 24 அன்றே “ஈழத் தமிழர் பிரச்சினை தீர்வுக்கு சகலரும் ஓரணியாக வேண்டும்!” என்று முதல் பக்கத்தில் தலைப்புச் செய்தியாக வெளியிட்டிருந்தது. [1981-ஆம் ஆண்டு மே 31 இரவு யாழ்ப்பாணத்தில் தொடங்கிய கலவரத்தில் ஜூன் 1 அன்று எரிக்கப்பட்ட முக்கிய இடங்களில் ஈழநாடு பத்திரிகை அலுவலகமும் ஒன்றாகும்.] யாழ் குடா நாடு என்பது பல கடலேரிகள் உள்ள பகுதியாகும். மாலையில் சிறிதுநேரம் அந்தப் பகுதியில் நடைபோட்டுவிட்டுத் திரும்பினார்.

ஈகியருக்கு மரியாதை

இரண்டாம் நாளான 24.08.2024 காலை 9:30 மணிக்குக் கிளம்பித் தயாரானோம். முதலில் ஈழத்தந்தை செல்வா அவர்களின் நினைவிட வளாகத்திற்குச் சென்றோம். தந்தை செல்வா சிலைக்குத் திராவிடர் கழகப் பொதுச் செயலாளர் வீ.அன்புராஜ் மாலை அணிவித்தார். உடன் தந்தை செல்வாவின் பேரனும், சந்திரகாசன் அவர்களின் மகனுமான இளங்கோவன் இருந்தார்.

தமிழர் தலைவர் ஆசிரியர் கி.வீரமணி, இலங்கைத் தமிழரசுக் கட்சித் தலைவர் மாவை சோ.சேனாதிராஜா ஆகியோர் தந்தை செல்வாவின் நினைவிடத்திற்கு மலர்கள் தூவி மரியாதை செய்தனர். திராவிடர் கழகப் பொதுச் செயலாளர் வீ.அன்புராஜ், கழகத் துணைப் பொதுச் செயலாளர் ச.பிரின்சு என்னாரெசு பெரியார், இலங்கைத் தமிழரசுக் கட்சியின் பொறுப்பாளர்களில் ஒருவரான கனகசபாபதி, நிர்வாகச் செயலாளர் குலநாயகம், தங்க.முகுந்தன்,

ஆர்.பேரின்பநாயகம் ஆகியோரும் தந்தை செல்வா நினைவிடத்தில் மரியாதை செலுத்தினர். வளாகத்திலிருந்த 80 அடி உயர செல்வா நினைவுத் தூண் தந்தை செல்வாவின் நினைவிடத்திற்கான பேரடையாளமாகத் திகழ்கிறது.
தொடர்ந்து யாழ்ப்பாணம் – காங்கேசன் துறை சாலை யில் உள்ள ‘4-ஆவது உலகத் தமிழாராய்ச்சி மாநாட்டு உயிர்க்கொடை உத்தமர் நினைவாலயம்’ சென்றனர்.

 

 

யாழ்ப்பாணத்தில் 1974-ஆம் ஆண்டு ஜனவரி 3-ஆம் தேதி முதல் 10-ஆம் தேதி வரை எட்டு நாள்கள் நான்காம் உலகத் தமிழாராய்ச்சி மாநாடு நடைபெற்றது. அதன் இறுதி நாளன்று மாநாட்டு நிகழ்ச்சிகளைக் காண யாழ்ப்பாணம் சுற்றுவட்டாரப் பகுதிகளி லிருந்து ஆயிரக்கணக்கான பொதுமக்கள் திரண்டிருந்தனர். கூட்டுறவாளர் வீரசிங்கம் மண்டபத்தில் நடந்து கொண்டிருந்த மாநாட்டின் நிறைவு நிகழ்ச்சியை மட்டும், மக்கள் காணும் வகையில் வெளி அரங்கில் நடத்தத் திட்டமிடப்பட்டது. முதல் நாள் பெய்த மழையையும் பற்றி கவலை கொள்ளாமல், வெளியரங்க நிகழ்ச்சி நடைபெறும் என்று திரண்டிருந்த மக்கள் நிகழ்ச்சியைச் செவி மடுத்துக் கொண்டிருந்தபோது யாழ்ப்பாணம் காவல் நிலையத்திலிருந்து வேனிலும், ஜீப்பிலும் வந்த காவலர்கள் நிகழ்த்திய கண்ணீர்ப் புகை குண்டு வீச்சிலும், துப்பாக்கிச் சூட்டிலும், அதனால் மக்கள் சிதறியோடியதிலும் 11 தமிழர்கள் தங்கள் இன்னுயிரை இழந்தனர். ஒரு கொண்டாட்டமான நிகழ்வு கொடுங்கனவாக முடிந்தது. உலகத் தமிழர்கள் அன்றைய இலங்கை அரசின் கொடுங்கோன்மையை உணர்ந்துகொண்டனர். ஈழத் தமிழர்கள் வரலாற்றில் தனித் தமிழ் ஈழம் என்னும் முழக்கத்தைத் தமிழ்மக்களின் அனைத்துத் தலைவர்களும் முன்னெடுத்து வட்டுக்கோட்டை தீர்மானத்திற்கு வருவதற்கு இந்நிகழ்வு முக்கியக் காரணமாக அமைந்தது.

அவர்கள் உயிர்நீத்த இடத்தில் 11 தூண்களும், நடுகல்லும் நடப்பட்டு ‘4-ஆவது உலகத் தமிழாராய்ச்சி மாநாட்டு உயிர்க்கொடை உத்தமர் நினைவாலயம்’ அமைக்கப்பட்டுள்ளது. திராவிடர் கழகத் தலைவர் ஆசிரியர் அவர்கள் ஈகியருக்கு வீரவணக்கம் செலுத்தும் வகையில் மலர் தூவி மரியாதை செய்தார். கழகப் பொதுச் செயலாளர், துணைப் பொதுச் செயலாளர், இலங்கைத் தமிழரசுக் கட்சித் தலைவர்கள் உள்ளிட்டோரும் மரியாதை செய்தனர்.
(நாளை தொடரும்)

துணைப் பொதுச் செயலாளர் ச.இன்பக்கனியுடன் ஒரு நேர்காணல்

இயக்க மகளிர் சந்திப்பு (28) மனுதர்மத்தை எரித்ததால் ஒன்றரை ஆண்டுகள் வழக்கு!

Published August 24, 2024, விடுதலை ஞாயிறு மலர்

வி.சி.வில்வம்

ஒரு மகளிர், அரசு ஊழியராக இருந்தவர், ஓய்விற்குப் பிறகு பெரியார் திடல் வருகிறார், தலைவரைச் சந்திக் கிறார், இயக்கப் பணிகளில் தன்னை ஈடுபடுத்திக் கொள்கிறார். அதுசமயம் மனுதர்ம எரிப்புப் போராட்டம் அறிவிக்கப் படுகிறது. அதற்கு இவர் தலைமை தாங்குகிறார். விளைவு இவர் மீது வழக்குத் தொடரப்படுகிறது. சென்னை அல்லிக் குளம் மற்றும் எழும்பூர் நீதிமன்றங்களுக்கு ஒன்றரை ஆண்டுகள் அலைகிறார்! பிறகு விடுதலை ஆகிறார். எனினும் 30 ஆண்டுகள் அரசுப் பணி செய்து, வாங்கிய ஓய்வூதியப் பணத்தை வைத்துப் பிறர் எப்படி வாழ்வார்கள்; திராவிடர் கழக மகளிர் எப்படி வாழ்கிறார்கள் என்பதற்கான சான்று இந்நிகழ்வு! கழகத் தலைவரால், துணைப் பொதுச் செயலாளர் என அறிவிக்கப்பட்டு, சிறப்பாகச் செயல்பட்டு வரும் இன்பக்கனி அவர்களைத் தான், இந்த வார மகளிர் சந்திப்பில் பார்க்க இருக்கிறோம்!

அம்மா வணக்கம்! தங்களைக் குறித்து
அறிமுகம் செய்து கொள்ளுங்கள்?
என் பெயர் ச.இன்பக்கனி. ஊர் சென்னை. 69 வயதாகிறது. எனது அப்பா பெயர் பெ.சபாபதி. எஸ்.எஸ்.எல்.சி. முடித்தவர். அம்மா ச.இந்திராணி. கல்வி பயிலாதவர். எனினும் திருமணத் திற்குப் பிறகு அப்பா, அம்மாவுக்குத் தமிழ் வாசிக்கக் கற்றுக் கொடுத்தார்.‌ இதன்மூலம் வாழ்நாள் முழுவதும் விடுதலை இதழைப் படித்து வந்தார் அம்மா. என்னுடன் பிறந்தவர்கள் ஆறு பேர். அறிவுக்கண்ணு, ஆருயிர் என இரண்டு அக்காவும் மருத்துவர்கள். அறிவுக்கண்ணு என்கிற பெயர் பெரியார் வைத்தது. தம்பிகள் முகிலரசு, பவழக்கடல், தங்கைகள் எழில்மணி, பண்பொளி நால்வரும் பொறியாளர்கள். இதில் ஒரு அக்காவும், ஒரு தம்பியும் கரோனா காலத்தில் மறைந்துவிட்டார்கள்.

உங்கள் தந்தை திராவிடர் கழக
கொள்கையில் இருந்தவர்களா?
ஆமாம்! சென்னையில் பணியாற்றிய போது பெரியார் கூட்டம் கேட்டு, கொள்கைக்கு வந்தவர்கள்.‌ பிறகு அம்மாவும் மாறினார்கள். அதனையொட்டி எங்களின் இளம் வயது சிந்தனைகளும் இயக்கத்தை ஒட்டியே இருந்தன.‌ எனினும் நான் வங்கிப் பணியில் இருந்ததால், இயக்க நிகழ்ச்சிகளில் கலந்து கொள்ள முடியவில்லை. மும்பை, புதுடில்லி உள்ளிட்ட தமிழ்நாட்டின் பல நகரங்களிலும் பணியாற்றியுள்ளேன். ஆசிரியர் அவர்கள் அடிக்கடி குறிப்பிடும் “Invisible Member” என்கிற கணக்கில் நான் இருந்தேன்.

சிறு வயதில் பெரியார் திடல் சென்ற
அனுபவங்கள் இருக்கிறதா?
பள்ளிப் பருவ காலங்களில் சென்னையில் நடக்கும் பெரியார் கூட்டங்களுக்குக் குடும்பத்துடன் செல்வோம். பெரியார் திடலில் இரண்டு, மூன்று நாட்கள் நடைபெற்ற மாநாடுகளிலும் அங்கேயே தங்கியிருந்த அனுபவங்கள் உண்டு. அப்போது எம்.ஆர்.இராதா மன்றத்தின் மேற்கூரையில் தகடுகளும், தரையில் மணலும் பரப்பப்பட்டிருக்கும். மடக்கி வைக்கக் கூடிய இரும்பு நாற்காலிகள் இருக்கும். இரவில் நாற்காலியை ஒதுக்கி வைத்து விட்டு, மணலில் போர்வைகள் விரித்துப் படுத்துக் கொள்வோம். காலையில் அவசரமாக வீட்டிற்குச் சென்று, குளித்துவிட்டு, உணவு முடித்து, திடலுக்கு வந்துவிடுவோம். சில நேரங்களில் பெரம்பூரில் இருக்கும் வீடு வரைக்கும் நடந்தே சென்றுள்ளோம். அதேநேரம் வெளியூர் நிகழ்ச்சிகளில் நான் பங்கேற்றதில்லை.

பெரியாரைச் சந்திக்கும் வாய்ப்புக் கிடைத்ததா?
ஆமாம்! 28.05.1973 அன்று என் வாழ்வில் மறக்க முடியாத நாள்! அன்றுதான் பெரியாரைச் சந்தித்தேன். குடும்பத்தில் உள்ள அனைவரையும் அப்பா அழைத்துச் சென்றார்கள். பெரியாருடன் ஒளிப்படம் எடுத்துக் கொண்டோம். அப்போது மணியம்மையார் அவர்களும் இருந்தார்கள். பெரியார் எங்களின் பெயர்களைக் கேட்டு, நன்றாகப் படிக்க வேண்டும் என்று கூறினார்கள். நான் பொறியியல் கல்லூரியில் படித்துக் கொண்டிருந்த நேரம். அனைத்துப் பிள்ளைகளுமே நன்கு படிப்பதை அறிந்து, பெரியார் எங்கள் பெற்றோரைப் பாராட்டினார்.
திராவிடர் கழகத்தில் தாங்கள் வகித்த பொறுப்புகள் என்ன?
30.06.2015 அன்று பணி ஓய்வு பெற்றேன். ஆகஸ்ட் மாதம் திடலில் நடைபெற்ற செயற்குழுக் கூட்டத்தில் வட சென்னை மாவட்ட மகளிரணி செயலாளராக அறிவிக்கப்பட் டேன். தொடர்ந்து தலைமைச் செயற்குழு உறுப் பினர், மாநில மகளிரணி செயலாளர், தற்போது துணைப் பொதுச் செயலாளராக இருக்கிறேன். இந்த வாய்ப்புகளையும், வளர்ச்சியையும் கொடுத்த ஆசிரியர் அவர்களுக்கு இந்த நேரத்தில் நன்றியைத் தெரிவித்துக் கொள்கிறேன்.

இயக்கத்தின் முக்கிய நிகழ்ச்சிகளில் கலந்து கொண்ட அனுபவங்கள் குறித்துக் கூறுங்கள்?
பெரியார் அவர்கள் இறுதியாக 1973 இல் திடலில் நடத்திய மாநாடு, தியாகராயர் நகரில் 19.12.1973 அன்று பெரியார் ஆற்றிய இறுதிப் பேருரை, அன்னை மணியம்மையார் அவர்கள் நடத்திய இராவண லீலா உள்ளிட்ட நிகழ்ச்சிகளில் பங்கேற்றுள்ளேன். அதுமட்டுமின்றி திடலில் நடைபெற்ற பெரியார் நூலகம், படிப்பகம், பெரியார் மாளிகைத் திறப்பு போன்றவற்றிலும் கலந்துக் கொண்டுள்ளேன்.
எம்.ஜி.ஆர் அவர்கள் முதலமைச்சராக இருந்த போது, தந்தை பெரியார் நூற்றாண்டு விழா மிகச் சிறப்பாக நடந்தது. எனது சகோதரிகளுடன் தீச்சட்டி ஏந்தி வந்தேன். ஆசிரியர் அவர்களின் தலைமையின் கீழும் நிறைய நிகழ்ச்சிகளில் பங்கேற்றுள்ளேன். பின்னர் அரசுப் பணிக்குச் சென்றுவிட்டேன்.

போராட்டங்களில் பங்கேற்று
கைதான விவரங்கள் இருக்கிறதா?
அண்ணல் அம்பேத்கர் பிறந்த நாளில் 14.04.2016 அன்று, அனைத்து ஜாதியினரும் அர்ச்சகராக வேண்டும் என்பதை வலியுறுத்தி சென்னையில் ஆர்ப்பாட்டம் நடைபெற்றது. அப்போது தான் முதன்முதலாகக் கைதானேன். ஆயிரம் விளக்குப் பகுதியில் ஆசிரியர், சுப.வீரபாண்டியன் ஆகி யோருடன் ஒரு சமூக நலக் கூடத்தில் கைது செய்து வைக்கப் பட்டோம். தலைவர்கள் தங்கள் நினைவுகளைப் பகிர்ந்துக் கொள்ள, இருபால் தோழர்களும் இயக்கப் பாடல்களைப் பாடினர்.‌
பின்னர் 2017 ஆம் ஆண்டு அன்னை மணியம்மையார் பிறந்த நாளில் சென்னை, திருச்சி, தஞ்சாவூர், திருவாரூர், மதுரை, கோவை, சேலம் உள்ளிட்ட இடங்களில் இயக்க மகளிரால் “மனுதர்மம்” எரிக்கப்பட்டது. இதற்காகத்தான் ஒன்றரை ஆண்டுகள் நீதிமன்றப் படிகளில் ஏறி இறங்கினேன். தமிழர் தலைவர் ஆசிரியர் அவர்களின் வழிகாட்டுதலில், கழக வழக்குரைஞர் சு.குமாரதேவன் அவர்கள் முனைப்பெடுத்து வழக்கை முடித்துக் கொடுத்தார்கள். இளைஞரணி மாநிலச் செயலாளர் வழக்குரைஞர் சுரேஷ், எனது தம்பி முகிலரசு ஆகியோர் இறுதிவரை துணையாக இருந்தார்கள். எங்கள் அம்மாவும் ஒருமுறை கைதாகி, ஒரு வாரம் வரை சென்னை மத்தியச் சிறையில் இருந்துள்ளார்கள்.

இந்த இயக்கம் உங்களுக்கு வழங்கிய
மதிப்பாக எதைக் கருதுகிறீர்கள்?
வாழ்க்கையின் மொத்த மதிப்பிற்குமே, பெரியார் கொள்கைதான் காரணம். எனது கல்வி, எனது பணி, எனது இயக்க வாழ்க்கை அனைத்திலுமே மனநிறைவைப் பெற்றிருக்கிறேன். அண்மையில் கூட எனது பள்ளி ஆசிரியர் ஒருவரைச் சாலையில் சந்தித்தேன். “என்ன இன்பக்கனி இன்னமும் கடவுள் இல்லை என்று தான் சொல்கிறாயா?”, எனக் கேட்டுச் சிரித்தார்கள். இதுதான் நமக்கான அடையாளம். என்னைப் பார்த்ததும் அவர்களுக்குக் கொள்கை தான் நினைவிற்கு வருகிறது. அது எனக்கு மிகுந்த மகிழ்ச்சியைக் கொடுத்தது.
“உண்மை” இதழுக்கு அளித்த பேட்டியில், திருவாரூரைச் சேர்ந்த ஆசிரியர் முனியாண்டி அவர்கள், தங்களைக் குறித்துக் கூறியிருக்கிறாரே?
ஆமாம், நானும் வாசித்து மகிழ்ந்தேன். நன்றி! பள்ளி, கல்லூரி நாட்களில் இயக்கத் தொடர்பு என்பது என் அப்பாவின் மூலம் மட்டுமே கிடைத்தது. இதுதவிர எனக்கு நேரடியாகக் கிடைத்த முதல் தொடர்பு ஆசிரியர் முனியாண்டி அவர்கள். 1970 ஆம் ஆண்டு பகுத்தறிவாளர் கழகத்தின் சார்பில் பெரியார் குறித்துப் பேச்சு மற்றும் கட்டுரைப் போட்டிகளை‌ மாநில அளவில் நடத்தினார்கள். இதில் கட்டுரைப் போட்டியில் நான் முதல் பரிசை வென்றேன். தந்தை பெரியாரும், ஆசிரியர் முனியாண்டி அவர்களும் கையொப்பமிட்ட சான்றிதழை எனக்குக் கொடுத்தார்கள்.

பணியில் இருந்த காலத்தில் ஆசிரியர் கி.வீரமணி அவர்களைச் சந்தித்தது உண்டா?
மிகக் குறைவாகவே சந்தித்துள்ளேன். காரணம் வெளியூர் மற்றும் வெளி மாநிலங்களில் காலத்தைச் செலவழித்துவிட்டேன். ஆசிரியர் அய்யா அவர்களின் 80 ஆவது பிறந்த நாளில், இயக்கத் தோழர்களுடன் திடலில் வரிசையில் நின்று, நானும் என் தம்பியும் வாழ்த்துத் தெரிவித்தோம். அதேபோன்று சென்னைக்கு வரும் போது, அம்மாவுடன் பெரியார் திடல் சென்று ஆசிரியர் அய்யாவைச் சந்தித்திருக்கிறேன்.
எனது தந்தையார் மறைந்த போதும் (19.02.1996), தாயார் மறைந்த போதும் (18.12.2011) இல்லத்திற்கு வந்து இறுதி நிகழ்ச்சியில் பங்கேற்று, ஆசிரியர் அவர்கள் இரங்கல் உரை ஆற்றினார்கள். அதேபோன்று எங்கள் இல்லத்தின் முகப்பில் பெற்றோருக்கு மார்பளவு நினைவுச் சின்னம் வைத்துள்ளோம். அதனையும் ஆசிரியர் அவர்கள் 03.06.2012 அன்று திறந்து வைத்தார்கள். அன்றைய தினம் கழகத் துணைத் தலைவர் கவிஞர் கலி.பூங்குன்றன், மறைந்த மனோரஞ்சிதம், பார்வதி அம்மா போன்றோரும் கலந்து கொண்டார்கள்.
இளம் வயது முதல் கொள்கையில் இருக்கிறீர்கள். இயக்கத்தின் வளர்ச்சியாக எதைச் சொல்வீர்கள்?
பெரியார் மறைந்தவுடன் கொள்கையும், இயக்கமும் முடிந்துவிடும் எனக் கருதினார்கள். ஆனால் இன்று தந்தை பெரியார் தமிழ்நாடு கடந்து உலகமயமாகிவிட்டார். அந்தக் காலத்தில் நிகழ்ச்சிகள், மாநாடுகளுக்கு நடுத்தர மற்றும் முதியவர்கள் வருவார்கள். இன்று இருபால் இளைஞர்கள் கூட்டம் நம்மை மகிழ்ச்சியில் ஆழ்த்துகிறது.

எல்லோரும் சொல்வது தான்! தந்தை பெரியாரும், அன்னை மணியம்மையாரும் நமக்கு விட்டுச் சென்ற பெரும் சொத்து ஆசிரியர் தான்! ஏதேதோ காரணம் கொண்டு, சலசலப்பு ஏற்படுத்த முயன்றவர்கள் தோற்றுப் போனார்கள். ஆசிரியரின் தொலைநோக்குப் பார்வையே இதற்கு முக்கியக் காரணம். பெரியாரின் கருத்துகளைப் பாதுகாப்புப் பெட்டகமாக்கி, அதனை ஆவணமாக்கி, நூற்றுக்கணக்கில் நூலாக்கி, இன்று கோடிக்கணக்கில் மக்களைச் சென்று சேர்ந்திருக்கிறது என்றால், அது ஆசிரியரின் உழைப்பு! ஆசிரியரின் சாதனை!!
அப்படியான இந்த இயக்கத்தில் தோழர்கள் கூடுதல் வலிமையோடு பணியாற்றுவோம். குடும்பத்தில் உள்ள ஒவ்வொருவரும், கொள்கையில் இருப்பதை உறுதி செய்வோம். ஆசிரியர் அய்யா வழிகாட்டுதலில் நாம் அனைவரும் பயணிக்கிறோம் என்பதே என்றென்றும் நம் மகிழ்ச்சியாக இருக்கிறது”, என துணைப் பொதுச் செயலாளர் இன்பக்கனி தம் உணர்வுகளைப் பகிர்ந்து கொண்டார்!

தமிழ்நாடு அரசின் முக்கிய பார்வைக்கு இந்து அறநிலையத் துறை என்பது கோவில் பாதுகாப்பு, நிதி வரவு – செலவைப் பராமரிப்பதே!

 

விடுதலை நாளேடு

Published August 27, 2024

மதச்சார்புப் பிரச்சாரத்திற்கானதல்ல!

தமிழில் வழிபாடு – கருவறையில் சமத்துவம் என்ற முதலமைச்சரின் கருத்து வரவேற்கத்தக்கதே!

தமிழர் தலைவர் ஆசிரியர் அறிக்கை

இந்து அறநிலையத் துறை என்பதே கோவில் பாது காப்பு, நிதி வரவு – செலவுகளை நிர்வகிப்பதற்கானதே தவிர, இந்து மத பிரச்சாரத்திற்கானதல்ல. கருவறையில் மனிதருக்குள் பேதமற்ற நிலை, தமிழ் மொழியில் வழிபாடு என்ற முதலமைச்சரின் கருத்து வரவேற்கத்தக்கது என்று திராவிடர் கழகத் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:
இந்து சமய அறநிலையத் துறை சார்பில் ‘அனைத்து லக முத்தமிழ் முருகன் மாநாடு’ பழனியில் 24.8.2024 அன்று தொடங்கி இரண்டு நாள்கள் நடைபெற்றுள்ளது.
காணொலிக் காட்சி வழியாக மாநாட்டைத் தொடங்கி வைத்து வாழ்த்தி உரையாற்றியுள்ளார் தமிழ்நாடு முதலமைச்சர் மாண்புமிகு மு.க.ஸ்டாலின் அவர்கள்.

நீதிக்கட்சி ஆட்சியில் உருவாக்கப்பட்டதுதான்
இந்து அறநிலையத் துறை
இந்து அறநிலையத் துறை என்பது நீதிக்கட்சி பானகல் அரசரின் ஆட்சியில் பார்ப்பனர்களின் கடும் எதிர்ப்புக்கிடையே உருவாக்கப்பட்டு சட்ட மாக்கப்பட்டதாகும்.
தமிழ் மன்னர்களின் செல்வத்தாலும், தமிழினத் தொழிலாளர்களின் கடும் உழைப்பாலும் உரு வாக்கப்பட்ட கோவில்கள் பார்ப்பனர்களின் சுரண்டல் கூடாரமாகவே இருந்தது. நாம் இதைச் சொல்லவில்லை; இந்திய அரசால் சர்.சி.பி.இராமசாமி அய்யர் தலைமையில் அமைந்த குழுவினரே விலாவாரியாகத் தோலுரித்துக் காட்டினர் என்பது குறிப்பிடத்தக்கதாகும்.

இந்து அறநிலையத் துறை உருவாக்கப்பட்டதன் நோக்கம்
இந்து அறநிலையத் துறை என்பது கோவில் சொத்துகளைப் பாதுகாப்பதும், வரவு – செலவுகளை சரி பார்ப்பதுமான துறையே தவிர, பக்தியைப் பரப்புவதற்கான ஒன்றல்ல.
இதற்கு எடுத்துக்காட்டாக ஒன்றைச் சுட்டிக்காட்டுவது நமது கடமையாகும்.
அறிஞர் அண்ணா அவர்கள் முதலமைச்சராக இருந்த போது, இந்து அறநிலையத் துறை திரு.நாவலர் இரா.நெடுஞ்செழியன் அவர்கள் வசம் ஒப்படைக்கப்பட்டது.

சிதம்பரம் நடராசர் கோவிலில் அறநிலையத் துறை அமைச்சர் நாவலர் இரா.நெடுஞ்செழியன் நடந்துகொண்ட முன்மாதிரி (precedent)
அந்த நிலையில் சிதம்பரம் நடராசர் கோவிலுக்குச் சென்ற நிலையில், அவருக்குப் ‘‘பிரசாதங்கள்’’ எல்லாம் கொடுக்கப்பட்டுள்ளன. ஆனால், அவர் ஒன்றும் அதனை நெற்றியில் பூசிக்கொள்ளவில்லை. பரிவட்டம் கட்டினார்கள்.

தந்தை பெரியாரின் பாராட்டு
இதுகுறித்து தந்தை பெரியார் அவர்களே ‘விடுதலை’ யில் (25.3.1967, பக்கம் 2) தம் அறிக்கையில் குறிப்பிட்டுள்ளார்கள்.
‘‘அங்கே போய் அமைச்சர் நெடுஞ்செழியன் சாமி கும்பிடவில்லை. ‘‘பிரசாதம்’’ வாங்கி அணிந்து கொள்ளவில்லை. தலையில் கட்டிய பரிவட்டத்தை எடுத்து, கழுத்தில் வேட்டிபோல் போட்டுக் கொண்டார்.’’
‘‘ஒரு வெள்ளைக்காரன் இங்கு கோவிலுக்கு வந்து விட்டு எப்படிப் போவானோ, அப்படித்தான் நானும் வந்துவிட்டுப் போவேன்’’ என்றாராம்.
திரு.நெடுஞ்செழியன் அவர்கள், ‘‘நாங்கள் கொள்கை களைக் கழுவிக் கொட்டிவிட்டு இங்கு வரவில்லை. குளிக்கப் போகும்போது, வேஷ்டியை அவிழ்த்து மேடையில் வைத்துவிட்டு, குளிக்கப் போய் அழுக்கை தேய்த்துக் கழுவிவிட்டு, மேடையில் ஏறியவுடன், அந்த வேஷ்டியை எடுத்துக் கட்டிக் கொள்வதுபோல, அந்தக் கொள்கையோடுதான் இருக்கிறோம்’’ என்று காட்டிக் கொண்டார் என்றுதான் மக்கள் கருதவேண்டும்.
அவர்கள் (தி.மு.க.காரர்கள்) அதாவது ‘திராவிட’ என்ற சொல்லை நீக்கிக் கொள்ளும் வரையில், கொடியில் சிவப்பு பாதி, கருப்பு பாதிஎன்பதை மாற்றிக் கொள்கின்ற வரையில், அவர்களது சமுதாய சம்பந்தமான கொள்கை மாறாது என்பதை மக்கள் நம்பலாம் என்றே கருதுகிறேன்’’ (‘விடுதலை’, 25.3.1967) என்று தந்தை பெரியார், ‘‘மந்திரியும், அறநிலையப் பாதுகாப்பு இலாகாவும்’’ என்ற தலைப்பில் எழுதிய தலையங்க அறிக்கையில் குறிப்பிட்டுள்ளார்கள்.
16.4.1967 ‘விடுதலை‘யின் முதல் பக்கத்தில், ‘‘பலே நெடுஞ்செழியன்! பலே பலே நெடுஞ்செழியன்’’ என்ற தலைப்பிட்டு, கையெழுத்திட்டு, பாராட்டியும் எழுதினார்.

ஈரோட்டில் தேவஸ்தான கமிட்டி தலைவராக இருந்தவர்தான் தந்தை பெரியார்!
தந்தை பெரியார் அவர்களே கூட ஈரோட்டில் தேவஸ்தான கமிட்டி தலைவராக இருந்து, கோவில் வருவாயைப் பெருக்கிக்காட்டி, காங்கிரசில் சேரும்போது, 29 பதவிகளை உதறித் தள்ளியதில், இந்தப் பதவியும் அடங்கும்.
இந்த இடத்தில் இன்னொன்றையும் குறிப்பிட்டாக வேண்டும்.
சிதம்பரம் நடராசன் கோவிலுக்குச் சென்று, வெளியே வந்தபோது, செய்தியாளர்களிடம் அமைச்சர் நெடுஞ்செழியன் அவர்கள் சொன்ன கருத்து மிகவும் முக்கியமானதாகும்.

அறநிலையத் துறை அமைச்சரின் பணி என்பது என்ன?
‘‘அறநிலையத் துறை அமைச்சரின் பணி என்பது ஆறு மரக்கால் அரிசி என்றால், அதை அளவுப்படி சரியாகப் போடுகிறார்களா என்று பார்ப்பதுதானே தவிர, சாமி கும்பிடுவதோ, ஆன்மிகப் பிரச்சாரம் செய்வதோ அல்ல’’ என்று பளிச்சென்று சொன்னதை இந்த இடத்தில் நினைவூட்ட வேண்டியது நமது முக்கிய கடமையாகும்.
பாராட்டவேண்டிய நேரத்தில் மனந்திறந்து பாராட்டுவது போலவே, சறுக்கல் நேரும் நேரத்தில் அதனைச் சுட்டிக்காட்ட வேண்டியதும் தாய்க்கழகமான திராவிடர் கழகத்தின் முக்கிய கடமையாகும்.

முருகன் மாநாட்டுத் தீர்மானங்கள்
அனைத்துலக முருகன் மாநாட்டில் 21 தீர்மானங்கள் நிறைவேற்றப்பட்டுள்ளன.
அதில் 8 மற்றும் 12 ஆவது தீர்மானங்கள் விமர்ச னத்துக்கு உரியவையாகும்.
8 ஆவது தீர்மானம்:
‘‘கந்த சஷ்டி விழாக்காலங்களில் அருள்மிகு முருகன் திருக்கோவில்களில் மாணவர், மாணவியர்களைக் கொண்டு கந்தசஷ்டி பாராயணம் செய்விப்பது என்று தீர்மானிக்கப்படுகிறது.’’
12 ஆவது தீர்மானம்:
‘‘முருகப் பெருமானின் பெருமைகள் மற்றும் இலக்கியங்கள் குறித்து இந்து சமய அறநிலையத் துறையின் ஆளுகையின்கீழ் உள்ள திருக்கோவில்களின் சார்பில் நடத்தப்படும் கல்லூரிகளில் சிறப்பு ஆன்மிகப் பாடப் பிரிவுகளை ஏற்படுத்த அரசுக்குப் பரிந்துரைக்கலாம் என்று தீர்மானிக்கப்படுகிறது.’’
இந்த இரண்டு தீர்மானங்களையும் எந்த வகையில் நியாயப்படுத்த முடியும்?

இந்து அறநிலையத் துறையால் நடத்தப்படும் கல்வி நிறுவனங்கள் மதச் சார்புடையன அல்ல!
நமது தி.மு.க. அரசின் கொள்கை என்பது மதச் சார்பற்ற தன்மை கொண்டதாயிற்றே!
தி.மு.க. அங்கம் வகிக்கும் இந்தியா கூட்டணிக்குக் கூட மதச்சார்பற்ற கூட்டணி என்றுதானே பெயர் – இதற்குமேல் விளக்கத் தேவையில்லை.

அரசின் கொள்கை மதச்சார்பின்மையே!
முதலமைச்சர் காணொலி உரையில் முடிவாக ஒன்றை அழுத்தமாகக் குறிப்பி்ட்டுள்ளார்.
‘‘ஆலய வழிபாடுகளில் தமிழ்மொழி முதன்மை பெற வேண்டும்! திருக்கோவில் கருவறைக்குள் மனிதருக்கிடையே பாகுபாடு காட்டாத சமத்துவம் நிலவவேண்டும். அன்பால் உயிர்கள் ஒன்றாகும்! உலகம் ஒன்றாகும்.’’ (‘முரசொலி’, 25.8.2024, பக்கம் 4).
இது முத்தாய்ப்பான கொள்கை ரீதியான முத்திரை யடியாகும்.
அந்த வகையில், மாநாடு நடைபெற்ற முருகன் கோவிலிலேயே தொடங்குவது பொருத்தமானதாக இருக்க முடியும்.
தமிழிலும் அர்ச்சனை என்ற உம்மை இழிவு சிறப்பை நீக்கி, தமிழ்நாட்டுக் கோவில்களில் தமிழை வழிபாட்டு மொழியாக ஆக்குவதற்கு இந்து அறநிலையத் துறை உறுதியாக முன்வரவேண்டும்.
கோவில் கருவறைக்குள் மனிதருக்கிடையே பாகுபாடு காட்டாத சமத்துவம் நிலவவேண்டும் என்ற அடிப்படையில் அனைத்து ஜாதியினருக்கும் அர்ச்சகர் உரிமை என்ற ‘திராவிட மாடல்’ அரசின் மனிதத்துவ சிந்தனையை செயல்படுத்தவேண்டும். இது ஒரு கட்டத்தோடு நின்றிருக்கிறது. இதனை முழுமையாக நிறைவேற்றி, மாண்புமிகு முதலமைச்சர் காணொலியில் குறிப்பிட்ட, கோவில் கருவறைக்குள் மனிதருக்கிடையே பாகுபாடு காட்டாத சமத்துவம் நிறைவேற்றப்படவேண்டும்.

பழனிக் கோவிலின் உண்மை வரலாறு என்ன?
இந்தப் பழனிக் கோவிலை எடுத்துக் கொண்டாலே, இதன் பூர்வீக வரலாறு என்ன?
இந்தக் கோவிலை உருவாக்கியவர் யார்? பூசாரிகளாக (அர்ச்சகர்களாக) இருந்தவர்கள் யார்? இப்பொழுது பார்ப்பனர்கள் மட்டுமே அர்ச்சகர்களாக இருப்பதன் பின்னணி சூழ்ச்சி என்ன என்பது முக்கியமானதாகும்.
சித்தர்கள் பதினெண்மரில் போகர் என்பவரும் ஒருவர். திருமூலரின் வழிவந்தவர். திருமூலரின் சீடர் காலங்கநாதர், அவரது சீடரே போகர் ஆவார். இந்த சித்தர்கள் ஜாதி, மதங்களைக் கடந்தவர்கள்; இன்னும் சொல்லப்போனால், அவற்றைக் கடுமையாக எதிர்ப்பவர்கள்.
‘‘கல்லினால் அமைக்காமல் ஒன்பது வகை மருந்து சரக்குகளால் – அதாவது நவபாஷாணத்தினால் போகரால் நிறுவப்பட்டதுதான் பழனி முருகன் சிலை.’’ இன்றைக்கும் கோவிலின் உட்புறம் உள்ள திருச்சுற்றில் சித்தரான போகர் சமாதி உள்ளது.
போகர் வழிவந்தவர்கள்தானே
பூசை செய்து வந்தனர்
போகருக்குப் பின்னர், அவர்தம் சீடர் புலிப்பாணி யாராலும், அவருக்குப் பின்னரும், புலிபாணியாரின் வழிவந்த சீடர்களாலும் பூசை முதலியன நடைபெற்று வந்தன.

பழனிக் கோவில் அர்ச்சகர்களாக பார்ப்பனர்கள் வந்தது எப்படி?
கி.பி. 1623 முதல் 1659 வரை மதுரையினை திருமலை நாயக்கர் என்பான் ஆட்சி செய்து வந்தான். பொதுவாகவே நாயக்க மன்னர்கள் அனைவரும் பார்ப்பனர்களின் அடிமைகளாகவும், பார்ப்பனர்களின் ஆதிக்கத்திற்கும், ஏற்றத்திற்கும் அவர்களின் ஸநாதன தர்மத்திற்கும் ஆதரவு காட்டியவர்களாகவுமே இருந்து வந்தார்கள். திருமலை நாயக்கனைப்பற்றிச் சொல்லவே வேண்டியதில்லை… இவனது ஆட்சியில் பார்ப்பனர்கள் சகல துறைகளிலும் கொடி கட்டிப் பறக்கும் ஆதிக்கம் உச்சக்கட்டமாகவே இருந்தது. திருமலை நாயக்கனுடைய ஆட்சியில் ராமப்பய்யன் என்னும் பார்ப்பனன் தள வாய் ஆக (படைத்தலைவனாக) இருந்தான். இவன் வருணாசிரமத்தினைப் பரப்புவதில் கண்ணும் கருத்துமாக இருந்தவன்.
அவன் ஒரு சமயம் பழனி கோவிலுக்கு வந்தான்.

பழனி ஆண்டவனை வழிபட விரும்பினான். ஆனால், பழனி ஆண்டவன் கோவிலில் பூசை செய்பவர்கள் பார்ப்பனர் அல்லர். புலிப்பாணி பாத்திர சுவாமிகள் என்னும் பார்ப்பனரல்லாத பண்டாரமே பூசை செய்து வருவதைக் கண்டு சினந்தான். பாளையக்காரர்களை அழைத்து வினவினான். பரிகாரம் தேடத் துடித்தான். ‘‘பிராமணனாகிய நான், சூத்திர மரபில் வந்த புலிப்பாணி சாமியார் கையிலா தீர்த்தப் பிரசாதம் வாங்குவது? கூடாது, கூடவே கூடாது. எனவே, நீங்கள் அந்தணனாகிய யான் தீர்த்தப் பிரசாதம் வாங்கிக் கொண்டு பழனியாண்டவரை வணங்கி வழிபட ஆவன செய்தல் வேண்டும். அதற்கு வழிவகை செய்யுங்கள்’’ என்று கர்ச்சித்தான்.

போகர் காலத்தில் இருந்து அவர் வழிவழியாக பூசை செய்து கொண்டு வரும் மரபில் வந்தவர் புலிப்பாணி பாத்திர சாமியார் என்ற போதிலும், நீங்கள் புலிப்பாணியாரிடம் சென்று அவரைப் பழனியாண்டவருக்குப் பூசை செய்யும் உரிமையினை விட்டுக் கொடுக்கவேண்டும் என்று வற்புறுத்தி சம்மதிக்கச் செய்யுங்கள் என்று கூறினான்.
பாளையக்காரர்கள் சேனைத் தலைவனின் ஆணைக்குக் கட்டுப்பட்டவர்கள் ஆயிற்றே! அவர்கள் புலிப்பாணியாரை மிரட்டி, கோவில் பூசை செய்யும் உரிமையினை விட்டுக் கொடுக்கச் செய்தனர். சாமியாரும், அரசு கோபத்திற்கும், தண்டனைக்கும் பயந்து வேறு வழியின்றி விட்டுக் கொடுத்துவிட்டார். ராமப்பய்யன் உடனே பாளையக்காரரை அழைத்து கொங்குநாட்டில் இருந்து பார்ப்பன அர்ச்சகர்கள் அய்ந்து பேரை அழைத்து வரச் செய்தான். அப்படி அழைத்து வரப்பட்டவர்கள் கொடுமுடி சரஸ்வதி அய்யன், மரதூர் தம்பாவய்யன், நாட்டார் அய்யன் கோவில் சுப்பய்யன், கரூர் முத்தய்யன், கடம்பர் கோவில் அகிலாண்டய்யன் ஆகியவர்கள் ஆவர்.

ராமப்பய்யன் மேற்கூறிய அய்வரில் கொடுமுடி சரஸ்வதி அய்யனை கோவிலுக்குக் குருக்களாகவும், ஏனைய நால்வரையும் பூசைப் பரிகாரம் நம்பி மார்களாகவும் (பூசை செய்யும்போது குருக்களுக்கு உதவியாக இருப்பவர்கள்) நியமனம் செய்தான்.’’
(ஆதாரம்: ‘‘பழனித்தல வரலாறு‘‘ – ஜே.எம்.சோமசுந்தரம் பிள்ளை பி.ஏ., பி.எல்., அவர்களால் எழுதப்பட்டு, பழனிக் கோவில் தேவஸ்தானத்தால் 1944 இல் பதிக்கப்பட்ட நூலிலிருந்து)

பழனி கோவிலில் மாற்றம் தொடங்கட்டும்!
இந்த உண்மை வரலாற்றின் அடிப்படையில், ‘‘அனைத்து முத்தமிழ் முருகன் மாநாடு’’ நடத்தப்பட்டுள்ள இந்தத் தருணத்தில், பழனி முருகன் கோவிலில் அர்ச்சகர் நியமனம் செய்யப்படுவது பொருத்தமானதாகும். அதிலும் தற்போது மிஞ்சியது ஏமாற்றமே!
இந்து அறநிலையத் துறை அமைச்சர் மாண்புமிகு திரு.பி.கே.சேகர்பாபு, சிறந்த செயல்வீரர் என்பதால், செயல்பாபு என்றே நம் முதலமைச்சர் பாராட்டினார்.
அதைவிட இப்போது ஒன்றைச் சுட்டிக்காட்டுவதும் அவசியமாகும்.
‘‘கோவில் துறையைப் பாதுகாக்க அவரிடம் பொறுப்பை ஒப்படைத்தேன். அவர் இப்போது கோவிலிலேயே குடியிருக்கிறார்! என்று கூறியதன்மூலம், அவர் தனது துறைப் பணிகளில் தேவையான ஆர்வம் தாண்டி செய்கிறார். over enthusiastic ஆக இருக்கவேண்டாம் – கூடாது – இது ‘இடிப்பாரை’ – உள்நோக்கமின்றி!
முக்கியமாக அவரைப் பாராட்ட – அனைத்து ஜாதியினரும் அர்ச்சகர் நியமன உச்சநீதிமன்றத் தடை இன்னும் நீங்காது தொடரும் நிலை மாறவேண்டும்.
அதற்குரிய சட்ட நடவடிக்கைகள் – நியமனங்கள், புதிய மாணவர் சேர்க்கைகள் போன்ற பணிகளில் அவர் தீவிரம் காட்டவேண்டும் என்று சொல்வது நமது உரிமையாகும்.

கி.வீரமணி
தலைவர்
திராவிடர் கழகம்

சென்னை
27.8.2024

பகுத்தறிவுத் துறையில் பெரியார் செய்த புரட்சியை சமயத் துறையில் செய்தவர் குன்றக்குடி அடிகளார்!

 

விடுதலை நாளேடு

Published September 1, 2024

குன்றக்குடி அடிகளார் நூற்றாண்டு விழாவில் கழகத் தலைவர் எழுச்சியுரை!

காரைக்குடி, செப்.1 தவத்திரு குன்றக்குடி அடிகளார் நூற்றாண்டு விழாவில் கழகத் தலைவர் ஆசிரியர், தவத்திரு குன்றக்குடி பொன்னம்பல அடிகளார், கூட்டுறவுத் துறை அமைச்சர் கே.ஆர்.பெரியகருப்பன் உள்ளிட்டோர் கலந்து கொண்டு உரையாற்றினர்.

காரைக்குடி மாவட்ட திராவிடர் கழகம் சார்பில் தவத்திரு குன்றக்குடி அடிகளார் நூற்றாண்டு விழா காரைக்குடியில் உள்ள கண்ணதாசன் மணிமண்டபத்தில் 31.08.2024 அன்று மாலை 6 மணியளவில் சிறப்பாக நடைபெற்றது. திராவிடர் கழகத்தின் காரைக்குடி மாவட்டக் காப்பாளர் சாமி திராவிடமணி தலைமையில் காரைக்குடி மாவட்டத் தலைவர் ம.கு.வைகறை அனைவரையும் வரவேற்றுச் சிறப்பித்தார்.

சாமி திராவிடமணி தனது தலைமை உரையில், காரைக்குடியில் திராவிடர் கழகம் சார்பில் நடைபெற்ற நிகழ்ச்சியில் அடிகளார் கலந்துகொண்ட வரலாற்று முக்கியத்துவம் வாய்ந்த நிகழ்வுகளை தரவுகளுடன் பட்டியல் இட்டார். நிகழ்ச்சியில் ‘‘தவத்திரு குன்றக்குடி அடிகளார் அறிவுப்பெட்டகம்’’ எனும் நூல் வெளியிடப்பட்டது. தி.மு.க.மாநில இலக்கிய அணி புரவலர் மு.தென்னவன் வெளியிட்டு உரையாற்றினார். முதல் பிரதியை காரைக்குடி சட்டமன்ற உறுப்பினர் எஸ்.மாங்குடி பெற்றுக்கொண்டார். தொடர்ந்து காரைக்குடி துணை மேயர் நா.குணசேகரன் ஆகியோர் பெற்றுக் கொண்டனர். நூலைப் பெற்றுக்கொண்ட சட்டமன்ற உறுப்பினர் எஸ்.மாங்குடி, தவத்திரு குன்றக்குடி அடிகளாரை வாழ்த்தி உரையாற்றினார். தமிழ்நாடு அரசு கூட்டுறவுத்துறை அமைச்சர் கே.ஆர்.பெரியகருப்பன் தொடக்க உரை ஆற்றினார். நிறைவாக தமிழர் தலைவர் ஆசிரியர் கி.வீரமணி அவர்கள் உரையாற்றினார். அதைத் தொடர்ந்து தவத்திரு குன்றக்குடி பொன்னம்பல அடிகளார் ஏற்புரை வழங்கினார். காரைக்குடி மாவட்டச் செயலாளர் சி.செல்வமணி நன்றி கூறினார்.

காரைக்குடி மாவட்ட துணைத் தலைவர் கொ.மணி வண்ணன், மாவட்ட துணை செயலாளர் இ.ப.பழனிவேலு, சிவகங்கை மாவட்ட காப்பாளர் வழக்குரைஞர் ச.இன்பலாதன், நகர தலைவர் ந.செகதீசன், மாவட்ட இளைஞரணி அமைப்பாளர் தி.புரூனோ என்னாரெசு, மாவட்ட மாணவர் கழக அமைப்பாளர் பிரவீன் முத்துவேல், தி.தொ.ச. மாவட்ட தலைவர் சி.சூரியமூர்த்தி, கல்லல் ஒன்றிய தலைவர் கொரட்டி வீ.பாலு, தேவகோட்டை நகர தலைவர் வீர.முருகப்பன், தேவகோட்டை ஒன்றிய தலைவர் வாரியன்வயல் ஜோசப், தேவகோட்டை நகர ப.க. அமைப்பாளர் சிவ.தில்லைராசா ஆகியோர் முன்னிலை வகித்தனர்.

வெளியிடப்பட்ட புத்தகத்தை பார்வையாளர்கள் மிகுந்த ஆர்வத்துடன் மேடைக்குச் சென்று உரிய விலை கொடுத்து பெற்றுக் கொண்டனர். தமிழர் தலைவர் ஆசிரியர் அவர்கள், குன்றக்குடி மடத்தின் மறைந்த குன்றக்குடி அடிகளாரின் உதவியாளர் செல்வராஜ், பொன்னம்பல அடிகளாரின் உதவியாளர் சிங்காரவேலன் ஆகியோருக்கு சிறப்பு செய்தார். முன்னதாக பொன்னம்பல அடிகளாருக்கு ஆடையணிவித்து சிறப்பு செய்தார். பொன்னம்பல அடிகளாரும் மேடையில் வீற்றிருந்த ஆசிரியர் உள்ளிட்ட பெருமக்களுக்கு ஆடை யணிவித்து சிறப்பு செய்தார்.

நாம் காட்டும் நன்றித் திருவிழா!

தொடர்ந்து ஆசிரியர் பேசினார். அவர் தனது உரையில், ‘‘எங்களுக்கு வண்ணங்கள் முக்கியமல்ல, எண்ணங்கள் தான் முக்கியம்” என்று கருப்புச் சட்டை, காவி நிறமும் ஒன்றாக மேடையில் இருப்பதை சுட்டிக்காட்டித் தொடங்கினார். இந்த நிகழ்ச்சியின் முக்கியத்துவத்தைச் சொல்ல வந்த ஆசிரியர், ‘‘இது தவத்திரு குன்றக்குடி அடிகளாரின் நூற்றாண்டு விழா மட்டுமல்ல, அவருக்கு நாம் காட்டும் நன்றித் திருவிழா” என்றார். தந்தை பெரியாரைப் பற்றி, அறிவுப் புரட்சி செய்தவர், சிந்தனைப் புரட்சி செய்தவர், கருத்துப் புரட்சி செய்தவர் என்றும் இவைகள் மூலம் சமூகத்தில் ரத்தமின்றி, யுத்தமின்றி பெரும் மாற்றங்களை நிகழ்த்தியவர் என்றும் குறிப்பிட்டுவிட்டு, ‘‘இப்படி பகுத்தறிவுத் துறையில் தந்தை பெரியார் செய்த புரட்சியை சமயத்துறையில் செய்து காட்டியவர் தவத்திரு அடிகளார் அவர்கள்” என்று இரண்டு தத்துவ கர்த்தாக்களையும் மிகச்சரியாக ஒப்பீடு செய்தார். மொழிப் போராட்டத்தில் அடிகளாரின் பங்கைக் குறிப்பிட்டுப் பேசிய ஆசிரியர், ‘‘இந்த நூற்றாண்டு விழாவை என் வாழ்நாளில் ஒரு திருவிழா போல எண்ணுகிறேன்” என்றார் நன்றிப் பெருக்குடன்.

குன்றக்குடி மடம்
சமத்துவத்துக்கான மடம்!

மேலும் அவர், ‘‘குன்றக்குடி மடம் சமத்துவத்துக்கான மடம். வேறு எந்த மடத்திற்குச் சென்றாலும் இந்த சமத்து வத்தைக் காண இயலாது” என்றார். ‘‘குன்றக்குடி மடம் வெறும் வயிற்றுப் பசியை மட்டுமல்ல, அறிவுப் பசியையும் தீர்க்கும்” என்றார். தவத்திரு பொன்னம்பல அடிகளார் அருகில் இருந்து ஆசிரியர் கூற்றை மிகவும் கவனமாக கேட்டுக்கொண்டிருந்தார். தந்தை பெரியாரின் மானமும், அறிவும் மனிதர்க்கு அழகு என்ற கூற்றின் விரிவை விளக்கிய ஆசிரியர், அதன் தாக்கத்தால் தான் அடிகளார் தந்தை பெரியாரிடம் ஈர்க்கப்பட்டார் என்று கூறினார். 1966 இல் சென்னையில் நடைபெற்ற மாநாட்டில் கலந்து கொண்ட அடிகளாரை பெரியார், தவத்திரு குன்றக்குடி சந்நிதானம் என்று குறிப்பிட்டதைச் சுட்டிக்காட்டி திராவிடர் இயக்கம் அடிகளாரை எப்படிப் பார்த்தது என்பதை விவரித்தார். அதைத் தொடர்ந்து இன்றைய சந்நிதானமும் அதே அளவுக்கு செயல்பட்டு வருவதை சேர்த்துச் சொன்னார்.

மண்டைக்காட்டில் ஜாதிக்கலவரம் நடந்தபோது களத்தில் நின்று போராடியவர் அடிகளார் என்றும், அங்கே ஒரு சிலர் மீன் விற்பனையைத் தடை செய்த போது, அதுவரை மீனை தொட்டறியாத அடிகளார் மீனை கையில் எடுத்து ஏலம் போட்டு விற்பனை செய்தவர் என்று அடிகளாரின் முழுப் பரிமாணத்தையும் இந்த ஒரு நிகழ்வின் மூலம் விளக்கினார். அதே போல், ‘‘தந்தை பெரியார் இறந்த பிறகு பெரியார் திடலுக்கு வந்த அடிகளார் தந்தை பெரியார் பயன்படுத்திய படுக்கையில் பெரியார் எழுதுவது போன்றிருக்கும் ஒரு படத்தின் முன் நின்று தேம்பித் தேம்பி அழுததை நேரில் பார்த்த சாட்சி நான்” என்று கூறி பெரியாருக்கும், அடிகளாருக்கும் இருந்த பிணைப்பை எடுத்துரைத்து, ‘‘அப்படிப்பட்ட புரட்சித் துறவிக்குதான் இங்கே நூற்றாண்டு விழா கொண்டாடுகிறோம்” என்று குறிப்பிட்டார். இறுதியாக ஆசிரியர், ”சொல்வதற்கு ஏராளமாக இருக்கிறது என்பதை நினைவூட்டி, தனக்கென வாழாமல் பிறருக்காக வாழ்ந்த அடிகளார் புகழ் ஓங்குக” என்று கூறி உரையை நிறைவு செய்தார்.

நிகழ்ச்சியில் கலந்துகொண்டு சிறப்பித்தவர்கள்

மேனாள் சட்டப்பேரவை உறுப்பினர் சுப.மதியரசன், தி.மு.க. மாவட்ட துணை செயலாளர் சேங்கை மாறன், புதுக்கோட்டை மாவட்ட தி.மு.கழக பொறுப்பாளர் த.சந்திர சேகரன், மாநில கழக ஒருங்கிணைப்பாளர் இரா.ஜெயக்குமார், வி.சி.க. மாவட்ட செயலாளர் இளைய கவுதமன், ம.தி.மு.க. மாநில சட்ட திட்டக்குழு உறுப்பினர் சிற்பி சேது.தியாகராசன், ஏ.அய்.டி.யூ.சி. மாநிலக்குழு உறுப்பினர் பழ.இராமச்சந்திரன், தலைமைக்கழக அமைப்பாளர் மதுரை வே.செல்வம், அழகப்பா பல்கலைக்கழக மேனாள் துணைவேந்தர் சொ.சுப்பையா, பொறியாளர் கரிகாலன், தொழில்நுட்பக் குழு ஒருங்கிணைப்பாளர் வி.சி.வில்வம், பேராசிரியர் ப.சுப்பிரமணியம், தாம்பரம் மாவட்ட தலைவர் முத்தையன், மாவட்ட செயலாளர் நாத்திகன், தாம்பரம் மோகன்ராஜ், சேத்பட் நாகராசன், திருவாரூர் மாவட்ட தலைவர் வீ.மோகன், திருவாரூர் சாமிநாதன், மாநில ப.க. துணைத் தலைவர் அ.சரவணன், மாநில ப.க. துணைப் பொதுச் செயலாளர் முனைவர் மு.சு.கண்மணி, அறந்தாங்கி மாவட்ட தலைவர் கைகாட்டி மாரிமுத்து, அறந்தாங்கி மாவட்ட செயலாளர் ஜெகதாப்பட்டினம் குமார், புதுக்கோட்டை மாவட்ட தலைவர் மு.அறிவொளி, புதுக்கோட்டை மாவட்ட செயலாளர் பெ.வீரப்பன், மதுரை மாவட்ட தலைவர் சுப.முருகானந்தம், மதுரை மாவட்ட செயலாளர் இரா.லீ.சுரேசு, மாநில ப.க. எழுத்தாளர் மன்ற செயலாளர் அ.முருகானந்தம், சென்னை தங்கமணி, தனலெட்சுமி, மரு.ச.மலர்க்கன்னி, ச.கைவல்யம், கை. கலாவதி உள்ளிட்டோர் கலந்து கொண்டனர்.
கழக சொற்பொழிவாளர் தி.என்னாரெசு பிராட்லா நிகழ்ச்சியை ஒருங்கிணைத்தார்.